Modi ki bu pode onra Jeová na dia di bu kazamentu?

1-2. Modi ki Jeová krê pa ser bu dia di kazamentu?

BU STA noivu? Si sin, bu sta di parabens. Talvês bo ku bu noiva ô noivu, nhos sta txeu okupadu ta faze planus pa nhos kazamentu. I Jeová krê pa nhos pasa sábi na dia di nhos kazamentu.a El krê pa nhos ten un futuru filís djuntu. — Pro. 5:18; Cân. 3:11.

² Jeová merese pa bu da-l ónra na dia di bu kazamentu. Pamodi ki nu pode fla kel-li? I modi ki bu pode faze kel-li? Enbóra kel studu li é prinsipalmenti pa kes kazal ki sta ta pripara pa ses kazamentu, kes prinsípiu ki nu sta ben pâpia di el pode djuda nos tudu da Jeová ónra si nu sta ba sisti un kazamentu ô si kel kazal pidi-nu un opinion sobri ses planu di kazamentu.

PAMODI KI BU KAZAMENTU DEBE DA JEOVÁ ÓNRA?

3. Kuzê ki un kazal debe pensa na el, óras ki es ta pripara pa ses kazamentu i pamodi?

³ Kes kazal ki ta sirbi Jeová i ki sta ta pripara pa ses kazamentu debe faze-l di akordu ku kes prinsípiu di Jeová ki sta na Bíblia. Pamodi? Pamodi é Jeová ki kria kazamentu. É el ki faze kel primeru kazamentu kantu el kaza Adon ku Eva. (Jén. 1:28; 2:24) Dja ki é Jeová ki kria kazamentu, un kazal debe djobe kuzê ki es debe faze pa es pode ten serteza ma ses kazamentu ta ba da Jeová ónra.

4. Ki otu razon ta poi un kazal ta da Jeová ónra na dia di ses kazamentu?

⁴ Ten un otu razon inportanti ki debe pô-u ta leba en kónta kuzê ki Jeová ta pensa di kes planu ki bu sta ta faze pa dia di bu kazamentu. El é bu Pai ki sta na séu i el é bu midjór amigu. (Ebr. 12:9) Di serteza bu krê kontinua ta ser se amigu. Bu ka krê pa nada kontise na kel dia ô na kalker otu dia ki pode magua bu amigu. (Sal. 25:14) Óras ki bu pensa dretu na tudu kuza ki Jeová dja faze i ki el ta ben faze pa bo, bu ka ta fika más disididu na da-l ónra na dia di bu kazamentu? — Sal. 116:12.

MODI KI BU PODE DA JEOVÁ ÓNRA?

5. Modi ki Bíblia pode djuda un kazal toma bons disizon sobri ses kazamentu?

⁵ Bíblia ka ten un lista di régra sobri modi ki sérvus di Jeová debe faze serimónia ô fésta di kazamentu. Pur isu, un kazal pode faze planu pa ses kazamentu di akordu ku ses situason, ses kultura ô kuzê ki es gosta. Má kes sérvu di Jeová debe sigi kes lei di govérnu sobri kazamentu. (Mat. 22:21) Ka ta inporta kuzê ki un kazal disidi faze na ses kazamentu, óras ki es ta sigi kes prinsípiu di Bíblia es ta onra Jeová i es ta dexa-l kontenti. Nton ki prinsípius di Bíblia es meste lenbra di el?

6. Di akordu ku Romanus 13:1, 2, pamodi ki é inportanti pa un kazal obi ku kes lei di govérnu sobri kazamentu?

⁶ Obi ku kes lei di govérnu. (Rom. 13:1, 2) Na maioria di país, kes govérnu ten leis sobri kazamentu ki un kazal ten ki obi ku es. Un kazal debe djobe ki lei ten na undi ki es ta vive. Si bu meste ajuda pa ten kes informason li bu pode pidi ajuda di ansions.b

7. Modi ki un okazion di kazamentu debe ser i kuzê ki pode djuda pa kel-li kontise?

⁷ Sforsa pa kel okazion di kazamentu da ónra pa Jeová. (1 Kor. 10:31, 32) Sforsa pa kel okazion mostra kes kualidadi bunitu di frutu di spritu santu di Deus envês di spritu di mundu. (Gál. 5:19-26) Dja ki di akordu ku Bíblia é kel noivu ki ta ba ser xéfi di família, nton é el ki é responsável pa garanti ma kel kazamentu ta ser un okazion ki ta da ónra pa Jeová i pa el ser un momentu filís. Kuzê ki pode djuda pa kel-li kontise? Óras ki ta fazedu un diskursu di kazamentu ku bazi na Bíblia, di un manera ki ta mostra ruspetu i amor, kel-li ta djuda tudu kenha ki sta ta obi kel diskursu intende ma kazamentu é un prezenti di Jeová. Tanbê el ta djuda kes algen ki sta ta sisti odja ma kel okazion é un momentu sériu. Pur isu, maioria di kazal ta skodje faze kel serimónia di kazamentu na un Salon di Reinu, si ta da. Si bu krê uza Salon di Reinu pa faze bu diskursu di kazamentu bu debe skrebe un karta pa ansions más rápidu ki bu ta pode.

