Kʼojobʼ aachʼool naq li Jehobʼa narusila aawu

1. Kʼaru naru teʼxkʼoxla jalan jalanq aj kʼanjel chiru li Jehobʼa?

QʼAXAL us xnawbʼal naq «li Qaawaʼ naxra li xtenamit»! (Sal. 149:4). Abʼanan, maare wank sut wankebʼ nekeʼchʼinaak xchʼool ut nekeʼxkʼoxla: «Yaal naq li Jehobʼa sa xchʼool rikʼin ebʼ laj kʼanjel chiru joʼ chʼuut abʼan, ma sa tawiʼ xchʼool wikʼin?». Naabʼal re laj kʼanjel chiru li Yos re najter qʼe kutan wank sut keʼchʼaʼajkoʼk chiru xpaabʼankil naq li Yos narusila ruhebʼ (1 Sam. 1:​6-10; Job 29:​2, 4; Sal. 51:13).

2. Anihebʼ nekeʼusilaak ru xbʼaan li Jehobʼa?

² Li Santil Hu chi chʼolchʼo ru naxye naq usta laaʼo aj maak li Jehobʼa truuq rusilankil qu. Kʼaru tento tqabʼaanu? Xkʼutbʼesinkil naq naqapaabʼ li Jesukriist ut naq tkubʼeeq qahaʼ (Juan 3:16). Chi joʼkan tqakʼutbʼesi rehebʼ li junchʼol naq ak xqayotʼ qachʼool ut naq xqayeechiʼi re li Yos naq tqabʼaanu li rajom (Hech. 2:38; 3:19). Jwal nasahoʼk saʼ xchʼool li Jehobʼa naq naqabʼaanu aʼin re wank choʼq ramiiw. Wi naqakʼe qachʼool chi xbʼaanunkil li xqayeechiʼi re naq xqaqʼaxtesi li qayuʼam chiru, li Jehobʼa trusila qu ut twanq choʼq qamiiw (Sal. 25:14).

3. Kʼaru ebʼ li patzʼom tqasume saʼ li tzolom aʼin?

³ Abʼanan, kʼaʼut wankebʼ naru nekeʼxkʼoxla naq li Jehobʼa inkʼaʼ narusila ruhebʼ? Chanru naxkʼutbʼesi naq sa xchʼool qikʼin? Ut kʼaru tooxtenqʼa re naq chʼolchʼooq chiqu naq narusila qu?

KʼAʼUT WANKEBʼ NEKEʼXKʼOXLA NAQ LI JEHOBʼA INKʼAʼ NARUSILA RUHEBʼ

4, 5. Kʼaru chʼolchʼooq chiqu usta naqakʼoxla naq maakʼaʼ nokooʼok wiʼ?

⁴ Naabʼal qe xqakʼoxla naq maakʼaʼ nokooʼok wiʼ chalen chaq saʼ li qakachʼinal (Sal. 88:16). Laj Adrián jun li hermaan naxye: «Junelik xinkʼoxla naq maakʼaʼ ninʼok wiʼ. Jultik we naq saʼ linkachʼinal ninpatzʼ re li Jehobʼa naq linjunkabʼal twanq saʼ li Chʼinaʼusil Naʼajej abʼan chʼolchʼo chiwu naq laaʼin moko inkʼulubʼ ta wank aran». Laj Tony naxye aʼin chirix chanru xkʼirisiik xbʼaan li xnaʼ xyuwaʼ li maawaʼebʼ aj Testiiw: «Maajunwa xeʼxye we naq sahebʼ xchʼool wikʼin chi moko naq nikineʼxra. Nekeʼxbʼaanu naq twekʼa naq maajunwa tinruuq xsahobʼresinkil xchʼoolebʼ».

⁵ Wi wank sut naqekʼa naq maakʼaʼ nokooʼok wiʼ, qajultikaq naq li Jehobʼa xooxjilosi chaq saʼ li xtenamit (Juan 6:44). Aʼan naxkʼe reetal li qachaabʼil naʼlebʼ, usta laaʼo inkʼaʼ naqakʼe reetal ut naxnaw chi tzʼaqal chanru qanaʼlebʼ (1 Sam. 16:7; 2 Crón. 6:30). Joʼkan naq tooruuq xpaabʼankil naq naxye naq oxloqʼo chiru (1 Juan 3:​19, 20).

