Qitornarsiartaarneq — Qanoq isigissavara?

ANGAJOQQAARSIAT avippata aappaaluunniit toquppat ajornartorsiuteqalissasoq paasinarpoq. Qitornarsiaq artorsarnerpaasarpoq. Sooq?

Amerlanersatta kikkut angajoqqaavigalugit nalunngilaat. Suli mikisuusugut toqusimagaluarpataluunniit, eqqaamasaqartarpugut immaqaluunniit assiutigaavut. Meerarmi inunnguinnarluni qitornarsianngorsimaguni? Qitornarsiartaarnermi oqartussaasut anaanaasoq pillugu paasissutissanik peqarput, paasissutissalli tamakkua meeqqap inersimasunngortinnani amerlanertigut pisinnaaneq ajorpai. Allani anaanaasup inunngornermi allagartamut atini allattarpaa, kinali ataataanersoq nalunaarnagu. Meeqqat ilaat nassaajupput, taamaattumillu angajoqqaajusut ilisimaneqarnatik. Meeqqat taakku tamarmik sorlaqanngitsutut oqaatigineqarsinnaapput — siuaasaminnit nagguimminnilluunniit kipineqarsimasutut misigisinnaapput.

Pissutsit qanoq aalajaatsigaat?

Orpiit ataannassagunik sorlagilluartariaqarput. Avalequt nutaaq orpiup kanaartaanut peqqissumut nukittuumullu ikkunneqartoq naasinnaavoq, aammattaarli toqusinnaavoq inerititaqarsinnaananilu. Taamatulli meeqqat ilaat ipput, naak angajoqqaarsiat asanninnermik isumassuinermillu nittaagaluartut, sorlaminnik kipineqarnertik qaanginngitsoorsinnaavaat.

Kate taamaappoq.a Indiap kitaaneersunik angajoqqaaqarpoq, naalungiarsuullunili qaqortumik amilinnit asannittunit isumassuilluartunillu qitornarsiartaarineqarpoq. Avatangiisinili nutaani sungiussinngisaannarpoq. 16-inik ukioqarluni angerlarsimaffik qimappaa utinngisaannarlunilu. Narrutsassimaarneq uumissuininnguuppoq. „Sooruna anaanama ilissinnut tunniussimagaanga?“ killormoorluni aperisarpoq. Ajoraluartumik ilaqutariit aaqqiagiinngisaannarput.

Mervyn inunngorniariartoq meeqqat angerlarsimaffiannut kingusinnerusukkullu utaqqiisaagallartumik angajoqqaarsianut inissinneqarsimavoq. Qulingiluanik qaammateqartoq qitornarsianngortinneqarsimavoq. Inuunermi toqqissisimanngitsumik aallartinnera, akusamillu naggueqarnermi kamaatigerujussuarnerata, pikitsitsiumatuunngortissimavaa imminut ajornartorsiortitsiuartumik angajoqqaarsiaanullu ilumoortunut aliasuutaaqisumik. „Qitornarsiartaarnissaq pillugu siunersiorneqassagaluaruma,“ arnaa oqarpoq, „taava oqassaanga: ’Eqqarsaatigeqqissaaqqaassavat.’“

Tassunga akerliusumik Robertip Sylviallu misigisaat tusariartigik. Erneqarput meerartaaqqissinnaanatilli. „Nunamit allameersumik qitornarsiartaarnissarsi eqqarsaatigisimavisiuk?“ aperitissimapput. Sivitsunngitsoq Mak-Chai, niviarsiaraq qulingiluanik qaammatilik Hongkongimeersoq qitornarsiartaaraat. „Sooq qitornarsianngorsimanerlunga qatannguteqarnerlungalu eqqarsaatigigajuppara,“ Mak-Chai oqarpoq, „isumaqarpungali meeqqat allarpassuit angajoqqaavimminnut attaveqarnerannit uanga angajoqqaarsiannut qaninnerusumik attaveqarlunga. Kikkut angajoqqaavigalugit nalunngitsuugukku allaassuteqarnavianngikkaluarpoq, paasinerulaassagaluarparali sooq uattut pissuseqarnerlunga.“ Angajoqqaarsiaasa qitornarsiartaarnissaq kajumissaarutigisinnaavaat? „Aap,“ oqarput, „uagutsinnut nuannersimaqaaq!“

Mianersuutigisariaqakkat

Graham Ruthilu naalungiarsunnik marlunnik, nukappiaqqamik niviarsiaqqamillu qitornarsiartaarput, namminneq erneqareerlutik paneqareerlutillu. Meeqqat tamarmik sisamaallutik ilaqutariittut nuannaarlutik ataasiussuseqarlutillu peroriartorput. „Ukiut arlallit qaangiutereerput angerlarsimaffipput meeqqatta tamarmik qimammassuk immikkut inuulerlutik. Akulikitsumik attaveqarfigisarpavut tamaasalu asavavut,“ Ruth oqarpoq. Ajoraluartumilli qitornarsiavut marluullutik ajornartorsiorput. Sooq?

