Sallusuissut nalunaajaatigisigu
1 Sallusuissut nalunaajaatigissallugu nunamut pisimanini Jesusip erseqqissarsimavaa. Oqarsimavoq: ’Inunnguutigalugulu nunamut pissutigaara sallusuissut nalunaajaatigissallugu.’ — Juán. 18:37.
2 Ilungersortumik oqaluussinermigut Jehovap aqqa Jesusip ataqqisimavaa. Aammattaaq allanut asanninnivimmik ersersitsisarsimavoq anersaakkullu inissisimanerat alianartoq isiginngitsuusaarnagu. Taassuma sulinera Mattæusip allaatigaa: ’Jesusillu illorpassuallit nunaqarfinnguillu tamaasa angalaffigai, naalagiartarfiini ajoqersuisarluni iivangkiiliulu naalagaaffimmik oqaluussissutigalugu, . . . Inuppassuillu takugamigit nalligingaalerpai, paarinerlugaallutillu isumakkiigaammata savatut paarsisoqanngitsutut.’ (Mat. 9:35, 36) Soorlu Jesus taama pisimasoq oqaluussinissamut kajumississuterput tassaavoq Jehovamut tunniusimanerput inoqatitsinnullu asanninnerput.
SULIARPUT PINGAARUTEQARTOQ
3 Jehovamik tullermillu piviusumik asanninnitta Jehova taassumalu suliai nuanningaartut pillugit sallusuissummik inunnik allanik ilinniartitsinissamut periarfissat suulluunniit atorniarnissaannut kajumissisippaatigut. (Tuss. 96:2, 3; 145:10-13) Ulluinnarnili tatisimaneqarnerup, ulluinnarni inuunermi isumakuluutit silarsuarmiillu akornusersorneqangaarnerup nalunaajaanitsinnit allamut saasajasinnaavaatigut. Taamaattumik puiornaveersaartuartariaqarparput Guuti naalagaaffialu pillugit salluisuissutip oqaluussissutiginissaa qanoq nukinginnartigisoq. Uagutsinnut suliassiissutigineqarsimasumit inuunermut pingaaruteqartumit allamut saannaveersaartariaqarpugut. (Mat. 24:14; 28:19, 20) Jehovamut kiffartornermik ulapputeqarnerput illersuutigaarput, sallusuissummillu tusagassamik suli tusarusuttunut tamanna ataavartumik iluaqutaasinnaavoq. — 1 Kor. 15:58.
4 Hjælpepioneriunissannut pioneriunissannulluunniit periarfissaqarpit? Kiffartornivit annertusinissaanut periarfissaqarnerlutit eqqarsaatigeqqinniaruk. Aningaasanik pisartagaqalersimavit imaluunnit utoqqalinersiuteqalersimavit? Taava piffissat oqaluussinermut tamakkiisumik atulerusunngiliuk? Inuusuttorpassuit suli atuartuusut aalajangersimasumik akuttunngitsumik hjælpepioneriusarput. Taamaaliornikkut nuannaarneq angusaq anersaakkut timikkullu nutaannguallaataasarpoq.
5 Sallusuissummik tamakkiisumik nalunaajaaqataassagaanni pilersaarusiorluarneq pisariaqarpoq. (Evf. 5:15, 16) Hjælperpioneriuniaraannili qaammammi ataatsimi ullormut nalunaaquttap-akunneri agguaqatigiisillugit marluinnaat angunissaat pisariaqartarpoq. Ilaat atuariartunnginnerminni suliartunnginnerminniluunniit oqaluussiartorumallutik pisarnerminnit nalunaaquttap-akunnera sioqqullugu makittarput. Ilagiippassuit unnukkut katersuutsitsisarnermikkut hjælperpionerinik tapersersuisarput. Aammattaaq hjælperpioneriusinnaajumallutik piffissaminnik aaqqissuussisinnaasimasut oqaloqatigalugit kajumissinarsinnaasarpoq; immaqa nammineq qanoq iliornissamik siunnersuisinnaapput.
6 Ajunngissutsimik pisassarinngisaraluannik Jehovap kiffani ersersitsiviuaannarsimavai. Taassuminnga aalajaallutik kiffartuussisut pilluaqqusaangaartarput. Jehovap asasini ajunngitsuliorfigisarpai, periarfissavullu qanoq ittuugaluarpataluunniit sallusuissummik nalunaajaalluta kiffartornerput nuannaarutigisarpaa. — Epr. 6:10. (km 5/90)