Imita umildadi di Jeová

1. Pamodi ki umildadi di Jeová ta dexa-nu dimiradu?

ÓRAS ki bu ta odja kes algen na mundu oji ki ten puder, bu ta fla ma es é umildi? Klaru ki nau. Má Jeová, ki é Tudu-Poderozu, é umildi. (Sal. 113:5-8) Ka ten ningen ki é umildi sima Jeová. El ka ten nen un pónta di orgulhu. Na kel artigu li, nu sta ben pâpia di kuatu manera bunitu ki Jeová ta lida ku nos, i modi ki el ta mostra ma el é umildi na kada un di es. Tanbê nu ta ben odja modi ki Jizus imita umildadi di se Pai. Studa kes kuza li ta ben djuda-nu bira más amigu di Jeová i prende modi ki nu pode ser más umildi sima el.

JEOVÁ KRÊ PA NU XINTI AVONTÁDI PA NU PÂPIA KU EL

2. Kuzê ki Salmo 62:8 ta inxina-nu sobri Jeová? (Odja imajen.)

² Normalmenti, é ka fásil pâpia ku kes algen ki é orgulhozu. Pesoas orgulhozu txeu bês, ta trata otus algen di manera duru, pamodi es ta atxa ma es é más midjór ki otus algen. Pur isu, pesoas ta evita-s. Má Jeová é diferenti! Pamodi nos Pai na séu é umildi, el ta konvida-nu pa nu txiga na el i pa nu fla-l tudu kuza ki nu sta pensa i xinti. (Lé Salmo 62:8.) Sima un pai ki ta ama se fidju sta prontu pa obi kuzê ki se fidju ta pensa i xinti, Jeová tanbê krê obi nos orason. Na verdadi, el dexa txeu orason di ses sérvu na Bíblia. Kel-li ta mostra ma Jeová krê obi nos orason. (Juz. 10:12-14; 1 Sam. 1:10-18) Má, i si alvês nu ta xinti ma nu ka merese faze orason pa Jeová pamodi nu faze txeu pekadu?

3. Pamodi ki nu pode ten serteza ma Jeová krê pa nu faze orason pa el txeu bês sikrê nu ta xinti ma nu ka merese se amor?

³ Nu pode faze orason pa Jeová sikrê nu ta xinti ma nu ka merese se amor. Pamodi ki nu pode fla kel-li? Na kel ilustrason ki Jizus konta di kel fidju ki perde, el konpara Jeová ku un pai ki ten txeu amor i ki se fidju faze txeu pekadu, pur isu kel fidju ta pensaba ma se pai ka ta krê resebeba el na se família otu bês. Má, kuzê ki kel pai faze kantu se fidju volta pa kaza? Jizus fla ma lógu ki kel pai odja se fidju, kel pai “kóre, el brasa-l, i da-l beju.” (Luk. 15:17-20) Jeová é sima kel pai li. Lógu ki Jeová obi orason di un algen ki sta tristi pamodi el faze un pekadu ô pamodi el sta txeu preokupadu, se umildadi ta pô-l ta da kel algen tudu se atenson. (Lam. 3:19, 20) Pamodi konpaxon, é sima si Jeová ta kóre pa kel algen, el ta konsola-l i el ta da-l serteza ma el ta ama-l. (Isa. 57:15) Modi ki Jeová “ta kóre pa nos” oji? Txeu bês el ta uza ansions, nos família i amigus ki ta ama-l pa konsola-nu. (Tia. 5:14, 15) Jeová ta da-nu kes ajuda li pamodi el krê pa nu sta pértu di el.

4. Pamodi ki éra fásil pesoas papiaba ku Jizus?

⁴ Jizus ta imita se Pai. Sima se Pai, Jizus é umildi. Pamodi kel-li, kantu el staba na téra, pesoas ta xintiba avontádi pa txigaba na el. Es ka ta xintiba medu di faze-l pergunta. (Mar. 4:10, 11) I kantu el ta perguntaba es kuzê ki es ta pensaba sobri algun asuntu, es ta flaba el klaru kuzê ki es ta atxaba. (Mat. 16:13-16) Tanbê, óras ki es ta fazeba kuzas mariadu, es ka ta xintiba medu ma Jizus ta ba fikaba xatiadu ku es. Es sabia ma Jizus éra bondozu, el ta mostraba mizerikórdia i el tinha paxénxa. (Mat. 17:24-27) Dja ki Jizus ta imita se Pai dretu, ses sigidor konsigi konxe Jeová midjór. (Juan 14:9) Através di Jizus es konsigi odja ma Jeová é umildi, el krê pa es staba pértu di el i ma el ka éra sima kes xéfi di relijion ki éra duru i orgulhozu.

