STUDU 10
KÁNTIKU 31 Anda ku Deus
Imita Jeová i Jizus na bu manera di pensa
“Dja ki Kristu sufri na karni, nhos tanbê nhos pripara pa nhos pensa sima Kristu.” — 1 PEDRU 4:1.
ASUNTU PRINSIPAL
Modi ki apóstlu Pedru prende pensa sima Jizus i modi ki nu pode faze mésmu kuza.
1-2. Kuzê ki ta involve ama Jeová i modi ki Jizus mostra ma el ta ama Jeová di kel manera la?
“AMA Jeová, bu Deus, di tudu bu korason, di tudu bu alma, di tudu bu forsa i di tudu bu menti”. (Luk. 10:27) Jizus mostra klaru ma kel-li éra mandamentu más inportanti na Lei di Muizés. Repara ma nos amor pa Jeová ta involve nos korason i kel-li ta inklui nos dizeju i nos sentimentu. Tanbê ta involve nos adorason di tudu nos alma i nos forsa, kel-li ta inklui nos inerjia. Má, ama Jeová tanbê ta involve nos menti, kel-li ta inklui modi ki nu ta pensa sobri alguns asuntu. É klaru ki nu ka ta pode intende konpletamenti manera di Jeová pensa. Má, nu pode intende midjór manera ki Deus ta pensa óras ki nu ta studa “menti di Kristu” pamodi Jizus ta pensa sima se Pai. — 1 Kor. 2:16 i nóta di studu “nós temos a mente de Cristo.”
2 Jizus ama Jeová di tudu se menti. El sabia kal ki éra vontadi di Jeová i el staba disididu na faze-l sikrê el tinha ki sufri pa faze kel ki é dretu. Jizus staba konsentradu na faze vontadi di se Pai, pur isu el ka dexa nada distrai-l di se obijetivu.
3. Kuzê ki apóstlu Pedru prende ku Jizus i kuzê ki Pedru inkoraja kristons pa faze? (1 Pedru 4:1)
3 Pedru i kes otu apóstlu tevi priviléjiu di pasa ténpu ku Jizus i di prende modi ki el ta pensaba. Kantu Pedru skrebe se primeru karta, el inkoraja kes kriston pa es pensa sima Kristu. (Lé 1 Pedru 4:1.) Na kel língua orijinal, kantu Pedru fla “nhos pripara”, el uza un palavra ki ta uzadu pa mostra modi ki trópas ta poba ses arma pa pripara pa géra. Si kristons prende pensa sima Jizus ta pensa, es ta sta priparadu ku un arma poderozu ki ta djuda-s luta kóntra kalker dizeju di faze kuzas mariadu i luta kóntra governanti di kel mundu li ki é Satanás. — 2 Kor. 10:3-5; Efé. 6:12.
4. Modi ki kel studu li pode djuda-nu sigi kel konsedju ki Pedru da?
4 Nu ta ben prende modi ki Jizus ta pensaba i modi ki nu pode imita-l. Nu ta ben odja modi ki nu pode (1) imita manera di pensa di Jeová, ki ta djuda-nu pensa di mésmu manera ku kunpanheru, (2) ser umildi, i (3) ten bon juís óras ki nu ta kunfia na Jeová i faze orason.
IMITA MANERA DI PENSA DI JEOVÁ
5. Modi ki na un situason Pedru ka pensa di mésmu manera ki Jeová?
5 Odja un situason ki Pedru ka imita manera ki Jeová ta pensa sobri un asuntu. Jizus fla ses disiplu ma el tinha ki bai pa Jiruzalen, el ta ba intregadu na mô di kes xéfi di relijion, es ta torturaba el i dipôs es ta mataba el. (Mat. 16:21) Talvês Pedru ta atxaba difísil seta ma Jeová ta permitiba pa Jizus matadu, dja ki el éra speransa di Israel i kel Misías ki prometedu. (Mat. 16:16) Nton, Pedru leba Jizus apárti i el fla-l: “Ten péna di bu kabésa, Sinhor. Kel-li nunka ka ta ben kontise ku bo.” (Mat. 16:22) Dja ki Pedru ka imita manera di pensa di Jeová, el ka ta pensaba di mésmu manera ki Jizus.