„Nakorsatta oqaluttuuppaatigut meeqqap avatangiisii pingaaruteqarluinnartut,“ Graham oqarpoq, isumaqarporlu timikkut kingornussat aamma pingaaruteqartut. Nangipporlu: „Anaanaasummi naartunermi nalaani peqqissusia? Ikiaroornartunik atornerluineq, imerneq pujortarnerlu maannakkut nalunngilarput naartumut sunniuttartut. Qitornarsiartaartinnani angajoqqaajusut marluutillugit, aap aatakkuusut ajornanngippat, misissoqqissaarnissaat kajumissaarutigerusuppara.“

Peterip arnaa kateqqippoq, Peterilu timikkut eqqarsartaatsikkullu ataatassaminit innarlerneqarsimavoq. Pingasunik ukioqarluni qitornarsianngorpoq. „Angajoqqaarsiama oqartussaaffigilerniariaraannga akerlerilerpakka,“ Peter oqarpoq. Nangipporlu: „Pallissinnaasakka tamaasa aserortertarpakka. Sinilillatuaraangama, oqimangerujussuartarpunga. Maanna kingumut qiviaraangama takusinnaavara qanoq paatsiveerussimatigalunga. Angajoqqaarsiakka aamma avimmata, suli ajornerulerpoq — ikiaroortalerpunga, tillittalerpunga, aserorterisalerpunga ullullu tamaasa imertalerlunga.

27-nik ukioqarlunga inuunera siunertaqanngitsutut isigaara imminornissarlu eqqarsaatigalugu. Ullut ilaanni naqitaaqqamik Biibili tunngavigalugu nunap paratiisinngornissaanik oqaluttuartumik tunisippunga. Soqutigaara. Ilumoorsoraara. Biibili atuartalerpara inuuneralu pissuseralu allanngortippakka, inuunitoqqannulli nakkartuarpunga. Kajumissaarneqartuareerlunga ineriartornartumillu kristumiunik ilaqartuarnikkut kiisami naggataatigut Guutimut kiffanngorpunga, ukiualuit matuma siornatigut sinnattorisimanngisaannakkannik maanna pilluarnerusutut toqqissisimanerusutullu misigivunga. Anaanannut qanimut attaveqaqqilersimavunga, nuannaarutigeqisannik.“

Pissutsit piviusut paasikkit

Qitornarsiartaarneq misigissuserpassuaqarfiuvoq, misigissutsinit sakkortuunit soorlu asanninnermit pingaartitsinermillu narrutsassimaarnermut qujasuissusermullu. Assersuutigalugu, Edgar Wallacep arni isumakkeerfiginngisaannarsimavaa, isummani malillugu, ajattorsimammani. Arnami inuunermi ukiuani kingullermi allatut sapilerluni aningaasat tungaatigut ikioqqulluni saaffigigaluarmani, Edgarip pisuujusup qiningalluni itigartippaa. Kingunitsianngua paasigamiuk anaanani piitsut iliveqarfianni ilineqarsimassagaluartoq ikinngutaasut ikiuiumatuut ilisaaneranik akiliisimanngikkaluarpata, misigittaassimanini peqqissimissutigingaarpaa.

Qitornarsiartaarniarlutik eqqarsaateqartut, ajornartorsiuteqarsinnaanera paasisariaqarpaat. Allaat meeqqat pitsaanerpaanik atugaqaraluartut angajoqqaamik iliuuserisartagaannut qujamasuttuujuaannanngillat — angajoqqaarsiaasunut angajoqqaaviusunulluunniit. Biibilip eqqartorpaa ullumikkut inuit ’asanniuitsuujumaartut’, ’qujasuitsuujumaartut’ aamma ’ilumoorfigeqatigiinngitsuujumaartut’. — 2 Timûtiuse 3:1-5.

Aappaatigulli meeqqamut angajoqqaanik asannittunik pisariaqartitsisumut angerlarsimaffimmik — uummammillu — ammaaneq ajunngitsumik pisuunngornartumillu misigiffiusinnaavoq. Assersuutigalugu, Cathy angajoqqaarsiaminut qujamasungaarpoq angerlarsimaffimmik kristumiuusumik tunimmanni aamma timikkut anersaakkullu pisariaqartitaminik tunisisarmata. — Ungalusaq „Iluatsitsivugut“, qupperneq 8-miittoq takuuk.

Angajoqqaat taamaattut qitornarsiaminnut misigissutsiminnik oqaluttuaraangamik, imaassinnaavoq tussiaasiortup oqaasii imaattut eqqaasaraat: „Ernerit tassaapput [Jehovap] tunissutai, arnap timaata iluani inerittoq tassaavoq taassuma akissarsiarititaa.“ — Tussiaat 127:3. (gE 8/5 96)

[Quppernerup ataani ilanngussaq]