Ataatsimeersuarnermi eqqaamasassat
Saqqummiussassanut piffissat: Ataatsimeersuarfissap matui nal. 8.00 ammarneqassapput. Ulluni pingasuni tamani nipilersuut nal. 9.20 appinneqartassaaq. Ataatsimeersuarneq torersumik aallartinniassammat piffissami tamatumani tamatta issiavissatsinnut ingikkiartortariaqarpugut. Tallimanngornermi arfininngornermilu nalunaaquttap tallimat missaani sapaammilu nalunaaquttap sisamat missaani saqqummiussassat naammassissapput.
‘Erinarsorlutit Jehova qutsavigiuk’: Guutip innuttaasa itsarli Jehova erinarsorlutik qutsavigisarpaat, ullumikkullu nipilersorneq ilumoortumik pallorfiginninnitsinnut suli pingaaruteqarput. (Tuss 28:7) Ulluni pingasuni ataatsimeersuarnermi immikkoortut tamarmik nipilersuummik aallarnerneqartarput. Tamanna tunuliaquttatut nipilersuutaannaanani Jehova taassuminngalu pallorfiginninneq pillugit ilinniutissaavoq. Taamaattumik nipilersuutip appinneqarnissaa saqqummiussassanik aqutsisup nalunaarutigippagu oqaloqateqarnani inginnissamut qujamasullunilu nipilersuummut tusarnaarnissamut piffissanngussaaq. Taamaaliorutta ersersissavarput Napasuliap Alapernaarsuiffiup nipilersoqatigiivisa immiussaannik pingaartitsilluta. Qatanngutit angutit arnallu ukiumut marloriarlutik namminneq akilikkaminnik nipilersuutinik nuannersunik Pattersonimut, New Yorkimiittumut, immiussiartortarput. Aallarniutitut nipilersuummut tusarnaareerutta tamatta erinarsuutinik Naalagaaffilersaarutinik erinarsoqataasinnaavugut.
Biilinik inissiineq: Ataatsimeersuarfinni tamani biilinut inissiisarfinnik nakkutilliisuuffigisatsinni inissiiffissat akeqassanngillat biilillu tikiussortillugit inissititerneqassallutik. Biilinut inissiisarfiit killeqakkajummata biileqatigiinnissaq siunnersuutigineqarpoq. Innarluutilinnut allagartallit kisimik sumiiffinnut innarluutilinnut immikkoortinneqarsimasumut biilitik inississinnaavaat. Stockholmimi ataatsimeersuarnermut tunngatillugu paasissutissat amerlanerusut www.sammankomst.org-imi saqqummersinneqassapput.
Issiavinnik inniminniineq: Ataatsimeersuarfissamut matut ullaakkut ammarneqarpata tuaviinnaq, issiavinnukaqqaanniuttutut, issiavinnukartoqassanngilaq. Allat innimigineqassapput, allaat qatanngutivut pillugit piumasavut tunulliukkusuttariaqarpavut. Imminut pilliutigeriaannaanerput kristumiutut ilumoortutut ilisarnaatigaarput, taamaaliornerpullu pissutigalugu inuit uagutsinnik takunnittut Guuti unnersiutigisarpaat. (Joh 13:34, 35; 1 Kor 13:5; 1 Petr 2:12) Biileqatigisatit, ineqatigisatit Biibilimilluunniit atuaqqissaaqatigisartakkatit taamaallaat issiavinnik inniminniissussinnaavatit. Pitsaanerussaaq pigisatit issiavinnut atunngisannut ilinngikkukkit. Taamaalioruit allat issiaviit sorliit atorneqannginnersut takusinnaassavaat. Utoqqarnut pitsorluttunullu immikkut ittunik issiavissaqassaaq. Issiaviit taakku killeqarmata taamaallaat inuk ataaseq marlulluunniit utoqqarmik pitsorluttumilluunniit issiaqateqarsinnaapput.
Isornaatsumik atisalersortarneq: Silarsuarmi atisalersoriaatsit ingasattut nalinginnaasullu assiginagit ataatsimeersuarnitsinni atisalersortarnerput naleqquttariaqarlunilu isornaatsuusariaqarpoq. (1 Tim 2:9) Allaat hotelimut inissinnitsinni hotelimillu aallalernitsinni aamma ataatsimeersuarnerup aallartinnginnerani kingornalu atisavut ulluinnarsiutaanatik kusanartuusariaqarput. Taamaaliorutta ataatsimeersuarnermi allagartap atornissaa tulluusimaarutigissallugulu kanngusunnata nalunaajaasinnaalissaagut. Ataatsimeersuarnermi isikkorinnerput pissuserinnerpullu pissutigalugit inuit eqqortuliorusuttut Biibilimi tusarliussamik annassutaasinnaasumik tusarusulersinnaapput, pingaarnerpaatullu Jehovamut nuannaarutaassapput. — Sef 3:17.
Atortorissaarutinut elektroniskiusunut tunngatillugu innimittarit: Mobilit atortorissaarutilluunniit elektroniskiusut ataatsimeersuarnermi allanut ajoqutaannginnissaat qulakkeeruk. Assiliivik, filmiliuut atortorissaarulluunniit elektroniskiusoq atorutsigu allanik assersuinnginnitsigut innimittarsinnaavugut. Aamma ataatsimeersuarnerup nalaani sms-innginnitsigut e-mailinnginnitsigulluunniit innimittartuusarpugut.
Nerineq: Ataatsimeersuartarfik qimannginniassagakku ulloqeqqasiuutissannik taquarit. Køletaski anginngitsoq issiaviup ataanut inissinneqarsinnaasoq atorneqarsinnaavoq. Køletaskit angisuut atortullu igalaaminiusut ataatsimeersuarfimmut eqqunneqaqqusaanngillat.
