Bangyufula Ya Batangi
Yoane ya ntete 4:18 ketela beto nde: “Kana [zola] kele, boma kele ve; [zola] ya kieleka ke katulaka boma.” Kansi Piere kusonikaka nde: “Beno zola bampangi na beno bakristu, beno tina Nzambi boma.” (1 Piere 2:17) Inki mutindu beto lenda kuwakanisa mikapu yai zole?
Piere ti Yoane kuvandaka bantumwa ya kulongamaka na Yezu Kristu yandi mosi. Yau yina beto lenda kutula ntima nde mambu ya bau kusonikaka kele ti kuwakana. Sambu na mikapu yai zole ya mekatuka kusonama, mvutu kele nde bantumwa yai yonso zole vandaka kutubila mitindu zole ya kuswaswana ya boma.
Beto tadila ntete ndongisila ya Piere. Mutindu mambu ya kele nzyunga ya mvese yango kemonisa, Piere vandaka kupesa ndongisila ya kupemama na bampangi na yandi Bakristu sambu na nkadilu na bau na ntwala ya bayina kele ti biyeka. Na ntubilu ya nkaka, yandi vandaka kutendula mboninu ya mbote ya bulemfu na mambu ya nkaka. Yau yina, yandi kulongisilaka Bakristu na kuvanda ti bulemfu na bantu ya kele ti biyeka ya kimfumu na baluyalu ya bantu, bonso bantotila to baguvernere. (1 Piere 2:13, 14) Na kufulaka, Piere kusonikaka nde: “Beno zitisa bantu yonso, beno zola bampangi na beno bakristu, beno tina Nzambi boma, beno zitisa ntotila.”—1 Piere 2:17.
Na kutadilaka yau ti mambu ya kele na lweka ya mvese, yau kele pwelele nde ntangu Piere kutubaka nde Bakristu fwete “tina Nzambi boma,” yau vandaka kutendula nde beto fwete kuvanda ti luzitu ya mudindu sambu na Nzambi, kubanga na kukonda kusepelisa muntu ya kuluta nene na kiyeka.—Fwanisa ti Baebreo 11:7.
Inki beto lenda kutuba sambu na ntubilu ya ntumwa Yoane? Na luyantiku ya 1 Yoane kapu 4, ntumwa kumonisaka mfunu ya kuswasukisa “[nsangu ya kupemama, NW]” yina kekatukaka na bambikudi ya luvunu. Yau kele kyeleka nde nsangu yango yina kekatukaka ve na Yehowa Nzambi; yau kekatukaka to kemonisaka nkadilu ya nza ya mbi.
Na kuswaswana, Bakristu ya kupakulama “[mebasika na Nzambi, NW].” (1 Yoane 4:1-6) Sambu yau kele mutindu yina, Yoane kukebisaka nde: “Bampangi na mono, beno zolana, sambu [zola] ke katukaka na Nzambi.” Nzambi kubakaka dibanza ya kumonisa zola—yandi “tindaka mwana na yandi mosi ya yandi vandaka na yandi, sambu beto vanda na moyo na ngolo na yandi.” (1 Yoane 4:7-10) Beto fwete sala inki?
Yau kele pwelele nde beto fwete kubikala ya kuvukana ti Nzambi na beto. Beto fwete kuvanda ve ti boma na yandi to kutekita na kufinama na yandi na lusambu. Ntete Yoane kulongisilaka nde: “Kana ntima na beto ke funda beto ve, [beto kele na kimpwanza ya kutuba ti Nzambi, NW]. Mambu yina yonso ya beto ke lombaka na yandi, yandi ke pesaka beto, sambu beto ke landaka bansiku na yandi.” (1 Yoane 3:21, 22) Ee, kansansa ya mbote kepesaka beto kimpwanza ya kufinama na Nzambi na lusambu nkatu bumolo to boma yina kekandikaka na kutuba. Ti zola, beto kevandaka na kimpwanza ya kuzabisa, to kufinama na Yehowa na lusambu. Na dyambu yai, “kana [zola] kele, boma kele ve.”
Bika ntangu yai beto kuvukisa mabanza yonso zole. Mukristu fwete kuvanda ntangu yonso ti boma ya luzitu sambu na Yehowa, yina mebutuka na luzitu ya mudindu sambu na pozisio, ngolo, mpi lunungu na yandi. Kansi beto mpi kezolaka Nzambi bonso tata na beto, mpi beto kekudiwaka pene na yandi mpi kimpwanza ya kufinama na yandi. Na kisika ya kudikangisa sambu na boma na yandi, beto ketulaka ntima nde beto lenda kufinama na yandi, bonso mutindu mwana kevandaka na kimpwanza ya kufinama na tata na yandi.—Yakobo 4:8.