8. Si nhos sta ta faze un fésta di kazamentu modi ki nhos pode ten serteza ma el ta da ónra pa Jeová? (Romanus 13:13)

⁸ Lé Romanus 13:13. Si nhos skodje faze un fésta di kazamentu, kuzê ki nhos pode faze pa el ka mostra spritu di mundu? Kel palavra gregu ki traduzidu pa “féstas diskontroladu” sta ta pâpia di okazions ki pesoas ta bebeba dimás i ki tinha múzika ti astanta di noti. (Odja nóta di studu na palavra “féstas diskontroladu” na Romanus 13:13.) Si nhos disidi sirbi bebida alkólika na nhos kazamentu, nhos pensa antis na kuzê ki nhos pode faze pa ningen ka bebe dimás.c Si ta ba ten múzika, nhos poi volumi di un manera ki ta dexa kes konvidadu pâpia ku kunpanheru sen meste grita. Skodje ku kuidadu kes tipu di múzika ki nhos sta ba poi i djobe kes létra di múzika asi pa es ka ofende ningen.

9. Kuzê ki un kazal debe lenbra sobri kes kuza pa divirti ki es ta ba faze na ses fésta di kazamentu?

⁹ Nhos konvidadu ta ba faze algun komentáriu duránti fésta? Nhos ta ba poi algun vídiu, fotu ô otus kuza pa divirti duránti nhos fésta? Kes kuza li pode poi dia di nhos kazamentu ta ser más spesial inda. Má nhos konfirma ma tudu kuza ki ta ba podu na nhos kazamentu ta inkoraja algen. (Flp. 4:8) Nhos pensa na kes pergunta li: ‘Kes kuza ta ba mostra ruspetu pa otus algen? Es ta ba mostra ruspetu pa kel kazamentu?’ Má más inportanti inda nhos pergunta: ‘Es ta ba da ónra pa Jeová?’ Enbóra pode ser bon pesoas konta algun kuza pa algen ri, ningen ka debe fla kuzas mariadu i indisenti sima kuzas sobri séksu. (Efé. 5:3) Si bus família i amigus ta ba fla kuzas duránti fésta di kazamentu ten serteza ma es ta intende ki tipu di kuzas ki es debe fla i ki kuzas ki es ka debe fla.

10. Pamodi ki un kazal ka debe txoma atenson pa ses kabésa óras ki es ta faze planu pa ses kazamentu? (1 Juan 2:15-17)

¹⁰ Ka nhos txoma atenson pa nhos kabésa. (Lé 1 Juan 2:15-17.) Jeová ta da valor pa ses sérvu óras ki es ta sforsa pa da-l ónra envês di txoma atenson pa ses kabésa. Pur isu, un sérvu di Jeová ki é umildi ka ta gasta txeu dinheru i nen el ka ta “izibi”. Modi ki faze un kazamentu sinplis ta djuda nhos? Odja izénplu di Mike, un irmon di Noruega, ki fla: “Nu ka faze dívida, pur isu nu konsigi kontinua pioneru. Nos kazamentu foi sinplis, má bunitu i sábi.” Tabita ki é un irman di Índia fla: “Nu ivita txeu stress. Dja ki nos kazamentu foi sinplis tevi ménus kuza pa nu faze planu i ménus kuza ki pode poba nos ka ta konkorda ku kunpanheru.”

11. Modi ki noivu ku noiva pode mostra ma es é modéstu na manera ki es ta bisti i konpo? (Odja imajens.)

¹¹ Dja nhos disidi kuzê ki nhos ta ba bisti na nhos kazamentu? Di serteza nhos krê sta bunitu. Ti na ténpu ki Bíblia skrebedu noivu ku noiva ta skodjeba ku kuidadu kuzê ki es ta bistiba. (Isa. 61:10) Kel ropa ki bu ta ba bisti na dia di bu kazamentu talvês é diferenti di kel ki bu ta bisti na otus okazion, má el debe ser modéstu tanbê. (1 Tim. 2:9) Ka bu dexa ropa ô modi ki bu krê konpo ser kel kuza más inportanti na bu kazamentu. — 1 Ped. 3:3, 4.