6. Kʼaru narekʼa laj Pablo naq naxkʼoxla rix li xmaak?

⁶ Maare wank qe li toj narahoʼk qachʼool xbʼaan li maak li xqabʼaanu naq toj maajiʼ naqanaw li yaal (1 Ped. 4:3). Maare wankebʼ ak naabʼal chihabʼ rokikebʼ chi kʼanjelak chiru li Jehobʼa abʼan toj yookebʼ xyalbʼal xqʼe rikʼin li yibʼru aj naʼlebʼ. Ut laaʼat? Ma nakatxqʼabʼa laachʼool? Wi joʼkan, xnawbʼal naq wankebʼ laj kʼanjel chiru li Jehobʼa li joʼkan ajwiʼ xeʼrekʼa ribʼ naru tixkʼojobʼ aachʼool. Jun eetalil, li apóstol Pablo narahoʼk xchʼool naq naxkʼoxla rix li xmaak (Rom. 7:24). Usta ak kixyotʼ xchʼool ut kikubʼeek xhaʼ, toj naxkʼoxla naq aʼan «li kachʼin saʼ xyanqebʼ li apóstol» ut «li qʼaxal» wank xmaak chiruhebʼ li nekeʼmaakobʼk (1 Cor. 15:9; 1 Tim. 1:15).

7. Kʼaru chʼolchʼooq chiqu wi naqayotʼ qachʼool?

⁷ Li qachoxahil Yuwaʼ naxye naq tixkuy qamaak wi naqayotʼ qachʼool (Sal. 86:5). Joʼkan naq, wi narahoʼk qachʼool xbʼaan li qamaak moko wank ta xyaalal re xkʼoxlankil naq inkʼaʼ naxbʼaanu li naxye: chʼolchʼo naq ak xkuy qamaak (Col. 2:13).

8, 9. Kʼaru tooxtenqʼa re naq inkʼaʼ chik tqakʼoxla naq moko tzʼaqal ta re li Jehobʼa li naqabʼaanu?

⁸ Chiqajunilo naqaj xkʼebʼal re li Jehobʼa li jwal chaabʼil. Abʼan maare wankebʼ nekeʼrekʼa naq maakʼaʼ naxye li teʼxbʼaanu moko tzʼaqal ta re xtawbʼal li rusilal li Yos. Li xʼAmanda, jun li hermaan naxye: «Junelik ninkʼoxla naq re xkʼebʼal re li Jehobʼa li jwal us junelik yooqin xkʼebʼal xkomon. Naq inkʼaʼ ninruuk xbʼaanunkil chixjunil li nawaj ninkʼoxla naq li Jehobʼa moko sa ta xchʼool wikʼin joʼ nawekʼa wibʼ laaʼin».

⁹ Kʼaru tooxtenqʼa re naq inkʼaʼ tqakʼoxla naq moko tzʼaqal ta re li Jehobʼa li naqabʼaanu? Qajultikaq naq li Jehobʼa naxtaw qu ut maajunwa naxpatzʼ qe li inkʼaʼ tooruuq xkʼebʼal. Wi li naqakʼe re aʼan li nokooruuk xbʼaanunkil, aʼ yaal ma nim malaj kachʼin, jwal naroxloqʼi. Qakʼoxlaq ajwiʼ ebʼ li eetalil li wank saʼ li Santil Hu li xeʼkʼanjelak chiru li Jehobʼa chi anchal xchʼoolebʼ. Jun eetalil, laj Pablo kaw kikʼanjelak chiru naabʼal chihabʼ najt kibʼihajik ut kixxaqabʼ naabʼal ebʼ li chʼuut. Abʼan kiwulak jun hoonal bʼarwiʼ kijalaak li xwanjik ut inkʼaʼ chik kiruuk puktesink joʼ junxil. Ma inkʼaʼ chik sa xchʼool li Jehobʼa rikʼin? Chʼolchʼo naq inkʼaʼ. Laj Pablo kixkʼe xchʼool chi xbʼaanunkil li kiruuk ut li Jehobʼa junelik kirosobʼtesi (Hech. 28:​30, 31). Joʼkan ajwiʼ, maare wank sut moko juntaqʼeet ta li tooruuq xkʼebʼal re li Jehobʼa abʼan aʼan naxkʼe saʼ ajl kʼaʼut naqabʼaanu. Anaqwan tqil wiibʼ oxibʼ li naʼlebʼ bʼarwiʼ naxkʼutbʼesi li Jehobʼa naq sa xchʼool qikʼin.

