Yezu Ta Manisa Mubulu

Yezu me zaba inki mutindu bantu ke kudiwaka sambu na mubulu mpi kukonda lunungu. Bo me kusilaka yandi makambu, bo me bulaka yandi na mutindu yina nsiku vandaka kupesa ve nswa, bo sambisaka yandi na mutindu ya mbi, bo kusilaka yandi nde yandi fwaka nsiku, mpi pesaka yandi mpasi na ntwala ya kufwa yandi. Ata yandi salaka ve kima mosi ya mbi, yandi pesaka na luzolo yonso “luzingu na yandi sambu na kusumba bantu mingi.” (Matayo 20:28; Yoane 15:13) Sesepi, mutindu yandi kele Ntotila ya Kimfumu ya Nzambi, yandi ta sala nde mambu kusalama na mutindu ya mbote na ntoto ya mvimba, yandi ta manisa mubulu mbala mosi.—Yezaya 42:3.

Biblia ke monisaka mutindu nsi-ntoto ta vanda ntangu Yezu ta yantika kuyala ntoto:

• “Bantu ya mbi ta vanda diaka ve; nge ta tala kisika yina bo vandaka, mpi bo ta vanda ve pana. Kansi bantu ya kudikulumusa ta baka ntoto, mpi bo ta wa kiese mingi kibeni na ngemba ya mingi.”—Nkunga 37:10, 11.

Inki mutindu beto lenda monisa ntonda sambu na mambu yonso yina Yezu me salaka sambu na beto mpi yina yandi ta sala? Na kati ya mambu yina beto lenda sala, beto lenda tanga kusosa kuzaba mambu mingi na yina me tala “nsangu ya mbote ya Kimfumu ya Nzambi,” yo kele nsangu yina yandi vandaka kulonga. (Luka 4:43) Tanga disolo “Kimfumu ya Nzambi Kele Inki?”