Inooriaaseq Guutimut ataqqinaataasoq
1. Sooq Jehovap Nalunaajaasui ataatsimeersuaraangamik ilisarineqartarpat?
1 Ataatsimeersuariaraangatta inunnit amerlanernit ilisarineqarsinnaasarpugut. Sumiiffinni amerlanerni ataatsimeersuarnerput nutaarsiassaqartitsivinnit nalunaarutigineqartarpoq. Akunnittarfiit neriniartarfiillu amerlanerit ataatsimeersuarianik ulikkaartarput, illoqarfimmilu najugaqartut maluginiartarpaat tikeraarpassuit ataatsimeersuarnermi allagartaqarnerat. Illoqarfimmi ataatsimeersuarfiusumiinnitsinni ajunngitsumik inooriaaseqarnikkut Guutimik ataqqinarsisitsinissatsinnut eqqaasitsissutit maanna sammissavavut. — 1 Petr 2:12.
2. Qanoq illoqarfimmi ataatsimeersuariarfigisatsinni isornaatsumik atisaqarnitsigut Guutimik ataqqinarsisitsisinnaavugut?
2 Isornaatsumik atisalersortarneq: Ataatsimeersuarnitsinni isornaatsumik atisalersortarnerput uppeqatiginngisatsinnit tupigusuutigineqarajuttarpoq. Pisunili allani — akunnittarfimmut iserternitsinni, neriniartarfinni nerinitsinni, pisinniarfilerinitsinni ilaalu ilanngullugit — atisalersoriaaserput allanut sunniuteqarnerusinnaasarpoq. Pisuni taakkunani assuuteqartariaqanngikkaluarluta atisavut ulluinnarsiutaanatik kusanartariaqarput aamma ataqqinnippaluttuusariaqarput. Uppeqatiginngisatta allanit upperisalinnit allaanerunerput takusinnaasariaqarpaat. (Rom 12:2) Tamatuma saniatigut ataatsimeersuarnerput ilisimaneqalersissinnaajumallugu, nalunaajaanissamut periarfissaqalersinnaajumalluta ataatsimeersuarianillu allanit ilisarineqarsinnaajumalluta ataatsimeersuarnermi allagartarput saqqarmiorisariaqarparput.
3. Utaqqisinnaassuseqarnerput inussiarnersuunerpullu qanoq ersersissinnaavavut?
3 Utaqqisinnaassuseqarneq inussiarnersuunerlu: Silarsuarmi inuit amerlasuut namminissarsiortuullutillu qujasuitsuummata utaqqisinnaassuseqarnerput inussiarnersuunerpullu inunnut allanut, soorlu akunnittarfimmi neriniartarfimmilu sulisunut, qiimmassaataassaaq! (2 Tim 3:1-5) Issiavissarsioraangatta ataatsimeersuarnermiluunniit saqqummersinneqarsimasunik piniarluta siuleriiaakkaangatta allanut, uagutsinnuunngitsoq, pitsaanerusoq noqqaassutigisariaqarparput. (1 Kor 10:23, 24) Soqutiginnittoq siullerpaamik ataatsimeersuarnermut najuutereerluni ima oqaluttuarpoq: “Ulloq taanna saqqummiuneqartut tamaasa eqqaamasaqarfiginngilakka, nalunaajaasulli ileqqorissaarnerat puiukkiunnikuuara.”
4. Sooq ataatsimeersuarnermi nammineq kajumissutsimik suleqataanissatsinnut piumassuseqartariaqarpugut?
4 Nammineq kajumissutsimik sulisut: Kristumiut ilumoortut namminneq kajumissutsiminnik sulisarnerminnut ilisimaneqarput. (Tuss 110:3) Ataatsimeersuarnermi nammineq kajumissuserisannik suleqataasinnaavit? Ataatsimeersuarfissat ilaanni qatanngutit angutit arnallu 600-t missaanniittut ataatsimeersuarnerup aallartinnginnerani namminneq kajumissutsiminnik eqqiaaqataasimapput. Sulisut ima oqaluttuarput: “Aatsaat taama tupinnartigisumik takusaqarpugut! Peqataasut tamarmik kajumissutsiminnik suleqataanerat upperinngingajapparput.” 2013-imi ataatsimeersuarnissarput aamma Guutimut tusarnaaginnarata taassumanngalu ilinniartinneqaannarata taassuminnga ataqqinarsisitsinissarput qilanaaraarput.