12. Pamodi ki un kazal debe nega kalker kustumu ki ka sta di akordu ku Bíblia?

¹² Nega kes kustumu ki ka sta di akordu ku Bíblia. (Apo. 18:4) Kazamentu di mundu oji txeu bês ta ten kustumus di relijion falsu, fitisaria i superstison. Jeová krê pa nu fika lonji di kuzas inpuru sima kes-li. (2 Kor. 6:14-17) Si ten alguns kustumu i tradison na lugar undi ki bu ta vive i bu ka sabe si Jeová ta seta-s ô nau, faze piskiza sobri es pa atxa informasons i prinsípius di Bíblia ki ta djuda-u disidi si bu ta faze-s na bu kazamentu.

13. Modi ki un kazal pode imita Jeová óras ki es ta resebe prezenti?

¹³ Na undi ki bu ta vive kes konvidadu ta kustuma oferese un prezenti pa kes algen ki sta ta kaza? Un algen ki é riku pode da un prezenti diferenti di un algen ki ka ten txeu dinheru. Sérvus di Jeová é insentivadu pa es gosta di da i es ta xinti filís óras ki es ta faze kel-li. (Pro. 11:25; Atus 20:35) Má nu ka krê poi nos konvidadu ta xinti ma es é obrigadu na da-nu prezenti. Nen nu ka krê pa es xinti ma nu ka ta ba fika kontenti si es da-nu un prezenti sinplis. Nu ta imita Jeová óras ki nu ta mostra gratidon pa kalker kuza ki otus algen da-nu ka pamodi es é obrigadu, má pamodi es krê. — 2 Kor. 9:7.

IVITA I REZOLVE PRUBLÉMAS

14. Ki prublémas alguns kazal ta pasa pa el?

¹⁴ Talvês nhos ta lida ku alguns prubléma óras ki nhos ta faze planu pa faze un kazamentu ki ta da ónra pa Jeová. Pur izénplu, pode ser difísil faze un kazamentu sinplis. Charlie, ki ta vive na Ilhas Salumon, fla: “É txeu difísil disidi kenha ki bu ta konvida pa fésta. Nu ten txeu amigu i na nos kultura tudu algen ta spera ma es ta konvidadu!” Tabita, ki dja nu papiaba di el antis, fla: “Undi ki N ta vive pesoas ta kustuma faze féstas grandi di kazamentu. Leba ténpu pa nos pai ku mai seta nos disizon di konvida sô uns 100 algen.” Sara di Índia fla: “Alguns algen ta konsentra na mostra kantu dinheru ki es ten i na kuzê ki otus algen ta pensa di es. Nhas primu faze un fésta grandi di kazamentu, pur isu, N ta xintiba preson pa N faze un más grandi inda. Kuzê ki pode djuda-u lida ku kes prubléma li i ku otus prubléma?

15. Pamodi ki nu debe ora txeu sobri nos planus di kazamentu?

¹⁵ Nhos ora txeu sobri nhos planu di kazamentu. Nhos pode fla Jeová na orason sobri kalker disizon ki nhos meste toma i sobri modi ki nhos sta ta xinti. (Flp. 4:6, 7 i nóta di studu na “tudu kuza”.) Nhos pode pidi-l pa el djuda nhos toma bons disizon, mante kalmu óras ki nhos ta xinti preokupadu dimás i mostra koraji óras ki meste. (1 Ped. 5:7) Nhos kunfiansa na Jeová ta fika más fórti óras ki nhos odja-l ta responde nhos orason. Tabita, ki dja nu papiaba di el antis, fla: “Mi ku nha noivu nu staba preokupadu si nu ta ba tinha dizentendimentu ku kunpanheru i ku nos família. Pur isu, tudu bês ki nu ta papiaba sobri planus di kazamentu nu ta kumesaba ku un orason. Nu xinti ajuda di Jeová i nu konsigi ten pas ku kunpanheru i ku nos família.”

16-17. Pamodi ki pâpia di manera klaru pode djuda un kazal óras ki es sta ta faze planu pa ses kazamentu?

