“Kũmwenda Ngai Nĩ Kũũ”

1, 2. Nĩ kyaũ kĩkwĩkĩaa vinya ũmwende Yeova Ngai?

WE NŨMWENDETE Ngai? Ethĩwa nũmwĩyumĩsye Yeova, vate nzika ũsũngĩo waku kwa ĩkũlyo yĩu nĩ, “Ĩĩ,” na ũsu nĩwʼo ũsũngĩo ũla waĩle! Twoombiwe tũtonya kũmwenda Yeova. We nũtwendete na ũu nũtwĩkĩaa vinya o naitũ tũmwende. Mbivilia yaĩtye atĩĩ: “Ithyĩ nĩtwendanaa nĩkwĩthĩwa [Yeova] nĩwambie ũtwenda.”—1 Yoana 4:19.

² Yeova nĩwe watwendie mbee. Nĩwatũnengie nthĩ nzeo yĩthĩwe ũtũo witũ, na nũtwĩanĩasya mavata maitũ ma kĩ-mwĩĩ. (Mathayo 5:43-48) O na ĩngĩ, Yeova nũtwĩanĩasya mavata maitũ ma kĩ-veva. Kwa ngelekanyʼo, nũtũnengete Ndeto yake Mbivilia. O na nũtũthoketye tũmũvoyae twĩ na mũĩkĩĩo kana nũtwĩthukĩĩasya, na kũtũnenga veva wake mũtheu ũtũtetheesye. (Savuli 65:2; Luka 11:13) Ĩndĩ ũndũ ũla wa vata vyũ nĩ kana, nĩwatũmie Mwana wake mwendwa ethĩwe Mwovosya witũ nĩ kana atwovosye kuma naĩnĩ na kĩkwʼũnĩ. Ũsu nĩ wendo mwingĩ ta kĩ Yeova ũtwonetye!—Soma Yoana 3:16; Alomi 5:8.

3. (a) Twaĩle kwĩka ata nĩ kana twĩkale wendonĩ wa Ngai? (b) Nĩ ĩkũlyo yĩva ya vata twaĩle kwĩkũlya, na nĩ va tũtonya kũkwata ũsũngĩo wayo?

³ Yeova endaa wendo wake ũtũune tene na tene. Kwoou, nĩ ĩũlũ witũ kũtwʼa ethĩwa wendo ũsu ũkatũuna kana ndũkatũuna. Ndeto ya Ngai ĩtwĩkĩaa vinya ĩla ĩkwasya, “Ĩyĩkalyei ene wendonĩ wa Ngai . . . kũvika thayũ ũtathela.” (Yuta 21) Ndeto ii, “ĩyĩkalyei ene,” syonanasya kana nĩtwaĩle kwosa ĩtambya yĩkwonanyʼa nĩtũkwenda kwĩkala wendonĩ ũsu. Kwoou, nĩtwaĩle kwĩkũlya ĩkũlyo yĩĩ ya vata, ‘Ndonya kwonanyʼa ata kana nĩnĩmwendete Ngai?’ Ũsũngĩo wa ĩkũlyo yĩu ũkwatĩkanaa ndetonĩ ii mũtũmwa Yoana watongoewʼe nĩ veva wa Ngai kũiandĩka: “Kũmwenda Ngai nĩ kũũ, tũkwatae mĩao yake: na mĩao yake ti mĩito.” (1 Yoana 5:3) Nĩtwaĩle kũkunĩkĩla kwa ũliku kĩla kyonanawʼa nĩ ndeto isu, kĩtumi nũndũ nĩtũkwenda kũmwonyʼa Ngai ũndũ tũmwendete.

“KŨMWENDA NGAI NĨ KŨŨ”

4, 5. Elesya ũndũ wambĩĩie kũmwenda Yeova kuma ngoonĩ.