CHANRU NAXKʼUTBʼESI LI JEHOBʼA NAQ SA XCHʼOOL QIKʼIN

10. Chanru «naxye» qe li Jehobʼa naq sa xchʼool qikʼin? (Juan 16:27).

¹⁰ Rikʼin li Santil Hu. Jwal nawulak chiru li Jehobʼa xkʼutbʼesinkil rehebʼ laj kʼanjel chiru naq naxrahebʼ ut naq narusila ruhebʼ. Saʼ li Santil Hu natawmank wiibʼ sut naq kixye re li Jesús naq aʼan li Ralal li jwal raaro xbʼaan ut naq narusila ru (Mat. 3:17; 17:5). Ma twulaq raj chaawu naq li Jehobʼa tixye naq sa xchʼool aawikʼin? Yaal naq inkʼaʼ nokooraatina chaq chalen saʼ choxa. Abʼan naxbʼaanu rikʼin li Raatin. Naq naqayaabʼasi li chʼinaʼusil aatin li kixye li Jesús rehebʼ li xtzolom, naqekʼa naq chanchan tawiʼ li Jehobʼa yook xyeebʼal qe (yaabʼasi Juan 16:27). Li Jesús chi tzʼaqal re ru kixkʼam re rikʼin li Xyuwaʼ. Joʼkan naq, naq naqayaabʼasi naq li Jesús kixye rehebʼ li xtzolom naq naxrahebʼ usta ebʼ aj maak, tooruuq xkʼoxlankil naq li Jehobʼa yook xyeebʼal qe aʼin (Juan 15:​9, 15).

11. Kʼaʼut inkʼaʼ tqil ebʼ li chʼaʼajkilal joʼ reetalil naq li Yos inkʼaʼ chik narusila qu? (Santiago 1:12).

¹¹ Rikʼin li xbʼaanuhom. Li Jehobʼa naraj qatenqʼankil, naxkʼe qe li naʼajmank saʼ li qajunxaqalil. Abʼan wank sut naxkanabʼ naq tqanumsi ebʼ li chʼaʼajkilal, joʼ kikʼulmank rikʼin laj Job (Job 1:​8-11). Inkʼaʼ tqil ebʼ li chʼaʼajkilal joʼ reetalil naq li Yos inkʼaʼ chik narusila qu, tqil bʼan joʼ li hoonal re xkʼutbʼesinkil naq jwal naqara ut naqakʼojobʼ qachʼool rikʼin (yaabʼasi Santiago 1:12). Ut naq yooqo xnumsinkil ebʼ li chʼaʼajkilal tqil li xtenqʼ ut li xrahom re naq tooruuq xkuybʼal.

12. Kʼaru naxkʼut chiqu li kixkʼul laj Dimitri?

¹² Qilaq li kixkʼul laj Dimitri jun li hermaan re Asia. Aʼan kixtzʼeq li xkʼanjel. Xbʼaan naq naabʼal po ak xnumeʼk ut inkʼaʼ naxtaw junaq, kixkʼubʼ xkʼebʼal xkomon xhoonal saʼ li puktesink re xkʼutbʼesinkil re li Jehobʼa naq naxkʼojobʼ xchʼool rikʼin. Abʼan nanumeʼk li po ut inkʼaʼ naxtaw junaq xkʼanjel. Moqon kiyajerk, li kixbʼaanu naq junelik twanq saʼ xchʼaat. Joʼkan naq kiʼok xkʼoxlankil naq moko chaabʼil ta joʼ yuwaʼbʼej ut joʼ bʼeelomej ut naq li Jehobʼa jwal ra xchʼool rikʼin. Abʼan saʼ jun qʼoqyink, li xchʼina rabʼin kixkʼe saʼ jun li hu li naxye Isaías 30:15: «Wi texwanq saʼ xyaalal chi kʼojkʼooq leeraanm, teetaw xkawubʼ leechʼool». Moqon kixkʼe re ut kixye re: «Yuwaʼ, naq rahaq aachʼool jultika li raqal aʼin». Laj Dimitri kixkʼe reetal naq xbʼaan li Jehobʼa inkʼaʼ napaltoʼk re li xjunkabʼal li xtʼikr, li xtzekemq ut li rochoch. Aʼan naxye: «Li tento tinbʼaanu aʼan wank saʼ xyaalal ut naq junelik tinkʼojobʼ inchʼool rikʼin Linyos». Wi yookat xnumsinkil junaq li naʼlebʼ joʼ aʼin, chʼolchʼooq chaawu naq li Jehobʼa naxkʼe xchʼool chaawix ut tixkʼe aametzʼew re naq tatruuq xkuybʼal.

