Wetin Mek Jiova in Nem Rili Impɔtant to Jizɔs?

1-2. (a) Wetin Jizɔs bin du di nɛt bifo dɛn kil am? (b) Us kwɛstyɔn dɛn wi go tɔk bɔt insay dis atikul?

NA BIN Tɔsde nɛt, Naysan 14 insay di ia 33, ɛn tɛm bin dɔn rich fɔ mek Judas kɔmɔt biɛn Jizɔs, fɔ mek dɛn jɔj am, kɔndɛm am, bit am, ɛn kil am. I bin jɔs dɔn fɔ it wan spɛshal it wit in fetful apɔsul dɛn ɔp wan rum. Afta dɛn dɔn fɔ it, Jizɔs bin tɔk tin dɛn fɔ ɛnkɔrej in apɔsul dɛn. Ɛn jɔs bifo dɛn kɔmɔt na di rum, i bin stɔp ɛn pre wan impɔtant prea. Apɔsul Jɔn bin rayt da prea de. I de na Jɔn chapta 17.

² Insay dis atikul, wi go tɔk bɔt sɔm tin dɛn we wi go lan frɔm Jizɔs in prea. Wetin i bin de wɔri bɔt jɔs bifo i day? Aw da prea de sho di tin we bin impɔtant to am we i bin de du in prichin wok na di wɔl? Lɛ wi tɔk bɔt di ansa dɛn to dɛn kwɛstyɔn dɛn ya.

“A DƆN MEK DƐN NO YU NEM”

3. Wetin Jizɔs bin se bɔt Jiova in nem? Wetin i bin min? (Jɔn 17:6, 26)

³ We Jizɔs bin de pre, i tɔk se: “A dɔn mek dɛn no yu nem.” Infakt, i tɔk tu tɛm se i dɔn mek in disaypul dɛn no Jiova in nem. (Rid Jɔn 17:6, 26.) Wetin i bin min? Fɔ se i bin sho dɛn nem we dɛn nɔ bin sabi? Jizɔs in disaypul dɛn na bin Ju dɛn, so dɛn bin ɔlrɛdi no se Gɔd in nem na Jiova. Da nem de, de bɔku tɛm na di Ibru Skripchɔ dɛn. So Jizɔs nɔ bin de tɔk bɔt Gɔd in nem, bɔt i bin de tɔk bɔt wetin da nem de tinap fɔ. I bin mek dɛn no di Pɔsin we Jiova bi, di tin dɛn we I want fɔ du, di tin dɛn we I de du, ɛn In kwaliti dɛn di kayn we we nɔbɔdi nɔ ɛva du am.

4-5. (a) Us ɛgzampul wi go yuz fɔ sho wetin i min fɔ no pɔsin in nem? (b) Us we Jizɔs in disaypul dɛn bin kam fɔ no Jiova in nem?

⁴ Fɔ ɛgzampul, lɛ wi se wan ɛlda de na yu kɔngrigeshɔn we nem Devid we na dɔktɔ. Yu dɔn sabi da brɔda de fɔ lɔng tɛm. Bɔt wan de, yu sik siriɔs wan. Dɛn rɔsh go wit yu na di ɔspitul usay da brɔda de de wok, ɛn da brɔda de sev yu layf. Fɔ se da brɔda de in nem go impɔtant to yu naw mɔ? Yɛs! Devid nɔto jɔs di ɛlda we yu sabi; in na di dɔktɔ we sev yu layf.

⁵ Semweso, Jizɔs in disaypul dɛn bin ɔlrɛdi no Jiova in nem. Bɔt da nem de bin impɔtant to dɛn mɔ we Jizɔs bin de prich. Wetin mek wi tɔk so? Na bikɔs Jizɔs bin sho di kayn pɔsin we in Papa bi pan ɔl wetin i bin de se ɛn du. In apɔsul dɛn bin kam fɔ “no” Jiova mɔ bay we dɛn bin de lisin to aw Jizɔs bin de tich ɛn tek tɛm wach aw i bin de trit pipul dɛn.​—Jɔn 14:9; 17:3.

