Bitumba ya Ukraine Me Kota na Mvula ya Zole—Inki Kivuvu Biblia Ke Pesa?

Na Kitanu 24 février 2023, mvula mosi ta lunga banda kima mosi ya mbi kibeni yantikaka: bitumba na insi Ukraine. Na kutadila bansangu ya nkaka, kiteso ya basoda 300 000 ya Ukraine mpi ya Russie me fwa to me lwala na bitumba yai mpi bansangu yango ke monisa nde bantu kiteso ya 30 000 me fwa na bitumba. Kansi ntalu yai lenda vanda na nsi.

Diambu ya mawa kele nde, ata kima mosi ve ke monisa nde bitumba yai ta mana ntama ve.

• Radio mosi (National Public Radio) tubaka na Lumingu 19 février 2023 nde: “Banda basoda ya insi Russie kotaka na Ukraine, ata kima mosi ve ke monisa nde bitumba yai ta mana sesepi. Ata kima mosi mpi ve ke monisa nde Ukraine to Russie bantu ta nunga bitumba yai, mpi ata kima mosi ve ke monisa kibeni nde bansi yai zole ta wakana.”

Yo kele mbi ve mutindu bantu mingi ke kudiyangisa sambu na mpasi yina bitumba yai mpi bitumba ya nkaka yina ke salama ke natila bantu yina me sala ve mbi na ntoto ya mvimba. Inki kivuvu Biblia ke pesa? Keti kilumbu kele bitumba ta mana?

Bitumba yina ta sukisa bitumba yonso

Biblia ke tubila bitumba mosi yina ta gulusa bantu. Kansi yo ta fwa bo ve. Bo ke bingaka bitumba yango Armagedoni mpi Biblia ke tubaka nde yo kele “bitumba ya kilumbu ya nene ya Nzambi Nkwa-Ngolo Yonso.” (Kusonga 16:14, 16) Nzambi ta sadila bitumba yina sambu na kukatula baluyalu yonso ya bantu ya me nataka bitumba mingi ya me fwaka bantu. Sambu na kuzaba mutindu bitumba ya Armagedoni ta nata ngemba ya mvula na mvula na ntoto, tanga masolo yai:

• “Bitumba ya Armagedoni Kele Nki?”

• “Armagedoni Kele Bitumba ya Mbote!”