2023: Mvula Mosi ya Mpasi​—Inki Biblia Ke Tuba?

Na 2023, mambu mingi ya me salama na ntoto ya mvimba me monisa pwelele nde beto ke zinga na ntangu yina Biblia ke bingaka nde “bilumbu ya nsuka.” (2 Timoteo 3:1) Tala mutindu mambu ya ke salama bubu yai na ntoto ke wakana ti mambu yina Biblia tubaka nde yo ta salama na bilumbu na beto.

Mambu ya Biblia Tubaka Nde Yo Ta Salama na Ntoto ya Mvimba

“Makelele ya bitumba mpi bansangu ya bitumba.”​—Matayo 24:6.

• “Mubulu mpi bitumba ke kuma mingi na bisika mingi na ntoto.”a

“Ntoto ta nikana na bisika ya mutindu na mutindu.”​—Marko 13:8.

• “Banda na luyantiku ya mvula 2023, kunikana ya ntoto ya ngolo mpenza (magnitude 7) me salama bambala 13; yo kele ntalu ya kuluta zulu na mvula mosi banda ya bo me yantikaka kutanga yo.”b

“Mambu ya ke pesa boma.”​—Luka 21:11.

• António Guterres ya kele sekretere ya kimvuka ya bo ke bingaka Nations unies tubaka nde “Mpila ntangu me kuma ngolo bilumbu yai, yo ke bonso beto ke zinga na kati ya masa ya tiya yina ke toka.”c

“Nzala.”​—Matayo 24:7.

• “2023: Mvula ya nkaka ya mpasi sambu na bantu yina ke niokwamaka sambu na kusansa mabuta na bo.”d

“Bantangu ya mpasi mpi ya nku.”​—2 Timoteo 3:1.

• “Na ntoto ya mvimba, muntu mosi na kati ya bantu nana ke belaka mosi ya bamaladi ya ntu to maladi ya basusi.”e

Inki Ta Kumina Beto na 2024?

Ata muntu mosi ve ke zaba mbote mambu yina ta salama na 2024. Kansi mambu ya ke salama na ntoto ke monisa nde ntama ve, Kimfumu ya Nzambi to guvernema ya zulu, ta baka kisika ya baguvernema ya bantu mpi yo ta katula mambu yonso ya ke salaka nde bantu kumona mpasi to kukuma ti basusi.​—Daniel 2:44; Revelation 21:4.

Awa ya beto ke vingila nde mambu yai kusalama, kana beto ke kudiyangisa, beto tudila Nzambi ntima sambu yandi sadisa beto. Biblia ke tubaka nde:

“Ntangu ya mono kele na boma, mono ke tulaka ntima na nge.”​—Nkunga 56:3.

Inki mutindu beto lenda monisa nde beto ke tudilaka Nzambi ntima? Beto ke lomba nge na kulonguka mambu mingi yina Biblia ke tubaka sambu na bilumbu ke kwisa, ntangu beto ta monaka diaka ve mpasi. Ndima kulonguka Biblia ya ofele sambu na kuzaba mambu yina nge ti dibuta na nge lenda sala sambu na kubaka mambote ya balusilu yai ya Biblia.