Jehovamik unnersiutiginninnerit apriilimi annertusisinnaaviuk?
1 Tussiaasiortup Davidip Jehovamik unnersiutiginninnissani qamannga pisumik kissaatigisimavaa. Ima oqarsimavoq: „Nipituumik qutsavigissavara [Jehova], inuppassuit akornanni unnersiutigissavara.“ (Tuss. 109:30) Apriilimi oqaluussinermut peqataanerunikkut ’taassuminnga erinalimmik unnersiutiginninnermik annertusisitsiffissaalluarpoq’. (Tuss. 71:14) Ikiorti-pioneriunikkut taamaaliortunut peqataanissat pilersaarutigaajuk?
2 Maannakkut pilersaarusiorit: „Eqiasuitsup eqqarsarluaqqaarnera iluanaarutissarsisitsisarpoq,“ Ussatit 21:5-imi eqqaasinneqarpugut. Tamanna kajumissaarutaavoq suliassap qinunikkut Jehovamut saqqummiunnissaanut pilersaarusiorninnilu Jehovap soqutigisaasa salliutinnissaannut. (Uss. 3:5, 6) Taava qaammatisiutitit qimerloorsinnaavatit paasiniarlugu ullormut agguaqatigiissillugu nalunaaquttap-akunnerini marlunni oqaluussisarnissannik ajornarunnaarsitsisumik allannguuteqartitsisinnaanerlutit. Sammisassanit allanit ’piffissamik pisisinnaavit’ oqaluussinermut piffissaq annerusoq atorsinnaalerumallugu? — Evf. 5:16, (NV).
3 Attaveqatiginnigit suleqatiginnillutillu: Apustilip Paulusip kiffartuutiminik naammassinninnissaminut ’nakussatsitsisut’ eqqartorsimavai. (Kul. 4:11, NV) Apriilimi ikiorti-pioneriunissaminnut pilersaarusiortut allat oqaloqatigisakkit. Qularnanngitsumik tapersersoqatigisiinnaassaasi suleqatigiissinnaassallusilu immissinnut anersaakkut iluaqutissiorlusi. Ilagiit oqaluussinissamik pilersaarutaannut oqaluussiffanulluunniit tunngasunik apeqqutissaqarussi oqaluussinermut nakkutilliisup ikiorsinnaassavaasi.
4 Ilaqutariit iluanni suleqatigiinneq ataasiakkaat ikiorti-pioneriunissaannut periarfissiisinnaavoq. Immaqa illumi pisussaaffinnik allatut agguaassigallarnermik tamanna nassataqarsinnaavoq. Ilaqutariittut tamatuma oqaloqatigiissutiginissaa iluaqutaassaaq. Attaveqatigiilluarneq suleqatigiinnerlu iluatsinnissaanut aalajangiisuuvoq.
5 Isumalluartuarit: Pissutsit atukkavit naleqqutinnginnerat pissutigiinnarlugu ikiorti-pioneriusinnaanissat tunuartiaarpallaarniaqinagu. Ukiut ingerlanerini atuartut, soraarnerit, sulisinnaajunnaarnersiutillit, anaanat angerlarsimasunik meerallit, ataatat ulloq naallugu suliffillit allarpassuillu — nuannaaqalutik — pilliuteqartarsimapput, apriilimi ikiorti-pioneriusinnaajumallutik. (Siorna Danmarkimi 2578-it apriilimi ikiorti-pioneriusimapput. Ukioq manna 3000-it qaangersinnaavavut?) Taakkua tussiaasiortoq isumaqatigaat oqarmat ’unnersiutiginninneq peqqusersuitsut ileqqussarigaat’, nalunaaquttallu akunneri 60-it atorlugit immikkut suliniuteqarnerminni assorsuaq nuannaarutissarsisarput. (Tuss. 33:1) Illit ikiorti-pioneriunissannut periarfissaqanngikkuit ilagiinni oqaluussisartutut annertunerusumik suliniuteqarnikkut ikiorti-pionerit nuannaaqatigerusunngiligit?
6 Amerlasuunut ikiorti-pioneriuneq nalinginnaasumik pionerinngornissamut ikaarsaariarfiusimavoq. Annertunerusumik suliniuteqarnermikkut pionerinngornissartik merseriunnaarsimavaat.
7 Jehovap Jesus Kristusillu uagutsinnut iliuuserisimasaannik pingaartitsinermik ersersitsinissatsinnik eqqaaniaalluni nalliuttorsiornerup kajumissaarinerata saniatigut aamma oqartariaqarpugut upernaap annertunerusumik suliniuteqarnissatsinnik kajumissaaraatigut. Ullut tannerulersimapput unnukkullu oqaluussinissamut periarfissaqarnerulerpugut. Guuterput Jehova ataqqiniarlugu sapinngisatsinnik iliuuseqarnissarput kissaatigaarput. Jehovap Kristus aqqutigalugu ’saammaanneq saammaannermik tapertillugu’ tunissutaanik pingaartitsinermik ikiorti-pioneriuneq ersersitsissutissaalluarpoq. — Juán. 1:16. (kmD 94/3 Kan du øge din . . .?)