’Pisariaqarfiagut ikiorneqaatissaq’
1 Jesusip ilagiit ilumoortumik soqutigigamigit ’pisariaqarfiagut ikiorneqaatissaat’ isumagiuassavai. (Eprîarit 4:16) Ikiorneqaatissallu tamakku amerlanersaat pilersinneqassapput Evfisumiunut agdlagkat-ni 4:8, 11, 12-imi neriorsuutigineqartutut ’inunnik tunissutaasutigut’. Ilagiinnilu oqaluussinermut tunngasunik nakkutilliisoq tunissutaasut taamaattut ilagaat.
2 Oqaluussinermut tunngasunik nakkutilliisup sutigut ikiorsinnaagamisigut? Periarfissat arlaliupput. 1) Ikiortarpaatigut oqaluussisarnitta ajoqersuganngortitsinissattalu qanoq pingaaruteqartiginerata eqqumaffigiuarnissaanut. 2) Nakkutigisarpaa oqaluussinermut kiffartuuteqarneq kinguneqarluartumik aaqqissugaanersoq ilagiillu atuakkamik atuaqqissaaqatigiinnikkut siulersorneqarnersut. 3) Soqutigisarpaalu inuttut ataasiakkaatut pisariaqartitarput naapertorlugu oqaluussisarnermut pikkorissarneqarnissamut ikiorneqarnissarput.
NAKKUTILLIISUMIT PULAARNEQARNEQ
3 Oqaluussinermut tunngasunik nakkutilliisoq nammineq amerlanertigut atuakkamik atuaqqissaaqatigiinnik aqutaqartarpoq, kisiannili qaammammut ataasiarluni atuakkamik atuaqqissaaqatigiit allat sapaatip akunnerani ataatsimi suleqatigisarpai. Ikiortaatalu peqannginnerani atuaqqissaaqatigiit isumagisarpai. Atuaqqissaaqatigiinnermik aqutsisoq pulaarnissaminik siumut ilisimatereertarpaa atuaqqissaaqatigiinnermut ilaasut pissarsiaqarluarnissartik pillugu pilersaarusiorsinnaaniassammata.
4 Sapaatip akunnerani immikkut ittumi tassani atuakkamik atuaqatigiinneq 45 minuttinut sivikillineqartarpoq. Taamatulilluni nakkutilliisoq 15 minuttinik periarfissinneqartarpoq oqalugiarnissaminut, oqaluuseralugu oqaluussisarnitsinni qanoq pitsanngoriaateqarsinnaanissatsinnik ikiorneqarnissarput. Taamaattumik oqaluussisartut tamarmik, aammalu soqutiginnilerlaat najuunnissaat pingaaruteqarpoq.
5 Atuaqqissaaqatigiinni oqaluussisartortaasut tamarmik sapaatip akunnerani immikkut ittumi tassani pulaarneqarfigisaminni oqaluussinissamut peqataalluarnissaminnut pilersaarusiortariaqarput, ingammik weekendimi. Sapaatillu akunnerata ingerlanerani periarfissaqarpat unnukkut oqaluussisoqassaaq. Oqaluussinermut tunngasunik nakkutilliisup sapinngisaminik anguniarpaa oqaluussisartut amerlanerpaat suleqatiginiassallugit. Immaqalu pulaaqqinnernut imaluunniit Bibelimik atuaqqissaaqatigiinnernut ilaasinnaassalluni. Kinaluunniit oqaluussisarnermut atatillugu ikiorneqarnissaminut imaluunniit kaammattorneqarnissaminut pisariaqartitsiguni nakkutilliisoq taanna saaffigisinnaavaa qinnuigalugu ikiorneqaqqulluni. Sapaatillu akunnerata ingerlanerani atuaqqissaaqatigiinnut oqaluussinissamut katersuunnerit aaqqissugai najuuffigigutsigik pissarsiaqarfigilluarsinnaavavut.
6 Oqaluussinermut tunngasunik nakkutilliisup atuaqqissaaqatigiinnermik aqutsisoq peqatigalugu atuaqqissaaqatigiit oqaluussisarnerata eqqartornissaa piffissaqarfiginiassavaa. Atuaqqissaaqatigiit tamarmik iluaqutissaannik oqaluussinissamut katersuunnissaat piffissaat misissorneqassapput tamarmik aaqqissugaalluarnerat qulakkeerniarlugu. Aalajangersimasumik akuttunngitsumillu oqaluussisarnissamut arlaat ikiorneqartariaqarpat kaammattorneqartariaqarpalluunniit taamaattut ataasiakkaarlugit oqaloqatigissavai inussiarnersumillu siunnersuuteqarfigissallugit siuarnissaannut ikiuutaasinnaasumik. Nakkutilliisup atuaqqissaaqatigiinnermik aqutsisoq ilagalugu aalajangersimasumik akuttunngitsumillu oqaluussisarnermut peqataasarunnaarsimasut pulaarsinnaavai. Aammattaaq atuaqqissaaqatigiit Bibelimik atuaqqissaaqatiginninnerminnik nalunaarsuutaat atuaqqissaaqatigiinnerni aqutsisoq ilagalugu nakkutilliisup misissussavai.
7 Ilagiinni atuakkamik atuaqqissaaqatigiittorpassualinni atuaqqissaaqatigiit akulikitsumik pulaarneqartarsinnaanngillat. Taamaattumik tamatta peqataanissatsinnut ilungersortariaqarpugut pulaarnerata nalaa pissarsiffigilluassagutsigu. Oqaluussinermut atatillugu pitsanngorsaanissamut siunnersuutai allattukkit, tullissaanullu pulaarneqaqqitsinnasi siunnersuutai piviusunngortikkit. Oqaluussinermut tunngasunik nakkutilliisoq sukkulluunniit ilagiinni ikiorneqarnissamut pisariaqartitsigutta saaffigineqarsinnaajuarpoq. Ilagiinni ikittuinnarnik atuakkamik atuaqqissaaqatigiittoqartuni nakkutilliisup atuaqqissaaqatigiit sapinngisaminik ukiup ilivitsup affaata ingerlanerani ataasiarlugit pulaarniartassavai.
8 Oqaluussinermut tunngasunik nakkutilliisoq atuaqqissaaqatigiinnut pulaarnerata nalaani eqinnaatsumik suleqatigigutsigu uummatitsinnillu iluunngarluta tapersersorutsigu, nuannaarnerulernissatsinnut angusaqarnerulernissatsinnullu ikiussavaatigut. (km 90/6)