Iliuuseqarnerorusuppit?
1 Jiisusip Naalagaaffik illernartuutitut naleqangaartutut assersuuppaa. (Mat. 13:44-46) Naalagaaffimmik tusagassamik nuannersumik oqaluussineq sulineq illernartuutitut akisuutut ippoq. Naak imminnut tunniuttuartariaqaraluarluta oqaluussineq inuunitsinni salliutittariaqarparput. (Mat. 6:19-21) Oqaluussinermi iliuuseqarnerorusuppit?
2 Suut pisariaqarnersut isumaliutigeqqissaaruk: Oqaluussinermi suliniuteqarnerujumagaanni: (1) Naalagaaffiup soqutigisai inuunermi salliutinniarlugit aalajangersimasariaqarpoq (Mat. 6:33); (2) Jehovamut uppernermik tatiginninnermillu takutitsinissaq (2 Kor. 4:1, 7); (3) Ilumoortumik kipisuitsumillu qinunikkut Guutimut ikiortissarsiornissaq (Luk. 11:8-10); (4) nammineq qinnutinut naapertuuttumik iliuuseqarnissaq. — Jaaku. 2:14, 17.
3 Oqaluussinermi iliuuseqarnerunissamut periarfissat: Tamatta aalajangersimasumik oqaluussisalernissarput anguniarsinnaavarput. Torrutiinnarluguli oqaluussinissamut periarfissatit tamaasa atortarpigit, oqariartuummik saqqummiussillualernissat suliniutigaajuk pulaaqqittakkannullu oqaluussisarnerit siuariartortillugu atuaqqissaaqatigiinnermillu aallarniillutit? Pisariaqartitsiffiunerusumi ikiorti-pioneeriunissannut pioneriunissannulluunniit periarfissaqarpit? Qatanngutaaguit angut, ilagiinni kiffartortunngorsinnaavit utoqqaanertanngorlutilluunniit? (1 Tim. 3:1, 10) Kiffartornerit annertusarsinnaaviuk Betelimut, Kiffartortut atuarfiannut ajoqersuiartortunngorusuttunulluunniit atuarfiannut Gileadimut qinnuteqarnikkut? — Luk. 10:2.
4 Qatanngut angut ulloq tamaat sulisartoq piffissarujussuarmillu timersornermut atuisartoq pionerinngornissamut kajumissaarneqarsimavoq. Ikiorti-pioneritut nalunaarpoq piffissallu ingerlanerani pionerinngornissaminut pissutsit naleqqussarpai. Kingusinnerusukkut Kiffartortut atuarfianniilerpoq, ilagiinnilu kiffartortutut saqqummiussassaminik piareersarnissaminut iluaqutigaa. Naalagaaffimmut tunngasunik suliaqarnerunissaminut kajumissaarutit qujamasuutigeqai. Qularutiginngilaalu allamik pilluarnarnerusumik nassaassaqanngitsoq.
5 Jehovap kiffartornissaminnut piareersimasut pilluaqqusarpai. (Es. 6:8) Suulluunniit kiffartornermi suliniuteqarnerunissannut akornusernaveerilisit nuannaarnermik nalerisimaarnermillu annertuumik kinguneqarmata.