ಕ್ರಿಸ್ತನ ಸ್ಮರಣೆಗೆ ನೀವು ಹೇಗೆ ಸಿದ್ಧತೆ ಮಾಡುತ್ತಿದ್ದೀರಾ?

ಕ್ರಿ.ಶ. 33 ನೈಸಾನ್‌ 13⁠ರ ಸಂಜೆ, ತನ್ನ ಶಿಷ್ಯರೊಂದಿಗೆ ಸಮಯ ಕಳೆಯಲು ತನಗಿದ್ದ ಕೊನೆಯ ಅವಕಾಶ ಎಂದು ಯೇಸುವಿಗೆ ತಿಳಿದಿತ್ತು. ಕಾರಣ, ಮರುದಿನ ಅವನು ಸಾಯಲಿದ್ದನು. ಆದ್ದರಿಂದ ಅವರೊಂದಿಗೆ ತನ್ನ ಕೊನೆಯ ಪಸ್ಕ ಹಬ್ಬವನ್ನು ಆಚರಿಸಿ, ಕರ್ತನ ಸಂಧ್ಯಾ ಭೋಜನವೆಂಬ ಒಂದು ಹೊಸ ಆಚರಣೆಯನ್ನು ಆರಂಭಿಸಲಿದ್ದನು. ಇಂಥ ಪ್ರಾಮುಖ್ಯ ಆಚರಣೆಯನ್ನು ನಡೆಸಲು ತುಂಬ ಸಿದ್ಧತೆ ಮಾಡಬೇಕಿತ್ತು. ಆ ಸಿದ್ಧತೆಗಳನ್ನೆಲ್ಲಾ ನೋಡಿಕೊಳ್ಳುವಂತೆ ಪೇತ್ರ ಮತ್ತು ಯೋಹಾನರಿಗೆ ಯೇಸು ಹೇಳಿದನು. (ಲೂಕ 22:7-13) ಅಂದಿನಿಂದ ಇಂದಿನವರೆಗೂ, ಪ್ರತಿ ವರ್ಷ ಯಾರೆಲ್ಲಾ ಕ್ರಿಸ್ತನ ಮರಣವನ್ನು ಸ್ಮರಿಸಲು ಇಷ್ಟಪಡುತ್ತಾರೋ ಅವರೆಲ್ಲಾ ಹೆಚ್ಚಿನ ಸಿದ್ಧತೆ ಮಾಡಿಕೊಳ್ಳಬೇಕು. (ಲೂಕ 22:19) ಹಾಗಾದರೆ, ಏಪ್ರಿಲ್‌ 3⁠ರಂದು ನಡೆಯಲಿರುವ ಸ್ಮರಣೆಗೆ ಮುಖ್ಯವಾಗಿ ನಾವು ಯಾವೆಲ್ಲಾ ಸಿದ್ಧತೆ ಮಾಡಿಕೊಳ್ಳಬೇಕು?

ಹಿರಿಯರು ಮಾಡಬೇಕಾದ ಸಿದ್ಧತೆಗಳು:

ಸ್ಮರಣೆಗಾಗಿ ರಾಜ್ಯ ಸಭಾಗೃಹ ಅಥವಾ ಸೂಕ್ತವಾದ ಇನ್ನೊಂದು ಸ್ಥಳದ ಏರ್ಪಾಡು ಮಾಡಿಕೊಳ್ಳಿ. ಆ ಸ್ಥಳದಲ್ಲಿ ಎಲ್ಲರೂ ಆರಾಮವಾಗಿ ಕುಳಿತುಕೊಳ್ಳಲು ಸಾಕಷ್ಟು ಆಸನಗಳಿರಬೇಕು, ಗಾಳಿ, ಬೆಳಕು ಇರುವಂತೆ ನೋಡಿಕೊಳ್ಳಬೇಕು. ಆ ಸ್ಥಳವನ್ನು ಮೊದಲೇ ಸ್ವಚ್ಛಗೊಳಿಸಲು ಏರ್ಪಾಡು ಮಾಡಿ.
ಆ ದಿನ ಯಾರು ಭಾಷಣ ನೀಡಬೇಕು, ಯಾರು ಅಧ್ಯಕ್ಷತೆ ವಹಿಸಬೇಕು ಮತ್ತು ರೊಟ್ಟಿ, ದ್ರಾಕ್ಷಾಮದ್ಯ ದಾಟಿಸುವ ಮುಂಚೆ ಯಾರ್ಯಾರು ಪ್ರಾರ್ಥಿಸಬೇಕು ಎಂದು ಮೊದಲೇ ನಿರ್ಣಯಿಸಿ.
ಒಂದೇ ಸ್ಥಳದಲ್ಲಿ ಒಂದಕ್ಕಿಂತ ಹೆಚ್ಚು ಕಾರ್ಯಕ್ರಮಗಳು ನಡೆಯುವುದಾದರೆ ಯಾವ ಸಮಯದಲ್ಲಿ ಯಾವ ಸಭೆಗಳು ಕಾರ್ಯಕ್ರಮ ನಡೆಸುತ್ತವೆ ಎಂದು ಮೊದಲೇ ನಿರ್ಣಯಿಸಿ. ಬಾಗಿಲಲ್ಲಿ ಮತ್ತು ವಾಹನ ನಿಲುಗಡೆಯಲ್ಲಿ ನೂಕು ನುಗ್ಗಲನ್ನು ತಪ್ಪಿಸಲು ಏರ್ಪಾಡುಗಳನ್ನು ಮಾಡಿ.
ಅಟೆಂಡೆಂಟರನ್ನು, ರೊಟ್ಟಿ ಮತ್ತು ದ್ರಾಕ್ಷಾಮದ್ಯ ದಾಟಿಸುವವರನ್ನು ಆಯ್ಕೆ ಮಾಡಿ, ಅವರಿಗೆ ತರಬೇತಿ ಕೊಡಿ.
ರೊಟ್ಟಿ, ದ್ರಾಕ್ಷಾಮದ್ಯ, ಅವುಗಳನ್ನಿಡುವ ಪ್ಲೇಟ್‌ ಮತ್ತು ಗ್ಲಾಸ್‌ಗಳು, ಮೇಜು ಮತ್ತು ಅದರ ಮೇಲೆ ಹಾಸುವ ಬಟ್ಟೆಯನ್ನು ಮೊದಲೇ ಸಿದ್ಧ ಮಾಡಿಕೊಳ್ಳಿ.

ಪ್ರಚಾರಕರು ಮಾಡಬೇಕಾದ ಸಿದ್ಧತೆಗಳು:

ಸ್ಮರಣೆಯ ಅಭಿಯಾನದಲ್ಲಿ ಸಂಪೂರ್ಣವಾಗಿ ಭಾಗವಹಿಸಲು ಇಂದಿನಿಂದಲೇ ಏರ್ಪಾಡು ಮಾಡಿಕೊಳ್ಳಿ.
ನಿಮ್ಮ ಬೈಬಲ್‌ ವಿದ್ಯಾರ್ಥಿಗಳ, ಸಂಬಂಧಿಕರ, ಸಹಪಾಠಿಗಳ, ಜೊತೆ ಕೆಲಸಗಾರರ ಮತ್ತು ಪರಿಚಯಸ್ಥರ ಹೆಸರುಗಳನ್ನು ಪಟ್ಟಿ ಮಾಡಿ ಅವರನ್ನೆಲ್ಲಾ ಆಮಂತ್ರಿಸಿ.
ಸ್ಮರಣೆಯ ವಾರದಲ್ಲಿ ಓದಲು ಕೊಡಲಾದ ಬೈಬಲಿನ ವಚನಗಳನ್ನು ಓದಿ, ಧ್ಯಾನಿಸಿ.
ಸ್ಮರಣೆಯ ದಿನದಂದು ಹೊಸದಾಗಿ ಬರುವವರನ್ನು ಸ್ವಾಗತಿಸಲು ಆದಷ್ಟು ಬೇಗ ಬನ್ನಿ.