Bukristu ya Kyeleka Kele Kaka Ngolo

KISALU ya Yezu Kristu kunikisaka mpenza inza na mvu-nkama ya ntete. Nsangu ya yandi longaka kuvandaka ya ngolo, yo kangulaka bantu meso, mpi yo sobaka bo na mutindu mosi ya kuyitukisaka mpenza. Malongi na yandi kusimbaka mpenza ntima ya bantu mingi yina vandaka kuwidikila yandi.​—Matayo 7:28, 29.

Yezu kuwaka ve boma na kubuya kukota na mambu yina bamfumu ya mabundu ti ya politiki ya ntangu yina vandaka kusala sambu na kunyokula bantu, kansi yandi salaka yonso na mpila nde bantu ya mpamba kupusana penepene ti yandi. (Matayo 11:25-30) Yezu kundimaka pwelele nde bampeve ya mbi vandaka kubebisa ntoto mpi yandi monisaka nde Nzambi kupesaka yandi kiyeka na zulu na bo. (Matayo 4:2-11, 24; Yoane 14:30) Na mayele yonso, Yezu kutendulaka kuwakana ya ngolo yina kele na kati ya mpasi ti disumu, mpi yandi monisaka na zola yonso nde Kimfumu ya Nzambi takatula mambu yina yonso kimakulu. (Marko 2:1-12; Luka 11:2, 17-23) Yandi katulaka kimakulu mudidi yina vandaka kusala nde bantu kubakisa ve kimuntu ya Tata na yandi, yo yina yandi longaka zina ya Nzambi na bantu yonso yina kundimaka na kukuma banduku na Yandi.​—Yoane 17:6, 26.

Yo yina, mpila ya kuyituka kele ve na kumona nde ata bantu ya mabundu ti ya politiki kunyokulaka balongoki ya Yezu, balongoki yango kumwangaka nsangu na yandi ya ngolo nswalu mpenza. Na nima ya bamvula kiteso ya 30 mpamba, mabundu ya ngolo ya Bukristu kubutukaka na Afrika, na Azia, mpi na Eropa. (Kolosai 1:23) Mwa bakyeleka yina Yezu kulongaka kutemunaka bantima ya bantu yonso ya kudikulumusa, mpi ya masonga yina vandaka na nsi ya Kimfumu ya Roma.​—Efezo 1:17, 18.

Inki mutindu balongoki yonso ya mpa yina vandaka kukatuka na bimvuka ya kuswaswana na kimvwama, luzingu, bandinga, mpi lusambu kumaka kuzinga mpenza na bumosi na “lukwikilu mosi,” mutindu ntumwa Polo kutubaka? (Efezo 4:5) Inki zolaka kusala nde bo landa na ‘kuwakana’ sambu na kukonda kukabwana? (1 Korinto 1:10) Sambu Bakristu ya zina mpamba kekabwanaka mingi bubu yai, yo kele mbote nde beto tadila mambu yina Yezu yandi mosi kulongaka.

Kima Yina Kesimbaka Bumosi ya Bukristu

Ntangu yandi vandaka kusamba na ntwala ya Ponse Pilate, Yezu kumonisaka kima yina kesimbaka bumosi ya Bukristu. Yandi tubaka nde: “Kisalu ya mono butukilaka ti ya mono kwisilaka awa na nsi-ntoto, yo kele sambu na kutuba kitemwe na mambu yina kele ya kieleka. Konso muntu yina kele ya kieleka, yandi ke waka ndinga na mono.” (Yoane 18:37) Yo yina, kundima malongi ya Yezu kumosi ti mambu yonso yina kele na Ndinga ya kupemama ya Nzambi, Biblia, kele ti bupusi ya ngolo ya kuvukisa balongoki ya kyeleka ya Kristu.​—1 Korinto 4:6; 2 Timoteo 3:16, 17.

Ntembe kele ve nde, na bantangu yankaka, yo zolaka kusalama nde balongoki ya Yezu kudiyula bangyufula ya masonga to nkutu bo konda kuwakana bo na bo. Kansi, inki zolaka kusadisa bo? Yezu kutendulaka nde: “Ntangu Mpeve ya kieleka ta kwisa, yandi ta nata beno na nzila ya kieleka yonso. Yandi ta tuba ve na kiyeka na yandi mosi, kansi yandi ta tuba mambu yonso yina ya yandi ta wa, yandi ta zabisa beno mpi mambu yina fweti kwisa.” (Yoane 16:12, 13) Verse yai kemonisa nde mpeve santu ya Nzambi zolaka kusadisa balongoki ya kyeleka ya Yezu na kubakisa kyeleka na kiteso yina Nzambi vandaka kusadisa bo na kuzaba yo fyotifyoti. Mpeve yango zolaka kusadisa bo dyaka na kubuta bambuma, bonso zola, kyese, ti ngemba, yina zolaka kusala nde bumosi kuvanda na kati na bo.​—Bisalu 15:28; Galatia 5:22, 23.