⁴ Ĩla mũtũmwa Yoana waandĩkie ndeto “Kũmwenda Ngai,” we asũanĩaa kyaũ? Asũanĩaa ĩũlũ wa ũndũ kĩla ũmwe witũ waĩle kwĩthĩwa amwendete Ngai kuma ngoonĩ. We no ũlilikane ĩla wambĩĩie kũmwenda Yeova kuma ngoonĩ?

⁵ Kwalilikana o vanini ĩvinda ya mbee ĩla weemanyĩisye ũla wʼo ĩũlũ wa Yeova na ieleelo syake, na wambĩĩa kwĩthĩwa na mũĩkĩĩo. Nĩwamanyie kana, o na kau wasyaiwe wĩ na naĩ na ũte na mũamba na Ngai, Yeova kwĩsĩla Klĩsto nĩwakũvingũĩe nzĩa nĩ kana wĩthĩwe ũte na naĩ o tondũ Atamu wailyĩ atanavĩtya, na ĩndĩ ũikwata thayũ ũtathela. (Mathayo 20:28; Alomi 5:12, 18) Nĩwambĩĩe kũelewa kana Yeova nĩweeyumisye mũno vyũ ĩla wamũtũmie Mwana wake mwendwa akwʼe kwondũ waku. Ũndũ ũsu nĩwaũkiitie ngoo, na wambĩĩa kwĩwʼa ũimwenda Ngai ũsu wakwonisye wendo wingĩvĩte ũu.—Soma 1 Yoana 4:9, 10.

6. Wendo wa wʼo wonanawʼa ata, na kũmwenda Ngai kwatumie ũtwʼa kwĩka ata?

⁶ Maũndũ asu mawetwa maĩ o mwambĩlĩlyo wa kwĩthĩwa na wendo wa wʼo kwa Yeova. Wendo ti o ũndũ ũkwĩwʼa ngoonĩ, na ndwonanawʼa kwa ndeto syoka. Mũndũ o kwasya, “Nĩnĩmwendete Yeova,” kũitoetye. O ũndũ ũmwe na mũĩkĩĩo, wendo wa wʼo wonekaa kwĩsĩla maũndũ ala ũtũsukumaa kwĩka. (Yakovo 2:26) Twonanasya wendo witũ kwa kwĩka maũndũ ala mendeeasya mũndũ ũla tũmwendete. Kwoou, ĩla wendo waku kwa Yeova wameisye mĩi ngoonĩ yaku, nĩwendie kwĩkala mwĩkalĩle ũũmwendeesya Ĩthe waku wa ĩtunĩ. We wĩ mũvatise ta ũmwe wa Ngũsĩ sya Yeova? Ethĩwa wĩ mũvatise, weekie ũtwi ũsu wa vata vyũ thayũnĩ waku nũndũ wa kũmwenda Yeova kuma ngoonĩ, na kwenda kwĩthĩwa ũlũmanĩtye nake. Kwoou, weeyumya wĩke kwenda kwake na wavatiswa nĩ kenda wonanyʼe kwĩyumya kũu. (Soma Alomi 14:7, 8.) Ĩndĩ, ve ũndũ ũngĩ waĩle kwĩka nĩ kenda wonanyʼe kana nĩwĩyumĩtye kwĩka kwenda kwa Ngai, nawʼo ũwetetwe ndetonĩ ila iatĩĩe sya mũtũmwa Yoana.

“TŨKWATAE MĨAO YAKE”

7. Mĩao ĩmwe ya Ngai nĩ yĩva, na mũndũ aĩle kwĩka ata nĩ kana onanyʼe nũmĩkwataa?

⁷ Ĩla Yoana waeleasya ũndũ kũmwenda Ngai kwonanasya, aisye ũũ: “Tũkwatae mĩao yake.” Mĩao ya Ngai nĩ myaũ? Kwĩsĩla Ndeto yake, Mbivilia, Yeova nũtũnengete mĩao mĩna ĩwetete maũndũ ũtheinĩ. Kwa ngelekanyʼo, nũvatanĩte ũnywi, ũlaalai, ũthaithi wa mĩvwʼanano, ũngʼei, na ũvũngũ. (1 Akolintho 5:11; 6:18; 10:14; Aeveso 4:28; Akolosai 3:9) Kũkwata mĩao ya Ngai kwendaa mũndũ ekale kwosana na myolooto mĩlũngalu ya Mbivilia.