[Qupp. 3-6-mi ungalusaq]
2013-imi ataatsimeersuarnermi eqqaamasassat
JEHOVAP NALUNAAJAASUISA SILKEBORG- IMI ATAATSIMEERSUARTARFIAT (STÆVNEPLADSEN)
◼ Angallanneq: Sukkassusissap killinganut allagartat qamutinut angallatinut tamanut, aamma sikkilinut, atuupput. Aqqusinermi taamaallaat sikkilertoqarsinnaavoq — ingammik unnuisarfimmi mianersortoqassaaq. Skateboardertoqaqqusaananilu rulleskøjtertoqaqqusaanngilaq.
◼ Aqutsisup allaffia: Oqalugiartarfiup tunuaniippoq.
◼ Ataatsimeersuartarfiup aappaa (Stævnehallen): Oslovej 4-mi inissiaq ataatsimeersuartarfik (Stævnehallen) ammarneqassappat nalunaarutigineqarumaarpoq.
◼ Bussit: Tamanut ilaasartaatit atukkit.
◼ Dankortterminali: Inersuup silarliup kujataa-tungaani unnuisarfimmilu dankortterminaleqarpoq.
◼ FM: Saqqummiussassat tamarmik radiokkut tusarnaarneqarsinnaapput, taamaattumik saqqummiunneqartunut tusarnaarumallutit naalaarutit siutaasat nassassavatit. FM-imi sorlermi tusarnaartoqarsinnaanersoq nalunaarutigineqarumaarpoq.
◼ Ikiueqqaarneq: Inersuup kujataa-tungaaniippoq. Ajornartoortoqarpat nakkutilliisoq qaninnerpaaq attavigineqassaaq, taassumalu immikkoortortaqarfik FØRSTEHJÆLP-imeersut kalerrissavai ikiueqqaarnermut pikkorissarsimasut ajornartoornermik nalileeqqujartorlugit ikiueqqujartorlugillu. Pisariaqassappat FØRSTEHJÆLP-imeersut 1-1-2-mut sianissapput.
◼ Immikkoortortaqarfiit allaffiillu: Immikkoortortaqarfiit allaffiillu sumiinnersut paaserusukkukku qatanngutit ORDEN OG OPSYN-imiittut imaluunniit INFORMATION-imiittut aperissavatit.
◼ Ineqarfik: Ukiormanna ilinniartut inaat attartorneqarsinnaanngillat.
◼ Innarluutilinnut perusuersartarfiit: Ataatsimeersuartarfimmi unnuisarfimmilu perusuersartarfinni innarluutilinnut perusuersartarfeqarpoq.
◼ Isersimaartarfik (Lounge): Inersuup kujataa-tungaaniippoq. Sila nillerpat kissasserneqassaaq. Issiaviit amerlanngimmata utoqqaat, innarluutillit allallu immikkut pisariaqartitsisut kisimik loungemiissinnaatitaapput. Isaariaa inersuup silarlianiippoq. Issiavinni kaassuartakkaniittunut isaariaqarpoq.
◼ Issiavinnik inniminniineq: Ataatsimeersuarnerit ulluisa siullianni nal. 8.00-niit ataatsimeersuartarfimmi issiavissanik inniminniisoqarsinnaavoq. Tamanna aamma issiavinnut nammineq nassatanut allanullu atuuppoq. Piffissami inniminniisoqaqqusaanngiffiusumi atortut issiavinniittut nassaarineqarsimasut kavaajaartarfimmi TABT OG FUNDET-imi aaneqarsinnaapput. Ullormiit ullormut inniminniisoqarsinnaavoq. Inoqutigiinnut biileqatigisimasanulluunniit taamaallaat inniminniisoqarsinnaavoq. Pisariaqassappat qatanngutit ORDEN OG OPSYN-imeersut ataatsimeersuarnerup aallartereernerani issiaviit atorneqanngitsut allanut tunniussinnaavaat. Issiaviit nammineq nassatat ataatsimeersuarfimmiitiinnarneqarsinnaapput.
