Okumona oixuna otaku ka xula po mafiku!

OKUPANGELA KWEPANGELO LIWA

“Kalunga ou komeulu ota ka dika ouhamba itau ka teka po fiyo alushe, nepangelo lawo itali ka yandjwa koshiwana shimwe. Ndele owo otau ka nyanyaula notau ka teyaula omauhamba aeshe noku a xulifa po, ndele owo vene tau ka kala fiyo alushe.” — Daniel 2:44.

Ouhamba waKalunga oo epangelo laKalunga lomeulu. Jesus Kristus, Ohamba ya hoololwa, ota ka pingena po omapangelo aeshe opanhu nota ka shilipaleka kutya ehalo laKalunga otali wanifwa kombada yedu ngaashi meulu. (Mateus 6:9, 10) Epangelo olo itali ka pingenwa po kepangelo nande olimwe lopanhu molwaashi olo ‘ouhamba waalushe wOmwene Omukulili wetu Jesus Kristus.’ Okwa udaneka kutya otamu ka kala mu na ombili fiyo alushe. — 2 Petrus 1:11.

OMALONGELOKALUNGA OIPUPULU OTAA KA XULIFWA PO

‘Satana mwene ote lifefa omweengeli wouyelele. Kashi fi hano oshinima shinene, ngeenge ovapiya vaye tave liningi ovayakuli vouyuki. Ndele exulilo lavo otali ningi li fike poilonga yavo.’ — 2 Ovakorinto 11:14, 15.

Omalongelokalunga oipupulu otaa ka nyanekwa pomutenya onga oilonga yOndiaboli notaa ka xulifwa po kombada yedu. Outondwe netileshi lohonde lomalongelokalunga aeshe otali ka xulifwa po. Osho otashi ka kwafela aveshe ovo ve hole “Kalunga omunamwenyo nomunashili” opo ve mu longele ‘meitavelo limwe’ nosho yo “momhepo nomoshili.” Naasho otashi ka tya ombili noukumwe. — 1 Ovatessaloniki 1:9; Ovaefeso 4:5; Johannes 4:23.

OKUHAWANENENA KWOVANHU ITAKU KA KALA PO VALI

‘Kalunga mwene ota kala pamwe navo. Ndele ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.’ — Ehololo 21:3, 4.

Jehova Kalunga osho okwe shi ninga tashi shiiva okupitila mOmona waye, Jesus, oo a yandja omwenyo waye kovanhu mounyuni. (Johannes 3:16) Koshi yewiliko laJesus, ovanhu otava ka ya mewaneneno. Itapa ka kala vali okumona oixuna molwaashi “Kalunga mwene ota kala pamwe navo” nota ka feta po “omahodi momesho avo.” Okuhawanenena kwovanhu nokumona oixuna otaku ka xula po; “ovayuki, vo otava ka fyuulula oshilongo, ndee tava kala mo alushe.” — Epsalme 37:29.

OISHITWA YOPAMHEPO IKOLOKOSHI OTAI KA XULIFWA PO

“Ye [Jesus Kristus] okwa kwata ongadu, eyoka linya likulu, olo ondiaboli naSatana, ndele okwe mu pandeka ouule womido eyovi limwe, nokwe mu ekela mombwili ndee ta idile po, nokwa tula ko oshipateko konima yaye, a ha hongaule vali oiwana.” — Ehololo 20:2, 3.

Enwefemo alishe laSatana otali ka xulifwa po ngeenge Satana neendemoni daye ova mangwa nokweekelwa “mombwili,” sha hala okutya monghalo yokuhalonga sha nandenande. Itava ka pangela vali ovanhu. Itatu ka kala tuu twa pepelelwa okukala mounyuni uhe na enwefemo laSatana neemhepo dowii!

‘OMAFIKU AXUUNINWA’ OTAA KA XULA PO

‘Omafiku axuuninwa’ otaa ka xula po pefimbo olo Jesus a ifana ‘oudjuu munene.’ Okwa ti: “Otapa kala oudjuu unene, inau kala ko okehovelo lounyuni fiyo opaife, ndele ngaashi itau uya vali.” — Mateus 24:21.

Oudjuu otau ka kala munene omolwoiningwanima inai ningwa nale oyo tai ka ningwa. Oudjuu oo otau ka xulifwa po ‘poita mefiku linene laKalunga omunamapangelo aeshe,’ oyo ya shiivika nedina “Harmagedon.” — Ehololo 16:14, 16.

Ovanhu keshe pamwe ovo ve hole ouyuki ova teelela nodjuulufi okuxulifwa po kwonghalelo ei yoinima youkolokoshi. Natu ka taleni amwe omomanangekonoupuna oo taa ka hafelwa kovanhu ovayuki koshi yOuhamba waKalunga.

KALUNGA OTA KA NINGA SHIHAPU

“Ongudu inene” otai ka ya mounyuni mupe wombili: Eendjovo daKalunga oda ti kutya “ongudu inene” yovanhu ya nyengana okuvalwa otai ka xupa “momahepeko manene,” ile tu tye poudjuu munene notai ka ya mounyuni mupe wouyuki. (Ehololo 7:9, 10, 14; 2 Petrus 3:13) Omolwexupifo, otava ka yandja olupandu kuJesus Kristus, “Odjona yaKalunga tai kufa po omatimba ounyuni.” — Johannes 1:29.

Omauwa a denga mbada otaa ka dja mehongo lopakalunga: Mounyuni mupe, “edu alishe otali ka kala li yadi eshiivo lokushiiva Omwene.” (Jesaja 11:9) Ehongo olo lopakalunga otali ka kwatela mo ouyelele u na sha nanghee hatu dulu okukala nombili novanhu aveshe nosho yo okukaleka omudingonoko monghalo iwa. Kalunga okwa udaneka a ti: “Aame Omwene Kalunga koye, ou handi ku longo eshi tashi ku wapalele ndele handi ku tula mondjila ei u nokweenda nayo.” — Jesaja 48:17.

Oonakufya ovaholike otava ka nyumuka okudja meembila: Eshi Jesus a li kombada yedu okwa li a nyumuna kaume kaye Lasarus koufi. (Johannes 11:1, 5, 38-44) Kungaho okwa li a ulika osho ta ka ninga pauyadi koshi yOuhamba waKalunga. — Johannes 5:28, 29.

Ombili nouyuki otai ka kala fiyo alushe: Koshi yepangelo laKristus, okuhe na omhango itaku ka kala po vali. Osho otu shi shii ngahelipi? Molwaashi Jesus oha dulu okutala omitima, ota ka longifa eenghono odo opo a tokole ovayuki nosho yo ovakolokoshi. Ovo inava hala okulundulula eenghedi davo dii itava ka pitikwa va ye mounyuni mupe waKalunga. — Epsalme 37:9, 10; Jesaja 11:3, 4; 65:20; Mateus 9:4.

Otwa kundafana ashike omaxunganeko manini omomaxunganeko mahapu Ombibeli oo taa ulike kefimbo likumwifi tali uya. Eshi Ouhamba waKalunga tau ka pangela kombada yedu otaku ka kala “ombili inene” fiyo alushe. (Epsalme 37:11, 29) Oyeetifi aishe youyahame nokumona oixuna oyo ya wilila po ovanhu otai ka xula po. Ohatu dulu okukala noushili mwaasho molwaashi oshi li eudaneko laKalunga, olo tali ti: “Tala, aishe ohandi i shitukifa i ninge ipe. . . Eendjovo edi odo doshili di shii kulinekelwa.” — Ehololo 21:5.