8, 9. Tũtonya ata kũmanya kwenda kwa Yeova o na maũndũnĩ ala vate mwĩao wa Mbivilia ũmawetete ũtheinĩ? Nengane ngelekanyʼo.

⁸ Kũmwendeesya Yeova ti o kũkwata mĩao yake ĩla ĩwetete maũndũ ũtheinĩ. Yeova ndatũvinyĩĩaa kwa kũtwova na mĩao ĩkonetye kĩla ũndũ twaĩle kwĩka thayũnĩ witũ. Kwoou nĩtũtonya kũkomana na maũndũ maingĩ ala vate mĩao ya Mbivilia ĩmawetete ũtheinĩ. Veethĩwa vailyĩ ũu, tũkamanya ata kĩla kĩtonya kũmwendeesya Yeova? Mbivilia nĩyonanĩtye nesa mawoni make. Tweemanyĩsya Mbivilia, nĩtũmanyaa kĩla Yeova wendete na kĩla ũmenete. (Soma Savuli 97:10; Nthimo 6:16-19) O na nĩtũmanyaa mawoni na meko ala wendete. O ũndũ twaendeea kwĩmanyĩsya nzĩa sya Yeova na kwĩmanyĩsya ũndũ we ũilyĩ, nowʼo twĩthĩawa tũtonya kwĩtĩkĩla mawoni make matũtongoesye nthĩnĩ wa motwi na meko maitũ. Kwoou, mavinda maingĩ nĩtũtonya kũmanya “kwenda kwa Mwĩaĩi ũndũ kũilyĩ,” o na maũndũnĩ ala vate mwĩao wa Mbivilia ũmawetete ũtheinĩ.—Aeveso 5:17.

⁹ Kwa ngelekanyʼo, Mbivilia ndĩ na mwĩao ũwetete ũtheinĩ kana nĩ ũthũku kwĩloela sinema kana ivĩndĩ sya televiseni syĩkwonanyʼa maũndũ ma ũngʼendu kana ũlaalai. Ĩndĩ ti lasima vethĩwe na mwĩao ũvatanĩte ũtheinĩ kwĩloela maũndũ ta asu. Nĩtwĩsĩ ũndũ Yeova wonaa maũndũ asu. Ndeto yake ĩwetete nesa atĩĩ: “Ngoo [ya Yeova] nĩmenete ũla . . . wendete ũngʼendu.” (Savuli 11:5) O na ĩngĩ nĩyaĩtye atĩĩ: “Mathaaa na ilaalai Ngai akamasilĩla.” (Aevelania 13:4) Twasũanĩa ĩũlũ wa ndeto isu syaveveeiwe nĩ Ngai, nĩtũtonya kũelewa nesa kwenda kwake. Na ũu no ũtume tũleana vyũ na maũndũ ma kwĩtanĩthya ta kwĩloela visa nthũku syĩkwonanyʼa imanyĩo ila Ngai witũ ũmenete. Nĩtwĩsĩ kana Yeova nũtanaa kwona tũyĩvathana na maũndũ mavuku ala nthĩ ĩno yonaa o ta maũndũ ma kwĩtanĩthya, na mataete mũisyo.a

10, 11. Nĩkĩ tũmwĩwʼaa Yeova, na wĩwi witũ waĩle kwĩthĩwa ũilyĩ ata?