13. Kʼaru chik naxbʼaanu li Jehobʼa re xkʼutbʼal naq narusila qu?

¹³ Rikʼinebʼ li hermaan. Li Jehobʼa truuq xbʼaanunkil naq teʼalaaq saʼ xchʼool ebʼ laj kʼanjel chiru naq teʼxye qe ebʼ li aatin li tixwaklesi qachʼool naq naʼajmank chiqu. Aʼan li kixkʼul jun li hermaan ixq li wank Asia. Aʼan kixtzʼeq li xkʼanjel ut kiyajerk. Moqon li xbʼeelom kixbʼaanu jun nimla maak ut kixkanabʼ wank joʼ cheekel winq. Jwal ra tzʼaqal li yook xkʼulbʼal li hermaan joʼkan naq kixye: «Inkʼaʼ nintaw ru kʼaʼut yookin xkʼulbʼal chixjunil aʼin. Xinkʼoxla naq maare xinmaakobʼk ut naq maakʼaʼ chik li rusilal li Jehobʼa wikʼin». Joʼkan naq kixtzʼaama re naq tixkʼutbʼesi chiru naq toj naraheʼk ut aʼan kixsume li xtij. Chanru? Aʼan naxye: «Ebʼ li cheekel winq xeʼaatinak wikʼin ut xineʼxtenqʼa chi rilbʼal naq li Jehobʼa toj nikinxra». Moqon kixye wiʼ chik re li Jehobʼa naq naʼajmank chiru li xtenqʼ. Kʼaru kikʼulmank? Aʼan naxye: «Saʼ li kutan ajwiʼ aʼan xinkʼul jun li chʼinaʼusil esilhu rehebʼ li hermaan re linchʼuut. Naq xinyaabʼasi, xwekʼa naq li Jehobʼa xinrabʼi». Joʼ naqil, naabʼal sut li qʼunil aatin li nekeʼxye ebʼ li junchʼol naxkʼutbʼesi naq li Jehobʼa narusila qu (Sal. 10:17).

14. Chanru naroksi li Jehobʼa ebʼ li hermaan re xkʼutbʼal naq narusila qu?

¹⁴ Li Jehobʼa naxkʼutbʼesi ajwiʼ naq narusila qu naq naxbʼaanu naq ebʼ li hermaan teʼxkʼe qanaʼlebʼ naq naʼajmank chiqu. Jun eetalil, saʼ xkutankilebʼ li apóstol, kiroksi laj Pablo re naq tixtzʼiibʼa kaalaju li esilhu choʼq rehebʼ laj paabʼanel bʼarwiʼ kixqʼusebʼ abʼan kixkʼutbʼesi ajwiʼ li xrahom. Kʼaʼut kixbʼaanu li Jehobʼa naq laj Pablo tixkʼe ebʼ li naʼlebʼ aʼin? Xbʼaan naq chaabʼil ut nokooxra ut naqʼusuk «joʼ jun li yuwaʼbʼej naxqʼus li ralal raaro xbʼaan» (Prov. 3:​11, 12). Joʼkan naq, wi ani naxkʼe qanaʼlebʼ rikʼin li Santil Hu, miqakʼoxla naq maakʼaʼ chik li rusilal li Yos qikʼin. Aʼin bʼan naxkʼutbʼesi naq toj nokooxra (Heb. 12:6). Kʼaru chik naxkʼutbʼesi naq li Jehobʼa narusila qu?

JALAN CHIK LI NAʼLEBʼ LI NAXKʼUTBʼESI NAQ LI JEHOBʼA NARUSILA QU

15. Re anihebʼ naxkʼe li Jehobʼa li xsantil musiqʼej ut kʼaru chʼolchʼooq chiqu?

¹⁵ Li Jehobʼa naxkʼe li xsantil musiqʼej rehebʼ li narusila ru (Mat. 12:18). Naru tqakʼoxla: «Ma ninkʼutbʼesi saʼ linyuʼam li naʼlebʼ li naruuchi li santil musiqʼej?». Jun eetalil, ma qʼaxal nakaakʼutbʼesi li kuyum anaqwan chiru naq toj maajiʼ nakaanaw ru li Jehobʼa? Wi nakaakʼe reetal naq yookat xyuʼaminkil li naʼlebʼ li naruuchi li santil musiqʼej, chʼolchʼooq chaawu naq li Jehobʼa sa xchʼool aawikʼin. (Chaawil li kaaxukuut «Li naruuchi li santil musiqʼej aʼan. . .»).

16. Joʼ naxye 1 Tesalonicenses 2:​4, anihebʼ naroksi li Jehobʼa re xpuktesinkil li chaabʼil esil? Ut chanru nakaawekʼa aawibʼ xbʼaan aʼin?

