NAʼLEBʼ RE TZOLOK 4
BʼICH 18 Bʼanyox Jehobʼa li qakolbʼal
Kʼaru naxkʼut chiqu li xkamik li Jesús?
«Joʼkaʼin naq kikʼutbʼesimank li xrahom li Yos» (1 JUAN 4:9).
RUʼUJIL LI TZOLOM
Kʼaru naxkʼut chiqu li xkamik li Jesús chirix li xchaabʼil naʼlebʼ li Jehobʼa ut li Jesús.
1. Kʼaru rusilal naqataw naq naqanima li xkamik li Jesús rajlal chihabʼ?
LI XKAMIK li Jesús aʼan jun li chaabʼil maatan li xqakʼul (2 Cor. 9:15). Saʼ xkʼabʼaʼ li xkamik li Jesús nokooruuk wank saʼ amiiwil rikʼin li Jehobʼa ut wank chi junelik. Wank naabʼal xyaalal re xbʼanyoxinkil li maatan li xkʼe qe li Jehobʼa, aʼan xbʼaanu aʼin xbʼaan naq nokooxra (Rom. 5:8). Joʼkan naq re naq junelik tqabʼanyoxi li xkamik li Jesús, aʼan kixye naq rajlal chihabʼ tqajultika li xkamik (Luc. 22:19, 20).
2. Kʼaru tqil saʼ li tzolom aʼin?
2 Saʼ li chihabʼ aʼin, li Xnimankil li Xkamik li Jesús tbʼaanumanq saʼ li sábado 12 re abril 2025. Chʼolchʼo naq chiqajunilo ak xqakʼubʼ qibʼ re wulak. Jwal us naq tqoksi li xqʼehil li Xnimankil li Xkamik li Jesús re xnaʼlebʼankil rixa li ak xbʼaanu li Jehobʼa ut li Jesús chiqix. Saʼ li tzolom aʼin tqil kʼaru naxkʼut chiqu li xkamik li Jesús chirix li Jehobʼa ut li Jesús. Ut saʼ li jun chik tzolom tqatzʼil rix kʼaru rusilal naqataw rikʼin li xkamik li Jesús ut chanru tooruuq xkʼutbʼesinkil naq naqabʼanyoxi.
KʼARU NAXKʼUT CHIQU LI XKAMIK LI JESÚS CHIRIX LI JEHOBʼA
3. Chanru naq rikʼin xkamik jun li winq teʼkoleʼq chixjunilebʼ li poyanam? (Chaawil ebʼ li jalam u).
3 Li xkamik li Jesús naxkʼutbʼesi naq li Jehobʼa naxra li tiikilal (Deut. 32:4). Kʼaʼut naqaye aʼin? Saʼ xkʼabʼaʼ naq laj Adán inkʼaʼ kiʼabʼink chiru li Yos chixjunilebʼ li ralal xkʼajol xeʼrechani li maak ut li kamk rikʼin (Rom. 5:12). Joʼkan naq li Jehobʼa kixtaqla chaq li Jesús re qakolbʼal chiru li maak ut li kamk. Abʼan, chanru naq rikʼin xkamik jun li winq li tzʼaqal re ru xyuʼam teʼkoleʼq chixjunilebʼ li poyanam? Li apóstol Pablo kixchʼolobʼ aʼin: «Joʼ chanru naq naabʼalebʼ xeʼmaakobʼk xbʼaan naq jun li winq [laj Adán] kixqʼet ribʼ, joʼkan ajwiʼ, naabʼalebʼ tiikaqebʼ xchʼool xbʼaan naq jun li winq [li Jesús] kiʼabʼink» (Rom. 5:19; 1 Tim. 2:6). Laj Pablo yook xyeebʼal naq chixjunilebʼ xeʼrechani li maak ut li kamk saʼ xkʼabʼaʼ naq jun li winq li tzʼaqal re ru inkʼaʼ kiʼabʼink chiru li Yos, joʼkan naq re elk rubʼel xwankil li maak ut li kamk, kaʼajwiʼ naʼajmank naq jun li winq li tzʼaqal re ru xyuʼam t-abʼinq chiru li Yos.