5. Pamodi ki é más fásil otus algen txiga na nos óras ki nos é umildi?

⁵ Modi ki nu pode imita Jeová? Óras ki nu prende ser más umildi, é más fásil pesoas txiga na nos. Si nos é ka umildi, nu pode xinti inveja di otus algen, xinti ma nos é más midjór ki es i ka purdua-s óras ki es magua-nu. Si nu aji si, pesoas ka ta krê txiga na nos. Má umildadi ta djuda-nu mostra bondadi, ten paxénxa i púrdua otus algen. Kes-li é kualidadis ki ta poi otus algen ta krê txiga na nos. (Kol. 3:12-14) É inportanti pa ansions ten serteza ma irmons ku irmans na kongregason ta xinti avontádi pa txiga na es i pâpia ku es. Má é klaru ki pa kel-li kontise ansions meste sta djuntu ku es. Kel-li krê fla ma es ta sforsa pa sisti runion na Salon di Reinu, envês di sisti runion pa internet. I si ses situason ta da, es ta tenta sai ku irmons i irmans na pregason di kaza en kaza. Óras ki kes irmon na kongregason ta konxe kes ansion midjór, es ta xinti más avontádi pa pâpia ku es na kalker óra.

JEOVÁ É IKILIBRADU

6-7. Da izénplus ki ta mostra ma Jeová sta prontu pa muda se disizon óras ki ses sérvu ora pa el.

⁶ Kes algen orgulhozu txeu bês ta atxa ma es sabe kuzê ki é midjór i es ka ta krê muda ses manera di pensa. Má Jeová, ki sénpri sabe kuzê ki é midjór, ka ta aji di kel manera li. El é umildi, el ta sta sénpri prontu pa obi kuzê ki otus algen ta pensa i ti el ta muda un disizon ku bazi na kel-li. Repara modi ki el lida ku Mirian, ki éra irman di Muizés. Djuntu ku Aron, el kritika Muizés, ki éra reprizentanti di Jeová. Na verdadi, Mirian staba ta mostra falta di ruspetu pa Jeová. Pur isu, Jeová fika xatiadu ku Mirian i el ataka-l ku lépra. Má kantu Aron inplora Muizés pa djuda se irman i Muizés inplora Jeová pa kura-l, kuzê ki Jeová faze? Un algen orgulhozu ka ta mudaba se opinion. Má Jeová aji di manera diferenti. Pamodi el é umildi, el obi Muizés i el kura Mirian. — Nun. 12:1-15.

⁷ Jeová tanbê mostra umildadi na manera ki el trata rei Ezekias. Jeová manda se proféta Izaías pa fla-l ma el staba ta ba móre. Ezekias txora i el inplora Jeová pa kura-l. Jeová obi orason di Ezekias i el fla-l ma el ta ba viveba más 15 anu. (2 Reis 20:1, 5, 6) Jeová ta xinti péna di pesoas i pamodi el é umildi, el sta prontu pa obi-s.

8. Ki izénplus ta mostra ma Jizus é ikilibradu? (Mar. 3:1-6)

⁸ Jizus ta imita se Pai. Kantu el staba na téra, Jizus ta fazeba kuzas dretu pa otus algen, sénpri ki ta daba. Pur izénplu, Jizus ta kuraba pesoas na sábadu, ki éra un kuza ki xéfis di relijion ta atxaba ma ka debe fazedu. Jizus ka éra duru, envês di kel-li, el ta mostraba konpaxon i el éra ikilibradu. (Lé Markus 3:1-6.) Oji, Jizus ta kontinua ta mostra konpaxon i el é ikilibradu na manera ki el ta orienta kongregason. Pur izénplu, óras ki un algen na kongregason ta faze un pekadu gravi, Jizus ta ten paxénxa ku el i el ta da-l oportunidadi di muda se atitudi. — Apo. 2:2-5.