¹⁰ Kĩtumi kĩla kĩnene kya kũkwata mĩao ya Ngai nĩ kyaũ? Nĩkĩ twendaa kwĩkala kwosana na woni wa Ngai kĩla mũthenya? Tũyĩkaa ũu tũikĩa kũsilĩlwa kana kũkwatwa nĩ maũndũ mathũku ala makwataa andũ ala matekaa kwenda kwa Ngai. (Akalatia 6:7) Vandũ va ũu, twonaa kũmwĩwʼa Yeova ne ũndũ ũtũnengae mwanya mũseo mũno wa kũmwonyʼa nĩtũmwendete. O tondũ kana kethĩawa na mea ma kwendeesya ĩthe wako, nowʼo o naitũ twendaa kũmwendeesya Yeova. (Savuli 5:12) Yeova nĩ Ĩthe witũ, na nĩtũmwendete. Vaiĩ ũndũ ũngĩ ũtũeteae ũtanu mwingĩ, kana ũkatuma twĩwʼa twĩ eanĩe, ta kũmanya kana twĩkalaa kwa nzĩa ĩtonya kũtuma ‘twona ũseo wa Yeova.’—Nthimo 12:2.

¹¹ Kwoou, tũimwĩwʼaa Yeova kwa kũthingʼĩĩwʼa, o na tũinyuvaa kũmwĩwʼa nthĩnĩ wa maũndũ o amwe, kana kwenda ambe kũtwĩanĩĩsya maũndũ mana nĩ kana tũmwĩwʼe.b O na ĩngĩ, tũinyuvaa nĩ mĩao yĩva twaĩlĩte kũkwata, o na tũimwĩwʼaa ĩla maũndũ maseo kana o ĩla ne ũndũ wĩ laisi kwĩka ũu. Vandũ va ũu, ithyĩ ‘nĩtũmwĩwʼaa kuma ngoonĩ.’ (Alomi 6:17) Twĩthĩawa na woni ta wa mũandĩki ũmwe wa Savuli ũla waisye atĩĩ: “Ngeetanĩthasya mĩaonĩ yaku, ĩla nendete.” (Savuli 119:47) Ĩĩ, nĩtwendete kũmwĩwʼa Yeova. Nĩtwĩsĩ kana nĩwe twaĩlĩte kũmwĩwʼa na nĩwendaa tũmwĩwʼe vyũ, tũte kwenda ambe kũtwĩanĩĩsya maũndũ mana. (Kũtũngĩlĩlwa Kwa Mĩao 12:32) Twĩenda Yeova ethĩwe atonya kũweta ĩũlũ witũ ũndũ Ndeto yake Mbivilia ĩwetete ĩũlũ wa Noa. Ĩielesya ĩũlũ wa mũtumĩa ũsu wa ĩvinda ya tene mũĩkĩĩku, ũla woonanisye nũmwendete Ngai kwa kwĩthĩwa e mwĩwi myaka mingĩ, Ndeto ya Ngai yaĩtye ũũ: “Noa eeka ũu; kwĩanana na wʼonthe ũla Ngai wamwĩaĩe, nĩwʼo wekie.”—Mwambĩlĩlyo 6:22.

12. Wĩwi witũ ũtanĩthasya ngoo ya Yeova ĩndĩĩ?

¹² Yeova ewʼaa ata ĩla twamwĩwʼa kuma ngoonĩ? Ndeto yake yaasya tweeka ũu ‘nĩtũtanĩthasya ngoo yake.’ (Nthimo 27:11) Yo nĩvatonyeka wĩwi witũ ũkamũtanĩthya Yeova, ũla nĩwe Mwĩaĩi Mũsumbĩ Mũnene wa nthĩ yonthe? Ĩĩ nũmũtanĩthasya, na e na kĩtumi kĩseo kya kũtana! Yeova atũmbie twĩ na ũthasyo wa kũnyuva. Ũu wonanasya nĩtũtonya kũnyuva kũmwĩwʼa kana kũlea kũmwĩwʼa. (Kũtũngĩlĩlwa Kwa Mĩao 30:15, 16, 19, 20) Ĩla twanyuva kwa ngenda kũmwĩwʼa na kwĩka ũu nũndũ nĩtũmwendete, nĩtũmũtanĩthasya mũno Ĩthe witũ wa ĩtunĩ. (Nthimo 11:20) O na ĩngĩ, twĩthĩawa twanyuva nzĩa ĩla nzeo vyũ ya thayũ.