Jun li winq xtenebʼ li maak ut li kamk saʼ qabʼeen ut jun ajwiʼ li winq xoorisi rubʼel xwankil li maak ut li kamk. (Chaawil li raqal 3).
4. Kʼaʼut inkʼaʼ kiruuk xkanabʼankil li Jehobʼa naq ebʼ li ralal xkʼajol laj Adán li teʼabʼinq teʼwanq chi junelik?
4 Ma tento tkamq li Jesús re qakolbʼal? Ma inkʼaʼ truuq xkanabʼankil li Jehobʼa naq ebʼ li ralal xkʼajol laj Adán li teʼabʼinq teʼwanq chi junelik? Choʼq qe us raj naq xtuqubʼamank li chʼaʼajkilal chi joʼkaʼin abʼan qajultikaq naq li xtiikilal li Jehobʼa tzʼaqal re ru joʼkan naq li Jehobʼa moko xruuk ta xbʼaanunkil naq maakʼaʼ xkʼulmank.
5. Kʼaʼut chʼolchʼo chiqu naq li Jehobʼa junelik tixbʼaanu li us?
5 Qakʼoxlaq wi li Jehobʼa inkʼaʼ raj xtoj li qakolbʼal ut xkanabʼ naq ebʼ li ralal xkʼajol laj Adán teʼwanq chi junelik. Kʼaru raj xkʼulmank? Saʼ xkʼabʼaʼ naq inkʼaʼ xraqok aatin saʼ tiikilal ebʼ li kristiʼaan maare teʼxkʼoxla ma joʼkan ajwiʼ tnaʼlebʼaq saʼ jalan chik ebʼ li naʼlebʼ. Maare teʼxkʼoxla: ma ttzʼaqloq ru ebʼ li xyeechiʼom? Abʼan moko taaxik ta qachʼool chi xkʼoxlankil aʼin xbʼaan naq li Jehobʼa kinaʼlebʼak saʼ tiikilal, usta re xbʼaanunkil aʼin kixmayeja li Ralal li raaro xbʼaan re naq tkamq saʼ qakʼabʼaʼ. Joʼkan naq chʼolchʼo chiqu naq li Jehobʼa junelik tixbʼaanu li us.
6. Chanru nokooxtenqʼa li xkamik li Jesús rilbʼal joʼkʼihal nokooxra li Jehobʼa? (1 Juan 4:9, 10).
6 Li xkamik li Jesús naxkʼutbʼesi naq li Jehobʼa tiik xchʼool abʼan qʼaxal wiʼ chik naxkʼutbʼesi naq nokooxra (Juan 3:16; yaabʼasi 1 Juan 4:9, 10). Li Jehobʼa kixtaqla chaq li Ralal re naq tkamq saʼ qakʼabʼaʼ xbʼaan naq naraj naq toowanq chi junelik ut tooʼokenq saʼ li xjunkabʼal. Qakʼoxlaq aʼin: naq laj Adán kimaakobʼk inkʼaʼ chik kiwank saʼ li xjunkabʼal li Jehobʼa. Joʼkan naq chiqajunilo inkʼaʼ xooyoʼlaak saʼ li xjunkabʼal li Jehobʼa. Abʼan saʼ xkʼabʼaʼ li xkamik li Jesús ebʼ li kristiʼaan li teʼxpaabʼ li Yos ut teʼabʼinq chiru naru teʼwanq saʼ li xjunkabʼal li Yos. Ut anaqwan ajwiʼ li Jehobʼa naraj xkuybʼal qamaak ut naraj naq toowanq saʼ amiiwil rikʼin ut saʼ amiiwil rikʼinebʼ li qechpaabʼanel. Kʼajoʼ naq nokooxra li Jehobʼa! (Rom. 5:10, 11).