“YU NEM WE YU DƆN GI MI”

6. Wetin Jizɔs bin min we i se Jiova gi am In nem? (Jɔn 17:11, 12)

⁶ We Jizɔs bin de pre, i pre fɔ in disaypul dɛn we i se: “Protɛkt dɛn bikɔs ɔf yu nem we yu dɔn gi mi.” (Rid Jɔn 17:11, 12.) Fɔ se dis min se na Jizɔs dɛn go kɔl Jiova? Nɔ. We Jizɔs bin de tɔk bɔt Jiova in nem, i bin se “yu nem.” So Jiova in nem nɔ bin bi Jizɔs in nem. Bɔt wetin Jizɔs bin min we i tɔk se Gɔd dɔn gi am in nem? Fɔs, na Jizɔs Jiova bin sɛn ɛn na in bin de tɔk fɔ Jiova. I bin kam as pɔsin we in Papa sɛn ɛn i bin yuz in Papa in nem fɔ du pawaful wok dɛn. (Jɔn 5:43; 10:25) Sɛkɔn, Jizɔs in nem min “Na Jiova de Sev.” Jizɔs in nem in minin gɛt Jiova in nem.

7. Wetin mek Jizɔs fit fɔ tɔk fɔ Jiova? Gi wan ɛgzampul.

⁷ Fɔ ɔndastand wetin mek Jizɔs fit fɔ tɔk fɔ Jiova, tink bɔt dis ɛgzampul. Prɛsidɛnt kin sɛn pɔsin fɔ tɔk to ɔda pipul dɛn fɔ am. So we di pɔsin tɔk, i gɛt di sem pawa lɛk di prɛsidɛnt we sɛn am. Semweso, na Jiova bin sɛn Jizɔs, ɛn Jizɔs bin yuz Jiova in nem fɔ tɔk to pipul dɛn.​—Mat. 21:9; Lyuk 13:35.

8. Aw Jiova in nem bin de “pan” Jizɔs bifo i kam na di wɔl? (Ɛksodɔs 23:20, 21)

⁸ Di Baybul kɔl Jizɔs “di Wɔd” bikɔs Jiova bin yuz am fɔ tɛl enjɛl ɛn mɔtalman dɛn wetin Jiova bin want dɛn fɔ no ɛn fɔ du. (Jɔn 1:1-3) I go bi se na Jizɔs na di enjɛl we Jiova bin sɛn fɔ kia fɔ di Izrɛlayt dɛn di tɛm we dɛn bin de na di wildanɛs. We Jiova bin de tɛl di Izrɛlayt dɛn fɔ obe da enjɛl de, i bin se: “Bikɔs mi nem de pan am.”a (Rid Ɛksodɔs 23:20, 21.) We Jiova se in nem de “pan” Jizɔs, i min se na in de tɔk fɔ Jiova ɛn in na di men pɔsin we de pruv se Jiova de du ɔltin di rayt we ɛn i oli.

“PAPA, MEK LƐ YU NEM GƐT GLORI”

9. Aw Jiova in nem bin impɔtant to Jizɔs? Wetin mek wi se so?

⁹ Jɔs lɛk aw wi dɔn tɔk, ivin bifo Jizɔs de kam na di wɔl, Jiova in nem bin impɔtant to am pas ɛni ɔda tin. Na dat mek wi nɔ sɔprayz we Jiova in nem bin gɛt sɔntin fɔ du wit ɔl di tin dɛn we Jizɔs bin du we i de na di wɔl. We tɛm nɔ bin de fa igen fɔ mek Jizɔs dɔn in wok na dis wɔl, i bin tɔk se: “Papa, mek lɛ yu nem gɛt glori.” Wantɛm wantɛm in Papa ansa lawd wan frɔm ɛvin se: “A dɔn mek i gɛt glori ɛn a go mek i gɛt glori bak.”—Jɔn 12:28.

10-11. (a) Aw Jizɔs bin mek in Papa in nem gɛt glori? (Luk bak di pikchɔ.) (b) Wetin mek nid de fɔ mek Jiova in nem oli ɛn fɔ pul badnem pan am?

¹⁰ Jizɔs sɛf bin mek in Papa in nem gɛt glori. Aw? Wan we aw i bin du dat na we i mek pipul dɛn no di fayn kwaliti dɛn we in Papa gɛt ɛn di wɔndaful tin dɛn we i de du fɔ ɔda pipul dɛn. Bɔt i bin du ɔda tin dɛn bak fɔ mek in Papa in nem gɛt glori. Nid bin de fɔ mek Jiova in nem oli ɛn fɔ pul badnem pan am. Jizɔs bin sho aw dat impɔtant we i bin tich in disaypul dɛn aw fɔ pre. I bin se: “Wi Papa we de na ɛvin, lɛ ɔlman tek yu nem as sɔntin we oli.”—Mat. 6:9.

