Keti Nge Kele ya Kuyilama Sambu na Kuta Kimbangi ya Dibaku ya Mbote?
1. Inki mbandu kemonisa nde kimbangi ya dibaku ya mbote lenda buta bambuma ya mbote?
1 Kimbangi ya dibaku ya mbote lenda buta mpenza bambuma ya mbote. Biblia kele ti bambandu mingi ya kimbangi ya dibaku ya mbote yina kubasisaka bambuma ya mbote. (Yoa. 4:7-15) Inki beto lenda sala sambu na kudibongisa na kuta kimbangi ya mutindu yai?
2. Inki mutindu mvwatu mpi mutindu na beto ya kuyidika nitu lenda sadisa beto na kuta kimbangi?
2 Kulwata mpi Kuyidika Nitu: Kutula ntangu yonso dikebi na kulwata mpi na mutindu na beto ya kuyidika nitu tasadisa beto na kuzabisa bankaka balukwikilu na beto kukonda mpasi. (1 Tim. 2:9, 10) Kana beto kebakisa nde beto melwata ve mbote, ziku beto tavanda ve ti kikesa ya kuta kimbangi. Kansi, kana mvwatu na beto kele ya kuyidika mbote mpi ya bunkete, yo lenda benda dikebi ya bantu yankaka. Mu mbandu, bankwelani zole ya Bambangi, yina kulwataka mbote mpi ya vandaka kusala nzyetelo, kuvandaka penepene ya Muzuluma mosi. Ntangu bakala yango kumonaka mutindu bo lwataka, yandi yulaka bo kana bo vandaka Bakristu. Dyambu yai kusalaka nde bo solula masolo ya Biblia ti bakala yina na nsungi ya bangunga tatu.
3. Na mbandu ya Yezu, inki mutindu nge lenda yantika disolo?
3 Kuyantika Masolo: Ntangu Yezu kukutanaka ti nkento ya Samaria na dibulu ya masa ya Yakobi, yandi yantikaka disolo na kulombaka kaka nkento yina na kupesa yandi masa ya kunwa. Mutindu mosi, beto lenda kuka kuyantika disolo na kutubaka dyambu mosi ya nkufi to na kuyulaka ngyufula mosi ya pete. Ata bantangu yankaka beto lenda vanda na badute, kana beto ketula ntima na lusadisu ya Yehowa, beto lenda baka “kikesa” sambu na kuyantika disolo.—1 Tes. 2:2.
4. Inki mutindu beto lenda kudibongisa sambu na kuta kimbangi ya dibaku ya mbote?
4 Mutindu ya Kusosa Mabaku: Bansamuni mingi mezwaka mitindu ya kuta kimbangi ya dibaku ya mbote. Tadila dyaka luzingu na nge, mpi yindula bantu yina nge lenda kutana ti bo konso kilumbu. Baka mikanda ya nge lenda sadila mpi Biblia mosi ya fyoti. Talaka mbote, mpi tula dikebi na bantu yina kele na nzyunga na nge. Kana nge yindula na ntwala mabaku ya nge lenda kutana ti yo na kilumbu, ziku nge tavanda ya kuyilama sambu na kuta kimbangi ya mbote.—Filp. 1:12-14; 1 Pie. 3:15.
5. Sambu na nki beto fwete baka ve kisalu ya kuta kimbangi ya dibaku ya mbote bonso kisalu mosi ya beto lenda sala kukonda kudibongisa?
5 Beto kele na bikuma zole ya mbote ya kusadila mabaku ya kuta kimbangi ya dibaku ya mbote—zola sambu na Nzambi mpi zola sambu na mfinangani. (Mat. 22:37-39) Sambu beto fwete sala kisalu ya kusamuna kukonda kusukinina, beto lenda baka ve kisalu ya kuta kimbangi ya dibaku ya mbote bonso kisalu mosi ya beto lenda sala kukonda kudibongisa. Beto fwete vanda ya kuyilama na kusadila konso dibaku ya mbote sambu na kuzabisa bankaka nsangu ya mbote ya Kimfumu awa ya ntangu kele ntete.—Roma 10:13, 14; 2 Tim. 4:2.