7. Chanru xkʼoxlankil li rahilal li kixnumsi li Jesús nokooxtenqʼa re xtawbʼal ru joʼkʼihal nokooxra li Jehobʼa?
7 Tooruuq xtawbʼal ru joʼkʼihal nokooxra li Jehobʼa wi naqakʼoxla naq jwal terto kixtoj li qakolbʼal. Laj Tza naxye naq maajun laj kʼanjel chiru li Yos tiikaq xchʼool chiru naq teʼxnumsi junaq li chʼaʼajkilal. Abʼan re xkʼutbʼesinkil naq moko joʼkan ta, li Jehobʼa kixkanabʼ naq li Jesús tixkʼul li rahilal naq toj maajiʼ nakamk (Job 2:1-5; 1 Ped. 2:21). Naq ebʼ li kristiʼaan xeʼxseʼe li Jesús ut ebʼ laj puubʼ xeʼxsakʼ ut xeʼxtʼuyubʼ chiru cheʼ li Jehobʼa kiril chixjunil li kixnumsi li Ralal ut chanru xkamsiik (Mat. 27:28-31, 39). Li Jehobʼa kiruuk raj xkolbʼal naq kixkʼe ribʼ chiru, naq ebʼ li kristiʼaan xeʼxye: «Anaqwan wi li Yos naraj xkolbʼal chixtenqʼaq» (Mat. 27:42, 43). Abʼan wi kixkol raj inkʼaʼ raj xtojmank rix li qakolbʼal ut ebʼ li kristiʼaan maakʼaʼebʼ raj roybʼenihom. Joʼkan naq li Jehobʼa kixkanabʼ naq li Ralal tixkʼul rahilal toj reetal naq kikamk.
8. Kʼaʼut naqanaw naq li Jehobʼa kirahoʼk xchʼool naq yookebʼ xrahobʼtesinkil li Ralal? (Chaawil li jalam u).
8 Yaal naq li Jehobʼa inkʼaʼ kiroksi li xwankilal re xbʼaanunkil naq li Ralal inkʼaʼ tixkʼul li rahilal, abʼan aʼin moko naraj ta xyeebʼal naq li Jehobʼa maakʼaʼ narekʼa. Li Jehobʼa xooxyobʼtesi re naq tqekʼa li sahil chʼoolejil ut li rahil chʼoolejil ut saʼ xkʼabʼaʼ naq xooxyobʼtesi joʼ xjalam u aʼan narekʼa ajwiʼ aʼin. Li Santil Hu naxye naq wankebʼ li kristiʼaan «keʼxkʼe xrahil xchʼool» ut keʼxchʼina xchʼool (Sal. 78:40, 41, Wy). Jun eetalil, li Jehobʼa kixye re laj Abrahán naq tixmayeja li ralal (Gén. 22:9-12; Heb. 11:17-19). Kʼoxla li rahil chʼoolej li kirekʼa laj Abrahán naq yook xkawresinkil ribʼ re xkamsinkil li ralal. Ut kʼaru tooruuq xyeebʼal chirix li Jehobʼa? webpubvid://?pub=jwb-106&track=4&langwritten=EKʼaru kirekʼa li Jehobʼa naq kiril naq yookebʼ xrahobʼtesinkil li Ralal toj reetal tkamsiiq. Relik chi yaal naq maamin tooruuq xyeebʼal joʼkʼihal li rahilal kirekʼa li Jehobʼa. (Chaawil saʼ jw.org li bʼideo Reetalil li xpaabʼalebʼ: Laj Abrahán [xkabʼ tasal]).
Kʼajoʼ kirahoʼk xchʼool li Jehobʼa rilbʼal naq xeʼxrahobʼtesi li Ralal. (Chaawil li raqal 8).
9. Kʼaru naxkʼut chaawu Romanos 8:32, 38, 39 chirix li xrahom li Jehobʼa?
9 Li xkamik li Jesús naxkʼut chiqu naq maaʼani chik nokooxra joʼ nokooxra li Jehobʼa chi moko junaq li qakomon malaj li qamiiw (yaabʼasi Romanos 8:32, 38, 39). Chi moko laaʼo naqara qibʼ joʼ nokooxra li Jehobʼa. Kʼoxla aʼin: ma nakaawaj wank chi junelik? Li Jehobʼa jwal naraj wiʼ chik naq tatwanq chi junelik. Ma nakaawaj naq tkuyeʼq laamaak? Li Jehobʼa jwal naraj wiʼ chik xkuybʼal aamaak. Li Jehobʼa kaʼajwiʼ naxpatzʼ qe naq tooʼabʼinq chiru ut tqapaabʼ re xkʼutbʼesinkil naq naqakʼulubʼa li xmaatan. Relik chi yaal naq li qakolbʼal aʼan reetalil li xrahom li Jehobʼa. Ut saʼ li akʼ ruuchichʼochʼ tooruuq xtzolbʼal xkomon qanaʼlebʼ chirix li xrahom li Jehobʼa (Ecl. 3:11).