¹⁶ Nhos pâpia klaru i ku ruspetu. (Pro. 15:22) Un kazal meste toma txeu disizon sobri ses kazamentu. Kel-li ta inklui data di kazamentu, kantu dinheru ki es ta gosta, lista di konvidadu i txeu otus kuza. Antis di nhos toma un disizon, nhos djobe djuntu kes opson ki nhos ten i nhos pâpia di prinsípius di Bíblia ki ta aplika na kes situason. Tanbê, nhos djobe konsedju di irmons ku irmans ki é maduru i ki é un bon izénplu. Óras ki nhos ta pâpia ku kunpanheru i ku nhos família sobri kuzê ki nhos krê, nhos mostra bondadi, nhos ser ikilibradu i nhos sta prontu pa faze mudansa. Pur izénplu, si nhos pai ku nhos mai pidi nhos pa faze un kuza ki nhos ta konsigi faze, nhos tenta faze-l. Kel-li é un okazion spesial pa es tanbê. Si es pidi nhos pa faze un kuza ki nhos ka ta pode, nhos splika-s ku bondadi i amor pamodi ki nhos ka ta pode. (Kol. 4:6) Splika bu família ma bu prinsipal obijetivu é pa bu kazamentu ser filís i pa el da ónra pa Jeová.

¹⁷ Pode ser txeu difísil splika nhos pai ku nhos mai nhos disizon prinsipalmenti si es ka sta na verdadi, má nhos pode ten bons rezultadu. Un irmon na Índia ki txoma Santhosh fla: “Nos família kreba pa nu inkluiba kes ritual indu na nos kazamentu. Leba algun ténpu pa mi ku nha noiva splika-s nos disizon. Nu konkorda na faze alguns kuza ki es kreba kantu nu xinti ma es ka ta ba dizagradaba Jeová. Pur izénplu, nu muda kel kumida ki nu ta ba sirbiba na fésta pa kel kumida ki es kreba i nu disidi ka kanta nen badja pamodi es ka staba kustumadu ku kes kuza li.”

18. Kuzê ki nhos pode faze pa tudu kuza pode kóre dretu na dia di nhos kazamentu? (1 Koríntius 14:40) (Odja imajen.)

¹⁸ Organiza dretu. Si nhos sta ben organizadu talvês nhos ta xinti ménus stress na dia di nhos kazamentu. (Lé 1 Koríntius 14:40.) Wayne di Taiuan, fla: “Alguns dia antis di kazamentu nu faze un runion pikinoti ku kes algen ki staba ta ba djuda-nu na kel dia di kazamentu. Nu pâpia sobri kes planu pa kel dia i nu insaia alguns kuza, asi pa tudu pode koreba dretu.” Tanbê pa mostra ruspetu pa nhos konvidadu nhos faze nhos midjór pa txiga na óra.

19. Kuzê ki pode djuda-u kontrola kuzê ki ta ba kontise na bu fésta di kazamentu?

¹⁹ Nhos pode ivita txeu prubléma si nhos pensa na alguns kuza ki pode kontise duránti kazamentu i kuzê ki nhos ta faze si es kontise. (Pro. 22:3) Pur izénplu, si na undi ki bu ta mora é normal pesoas bai pa kazamentu sen ser konvidadu, pensa na kuzê ki bu pode faze pa kel-li ka kontise. Ten serteza ma kalker algen di nhos família ki é ka Tistimunha di Jeová ta intende kuzê ki ta ba kontise i splika-s kuzê ki bu ta atxa sobri alguns tradison di kazamentu. Bu pode manda-s kel artigu “Kuzê ki ta kontise na kazamentu di Tistimunhas di Jeová”, na jw.org. Pa djuda-u kontrola kuzas duránti fésta pidi un irmon maduru pa ser “diretor di fésta.” (Juan 2:8) Si nhos pâpia ku el di manera klaru sobri nhos planu di kazamentu, el pode djuda nhos pa kuzas kontise di manera ki nhos krê i pa nhos kazamentu da Jeová ónra.

20. Kuzê ki un kazal debe lenbra sobri ses dia di kazamentu?

²⁰ Dipôs di odja tudu kuza ki sta involvidu na faze planus pa un kazamentu, talvês nhos fika un bokadinhu preokupadu. Má nhos lenbra ma kel kazamentu é sô un dia. El é komésu di un vida bunitu ta sirbi Jeová djuntu. Nhos faze nhos midjór pa nhos kazamentu ser sinplis i pa ser un okazion ki ta da ónra pa Jeová. Nhos kunfia na Jeová. Ku se orientason, nhos ta konsigi organiza nhos kazamentu i óras ki nhos djobe pa tras nhos ta ten sô bons lenbransa i nhos ka ta rapende di nada. — Sal. 37:3, 4.