Bantu Ke Tudila Diaka Ve Bamfumu ya Politiki Ntima—Inki Biblia Ke Tuba?

Bansi mingi ta sala voti sambu na kupona bantwadisi na bo na mvu 2024. Kupona bamfumu mutindu yai me salamaka ntete ve mingi mpidiyai na ntoto ya mvimba na mvula mosi mpamba. Kansi bantu mingi ke tudila diaka bamfumu ya politiki ntima.

• Sentre mosi ya bo ke salaka bansosa (Pew Research Center) monisaka na Kizole 19 setpembre 2023 nde, bantu ya ke zingaka na Amerika yina bo yulaka bangiufula tubaka nde “kima ya ke pusaka bamfumu mingi ya politiki kele lukasi ya bo kele na yo na kisika ya kusadila bantu yina bo ke monisaka.”a

Kiteso mosi, bantu mingi ke tudilaka ve bantu ya politiki ntima.

• Zulunalu mosi (The New York Times) tubaka na Kintete 29 janvier 2024 nde: “Bubu yai, batoko mingi kele pene-pene ya kumanisa mambu ya mpasi, kansi bo ke tuba nde bamfumu ya politiki ke kuka ve kumanisa mambu yina.”

• Zulunalu ya nkaka (The Korea Times) tubaka na Kintete 22 janvier 2024 nde: “Na kutadila kimvuka mosi ya bantu yina bo yulaka, batoko ke tula ntima na bantu yina ke tulaka bavideo na Internet mpi bo kele ti bantu mingi ya ke landaka bo na kisika ya kutula ntima na bantu ya politiki.”

Keti beto lenda tula ntima nde bamfumu ya politiki ta sala nde mambu kubonga na bilumbu ke kwisa? Nani beto lenda tudila ntima?

Keba na bantu ya nge ke tudila ntima

Yo kele mbote nde bantu kukeba na banani to ke tudila ntima. Biblia ke tuba nde “bantu ya kukonda mayele ke ndimaka mambu yonso, kansi muntu ya mayele ke tadilaka kitambi na yandi.”—Bingana 14:15.

• Sambu na kuzwa bandongisila ya mbote yina ta sadisa nge na kuzaba inki mutindu nge lenda zaba kana bansangu kele ya masonga to ya luvunu, tanga disolo “Kuditanina na Bansangu ya Luvunu.”

Katula yo, yo vanda bamfumu ya politiki yina kele masonga mpi ti bangindu ya mbote, bo lenda kuka ve kusala mambu yonso. Yo yina Biblia ke pesa beto lukebisu yai:

• “Beno kutula ve ntima na bamfumu ya ntoto; bo kele bantu; bo ta gulusa beno ve.”—Nkunga 146:3, Nzambi Ngungudi ya Bantu na Yandi.

Ntwadisi yina nge lenda tudila ntima

Biblia ke tuba nde, Nzambi me ponaka ntwadisi mosi ya me fwana mpi ya bantu lenda tudila ntima: Yezu Kristu. (Luka 1:32, 33) Yezu kele Ntotila ya Kimfumu ya Nzambi yina kele guvernema ya ta yala bantu katuka na zulu.—Matayo 6:10.

• Longuka na kuzaba sambu na nki nge lenda tudila Yezu ntima mpi mambu yina yandi ta sala sambu na kumanisa bampasi yonso ya beto ke mona. Tanga masolo “Nani Kele Ntotila ya Kimfumu ya Nzambi?” mpi “Inki Mambu Kimfumu ya Nzambi Ta Sala?”