¹¹ Wetin mek nid bin de fɔ mek Jiova in nem oli ɛn fɔ pul badnem pan am? Na bikɔs Setan nɔ bin ɔnɔ Jiova in nem ɛn i bin tɔk lay lay tin dɛn bɔt am na di gadin we bin de na Idɛn. Setan bin tɔk se Jiova de lay ɛn I de ayd gud tin frɔm Adam ɛn Iv. (Jɛn. 3:1-5) Setan bin de tray fɔ tɔk bak se Jiova nɔ de du tin di rayt we. Di lay lay tin dɛn we Setan bin tɔk bɔt Jiova go mek pipul dɛn tink se Jiova na Gɔd we bad. Leta, insay Job in tɛm, Setan bin tɔk se di wangren rizin we mek pipul dɛn de sav Jiova na bikɔs ɔf wetin I de du fɔ dɛn. Da layman de bin tɔk bak se no mɔtalman nɔ de we rili lɛk Jiova di kayn we we go mek i kɔntinyu fɔ sav Am we i gɛt prɔblɛm. (Job 1:9-11; 2:4) Tɛm bin nid fɔ pas fɔ sho if na Jiova de lay ɔ na Setan.

“A DE GI MI LAYF”

12. Wetin Jizɔs bin rɛdi fɔ du bikɔs i lɛk Jiova in nem?

¹² Bikɔs Jizɔs lɛk Jiova, i bin want fɔ du ɔl wetin i ebul fɔ mek Jiova in nem oli ɛn fɔ pul badnem pan am. Jizɔs bin tɔk se: “A de gi mi layf.” (Jɔn 10:17, 18) Jizɔs bin ivin rɛdi fɔ day fɔ Jiova in nem.b Di fɔs tu pafɛkt mɔtalman dɛn we na Adam ɛn Iv, bin tɔn dɛn bak pan Jiova ɛn sɔpɔt Setan. Bɔt Jizɔs bin rɛdi fɔ kam na di wɔl ɛn pruv se i lɛk Jiova. Jizɔs bin du dat bay we i bin de obe Jiova pan ɔl di tin dɛn we i bin de se ɛn du. (Ibru. 4:15; 5:7-10) I bin kɔntinyu fɔ sav Jiova fetful wan te dɛn kil am pan di tik we i sɔfa pan. (Ibru. 12:2) We i du dat, i bin sho se i lɛk Jiova ɛn In nem.

13. Wetin mek Jizɔs na bin di bɛst pɔsin fɔ pruv se Setan na layman? (Luk bak di pikchɔ.)

¹³ Di we aw Jizɔs bin liv in layf bin sho klia wan se na Setan na di layman, nɔto Jiova! (Jɔn 8:44) Jizɔs no Jiova pas ɛnibɔdi we dɔn ɛva liv. If ɛniwan pan di tin dɛn we Setan bin tɔk bɔt Jiova na tru, Jizɔs bin fɔ dɔn no bɔt am. Bɔt Jizɔs bin mek-ɔp in maynd fɔ tɔk di tru bɔt udat in Papa bi, we sho se i no se ɔl di tin dɛn we Setan tɔk na lay. Ivin we i bin tan lɛk se Jiova dɔn lɛf am, Jizɔs bin rɛdi fɔ day bifo i tɔn in bak pan in Papa we lɛk am.​—Mat. 27:46.c

“A . . . DƆN DƆN DI WOK WE YU GI MI FƆ DU”

14. Aw Jiova bin blɛs Jizɔs bikɔs i bin fetful?

¹⁴ We Jizɔs bin de pre di nɛt bifo i day, i bin tɔk se: “A . . . dɔn dɔn di wok we yu gi mi fɔ du.” I nɔ bin gɛt wan dawt se Jiova go blɛs am bikɔs i bin fetful. (Jɔn 17:4, 5) Jizɔs nɔ bin mek mistek fɔ biliv in Papa. Jiova nɔ bin alaw am fɔ kɔntinyu fɔ de na di grev. (Akt 2:23, 24) I bin gi Jizɔs layf bak ɛn gi am pozishɔn we ay pas di wan we i bin gɛt na ɛvin. (Fil. 2:8, 9) As tɛm de go, Jizɔs bin bigin fɔ rul as Kiŋ na Gɔd in Kiŋdɔm. Wetin da Kiŋdɔm de go du? Jizɔs bin gi di ansa we i bin de tich in disaypul dɛn aw fɔ pre. I bin se: “Lɛ yu Kiŋdɔm kam. Lɛ wetin yu [Jiova] want, bi na dis wɔl lɛk aw i de bi na ɛvin.”—Mat. 6:10.