9. Modi ki nu pode pensa i aji di manera ikilibradu? (Odja imajens.)

⁹ Modi ki nu pode imita Jeová? Nu meste sforsa pa nu ser ikilibradu na nos manera di pensa i di aji, sima Jeová. (Tia. 3:17) Pur izénplu, pai ku mai ki ta imita Jeová ka ta spera pa ses fidju faze kuzas ki es ka ta konsigi faze. Jakó da un bon izénplu di kel-li, sima sta na Jénezis 33:12-14. Tanbê, kes pai ku mai ki é umildi i ikilibradu ta ivita konpara un fidju ku kel otu. Ansions tanbê meste ser ikilibradu. Pur izénplu, un ansion ka ta insisti na se própi opinion. Envês di kel-li, el ta apoia disizon ki maioria di kes ansion toma, si el ka ta bai kóntra prinsípius di Bíblia. (1 Tim. 3:2, 3) I nos tudu nu ta tenta intende manera di pensa di otus algen, sikrê nu ta odja kuzas diferenti di es. (Rom. 14:1) Tudu algen na kongregason debe sforsa pa ‘dexa tudu algen odja ma es é ikilibradu.’ — Flp. 4:5.

JEOVÁ TEN PAXÉNXA

10. Kal ki foi alguns manera ki Jeová mostra paxénxa?

¹⁰ Talvês dja bu repara ma kes algen orgulhozu ka gosta di spera. Es ka ten paxénxa. Kel-li é totalmenti diferenti di Jeová, ki ten paxénxa más di ki kalker algen. Pur izénplu, na ténpu di Nué, Jeová spera 120 anu pa el distrui kes algen mau. (Jén. 6:3) Nué tevi ténpu pa kria ses fidju i el faze un arka ku ajuda di se família. Un ténpu dipôs, Jeová obi Abraon ku paxénxa, timenti Abraon ta fazeba el perguntas sobri distruison di Sudoma ku Gumora. Un algen orgulhozu pode respondeba: ‘Abo é kenha pa faze-m kes pergunta li?’ Má pamodi Jeová é umildi, el mostra paxénxa ku Abraon. — Jén. 18:20-33.

11. Sima sta na 2 Pedru 3:9, pamodi ki Jeová sta ta mostra paxénxa na nos ténpu?

¹¹ Jeová sta ta mostra paxénxa na nos ténpu tanbê. El sta ta spera ténpu sértu pa el traze fin. Pamodi ki el sta ta spera ku paxénxa? “Pamodi el ka krê pa ningen ser distruídu, má el krê pa tudu algen rapende.” (Lé 2 Pedru 3:9.) Bale péna paxénxa ki el sta ta mostra? Klaru ki sin! Milhons di algen justu sta ta bira se amigu. I nu ta spera ma txeu otus algen ta ben faze kel-li. Má, paxénxa di Jeová ten limiti. Jeová ta ama pesoas, má el ka ta ben dexa-s faze kuzê ki es krê pa tudu ténpu. El ta ben kaba ku kes algen mau. — Hab. 2:3.

12. Modi ki Jizus sta ta imita paxénxa di Jeová?

¹² Jizus ta imita se Pai. Dja ten milharis di anu ki Jizus sta ta imita paxénxa di Jeová. El odja Satanás ta konta un grandi mintira sobri Jeová i ses sérvu. (Jén. 3:4, 5; Jó 1:11; Apo. 12:10) Tanbê Jizus odja txeu algen ta pasa pa sufrimentu terível. Imajina modi ki el tene vontadi di “disfaze kes óbra di Diabu”! (1 Juan 3:8) Kuzê ki sta ta djuda Jizus spera ku paxénxa, ti ki Jeová dexa-l distrui kes óbra di Diabu pa tudu ténpu? Un di kes razon é pamodi Jizus é umildi. El sabe ma Jeová é úniku algen ki ta disidi ki ténpu ki fin ta ben. — Atus 1:7.

13. Modi i pamodi ki Jizus mostra paxénxa ku ses apóstlu?

¹³ Kantu Jizus staba na téra, tanbê el mostra paxénxa ku ses apóstlu. Pur izénplu, kantu kes apóstlu diskuti sobri kal di es éra más inportanti, Jizus ka fika xatiadu i nen el ka dizisti di es. El kontinua ku paxénxa. (Luk. 9:46; 22:24-27) El kunfia ma na ténpu sértu es ta mudaba ses manera di pensa. Dja bu faze mésmu éru txeu bês? Si sin, bu ka ta fika kontenti di ten un Rei umildi i ki ten paxénxa?