KʼARU NAXKʼUT CHIQU LI QAKOLBʼAL CHIRIX LI JESÚS
10. a) Kʼaru naxkʼe xkʼaʼuxl li Jesús naq toj maajiʼ nakamk? b) Kʼaru kixbʼaanu li Jesús re xkolbʼal rix li xkʼabʼaʼ li Xyuwaʼ? (Chaawil li kaaxukuut «Li xtiikilal li Jesús kixkol rix li xkʼabʼaʼ li Jehobʼa»).
10 Li Jesús inkʼaʼ naraj naq inkʼaʼ us teʼaatinaq chirix li Xyuwaʼ (Juan 14:31). Li Jesús naxik xchʼool chi xkʼoxlankil naq truuq xbʼaanunkil naq inkʼaʼ tsantobʼresimanq li xkʼabʼaʼ li Xyuwaʼ saʼ xkʼabʼaʼ naq teʼxye naq naxmaajewa ut naxqʼet ribʼ chiru. Joʼkan naq kixye: «At Inyuwaʼ, wi naruhank, isi chiwu li ukʼlebʼ sekʼ aʼin» (Mat. 26:39). Saʼ xkʼabʼaʼ naq junelik kiwank chi tiik ru xchʼool chiru li Yos toj saʼ xkamik kiruuk xkolbʼal rix li xkʼabʼaʼ li Jehobʼa.
11. Chanru kixkʼutbʼesi li Jesús naq qʼaxal naxra ebʼ li kristiʼaan? (Juan 13:1).
11 Li qakolbʼal naxkʼut ajwiʼ naq li Jesús qʼaxal naxkʼe xchʼool chirixebʼ li kristiʼaan, qʼaxal wiʼ chik ebʼ li nekeʼtaqenk re (Prov. 8:31, Wy; yaabʼasi Juan 13:1). Li Jesús naxnaw naq twanq saʼ Ruuchichʼochʼ, naabʼal li rahilal tixkʼul ut qʼaxal ra naq tkamsiiq. Abʼanan moko kixbʼaanu ta li xkʼanjel yal saʼ xkʼabʼaʼ naq tenebʼanbʼil saʼ xbʼeen, chi anchal bʼan xchʼool kipuktesink, kikʼutuk ut kixtenqʼahebʼ li junchʼol. Ut saʼ li kutan naq tkamq kixchʼaj li roq ebʼ li xtzolom, kixwaklesihebʼ xchʼool ut kixkʼut chiru ebʼ li naʼlebʼ (Juan 13:12-15). Ut naq tʼuytʼu chiru li cheʼ kixkʼe roybʼenihom laj kamsinel li tʼuytʼu ajwiʼ chixkʼatq ut kixye re laj Juan naq tril li xnaʼ, aʼ li xMaría (Luc. 23:42, 43; Juan 19:26, 27). Li Jesús kixkʼutbʼesi naq qʼaxal naxra ebʼ li kristiʼaan naq kiwank arin saʼ Ruuchichʼochʼ ut naq kixkʼe li xyuʼam saʼ qakʼabʼaʼ.