6. Modi ki Jizus mostra ma se manera di pensa staba di akordu ku manera di pensa di Jeová?
6 Manera di pensa di Jizus staba di akordu ku manera di pensa di se Pai na séu. Jizus fla Pedru: “Pa tras di mi Satanás! Abo é un pédra di tropesu pa mi, pamodi bu ka ten pensamentus di Deus, má di ómis.” (Mat. 16:23) Pedru tinha bon intenson, má Jizus ka seta kel konsedju di Pedru. Kel-li é un lison pa nos. Ka éra vontadi di Jeová pa Jizus popaba se vida. Nton, na kel situason li, Pedru prende un lison inportanti sobri pensa di mésmu manera ki Jeová.
7. Modi ki Pedru mostra ma el krê mudaba se manera di pensa pa el pode pensaba sima Jeová? (Odja dizenhu na kapa.)
7 Dipôs, Pedru mostra ma el krê prende pensaba di mésmu manera ki Jeová. Kantu txiga ténpu pa kes algen ki ka éra sirkunsidadu faze párti di povu di Deus, Jeová manda Pedru pa bai prega pa Kornéliu ki éra un di kes primeru algen di nason ki bira kriston. Judeus normalmenti ta ivitaba sta djuntu ku kes algen di nason. Pur isu, Pedru meste mudaba se manera di pensa pa el pode pregaba pa kes algen di nason. Kantu Pedru intende kal ki éra vontadi di Deus el muda se manera di pensa. Pamodi kel-li, kantu el mandadu el bai “sen duvida”. (Atus 10:28, 29) El prega pa Kornéliu i se família i es batizadu. — Atus 10:21-23, 34, 35, 44-48.
Pedru sta ta entra na kaza di Kornéliu (Odja parágrafu 7.)
8. Modi ki nu pode mostra ma nos manera di pensa sta di akordu ku manera di pensa di Jeová? (1 Pedru 3:8 i nóta di rodapé.)
8 Alguns anu dipôs, Pedru inkoraja kes kriston pa “pensa di mésmu manera”. (Lé 1 Pedru 3:8 i nóta di rodapé.) Nu pode pensa di mésmu manera ki nos irmons ku irmans si nu imita manera di pensa di Jeová ki nu ta prende na Bíblia. Pur izénplu, Jizus insentiva ses sigidor pa poi Reinu na primeru lugar na ses vida. (Mat. 6:33) Nton, un algen na bu kongregason pode disidi kumesa sirvisu di pioneru ô sirbi Jeová pa ténpu interu di otu manera. Envês di fla-l pa el skodje un vida más fásil, nu debe fla kuzas puzitivu sobri se méta i oferese pa djuda-l.
SER UMILDI
9-10. Di ki manera Jizus mostra ma el tinha txeu umildadi?
9 Na kel noti, antis di Jizus móre, el inxina Pedru i kes otu apóstlu un lison inportanti di umildadi. Jizus manda Pedru ku Juan pa pripara kes kuza pa kel últimu seia di Jizus antis di el móre. Talvês un di kes kuza ki es faze é ranja un basia i tuadja pa kes konvidadu pode lababa pé antis di kume. Má, ken ki ta sérba umildi pa lababa pé di kes otu?