¹⁶ Li Jehobʼa kixxaqabʼ saʼ xbʼeen li narusila ruhebʼ li kʼanjel re xpuktesinkil li chaabʼil esil (yaabʼasi 1 Tesalonicenses 2:4). Qilaq chanru li xJocelyn jun li hermaan kixkʼe reetal naq yaal li naʼlebʼ aʼin. Saʼ jun kutan, naq kiwakliik moko sa ta narekʼa ribʼ. Naxye: «Xwekʼa naq maakʼaʼ inmetzʼew, maakʼaʼ ninruuk xbʼaanunkil. Abʼan wankin joʼ aj kʼamolbʼe saʼ li puktesink ut saʼ li kutan aʼan tento tinxik chi puktesink. Joʼkan naq xintijok chiru li Jehobʼa ut xinʼelk». Saʼ li eqʼla aʼan li xJocelyn kiʼaatinak rikʼin li xMary, jun li ixq li chaabʼil xnaʼlebʼ li kixkʼulubʼa xtzolbʼal li Santil Hu. Wiibʼ oxibʼ po moqon li xMary kixye re li xJocelyn naq saʼ li eqʼla naq kiwulak saʼ rochoch, kitijok chiru li Yos re naq ttenqʼaaq. Kʼaru kixtzol li xJocelyn rikʼin li kixkʼul? Aʼan naxye: «Xwekʼa naq li Jehobʼa yook xyeebʼal we “Sa inchʼool aawikʼin”». Yaal naq moko chixjunilebʼ ta li poyanam teʼrabʼi li chaabʼil esil abʼan chʼolchʼooq chiqu naq sa xchʼool li Jehobʼa qikʼin naq naxkʼe reetal naq naqakʼe qachʼool chi puktesink.

17. Kʼaru naxkʼut chaawu chirix li kolbʼa ibʼ li naxye li xVicky? (Salmo 5:13).

¹⁷ Li narusila ruhebʼ li Jehobʼa nekeʼxtaw rusilal li kolbʼa ibʼ (1 Tim. 2:​5, 6). Abʼan, ut wi nachʼaʼajkoʼk chiqu xkʼulubʼankil naq li Jehobʼa narusila qu usta wank qapaabʼal chirix li kolbʼa ibʼ ut ak xkubʼeek qahaʼ? Qajultikaq naq moko junelik ta tqapaabʼ li naxye li qachʼool abʼan junelik tooruuq xpaabʼankil li naxye li Jehobʼa. Choʼq re, li nekeʼxpaabʼ li kolbʼa ibʼ tiikebʼ xchʼool ut naxye naq trosobʼtesihebʼ (yaabʼasi Salmo 5:13; Rom. 3:26). Li xVicky, jun li hermaan kʼajoʼ kitenqʼaak xnaʼlebʼankil rix li kolbʼa ibʼ. Usta nachʼaʼajkoʼk chiru xpaabʼankil naq naraheʼk xbʼaan li Jehobʼa, kixtaw ru aʼin: «Chiru naabʼal chihabʼ li Jehobʼa kixkʼutbʼesi naq wank xkuyum wikʼin [ . . . ]. Usta joʼkan, chanchan naq yookin xyeebʼal re: “Moko tzʼaqal ta rikʼin laarahom. Li xkamik Laawalal moko natzʼaqlok ta re naq taakuy linmaak”». Joʼ li xVicky, wi nokoonaʼlebʼak chirix li kolbʼa ibʼ tqekʼa li xrahom li Jehobʼa ut tchʼolaaq chiqu naq narusila qu.

18. Kʼaru chʼolchʼooq chiqu wi maajunwa naqakanabʼ xraabʼal li qachoxahil Yuwaʼ?

¹⁸ Usta tqakʼe qachʼool chi xyuʼaminkil chixjunil li xqatzol saʼ li tzolom aʼin, maare wank sut tchʼinaaq qachʼool ut tqakʼoxla wi li Jehobʼa narusila qu. Wi aʼan nakaakʼul, jultika naq aʼan narusila ruhebʼ «li inkʼaʼ nekeʼxkanabʼ xraabʼal» (Sant. 1:12). Joʼkan naq junelik jilon chixkʼatq li Jehobʼa ut chaawil li jalan jalanq chi naʼlebʼ bʼarwiʼ naxkʼutbʼesi naq sa xchʼool aawikʼin. Ut maajunwa chi sach saʼ aachʼool naq li Yos «moko najt ta wank qikʼin chiqajunqal» (Hech. 17:27).