“MĨAO YAKE TI MĨITO”

13, 14. Nĩkĩ tũtonya kwasya kana ‘mĩao ya Ngai ti mĩito,’ na tũtonya kũelekanyʼa ũndũ ũsu na kyaũ?

¹³ Nthĩnĩ wa ĩandĩko ya 1 Yoana 5:3, mũtũmwa Yoana atũtavĩtye ndeto itwĩkĩaa vinya mũno ĩũlũ wa mĩao ya Yeova. Aĩtye atĩĩ: “Mĩao yake ti mĩito.” Na nthĩnĩ wa Mbivilia ĩngĩ, ĩandĩko o yĩu yaĩtye ũũ: “Mĩao yake . . . ndĩ vinya kũatĩĩkĩka.” (The New Testament in Kikamba Language) Kũatĩĩa mĩao ya Yeova ti ũndũ wĩ vinya, na mĩao ĩsu ndĩtũvinyĩaa.c Ĩndĩ o na kau twĩ ene naĩ, no tũkwate mĩao ĩsu.

¹⁴ Ngelekanyʼo ĩĩ ĩatĩĩe nĩtonya kũtũtetheesya kũelewa ũndũ ũsu. Kwasũanĩa wĩ na mũnyanyau ũkwenda ũmũtetheesye kũthama. E na masandũkũ maingĩ meenda ũkuwa. Amwe nĩ mavũthũ na no makuwe nĩ mũndũ ũmwe, ĩndĩ angĩ nĩ maito na matonya kũkuwa nĩ andũ elĩ. Na ĩndĩ mũnyanyau ainyuva masandũkũ ala ũkwenda ũmũtetheesye kũkua. We no akwĩe ũkue masandũkũ maito mũno o esĩ ndũvikya? Aiee. Ndenda wĩyĩũmĩsye kwa kũeka ũmakue wĩ weka. O ta ũu, Ngai witũ wĩ wendo na tei ndatwĩa tũkwate mĩao o esĩ nĩ mĩito mũno kwitũ kũmĩatĩĩa. (Kũtũngĩlĩlwa Kwa Mĩao 30:11-14) Ndesa nongi kũtwĩa tũkue mũio mũito tũtavikya. Yeova nĩwĩsĩ mawonzu maitũ nũndũ “nĩwĩsĩ wũmbe witũ; [na] nũlilikanaa kana twĩ kĩtoo.”—Savuli 103:14.

15. Nĩkĩ tũtonya kwĩthĩwa na mũĩkĩĩo kana mĩao ya Yeova nĩtũunaa?

¹⁵ Mĩao ya Yeova ti mĩito o na vanini; atũnengete ĩtũune. (Soma Isaia 48:17.) Kĩu nĩkyo kĩtumi Mose watavisye Aisilaeli atĩĩ: ‘Yeova atwĩaĩe twĩke myamũlo ĩsu yonthe, na kũkĩa Yeova Ngai waitũ nĩ kana twĩthĩwe na ũseo mavinda onthe, na nĩ kana atũsũvĩe twĩthĩwe thayũ, o ũndũ kũilyĩ ũmũnthĩ.’ (Kũtũngĩlĩlwa Kwa Mĩao 6:24) O naitũ no twĩthĩwe na mũĩkĩĩo kana Yeova atũnengete mĩao yake nũndũ endaa tũunĩke tene na tene. Vate nzika, ndesa kũtũnenga mĩao ĩtonya kũtũũmĩsya. Yeova nĩ Ngai wĩ ũĩ ũte maela. (Alomi 11:33) Kwoou, nĩwĩsĩ kĩla kĩtonya kũtũtethya, na nĩwe ngelekanyʼo ĩla nzeo vyũ ya wendo. (1 Yoana 4:8) Nũndũ Yeova nĩ wendo, nĩtwonaa wendo ũsu nthĩnĩ wa maũndũ onthe ala wĩkaa na ndeto ila ũneenaa. Wendo ũsu nĩwʼo mũsingi wa mĩao yonthe ĩla ũnengete athũkũmi make.