Tunissutit: Ataatsimeersuartarnitsinnut qujamasunnerput takutissinnaavarput ataatsimeersuarnermi silarsuaq tamakkerlugu suliniarnermut kajumissutsitsinnik tunisinikkut. Kortterminalit atorlugit tunisisoqarsinnaavoq.
Nakorsaatit: Nakorsaatinut allagartaqaruit ataatsimeersuarfimmi nakorsaatinik aallertoqarsinnaanngimmat naammattunik pissamaateqarnissat qulakkiissavat. Sukkornermik nappaatillit kapuutaat eqqaavinnut iginneqarnatik eqqaavinnut ulorianartunut naatsorsuussaasunut iginneqartariaqarput.
Isumannaallisaaneq: Quaannissat mianersuutigiuk. Ukiut tamaasa kamippaat, ingammik kimmikkaat, pissutigalugit ajoqusertoqartarpoq. Kamippaat naleqquttut majorallaffikkoorutaasinnaasut, majuartarfikkoorutaasinnaasut ristikkoorutaasinnaasut il.il. atorukkit ajunnginnerussaaq.
Tutsarluttunut: Saqqummiussassat ataatsimeersuarfimmi radiokkut tusarnaarneqarsinnaapput. Saqqummiunneqartut tusarnaarumallugit radio naalaarutillu nassassavatit.
Stockholmimi ataatsimeersuarnermi barnevognit issiaviillu nammineq nassatat: Qatserisartoqarnermi peqqussutit pissutigalugit barnevognit ataatsimeersuarfimmut eqqunneqaqqusaanngillat. Taamaattorli silami barnevogninut inissiisarfeqassaaq meeqqallu issiavii angajoqqaat eqqaannut issiavinnut isumannaarneqarsinnaapput. Sumiiffik anginngitsoq issiavinnut nammineq nassatanut immikkoortinneqassaaq.
Tipigissartarneq: Ataatsimeersuarnerit amerlanerit inersuarni silaannarissarfilinni ingerlanneqassapput. Taamaattumik tipigissaatit tipigissaatinik sapigalinnut ajoqutaasinnaammata killilimmik tipigissartarnissaq asannittuliornerussaaq. — 1 Kor 10:24.
Neriniartarfiit: Neriniartarfinni pissuserinnikkut Jehovap aqqanik ataqqinarsisitsigit. Atisat oqaluussigaangavit atortakkatit atukkit.
Hotelit:
Init atugassarinngisatit inniminnernagillu inimi inuit najugaqaqqusaasut amerlassusaat sippussanngilatit.
Taamaallaat pinartumik pisoqartillugu inniminnikkat taamaatissavat, taamaatittariaqarukkulu ini allanit attartorneqarsinnaaniassammat piaarnerpaamik taamaaliussaatit. (Matt 5:37) Taamaatitsisimaguit taamaatitsininnut uppernarsaammik pissarsinissat qulakkiissavat.
Maluginiassavat inimut aningaasartuutitit, najugaqarninni aseruinerit aningaasartuutilluunniit allat, akilerneqarsinnaanissaat qulakkeerniarlugu hotelimi korti atorlugu akiliiguit hotelit ilaasa kortinni aningaasat aalajangersimasut immikkoortissinnaammatigit. Aallarnerpit ullualuit kingorna naatsorsuisoqareerpat aningaasaatitit taakku atoqqissinnaanngussavatit.
Nassatanut assartuut aatsaat pisariaqartikkukku atorsinnaavat, pisariaqartikkunnaarukkulu ingerlaannaq utertissavat.
Nunami ileqquuppat hotelimi sulisut nassatanik aqqussuisartut eqqiaasartullu aningaasanik kajumissaatissiissutinik tunisinnaavatit.
Inini igasoqarfiusinnaasuni taamaallaat igasoqarsinnaavoq.
Nerisassat, kaffi sikuluunniit akimut ilaareerpata ingasaassillutit piniinnassanngilatit.
Anersaap inerititaa hotelimi sulisunut ersersinniartuassavat. Inuppassuarnik sullissisaramik uagutsinnit inussiarnersumik, kamagittartumik ingasaassinianngitsumillu pineqartarnertik qujamasuutigissavaat.
Angajoqqaat meeqqatik hotelimiinnerminni, soorlu hotelip elevatoriani, naluttarfiani, saaffiginnittarfiup eqqaani, sungiusartarfimmi il.il. nakkutigisariaqarpaat.
Hotelinut siunnersuutigineqartunut allattorsimaffimmi inimut aki allassimasoq ullormut, akileraarutit ilanngullugit, akigitinneqartarpoq. Akisuallaamik akileeqquneqaruit itigartitsissaatit ataatsimeersuarnermilu inissaqartitsinermut immikkoortortaqarfik piaarnerpaamik attavigalugu.
Hotelimi ineqarninnut tunngatillugu ajornartorsiuteqartoqalerpat ataatsimeersuarnermi inissaqartitsinermut immikkoortortaqarfik ikiorneqarumallutit attavigiuk.
Kajumissutsimik suleqataaneq: Kajumissutsimik suleqataarusuttut ataatsimeersuarnermi kajumissutsimik sulisunut immikkoortortaqarfimmut nalunaassapput. Meeqqat 16-it inorlugit ukiullit angajoqqaatik, angajoqqaatut oqartussaatitaasoq inersimasorluunniit angajoqqaanit akuerineqarsimasoq suleqatigalugit ikiuutaasinnaapput.