12. Kʼaru ebʼ li naʼlebʼ yook xbʼaanunkil li Jesús chiqix?
12 Li Kriist «jun sut ajwiʼ kikamk [ . . . ] ut maajunwa chik tkamq», abʼan toj naxbʼaanu naabʼal li naʼlebʼ chiqix (Rom. 6:10). Joʼkan ajwiʼ kaw yook chi kʼanjelak re naq tqakʼul ebʼ li osobʼtesihom li nachalk saʼ xkʼabʼaʼ li qakolbʼal. Kʼoxla chixjunil li yook xbʼaanunkil joʼ awabʼej, xyuwaʼil aj tij ut joʼ li najolomink re li chʼuut (1 Cor. 15:25; Efes. 5:23; Heb. 2:17). Joʼkan ajwiʼ, tenebʼanbʼil saʼ xbʼeen xchʼutubʼankil li yulbʼilebʼ ru ut ebʼ li kristiʼaan re li junchʼol chik chi karneer ut li xkʼanjel ttzʼaqloq ru naq toj maajiʼ twulaq li nimla rahilal (Mat. 25:32; Mar. 13:27).b Joʼkan ajwiʼ naxbʼaanu chixjunil re naq ebʼ laj kʼanjel chiru teʼxkʼul li naʼlebʼ li tixkawresihebʼ li xpaabʼal saʼ rosoʼjikebʼ li kutan (Mat. 24:45). Ut chiru li jun mil chihabʼ naq t-awabʼejinq kaw tkʼanjelaq re qatenqʼankil. Joʼ naqakʼe reetal naq li Jehobʼa kixqʼaxtesi li Ralal saʼ qakʼabʼaʼ moko kaʼaj tawiʼ kixbʼaanu re naq tixqʼaxtesi li xyuʼam, re naq tixbʼaanu ajwiʼ naabʼal li naʼlebʼ saʼ qakʼabʼaʼ.
CHAATZOL XKOMON EBʼ LI NAʼLEBʼ
13. Kʼaru tatruuq xbʼaanunkil re xtzolbʼal xkomon chirix li xrahom li Yos ut li Jesukriist chiqix?
13 Xkʼoxlankil li ak xbʼaanu li Jehobʼa ut li Jesús chaawix tatxtenqʼa re xtzolbʼal xkomon aanaʼlebʼ chirix li xrahom li Jehobʼa ut li Jesukriist. Naru taayaabʼasi ebʼ li tasal li naʼaatinak chirix li xyuʼam li Jesús saʼ xqʼehil li Xnimankil li Xkamik li Jesús re li chihabʼ aʼin. Maayaabʼasi naabʼal ebʼ li tasal, kʼe bʼan aachʼool chi rilbʼal li xyaalal kʼaʼut tento tqara li Jehobʼa ut li Jesús. Ut misach saʼ aachʼool xwotzbʼal rikʼinebʼ li junchʼol li yookat xtzolbʼal.
14. Joʼ naxye Salmo 119:97, kʼaru tento tqabʼaanu re xtzolbʼal xkomon qanaʼlebʼ chirix li xkamik li Jesús ut jalan chik ebʼ li naʼlebʼ? (Chaawil li jalam u).
14 Wi ak naabʼal chihabʼ aawokik saʼ li yaal maare taakʼoxla wi tatruuq xtawbʼal xkomon li naʼlebʼ chirix junaq li naʼlebʼ li ak nawbʼil ru joʼ li xtiikilal li Yos, li xrahom ut li xkamik li Jesús. Abʼan li xyaalalil aʼan naq wank naabʼal li naʼlebʼ li tooruuq xtzolbʼal chirix aʼin. Li tatxtenqʼa re xtzolbʼal xkomon aanaʼlebʼ aʼan roksinkil chixjunil li naʼlebʼ li natawmank saʼebʼ li qatasal hu. Wi nakaataw junaq li raqal li inkʼaʼ nakaataw ru, sikʼ xkomon laanaʼlebʼ ut naʼlebʼa rix li xaataw ut li xaatzol chirix li Jehobʼa, li Ralal ut li rahok li nekeʼrekʼa chiqix (yaabʼasi Salmo 119:97).
Usta naabʼal chihabʼ qokik saʼ li yaal naabʼal tooruuq xtzolbʼal chirix li xkamik li Jesús, li tixbʼaanu naq qʼaxal tqabʼanyoxi li xeʼxbʼaanu li Jehobʼa ut li Jesús chiqix. (Chaawil li raqal 14).