14. Kuzê ki pode djuda-nu ten más paxénxa?

¹⁴ Modi ki nu pode imita Jeová? Pa nu konsigi pensa i aji kada bês más sima Jeová, nu meste prende pensa sima Jizus. (1 Kor. 2:16) Kuzê ki ta djuda-nu pensa kada bês más sima Jizus ta pensa? Un di kes midjór manera ki nu pode faze kel-li é óras ki nu ta lé kes Ivanjélhu. Dipôs, nu meste tra ténpu pa pensa na modi ki kada un di kes stória ta inxina-nu sobri manera ki Jizus ta pensa sobri kel asuntu. I tanbê nu meste pidi Jeová pa djuda-nu ser umildi i ten paxénxa sima Jizus. Sima nu ta ba ta prende pensa sima Jizus ta pensa, ta ser más fásil pa nu imita Jeová, ten paxénxa ku nos irmons i ku nos tanbê. — Mat. 18:26-30, 35.

JEOVÁ TA DA ÓNRA PA KES ALGEN UMILDI

15. Da alguns izénplu ki ta mostra ma Jeová ta da ónra pa kes algen umildi. (Salmo 138:6)

¹⁵ Lé Salmo 138:6. É un grandi ónra pa kes algen umildi sabe ma kel Algen Más Grandi di universu ta presta atenson na es! Odja izénplu di pesoas umildi ki Jeová da ónra. Pode ser ki bu ka ta lenbra di alguns di es. Má Jeová poi ses stória na Bíblia. Pur izénplu, Jeová uza Muizés pa skrebe nómi di Débura, ki éra un sérva fiel i ki sirbi família di Izaki i Jakó pa uns 125 anu. Enbóra nu ka sabe txeu kuza sobri kel mudjer lial li, Jeová uza Muizés pa skrebe se stória pa mostra modi ki El i Jakó ku se família ta amaba el txeu. (Jén. 24:59; 35:8 i nóta di rodapé.) Txeu anu dipôs, Jeová skodje un jóven ki éra pastor i ki txomaba Davidi, pa bira rei di Israel. (2 Sam. 22:1, 36) Poku ténpu dipôs ki Jizus nase, Deus manda un anju pa un grupu di pastor i el da-s ónra pamodi es foi kes primeru algen ki kes anju fla ma Misías dja nase na Belen. (Luk. 2:8-11) I kantu Juzé ku Maria leba Jizus pa ténplu, Jeová da Simion i Ana ónra di odja se Fidju. (Luk. 2:25-30, 36-38) Kel-li ta mostra ma ‘enbóra Jeová sta na un puzison altu, el ta odja pa algen umildi’!

16. Modi ki Jizus imita se Pai na manera ki el trata otus algen?

¹⁶ Jizus imita se Pai. Sima se Pai, Jizus da ónra pa kes algen umildi. El inxina verdadi sobri Reinu di Deus pa kes algen “sinplis i ku poku skóla”. (Atus 4:13; Mat. 11:25) Tanbê, el kura kes algen duenti i el faze kel-li di manera ki es ta xintiba amadu i ruspetadu. (Luk. 5:13) Na kel últimu noti, antis di el móre, Jizus laba pé di ses apóstlu. Normalmenti, kel-li éra un trabadju ki skravu ta fazeba. (Juan 13:5) I antis di el bai pa séu, el da tudu ses sigidor, i kel-li ta inklui nos oji, ónra di faze kel trabadju más inportanti ki un algen pode faze, ki é djuda otus algen ganha vida pa tudu ténpu. — Mat. 28:19, 20.

17. Modi ki nu pode mostra amor i ruspetu pa otus algen? (Odja imajen.)

¹⁷ Modi ki nu pode imita Jeová? Nu ta mostra amor i ruspetu pa pesoas óras ki nu ta prega notísias sábi pa tudu algen, ka ta inporta di undi ki es é, ses kor di péli, ô kantu skóla ki es ten. I nu ta mostra amor i ruspetu pa nos irmons ku irmans ka ta inporta ki kapasidadi ki nu ten ô ki priviléjiu ki nu ten. (Flp. 2:3) Jeová ta fika kontenti óras ki nos é umildi i nu ta “ser primeru” na da ónra pa kunpanheru di kes manera li i di otus manera. — Rom. 12:10; Sof. 3:12.

18. Pamodi ki nu krê imita umildadi di Jeová?

¹⁸ Óras ki nu ta sforsa pa nu imita umildadi di nos Pai na séu, ta ser más fásil pa otus algen txiga na nos, nu ta ser más ikilibradu i nu ta ten más paxénxa. Tanbê, nu ta da otus algen ónra, sima Jeová ta faze. I lenbra ma óras ki nu ta faze tudu kel ki nu ta pode pa nu ser más umildi, sima nos Deus é umildi, kel-li ta pô-nu ta ten más valor pa el. — Isa. 43:4.