Yezu kupesaka ve nswa nde kukabwana to tubimvuka kuvanda na kati ya balongoki na yandi; yandi pesaka bo mpi ve nswa ya kutendula bakyeleka ya Biblia na mutindu mosi yina tasala nde yo wakana ti bansiku ya bambuta to ya lusambu ya babwala ya bantu yina bo takutanaka ti bo. Kansi na mpimpa, na ntwala nde yandi kufwa, yandi salaka kisambu mosi ya ngolo nde: “Mono ke samba kaka ve sambu na balonguki na mono mpamba, kansi mono ke samba mpi sambu na bantu yina ta tula ntima na mono sambu na malongi na bo. Mono ke samba sambu bo yonso kuvanda muntu mosi. Tata, bo vanda na kimvuka ti beto, mutindu nge kele na mono, mono mpi kele na nge. Bo vanda muntu mosi, sambu bantu ya nsi-ntoto yai kundima nde nge muntu tindaka mono.” (Yoane 17:20, 21) Yo yina, yo lombaka nde, banda na ntangu yina tii bubu yai, balongoki ya Kristu kuzabana sambu na bumosi na bo ya masonga na mpeve mpi na kyeleka. (Yoane 4:23, 24) Ata mpidina, mabundu ya bubu kevandaka ve na bumosi, kansi ya kukabwana. Sambu na inki?

Sambu na Nki Mabundu Ke ya Kukabwana

Ntendula ya masonga ya beto lenda pesa sambu na kumonisa kikuma ya mesalaka nde Bakristu ya zina mpamba ya bubu yai kuvanda ti malongi mpi bikalulu ya kuswaswana kele nde bo kelandaka ve malongi ya Yezu. Nsoniki mosi kutubaka nde: “Bonso na ntangu ya ntama, Bakristu ya mpa ya bubu yai kesosaka kupona kaka malongi ya Biblia yina kewakana ti mambu ya bo kezolaka. Mpi bo kebuyaka kundima malongi yonso yina kewakana ve ti balusambu ya bankaka na bo.” Yai kele mpenza mambu yina ya Yezu ti balongoki na yandi kutubaka nde yo tasalama.

Mu mbandu, mpeve santu kutwadisaka ntumwa Polo na kusonikila nduku na yandi Timoteo, yina kuvandaka nkengi, nde: “Na bilumbu ke kwisa na ntwala, bantu ta zola diaka ve kuwa malongi ya kieleka, kansi bo ta landaka mabanza na bo mosi, bo ta bakaka balongi ya nkaka mingi sambu na kulonga bo konso mambu yina ya bo zola wa. Bo ta waka diaka mambu ya kieleka ve, kansi bo ta tulaka makutu na bo mingi na kuwa bingana ya luvunu.” Keti Bakristu yonso zolaka kukusama? Ve. Polo keyika nde: “Kansi nge, na mambu yonso nge fweti kudiyala; kanga ntima sambu na bampasi; sala kisalu na nge ya kulonga Nsangu ya Mbote; lungisa kisalu na nge yonso ya nge fweti sala sambu na kusadila Nzambi.” (2 Timoteo 4:3-5; Luka 21:8; Bisalu 20:29, 30; 2 Piere 2:1-3) Timoteo ti Bakristu yankaka ya kwikama vandaka kulanda ndongisila yai ya kupemama.

Bakristu ya Kyeleka Kele Kaka na Bumosi

Bonso Timoteo, Bakristu ya kyeleka ya bubu ketaninaka mabanza na bo na ntangu bo kebuyaka bangindu ya bantu mpi kendimaka nde malongi na bo fwete katuka kaka na Masonuku. (Kolosai 2:8; 1 Yoane 4:1) Bonso Bakristu ya mvu-nkama ya ntete, Bambangi ya Yehowa kesala kisalu na bo na bansi kuluta 230, bo kenatila bantu ya bisika yonso nsangu ya mbote ya Kimfumu yina Yezu kulongaka banda na luyantiku. Beto tadila bikuma yina kesalaka nde bo landa mbandu ya Yezu mpi bo monisa nde bo kele na Bukristu ya kyeleka ata bo kezinga na nki kisika.