16. O na kau nthĩ ĩno nthũku yĩ na maũndũ matonya kũtwelelũkya, na mwĩĩ witũ wĩ na naĩ nĩwĩthĩawa na mawendi mataĩle, nĩkĩ no twĩthĩwe twĩ ewi?

¹⁶ Ũu ti kwasya kana kũmwĩwʼa Ngai nĩ ũndũ wĩ laisi. Nthĩ ĩno nthũku “ĩtwĩe nthĩnĩ wa ũla mũthũku,” na yĩ na maũndũ matonya kũtwelelũkya. Kwoou, no nginya tũleane namo. (1 Yoana 5:19) O na ĩngĩ, no nginya tũkitane na mwĩĩ witũ nũndũ ithyĩ twĩ ene naĩ, na ũu nũtumaa twĩwʼa tũyĩemwa nĩ kũatĩĩa mĩao ya Ngai. (Alomi 7:21-25) Ĩndĩ nũndũ nĩtũmwendete, nĩtũtataa kũkwata mĩao yake. Yeova nũathimaa andũ ala monanasya kana nĩmamwendete, na mekaa ũu kwa kũmwĩwʼa. Nũmanengae veva mũtheu asu “mamwĩwʼaa.” (Meko ma Atũmwa 5:32) Veva ũsu ũtumaa twĩthĩwa na ũsyao mũseo mũno, kana ndaĩa nzeo ila itũtetheeasya kwĩthĩwa twĩ ewi.—Akalatia 5:22, 23.

17, 18. (a) Twĩkunĩkĩla maũndũ meva ĩvukunĩ yĩĩ, na ĩla tũkwĩka ũu, twaĩle kũlilikana kyaũ? (b) Kĩlungu kĩla kĩatĩĩe kĩneeneete kyaũ?

¹⁷ Nthĩnĩ wa ĩvuku yĩĩ nĩtũũkunĩkĩla mĩao ya Yeova na myolooto yake ĩla ĩkonetye mwĩkalĩle. O na ĩngĩ, nĩtũũkunĩkĩla maũndũ angĩ maingĩ makonetye kwenda kwake. Ĩla tũkwĩka ũu, nĩtwaĩle kũlilikana maũndũ mana ma vata. Tũlilikanei kana Yeova ndatũlasimĩthasya kũkwata mĩao na myolooto yake; endaa tũmwĩwʼe kwa ngenda na kuma ngoonĩ. Tũikolwe kana Yeova endaa twĩkale kwa nzĩa ĩla ĩtonya kũtũetee moathimo maingĩ yu, na thayũ ũtathela ĩvinda yũkĩte. Ekai twonanyʼe ũndũ tũmwendete Yeova kwa kũmwĩwʼa na ngoo yonthe.

¹⁸ Yeova Ngai wĩ wendo nũtũnengete wasya wa ngoo nĩ kana twĩthĩwe tũtonya kũvathũkanyʼa ũseo na ũthũku. Ĩndĩ, nĩ kana wasya witũ wa ngoo ũtonye kũtũtongoesya nesa, wasya ũsu nĩwaĩle kũmanyĩwʼa. Kĩlungu kĩla kĩatĩĩe nĩkĩneeneete ũndũ ũsu.