Wet fɔ di Siti we Go Kɔntinyu fɔ De

1. Wetin Jizɔs bin se go apin to Jerusɛlɛm we bin de trade?

SHƆT tɛm bifo Jizɔs Krays day, i bin tɛl in disaypul dɛn bɔt wan prɔfɛsi. Di fɔs tɛm we dis prɔfɛsi kam tru na di tