Maggyp misilinneqarnera uangalu pilluaqqusaanera
Marlunngorneq, maajip ulluisa aappaat 1995, tassaavoq panimma inuuia nuliamalu toquffia. Alianaraluaqisumik Maggyp panissaannguani takunngisaannarpaa. Maanna neriugisaraara Tamarap anaanaanut, taanna toqusunit makititaappat, ilisaritinnissaa.
UKIUNI 16-ini aappareereerluta nuliara, Maggy, nakorsamit paasitinneqarpoq iviangimigut kræfteqartoq qaammatialunnguaannarnilu inuusussanngortoq. Tamanna ukiut tallimat matuma siorna pivoq. Qujanartumik Maggy ulluni inuuffigisamini kingullerni nalinginnaasumik inuusinnaasimavoq. Aatsaalli naggataani naalliunnaqisumik annialerpoq.
Nakorsat oqarsimapput kræftiata annertussusia pissutigalugu naartulernissaa ilimanaatikitsuararsuusoq. Taamaattumik takorloorneqarsinnaassaaq qanoq tupatsigisugut kræftiata nalinginnaasumik misissorneqarnerani naartusoq paasineqarmat! Niviarsiaqqamik naartuvoq. Maggy qaammatit tallimangajassaanni naartuvoq. Aatsaat anaananngortussaagami nuannaartorujussuuvoq.
Maggy meerassami peqqilluni inunngorsinnaanissaa qulakkeerniarlugu suna tamaat angullugu ilungersorpoq. Suut nerissallugit sianigeqqissaartarpai, allaallu sapaatit-akunnerini kingullerni marlunni anniarluinnalernermini aatsaat saperluinnaleraangami nipaallisaatinik iisisarpoq.
Naalungiarsummik peqqissumik pilluaqqusaaneq
Arfininngornermi, apriilip 29-ani, Maggy uummamminit kassuttuulerami oqarpoq: „Immaqa toqulerpunga.“ Sapaatip-akunnerata naanera tamaat najorpara. Ataasinngornermi nakorsaq nalunaarfigeriarlugu Montrealimi, Canadamiittumi, najukkatsinnit Saint Jérômemiittumit ungasinngitsumiittumi, napparsimmaviliaakkasuarpara.
Aqaguani ullaakkut arfernup qeqqa napparsimasunik paarsisup Maggyp inaanut iserami malugisimavaa peruluttorujussuusoq, uummalliulersimagunarluni. Nakorsaq inip tullianiittoq kalerrikkasuarneqarpoq. Naak Maggy toqugaluartoq nakorsat meerarput annaappaat. Tamara qaammatinik pingasungajannik inorluni inunngorpoq 1 kiilulu sinnilaaginnarlugu oqimaassuseqarluni.
Tamarap aavata akui appasimmata nakorsat aalersornialersaalerpaat. Kajumissaarneqarpulli tamatumunnga taarsiullugu erythropoietin (EPO) atussagaat. Taamaaliorpullu, tamatuminngalu atuinerat aavata akuisa pitsanngoriarnerannik kinguneqarluarmat napparsimasunik paarsisoq oqarpoq: „Sooq naalungiarsunnut tamanut taanna atortanngilaat?“
Tamara inorluni inunngorsimanini pissutigalugu allanik ajornartorsiuteqarpoq, tamarmilli aaqqinneqarput. Kingornami qaratsamik pilattaasartup, Dr. Wattersip, misissuleramiuk napparsimasunik paarsisoq oqarfigaa: „Naalungiarsummik misissugassannik kukkullutit tunisimagunarparma; naalungiarsuk taanna ajoquteqarpasinngilluinnarpoq.“
Toqusoorneq tamatumalu kingorna akiuunneq
Maggy toqujartortoq isigalugu uannut artornarsimaqaaq. Ikioriarfissaarulluinnartutut misigisimavunga. Aallaqqaammut Maggyp toqunera eqqartussallugu artornartittorujussuuara. Taamaakkaluartorli qatanngutit angutit arnallu napparsimmavimmut pulaaraangata tamanna eqqartorniartarpara. Oqallisiginerujartortillugu aliasunnera milliartorpoq. Napasuliaq Alapernaarsuiffik-mi Iteritsi!-milu ilanngutassianik uannut naleqqutsitannik nassaaraangama immikkoortittarpakka kingorna pisariaqartitsileruma atuariaannaaniassagakkit.
Unamminiarnartitara alla tassaasimavoq illumut inoqanngitsumut angerlarneq. Kiserliorneq artornartorujussuuvoq. Misigissuseq tamanna suli takkuttarpoq, naak kristumioqatinik ineriartornartumik peqateqartarneq iluaqutigisaraluarlugu. Maggylu suut tamaasa suleqatigiissutigisarsimavavut, qanorlu ilillunga kiserliulernissama akiornissaa oqaloqatigiissutigisarsimavarput. Kateqqinnissara kissaatigaa. Oqaannarlunili pineq ajornaqaaq.
Kristumioqatinit tapersersorneqarneq
Naluara qanoq iliorsimassagaluarnerlunga Jehovap Nalunaajaasuisa napparsimmavinnut saaffiginnittartoqatigiivinit ikiorneqarsimanngitsuuguma. Ullaami Maggyp toquffiani nalunaajaasoq ilisimasaqarluartoq napparsimmavinnut saaffiginnittartoqatigiinneersoq najuuppoq pisariaqartunillu ikiorlunga.
Kristumioqatitsinnit Saint Jérômemi eqqaanilu ilagiinneersunit ikiorneqarnera napparsimmavimmi sulisut maluginiartorujussuuaat. Maggyp toqunera kristumiutut ataatsimiinnitsinni nalunaarutigineqarmat ikinngutit asannittut 20-nit amerlanerusut ikiuinissartik neqeroorutigaat. Annertoqqusersorneqarnera tupinnaqaaq.
Ikinngutima ilaasa nerisassiuuttarpaannga; nillataartitsivimma qerititsivittaa qaammatinut arlalinnut naammattunik immerneqarpoq. Allaat qanigisama kristumiutullu qatanngutit angutit arnallu paniga atisassaanik pajuttarpaat. Tuniorangaarmannga tamaasaluunniit inissaqartinngilakka.
Maannakkut nuannaarutit siunissamilu qilanaarnartut
Annaasannik aliasuutiginninninnik qaangiiniarninni Tamara iluaqutaaqaaq. Taanna asaqaara. Ullut tamaasa qungujulallunga ’kumooraanganni’ qungujorujussuaatigaluni oqalungussarfigileraraanga nuannaarnermillu tukkartorlunilu talini aalatittarlugit.
Nuannariinnarlugu ulloriarsiortutut qilanaareqaara Tamara sarlissiuteriarlugu qinngussuara ikiortigalugu qilammik kusanangaartumik Pinngortitsisorsuatta, Jehovap, piliaanik isiginnaartittalernissaa. Nunarsuarmi paratiisiusumi naassaanngitsumik inuulernissamik takorluuisarneq assut tuppallersaataasarpoq. Tamarattaaq naassaanngitsumik inuulernissamut periarfissaqarnera eqqarsaatigigaangakku suli nuannaarnerulersarpunga. — Tussiaat 37:9-11, 29.
Ukiuni tallimani kingullerni pisimasut kingumut qiviarukkit oqarsinnaavunga alianartortaqarlutillu nuannersortaqarsimasut. Imminut pillunga inuunerlu pillugu assut ilikkagaqarsimavunga. Siunissaq Biibilimi oqaatigineqartutut ’toqup peqarunnaarfissaa, aliasuttoqarunnaarlunilu nilliasoqarunnaarlunilu anniartoqarunnaarfissaa’ qilanaareqaara. — sarĸúmersitat 21:3, 4.
Makititaaffissami Maggy anniaateqannguarnani itisuumik anersaarsinnaasassaaq. Tamanillu pingaarnermik, neriuutiga aalajaannerpaaq kissaatigisaralu annerpaaq tassaavoq Tamarap Maggymut ilisaritinnissaa, niviarsiaraq naartunermini suna tamaat angullugu sernissorsimasaa. — Oqaluttuartoq: Lorne Wilkins.
[Qupp. 26-mi assiliartaq]
Nuliaralu
[Qupp. 26-mi assiliartaq]
Panipput, Tamara