◼ Isumannaallisaaneq: Campingvognimi innaallagiaqarsinnaajumallutit allattorsimaffimmi ilagiinnut nassiunneqarsimasumi “Sikkerhed på overnatningspladsen”-imi, tikinnermi aamma tunniunneqartussami, allassimasutut kabeli ikkutissavat. Kabelit inerteqqutaasut ikkussivimmit peerneqassapput. Campingvognit tamarmik gasimik atuisinnaanermut uppernarsaateqassapput.
◼ Katatat qimatallu, kavaajaartarfik: Inersuup silarliup avannaa-tungaaniippoq.
◼ Kuisinneq: Kuisinneq Jehovamut Guutimut inuttut tunniulluinnarnermut ersersitsinerummat kuisittussat kuisinnerminni tasiornissaat pissusissamisuunngilaq. Kuisittussat kuisinnginnerminni kuisereernermilu kingorna assilisikkusullutik kuisiffissamukaqqusaanngillat.
◼ Nangilersuisarfik: Ataatsimeersuartarfiup avannaa-tungaani kujataa-tungaanilu aamma unnuisarfimmi perusuersartarfimmi nangilersuisarfeqarpoq.
◼ Nerineq: Tupeq nerisarfik nr. 4 utoqqaat pitsorluttullu kisimik atorsinnaavaat.
◼ Pitsorluttut biiliminnik inissiisinnaanerat: Ataatsimeersuartarfiup isaariaani biilinik inissiisarnermik nakkutilliisut inissisimaffissamik innersuussissapput aamma saqqummiunneqartunut tusarnaarnermi biiliminniinnissaminnik pisariaqartitsisunut I-skiltinik (innarluuteqarnermut takussutissanik) tunniussissapput. (Saqqummiunneqartut biilimi radiokkut tusarnaarneqassapput). Annertuumik innarluutillit ataatsimeersuarnerup aallartinnginnerani ataatsimeersuartarfimmukarsinnaanngikkunik kingusinnerpaamik nal. 8.00 stævnepladsimut sianerlutik inissaminnik inniminniisinnaapput.
◼ Qasuersaartarfik: Tupeq kujallerpaamiippoq, FØRSTEHJÆLP-ip akinnguani.
◼ Saqqummiunneqartunik immiussineq: Immiussissutit ataatsimeersuartarfimmi sarfalersuutinut imaluunniit nipilerissutinut ikkunneqaqqusaanngillat. Saqqummiunneqartunik immiussineq allanut akornutaassanngilaq.
◼ Tusilartunut nutserussineq: Ulluni 11.-13. juulimi ataatsimeersuarnermi tusilartunut nutserussisoqassaaq.
◼ Tutsarluttut: Ataatsimeersuartarfimmi qasuersaartarfimmilu tusilartunut naalaaruteqarpoq.
◼ Unnuisarfik: Aatsaat ataasinngorneq nal. 10.00-p kingorna unnuisarfimmut isertoqarsinnaavoq; tamanna aamma ataatsimeersuarnermi siullermi atuuppoq. Ataatsimeersuarnerni tamani unnuisarfik kingusinnerpaamik sapaat nal. 14.00 qimanneqareersimassaaq.
◼ Uumasuutit: Qimmit uumasulluunniit allat, qimmit tappiitsut tasikumiagarisartagaat minillugit, ataatsimeersuartarfimmut unnuisarfimmullu eqquteqqusaanngillat.
MALUGINIARUK: Oqaluussisartut Kalaallit Nunaaneersut 1.-3. aggusti 2013-imi Silkeborgimi ataatsimeersuarnermut najuunnissamut qaaqquneqarput.