Immikkut ittumik ataatsimeersuarnissami saqqummiussassat nutaat

„Guutip itissusii misissukkit“ immikkut ittumik ataatsimeersuarnissanut septembarimi aallartittussanut qulequtaassaaq. (1 Kor. 2:10, NV) Suut pingaarutillit tassani ilinniassavavut?

Inuit ilisimassummik ujarlernerminni nassaarisatik amerlanertigut naammaginartinneq ajorpaat. Biibililli nukissanik nutaanik tunisarpaatigut, tamannalu nakkutilliisup angalasartup oqalugiaammi qulequtalimmi „Guutip oqaasiata misissornerat nutaanik nukissaqalersitsisarpoq“-mi nassuiarumaarpaa. Oqalugiaammi „Naalagaaffik pillugu oqaluussineq illit qanoq isigaajuk?“-mi oqalugiartussap Betelimeersup ’Guutip itissusianik misissuineq’ nutaarsiassamillu nuannersumik oqaluussineq imminnut ataqatigiississavai.

Angajoqqaat qanoq ilillutik meeqqatik Guutip oqaasianik isumaliutiginneqqissaarnissaannut ikiorsinnaavaat? Oqalugiaammi „Meeqqassinnut Guutip oqaasia nangeqqittuarlugu eqqartortarsiuk“-mi siunnersuutit atoriaannaasut pissarsiarissavaat. Kristumiut inuusuttut ilagiit iluanni qatanngutinik angutinik arnanillu anersaakkut inersimalluartunik ilagisaqartartut ajunngitsumik sunnerneqartarput. Tamanna oqaluuserisami „Inuusuttut inersimasunit ilikkagallit“-mi eqqartorneqarumaarpoq.

Sooq ullutsinni erlinnartut anersaakkut ittut ujassallugit ilungersuutigisariaqarparput? Jehova isertukkanik saqqummersitsisarpoq. Oqalugiartussap Betelimeersup oqaluttuunniarpaatigut itsaq ullumikkullu suut Jehovap saqqummersittarnerai oqalugiaammi „Jehovap itissutsini saqqummiukkiartuaarsimavai“-mi. ’Guutip itissusiisa misissornissaata’ aalajangiussarput nakussatsissavaa.

Sammineqartussat najuuffiginiarlugit piaartumik piareersaateqareerit. Kuisikkumasut nakkutiliisoq siulittaasoq tamanna pillugu piaartumik nalunaarfigissavaat. Guutip oqaasiata misissorluarnissaanut soqutiginninnerput kajuminnerpullu tusakkatsinnit annertusarneqassaaq. Taamaattumik immikkut ittumik ataatsimeersuarnissami anersaakkut nerisassat pinngitsooqinagit.