STUDU 6

Splika testu di Bíblia di manera klaru

João 10:33-36

REZUMU: É ka sô lé un testu i dipôs pasa pa otu pontu. Bu meste ten sertéza ma algen ntende dretu kal ki é ligason entri kel testu ki bu lé i kel asuntu ki bu krê splika-s.

MODI KI TA FAZEDU:

Sipara kes palavra más inportanti. Dipôs di lé un testu, distaka kes palavra ki ten aver ku kel pontu prinsipal. Bu pode faze kel-li óras ki bu ta ripiti kes palavra. Ô bu pode faze un pergunta ki ta djuda algen diskubri kal ki é kes palavra prinsipal.

Si bu sta uza palavras diferenti pa fla kel mésmu ideia ki sta na testu di Bíblia, ten sertéza ma algen ta konsigi odja klaru modi ki kes palavra na Bíblia sta ligadu ku pontu prinsipal ki bu sta inxina.
Distaka kel pontu. Si bu fla klaru pamodi ki bu sta lé un testu, dipôs di le-l splika modi ki kes palavra más inportanti na testu sta ligadu ku kuzê ki bu flaba antis.

Dexa bu Bíblia abértu timenti bu sta splika kel testu. Kel-li ta djuda algen liga kel ki bu sta fla ku kel versíklu ki bu kaba di lé.
Splika di manera sinplis. Ivita splika tintin pa tintin kes pontu ki ka é inportanti. Ku bazi na kel ki algen dja sabe sobri kel asuntu, disidi ki otus informason bu meste fla pa bira kel pontu klaru i faxi di ntende.