Ikiuutissat ajoqersuisut, iliuuseqartitsisut nakussatsitsisullu
1 Inuit Biibili pillugu ajoqersoraangatsigit Jehovap Nalunaajaasuilu pillugit paasissutissanik tunigaangatsigit taakkua ikiuutaalluartarput. Amerlasuunut sallusuissummut aalajanerniarnerminnik iliuuseqalersittarpaat. Guutip innuttaasa tunniulluinnarsimasut uppernerat pingaartitsinerallu taakkunatigut nakussatsinneqartarput. Suunuku eqqartorneqartut? Videomik isiginnaagassiatt Jehovap Nalunaajaasuisa peqatigiissortaata pilersitai. Tamaasa takusimavigit, aamma qanga kingullermik takuigit? Oqaluussigaangavit atortarpigit? Peqatigiiffiup maanna videomik isiginnaagassiat aqqanilissaat saqqummersippaat, ateqarporlu Our Whole Association of Brothers (isumaqartoq Qatanngutigiissuserput tamaat, suli qallunaatuunngortitaanngilaq). Ikiuutissaalluartut taakkua qanoq iluaqutiginerussavavut?
2 Allaaserisami „Ilaqutariittut Guutip Oqaasia Atuaqqissaartarsiuk“-mi Napasuliaq Alapernaarsuiffik 1. juuli 1999-meersumi siunnersuutigineqarpoq ’Peqatigiiffiup videoliaasa ilikkagaqarnartut ilaat isiginnaartaqqullugit . . . kingornatigullu imarisaa oqaloqatigiissutigalugu’. Siunnersuut tamanna pitsaasoq siunissami oqaluussinermut tunngasumik ataatsimiinnerni qaammat allortarlugu videomik isiginnaagassialiat tamarmik immikkuutaarlugit allaaserineqarnissatigut malinneqartassaaq. Ilagiinniittut tamarmik oqaluussinermut tunngasumik ataatsimiinnginnerni isiginnaartaqqullugu kajumissaarpavut.
3 Qaammat manna videomik isiginnaagassiaq pilersinneqartoq siulleq Jehovas Vidner og deres organisation oqaloqatigiissutigineqassaaq. Apeqqutit tulliuttut paasiniarlugit isiginnaaruk tusarnaarlugulu:
◼ Jehova Nalunaajaasui qanoq ilisimaneqarneruppat?
◼ Allassimaffik suna Betelimi suliarineqartunut tamanut attuumatinneqarpa?
◼ Biibilimi pisimasoq suna atuagassianut atorneqartussatut aaqqissorneqarlunilu, assilineqarluni, titartarneqarluni qalipanneqarpa?
◼ Atuagassiaatitta naammassineqarlutik suliarineqarneri takoreerlugit ilinnut qanoq sunniuteqarpa?
◼ Atuagassiat qanoq amerlatigisut Peqatigiiffiup 1920-mit 1990-mut naqitersimavai?
◼ Guutip innuttaasa akornanni ingammik kikkut Betelimi kiffartornissaminut anguniagaqarniartariaqarpat? — Uss. 20:29.
◼ Betelimi kiffartortut Jehovap Nalunaajaasuinut tamanut qanoq ilillutik maligassiuilluarpat?
◼ Nutaarsiassaq nuannersoq inunnut sapinngisamik amerlasuunut annguteqqullugu Betelimi suliarineqarnerit takullugit ilinnut qanoq sunniuteqarpa?
◼ Nunarsuaq tamakkerlugu suliaq qanoq aningaasalersorneqarpa?
◼ Suliaq suna tamatta ilungersorluta peqataaffigisinnaavarput, qanorlu isiginnittaaseqarluta? — Juá. 4:35; ap. sul. 1:8.
◼ Jehovap Nalunaajaasuisa peqatigiissortaat qanoq isigaajuk?
◼ Videomik isiginnaagassiaq oqaluussinermi qanoq atorneqarsinnaava?
Decembarimi videomik isiginnaagassiaq Bibelen — nøjagtig historie, pålidelig profeti pillugu allaaserisaqassaaq.