Malongi na bo kekatukaka na Ndinga ya Nzambi. (Yoane 17:17) Nganga-Nzambi ya Parwase mosi ya Belgique kusonikaka mutindu yai sambu na bo: “Kima mosi ya mu lenda longuka na bo [Bambangi ya Yehowa] kele luzolo yina bo kele na yo ya kulanda Ndinga ya Nzambi mpi kikesa na bo ya kuta kimbangi na yo.”

Bo kekingaka nde Kimfumu ya Nzambi kukwisa kukatula bampasi na ntoto ya mvimba. (Luka 8:1) Mbangi mosi ya Barranquilla, na Colombie, kusolulaka ti Antonio yina kuvandaka muntu mosi ya ngolo ya muvuma mosi ya politiki. Mbangi yango kukotilaka ve muvuma na yandi, yandi pusaka mpi ve bantu yankaka na kundima bangindu ya mivuma ya politiki yankaka, kansi yandi lombaka Antonio nde kana nge mezola mono lenda yantika kulonguka Biblia ya ofele ti nge mpi ti bampangi na nge ya bankento. Ntama mingi ve Antonio kubakisaka nde Kimfumu ya Nzambi kele mpenza kivuvu mosi kaka sambu na bansukami ya Colombie ti ya inza ya mvimba.

Bo kepesaka zina ya Nzambi lukumu. (Matayo 6:9) Ntangu Maria (Mukristu ya Katolika mosi ya nkento yina kezingaka na Australie) kukutanaka mbala ya ntete ti Bambangi ya Yehowa, yandi pesaka bo nswa ya kusonga yandi zina ya Nzambi na kati ya Biblia. Inki yandi salaka ntangu yandi monaka yo? “Mu dilaka ntangu mu monaka zina ya Nzambi mbala ya ntete na kati ya Biblia. Mu waka kyese mingi sambu na nzayilu ya mu kumaka kubaka mpi na kusadila zina ya Nzambi.” Maria kulandaka na kulonguka Biblia, mpi mbala ya ntete na luzingu na yandi, yandi longukaka na kuzaba mpenza nde Yehowa kele muntu mpi yandi salaka kinduku ya ngolo ti yandi.

Bo kele ya kuvukana na zola. (Yoane 13:34, 35) Zulunalu mosi ya Canada (The Ladysmith-Chemainus Chronicle) kutubaka nde: “Ata nge kekwikilaka na malongi ya nki dibundu, to nge kekwikilaka ve ata na malongi ya dibundu mosi, nge fwete sikisa Bambangi ya Yehowa 4500 yina mekatuka kutunga na kikesa yonso Nzo ya Balukutakanu ya nene ya bametre-kare 2 300 na mposo mosi ti ndambu na Cassidy . . . Kisalu yai ya bo mesala na kyese yonso kukonda kuswana, kukabwana, to kusosa lukumu na bo mosi memonisa nde bo kele mpenza na Bukristu ya kyeleka.”

Mambu yonso kemonana mpenza pwelele. Na lere yai ya bantu ya teolozi, bamisionere, ti bantu ya kekwendaka na banzo-Nzambi ya Kikristu kele na kunwana sambu kukonda kuwakana yina kele na banzo-Nzambi na bo, Bukristu ya kyeleka kelanda na kukuma kaka ngolo na inza ya mvimba. Ya kyeleka, Bakristu ya kyeleka ke na kulungisa kisalu na bo ya kusamuna mpi ya kulonga Ndinga ya Nzambi. (Matayo 24:14; 28:19, 20) Kana nge kele na kati ya bantu yina ‘ke mona mpasi ti kudila’ sambu na mambu yonso ya nzanzi yina kesalama ntangu yai mpi kewa mpasi na ntima na kumona kukonda kuwakana yina kele na kati ya mabundu ya Kikristu, beto kelomba nge na kwenda kuvukana ti Bambangi ya Yehowa sambu na kusambila Nzambi mosi kaka ya kyeleka, Yehowa, na kati ya Bukristu yina kele na bumosi.​—Ezekiele 9:4; Yezaya 2:2-4.