15. Kʼaʼut inkʼaʼ tqakanabʼ xsikʼbʼal li tertokil pek li wank saʼ li Santil Hu?
15 Michʼinaak aachʼool wi inkʼaʼ nakaataw junaq li akʼ naʼlebʼ malaj junaq li naʼlebʼ li nawulak chaawu naq nakaayaabʼasi malaj nakaatzol saʼ li Santil Hu. Xtzolbʼal li Santil Hu chanchan xsikʼbʼal li oor. Naabʼalebʼ li kristiʼaan nekeʼxnumsi naabʼal li kutan ut naabʼal li hoonal re xsikʼbʼal li oor. Abʼan wankebʼ xkuyum ut nekeʼxkʼe xqʼe xbʼaan naq usta jwal kachʼin, choʼq rehebʼ jwal oxloqʼ. Li tertokil pek li naqataw saʼ li Santil Hu jwal wank wiʼ chik xwankil chiru li oor (Sal. 119:127; Prov. 8:10). Joʼkan naq chiwanq aakuyum ut maakanabʼ xyaabʼasinkil ut xtzolbʼal li Santil Hu (Sal. 1:2).
16. Chanru tqakʼam qe rikʼin li Jehobʼa ut li Jesús?
16 Naq tattzoloq sikʼ chanru xyuʼaminkil li nakaatzol. Jun eetalil, naru taakʼam aawe rikʼin li xtiikilal li Jehobʼa naq inkʼaʼ tatsikʼoq u. Joʼkan ajwiʼ naru taakʼam aawe rikʼin li Jesús naq kixra li Xyuwaʼ ut ebʼ li kristiʼaan naq taakʼul li rahilal saʼ xkʼabʼaʼ li Jehobʼa. Tenqʼahebʼ laawechpaabʼanel usta tchʼaʼajkoʼq chaawu xbʼaanunkil ut taakʼe chi naweʼk li chaabʼil esil rehebʼ li junchʼol re naq chi joʼkan teʼwanq chiru xtawbʼal rusilal li xkamik li Jesús.
17. Kʼaru tqatzʼil rix saʼ li jun chik tzolom?
17 Wi inkʼaʼ naqakanabʼ xtzolbʼal xkomon qanaʼlebʼ chirix li xkamik li Jesús qʼaxal wiʼ chik tqara li Jehobʼa ut li Ralal. Ut ebʼ aʼan qʼaxal wiʼ chik tooʼeʼxra (Juan 14:21; Sant. 4:8). Joʼkan naq qoksihaq chixjunil li naxkʼe qe li Jehobʼa re xtawbʼal xkomon qanaʼlebʼ chirix li xkamik li Jesús. Saʼ li jun chik tzolom tqatzʼil rix kʼaru rusilal naqataw rikʼin li xkamik li Jesús ut chanru tooruuq xkʼutbʼesinkil naq naqabʼanyoxi li xrahom li Jehobʼa.
BʼICH 107 Li Yos, reetalil li rahok
a XNIMAL RU NAʼLEBʼ: «Naʼlebʼak» naraj xyeebʼal xkʼebʼal qahoonal re xkʼoxlankil junaq li naʼlebʼ re naq tqataw ru chiʼus ut xtzolbʼal xkomon qanaʼlebʼ.
b Saʼ Efesios 1:10, laj Pablo naʼaatinak chirix xchʼutubʼankil «li wank saʼ choxa». Saʼ Mateo 24:31 ut Marcos 13:27, li Jesús naʼaatinak chirix xchʼutubʼankil li «sikʼbʼilebʼ ru». Naq laj Pablo ut li Jesús xeʼaatinak chirix xchʼutubʼankil, yookebʼ chi aatinak chirix jalan jalanq li naʼlebʼ. Laj Pablo yook chi aatinak chirix li hoonal naq li Jehobʼa naxsikʼebʼ ru li teʼawabʼejinq rikʼin li Jesús ut naxyulebʼ rikʼin santil musiqʼej. Ut li Jesús yook chi aatinak chirix li hoonal naq li yulbʼilebʼ ru li toj wankebʼ saʼ Ruuchichʼochʼ teʼkʼameʼq saʼ choxa saʼ xqʼehil li nimla rahilal.