Beto Kele Bambangi Ntangu Yonso
1. Inki beto lenda longuka na disolo ya ketadila kimbangi yina Yezu kutaka na nkento mosi na dibulu ya masa?
1 Yezu metambula na nsungi ya bangunga mingi. Yandi melemba mpi kele na mpusa ya masa. Ntangu balongoki na yandi mekwenda kusumba madya, yandi mevanda na dibulu ya masa na nganda ya mbanza mosi ya Samaria sambu na kupema. Yezu kukwendaka ve na Samaria sambu na kusamuna; yandi vandaka kuluta kaka sambu na kukwenda na Galilea sambu na kulanda kusamuna kuna. Ata mpidina, yandi sadilaka dibaku ya kuta kimbangi na nkento mosi ya vandaka kubaka masa. (Yoa. 4:5-14) Sambu na nki? Yezu kuvandaka ntangu yonso “temwe ya kieleka” mpi ya kwikama ya Yehowa. (Kus. 3:14) Beto kelandaka mbandu ya Yezu na kuvandaka Bambangi ya Yehowa ntangu yonso.—1 Pie. 2:21.
2. Inki mutindu beto lenda kudibongisa sambu na kuta kimbangi ya dibaku ya mbote?
2 Vanda ya Kuyilama: Beto lenda vanda ya kuyilama na kuta kimbangi ya dibaku ya mbote na kuvandaka ntangu yonso ti mikanda. Bansamuni mingi kevandaka ti batrakiti na maboko mpi kepesaka yo na bakomersa, na bantu ya kesalaka na kisika yina bo ketekaka essence, mpi na bantu yankaka yina bo kekutanaka ti bo na kilumbu. (Lo. 11:6) Mpangi-nkento mosi ya kesalaka banzyetelo mbala mingi, kevandaka ntangu yonso ti Biblia ya fyoti mpi mukanda Biblia Kelongaka na saki na yandi ya fyoti, mpi yandi kemekaka kuyantika disolo ti bantu yina kevandaka na lweka na yandi.
3. Inki mutindu beto lenda yantika disolo?
3 Yantika Disolo: Ntangu beto ketaka kimbangi ya dibaku ya mbote, yo kelombaka ve nde beto tubila disolo mosi ya Masonuku na luyantiku. Yezu kuyantikaka ve disolo na yandi ti nkento ya Samaria na dibulu ya masa na kudimonisaka nde yandi kele Mesia. Yandi lombaka yandi kaka masa sambu na kutedimisa mpusa na yandi ya kusosa kuzaba mambu. (Yoa. 4:7-9) Mpangi-nkento mosi kumonaka nde metode ya mutindu mosi kesadisaka yandi na kuyantika disolo ntangu bo keyulaka yandi kana yandi kesepelaka na feti mosi buna. Na kisika ya kuvutula nde yandi kevukanaka ve na feti yango sambu yandi kele Mbangi ya Yehowa, yandi ketubaka nde, “Mu mebakaka lukanu mono mosi ya kusala ve feti yina.” Mbala mingi bantu yina kezolaka kuzaba mambu keyulaka yandi sambu na inki, ebuna yo kepesaka mpangi-nkento nzila ya kuta kimbangi.
4. Sambu na nki Matayo 28:18-20 kepesaka nge kikesa?
4 Ata Yezu memanisaka kisalu na yandi ya kikesa ya kusamuna na ntoto, yandi ketulaka kaka dikebi mingi na kisalu ya kusamuna ya ke na kusalama mutindu yandi salaka yo. (Mat. 28:18-20) Yo yina, bonso Mbandu na beto Yezu, beto kele Bambangi yina kele ya kuyilama na kuta kimbangi ya lukwikilu na beto na meso ya bantu yonso konso ntangu.—Baeb. 10:23.