Vanda ti Banduku Sambu na Nge Kudiwa Ve Nge Mosi—Inki Mutindu Biblia Lenda Sadisa Nge?

Na 2023, bantu yina ke talaka mambu ya sante monaka nde kana muntu ke kudiwa yandi mosi, yo kele mbi sambu na sante; yo yina bo fwete sala kima mosi sambu bantu kudiwa ve mutindu yai. Inki lenda manisa diambu yai?

• Doktere Vivek Murthy ya ke salaka bantu operasio mpi ya ke zingaka na États-unis ke tuba nde: “Kana beto ke kudiwa beto mosi mpi beto kudivandila, beto ta vanda ve ti sante ya mbote mpi beto ta vanda ve na kiese.” Yandi ke tuba diaka nde: “Beto lenda sala kima mosi sambu na kudiwa diaka ve mutindu yina.” Inki beto fwete sala? Yandi ke yika nde: “Beto lenda sala mambu ya fioti-fioti konso kilumbu sambu na kukumisa kinduku na beto ti bantu ya nkaka ngolo.”a

Kima ya ke salaka nde muntu kudiwa yandi mosi kele kaka ve kudivandila. Bantu ya nkaka ke kudiwaka bo mosi ata bo kele kisika mosi ti bantu ya nkaka. Biblia lenda sadisa beto ata beto ke kudiwa beto mosi sambu na konso kikuma yina. Biblia kele ti bandongisila ya mfunu yina lenda sadisa beto na kuzaba mutindu beto lenda kumisa kinduku na beto ti bantu ya nkaka ngolo, sambu yo ta sadisa beto na kudiwa ve beto mosi.

Bandongisila ya Biblia lenda sadisa nge

Solulaka mbote ti bantu. Yo ke tendula nde kaka beto mpamba ve bantu fwete songaka bantu ya nkaka mutindu beto ke kudiwa. Kansi beto fwete widikila mpi na dikebi yonso mambu yina bantu ya nkaka ke tuba na yina me tala mutindu bo ke kudiwa. Kana nge ke monisa muntu ya nkaka nde nge ke tudila yandi dikebi, kinduku na nge ti yandi ta kuma ngolo.

• Ndongisila ya Biblia: “Beno sosa kaka ve mambote na beno mosi, kansi mpi mambote ya bantu ya nkaka.”—Bafilipi 2:4.

Vanda ti banduku ya mutindu na mutindu. Vanda ya kuyilama na kusala kinduku ti bantu yina kele bambuta na nge mpi baleke na nge to bantu yina ke salaka ve mambu kaka bonso nge to ya kele ve insi mosi ti nge.

• Ndongisila ya Biblia: “Beno kangula kibeni ntima na beno.”—2 Bakorinto 6:13.

Kana nge ke zola kuzaba mambu mingi na yina me tala mutindu nge lenda kumisa kinduku na nge ti bantu ya nkaka ngolo, tanga disolo “Comment combler notre besoin d’amitié.”