Ndikenagio nĩ Ũtũũro Wakwa—Hihi Bibilia no Ĩndeithie?

Macokio ma Bibilia

Ĩĩ, no ĩgũteithie. Bibilia nĩ ibuku rĩandĩkirũo tene rĩrĩ ũũgĩ mũingĩ, na nĩ rĩheanaga macokio ma ciũria cia bata mũno ũtũũro-inĩ. No rĩgũteithie ũkenere ũtũũro na ũigue ũiganĩire. Ta rora ciũria imwe Bibilia ĩcokagia.

1. Hihi nĩ kũrĩ Mũũmbi? Bibilia yugaga atĩ Ngai nĩwe “wombire indo ciothe.” (Kũguũrĩrio 4:11) Arĩ Mũũmbi witũ, Ngai nĩ oĩ kĩrĩa tũbataraga nĩguo tũkene na tũiganĩre ũtũũro-inĩ.

2. Hihi Ngai nĩ anũmbũyagia? Bibilia ndĩonanagia atĩ Ngai ndangĩkinyĩrĩka, handũ ha ũguo, yugaga atĩ, “ndarĩ haraya na mũndũ o na ũmwe witũ.” (Atũmwo 17:27) Nĩ endaga kũmenya maũndũ marĩa marekĩka ũtũũro-inĩ waku, na nĩ endaga gũgũteithia ũgaacĩre.—Isaia 48:17, 18; 1 Petero 5:7.

3. Kũmenya Ngai kũngĩndeithia atĩa ngĩe na gĩkeno? Ngai aatũũmbire tũrĩ na “mabataro . . . ma kĩĩroho,” nyota ũkoragwo thĩinĩ witũ wa kwenda kũmenya bata na muoroto wa ũtũũro. (Mathayo 5:3) Mabataro maitũ ma kĩĩroho nĩ hamwe na kwenda kũmenya Mũũmbi witũ na kũgĩa na ũrata hamwe nake. Ngai nĩ egũkenio nĩ kĩyo gĩaku gĩa kwenda kũmũmenya tondũ Bibilia yugaga ũũ: “Kuhĩrĩriai Ngai, nake nĩ ekũmũkuhĩrĩria.”—Jakubu 4:8.

Andũ milioni nyingĩ nĩ monete atĩ kũgĩa ũrata na Ngai nĩ kwagĩrĩtie ũtũũro wao na gũkamonia ũrĩa mangĩkenera ũtũũro. O na gũtuĩka kũmenya Ngai ti kuuga atĩ ndũrĩonaga mathĩna ũtũũro-inĩ, ũũgĩ ũrĩa ũrĩ thĩinĩ wa Bibilia no ũgũteithie

• Kũgĩa na gĩkeno thĩinĩ wa famĩlĩ.

• Gũkenera thayũ hamwe na andũ arĩa angĩ.

• Kũhiũrania na mathĩna matiganĩte ta gũthuthĩka ngoro, mathĩna ma mbeca, na mũrimũ wa gũtũũra.

Ndini nyingĩ iria ihũthagĩra Bibilia itirũmagĩrĩra ũrutani wayo. Ĩndĩ ndini ya ma, ĩrĩa ĩrũmagĩrĩra biũ ũrĩa Bibilia yugaga, no ĩgũteithie kũmenya Ngai.