“Inuit allat akornanni pissuserissuujuaritsi”
1. Sooq ataatsimeersuarnermi pissuserissuunissaq pingaartipparput?
1 Ukiut tamaasa ataatsimeersuarnitsinni inunnit malugineqartaratta Guutimut sinniisuunerput pissuserinnitsigut takuneqarsinnaasariaqarpoq. (3 Mos 20:26) Pissuserissuunerput, atisalersoriaaserput isikkorissariaaserpullu Kristusimut ajoqersukkatut ilumoortuunitsinnik ersersitsisariaqarput. Ataatsimeersuarnitsinni qanoq Ataatatsinnik qilammiusumik naalannarsisitsisumik ‘inuit allat akornanni pissuserissuujuarsinnaavugut’? — 1 Petr 2:12, NW.
2. Ataatsimeersuarnermi kristumiutut pissuserinnerput qanoq ersersissinnaavarput?
2 Kristumiutut pissuserinneq ersersiguk. Asaqatigiinnerput ‘ilaginngisatsinnullu’ pissusilersortarnerput silarsuup anersaavanit allaanerulluinnarput. (Kol 3:9, 10; 4:5; 2 Tim 3:1-5) Akunnittarfimmi neriniartarfimmilu, ajornartorsiuteqaleraluarpalluunniit, sulisunut inussiarnersuullutalu utaqqisinnaassuseqassaagut.
3. Angajoqqaat suna eqqaamasariaqarpaat, aamma sooq?
3 Angajoqqaat meeqqatik ataatsimeersuarfimmi, neriniartarfinni akunnittarfimmilu nakkutigisariaqarpaat. (Uss 29:15, NW) Akunnittarfimmi neriniartarfiup pisortaa aappariinnut ima oqarsimavoq: “Nuannarisorujussuuassi. Tamatigut pissuserittarlusilu inussiarnertarpusi. Aamma meeqqasi taamaapput. Sulisut tamarmik weekendini tamani maani unnuisarnissarsi kissaatigigaluarpaat.”
4. Illoqarfimmi ataatsimeersuarfiusumiinnitsinni isikkutsinnut tunngatillugu suut eqqarsaatigisariaqarpavut?
4 Isornaatsumik atisalersortarneq. Silarsuarmi atisalersoriaatsit ingasattut nalinginnaasullu assiginagit ataatsimeersuarnitsinni atisalersortarnerput naleqquttariaqarlunilu isornaatsuusariaqarpoq. (1 Tim 2:9) Allaat akunnittarfimmut inissinnitsinni akunnittarfimmillu aallalernitsinni aamma ataatsimeersuarnerup aallartinnginnerani kingornalu atisavut ulluinnarsiutaanatik kusanartuusariaqarput. Taamaaliorutta ataatsimeersuarnermi allagartap atornissaa tulluusimaarutigissallugulu kanngusunnata nalunaajaasinnaalissaagut. Ataatsimeersuarnermi isikkorinnerput pissuserinnerpullu inuit eqqortuliorusuttut Biibilimi tusarliussaq inuunartoq pillugu paasisaqarusulissutigissavaat, pingaarnerpaatullu Jehovamut nuannaarutaassaaq. — Sef 3:17.