10 Lógu Jizus faze kel trabadju li. El mostra ma el tinha txeu umildadi. Kes apóstlu fika dimiradu kantu es odja-l ta faze kel trabadju ki normalmenti éra un skravu ki ta fazeba. Jizus tra se ropa i el panha un tuadja i el mara na sintura. El poi agu na kel basia i el kumesa ta laba ses disiplu pé. (Juan 13:4, 5) Jizus laba pé di kes 12 apóstlu, ti mésmu pé di Judas ki ta ba traíba el. Talvês kel-li toma txeu ténpu, má ku umildadi Jizus faze kel trabadju li. Dipôs ku paxénxa Jizus splika-s: “Nhos intende kuzê ki N faze nhos? Nhos ta txoma-m di ‘Instrutor’ i ‘Sinhor’, i nhos sta sértu pamodi mi é ‘Instrutor’ i ‘Sinhor’. Nton, si mi, ki é Sinhor i Instrutor, N laba nhos pé, nhos tanbê nhos debe laba pé di kunpanheru.” — Juan 13:12-14.
Umildadi di verdadi... ten aver ku kuzas ki nu ta pensa.
11. Modi ki Pedru mostra ma el prende ser umildi? (1 Pedru 5:5) (Odja dizenhu.)
11 Pedru prende ku umildadi di Jizus. Dipôs ki Jizus bai pa séu, Pedru faze un milagri kantu el kura un ómi ki nase manku. (Atus 1:8, 9; 3:2, 6-8) Un monti di algen odja kel milagri i es djunta na vólta di Pedru. (Atus 3:11) Dja ki Pedru binha di un kultura undi algen ta daba txeu valor pa puzison i ser un algen inportanti, el ta ba pruveta di kel momentu pa da glória pa se kabésa? Nau, ku umildadi Pedru ka txoma atenson pa el mê, má el da glória pa Jeová i Jizus kantu el fla: “Através di nómi [di Jizus] i di nos fé na se nómi, kel ómi li ki nhos sta ta odja i ki nhos konxe, bira fórti.” (Atus 3:12-16) Na un di kes karta ki Pedru skrebe pa kristons, el insentiva-s pa es bisti di umildadi. Kel-li ta lenbra-nu di kantu Jizus mara un tuadja na sintura i el laba pé di ses apóstlu. — Lé 1 Pedru 5:5.
Dipôs ki Pedru faze un milagri, ku umildadi el da glória pa Jeová i pa Jizus. Nos tanbê nu ta mostra umildadi óras ki nu ta faze kuzas dretu sen spera glória pa nos kabésa ô resebe un rekonpénsa. (Odja parágrafus 11-12.)
12. Modi ki, sima Pedru, nu pode kontinua ta ser umildi?
12 Nu pode imita Pedru i kontinua ta prende ser umildi. Lenbra ma umildadi di verdadi é mutu más ki sô fla kuzas dretu. Pedru uza kes palavra “umildadi na menti” pa mostra ma umildadi ten aver ku kuzas ki nu ta pensa. Nu ka ta faze kuzas pa otus algen pamodi nu krê pa es dimira-nu, má pamodi nu ta ama Jeová i nu ta ama pesoas. Nu ta mostra ma nos é umildi di verdadi si nu sirbi Jeová i nos irmons ku alegria sikrê otus algen ka ta repara kuzê ki nu ta faze. — Mat. 6:1-4.
“TEN BON JUÍS”
13. Kuzê ki “ten bon juís” krê fla?
13 Kuzê ki “ten bon juís” krê fla? (1 Ped. 4:7) Si nu ten bon juís nu ta faze nos midjór pa toma bons disizon ki ta mostra kuzê ki Jeová ta pensa. Nu ta lenbra ma nos amizadi ku Jeová é kuza más inportanti na nos vida. Tanbê nu ta ivita pensa dimás di nos kabésa, nu ta intende ma nu ka sabe tudu kuza. I nu ta mostra ma nu ta kunfia na Deus óras ki sénpri nu ta faze orason ku umildadi.a
14. Modi ki na un situason Pedru ka kunfia na Jeová?
14 Na kel últimu noti antis di Jizus móre el aviza ses disiplu: “Kel noti li nhos tudu ta ben tropesa pamodi mi”. Pedru pensa ma el éra fórti i el responde: “Mésmu ki tudu kes otu tropesa pamodi bo, ami nunka N ka ta tropesa!” Na kel noti Jizus konsedja ses disiplu: “Nhos mante sienti i nhos ora sénpri.” (Mat. 26:31, 33, 41) Si Pedru sigiba kel konsedju li antis, talvês más tardi el ta tinha koraji pa el rekonhese ma el éra disiplu di Jizus. Envês di kel-li, Pedru nega Jizus i kel-li pô-l ta xinti tristi dimás. — Mat. 26:69-75.
