Salmu
Pa diretor di múzika. Pa neilote.* Un múzika di Davidi.
5 Ó Jeová, obi nhas palavra.
Presta atenson óras ki N ta jeme.
2 Ó nha Rei i nha Deus, presta atenson óras ki N ta pidi-u ajuda,
Pamodi é pa bo ki N ta faze orason.
3 Ó Jeová, di palmanhan bu ta obi nha vós.
Di palmanhan N ta konta-u nhas preokupason i N ta fika ta spera ku gana pa bu responde-m.
4 Abo é ka un Deus ki gosta di maldadi.
Ningen ki é mau ka pode kontinua djuntu ku bo.
5 Ningen ki é orgulhozu ka pode fika di pé na bu frenti.
Bu ta ôdia tudu kes algen ki ta faze kuzas mariadu.
6 Bu ta ben distrui kes algen ki ta konta mintira.
Jeová ta ôdia kes algen violéntu* i ki ta ingana algen.
7 Má N ta ba entra na bu kaza pamodi bu grandi amor lial.
N ta ba inbaxa ku grandi ruspetu pa bo na direson di bu ténplu* santu.
8 Ó Jeová, gia-m na bu kaminhu di justisa pamodi nhas inimigu.
Djuda-m anda na bu kaminhu sen tropesa.
9 Pamodi ka ta da pa kunfia na nada ki es ta fla,
Déntu di es ten sô maldadi.
Ses garganta é un sipultura abértu.
Ses língua ta uza palavras bunitu pa ingana algen.*
10 Má Deus ta ben kondena-s.
É ses própi armadilha ki ta ben pô-s ta kai.
Kóre ku es pamodi ses pekadu é txeu,
Dja ki es rabela kóntra bo.
11 Má tudu kes algen ki ta djobe proteson na bo ta ser filís.
Sénpri es ta ben grita di alegria.
Bu ta proteje-s,
I kes ki ta ama bu nómi ta ben fika kontenti pamodi bo.
12 Pamodi bu ta ben abênsua kes algen justu, ó Jeová.
Bu ta ben proteje kes ki bu sta kontenti ku el, sima ki é ku un skudu grandi.