15. Wetin bak Jizɔs go du?

¹⁵ I nɔ go te igen, Jizɔs go fɛt agens Gɔd in ɛnimi dɛn ɛn dɔnawe wit wikɛd pipul dɛn di tɛm fɔ Amagɛdɔn. (Rɛv. 16:14, 16; 19:11-16) Shɔt tɛm afta dat, i go trowe Setan insay di “ol we nɔ gɛt bɔtɔm,” usay i nɔ go ebul fɔ du natin. (Rɛv. 20:1-3) Jizɔs go mek pis de bak na di wɔl ɛn mek mɔtalman dɛn pafɛkt insay di Wan Tawzin Ia we I Go De Rul. I go gi layf bak to di wan dɛn we dɔn day. I go mek di wan ol wɔl bi paradays. Wetin Jiova want go bi!​—Rɛv. 21:1-4.

16. Wetin go apin afta di Wan Tawzin Ia we Krays Go De Rul dɔn?

¹⁶ Wetin wi de ɛkspɛkt se go apin afta di Wan Tawzin Ia we Krays Go De Rul dɔn? Mɔtalman go pafɛkt ɛn sin nɔ go de igen. Mɔtalman nɔ go yuz di prayz we Jizɔs bin pe fɔ fri dɛn igen fɔ beg Jiova fɔ fɔgiv dɛn, ɛn dɛn nɔ go nid midulman ɔ prist dɛn igen. Ɛn “di las ɛnimi, [we na di day we wi de day bikɔs ɔf Adam in sin], nɔ go de igen.” Di grev dɛn go ɛmti. Di wan dɛn we dɔn day go dɔn gɛt layf bak. Ɔlman we de na di wɔl go pafɛkt.​—1 Kɔr. 15:25, 26.

17-18. (a) Wetin bak go apin afta di Wan Tawzin Ia we Krays Go De Rul dɔn? (b) Wetin Jizɔs go du we di tɛm rich fɔ lɛ i dɔn fɔ rul? (1 Kɔrintians 15:24, 28) (Luk bak di pikchɔ.)

¹⁷ Wetin bak go apin we di Wan Tawzin Ia we Krays Go De Rul dɔn? Da tɛm de, sɔntin we rili spɛshal go apin. Nɔbɔdi nɔ go ɛva dawt igen se Jiova na Gɔd we oli ɛn we de du tin tret. Wetin mek? Insay di gadin we bin de na Idɛn, Setan bin tɔk se Jiova na layman ɛn I nɔ de rul mɔtalman di we we de sho se i lɛk dɛn. Frɔm da tɛm de, pipul dɛn we de ɔnɔ ɛn rɛspɛkt Jiova dɔn de mek in nem oli igen ɛn igen. So we di Wan Tawzin Ia we Krays Go De Rul dɔn, Jiova nɔ go gɛt bad nem igen. I go dɔn pruv klia wan se in na Papa we de na ɛvin we lɛk wi.

¹⁸ Afta di Wan Tawzin Ia we Jizɔs go de rul dɔn, ɔlman go no se ɔl di tin dɛn we Setan bin tɔk bɔt Jiova na lay. Wetin Jizɔs go du we di tɛm rich fɔ lɛ i dɔn fɔ rul? Fɔ se i go falamakata Setan ɛn tɔn agens Jiova? Nɔ! (Rid 1 Kɔrintians 15:24, 28.) Jizɔs go an ova di Kiŋdɔm bak to in Papa. I go put insɛf ɔnda Jiova in rul. Fɔ tru, Jizɔs nɔ tan lɛk Setan. Jizɔs rɛdi fɔ giv-ɔp ɔltin bikɔs i lɛk Jiova.

19. Wetin Jiova in nem min to Jizɔs?

¹⁹ Naw wi dɔn si di rizin we mek Jiova bin rɛdi fɔ gi Jizɔs In nem! Jizɔs dɔn sho pafɛkt wan di kayn pɔsin we in Papa bi. So wetin Jiova in nem min to Jizɔs? I min ɔltin to am. I bin rɛdi fɔ day fɔ da nem de, ɛn i go rɛdi fɔ an ova ɔltin bak to Jiova afta di Wan Tawzin Ia we I Go De Rul dɔn. Aw wi go falamakata Jizɔs in ɛgzampul? Wi go tɔk bɔt di ansa to da kwɛstyɔn de insay di nɛks atikul.