15. Modi ki Jizus mostra ma el kontinua ku bon juís duránti se últimu noti li na téra antis di el móre?
15 Jizus sénpri ta kunfiaba na Jeová. Enbóra el éra perfeitu el ora txeu na kel noti antis di el móre. Kel-la da-l koraji pa el faze kel ki Jeová kreba pa el faze. (Mat. 26:39, 42, 44; Juan 18:4, 5) Di serteza Pedru nunka ka skese ma Jizus ora txeu bês duránti kel últimu noti.
16. Kuzê ki ta mostra ma Pedru dizenvolve un bon juís? (1 Pedru 4:7)
16 Ku ténpu, Pedru fika ta faze orason más txeu pamodi el prende kunfia más na Jeová. Kantu Jizus resusita, el da Pedru i kes otu apóstlu serteza ma es ta resebeba spritu santu asi pa es pode pregaba notísia sábi. Má, Jizus fla-s pa es spera na Jiruzalen ti ki kel-li kontiseba. (Luk. 24:49; Atus 1:4, 5) Kuzê ki Pedru faze timenti es staba ta spera? Pedru i ses kunpanheru “kontinua ta faze orason”. (Atus 1:13, 14) Más tardi, kantu Pedru skrebe se primeru karta, el insentiva ses irmon pa ten bon juís i pa es kontinua ta faze orason. (Lé 1 Pedru 4:7.) Pedru prende kunfia na Jeová i el bira un pilar na kongregason. — Gál. 2:9.
17. Kuzê ki nu meste kontinua ta faze ka ta inporta ki kapasidadi ki nu ten? (Odja fotu.)
17 Pa nu ten un bon juís, nu debe sta sénpri ta faze orason pa Jeová. Nu ta intende ma nu debe kontinua ta faze orason pa Jeová ka ta inporta ki kapasidadi ki nu ten. Pur isu, nu ta faze kel-li prinsipalmenti óras ki nu ten ki toma disizons inportanti. Nu ta pidi orientason di Jeová na orason pamodi nu ta kunfia ma el sabe kuzê ki é midjór pa nos.
Pedru prende faze orason más txeu pamodi el ta kunfiaba na Jeová. Nos tanbê nu ta mostra ma nu ten un bon juís óras ki nu ta faze orason pa Jeová ta pidi-l ajuda prinsipalmenti óras ki nu ten ki toma disizons inportanti. (Odja parágrafu 17.)b
18. Modi ki nu pode sforsa pa imita manera di pensa di Jeová?
18 Nu ten txeu gratidon pamodi Jeová faze-nu ku kapasidadi di imita ses kualidadi. (Jén. 1:26) É klaru ki nu ka ta pode imita Jeová di manera perfeitu. (Isa. 55:9) Má, sima Pedru, nu pode sforsa pa nu bira ta pensa sima Jeová. Nton, nu kontinua ta imita manera di pensa di Deus, ta ser umildi i ta ten bon juís.
KÁNTIKU 30 Nha amigu, nha Pai i nha Deus
a Pa sabe más sobri kuzê ki siginifika ten bon juís, odja kel artigu “Splikason di 2 Timótiu 1:7” — ‘Deus ka da-nu un spritu di kobardia’, na kel párti ki ta pâpia di “bon juís” na jw.org i na aplikativu JW Library®.
b SPLIKASON DI DIZENHU: Un irman sta ta faze orason déntu di el timenti el sta spera pa faze un entrivista di trabadju.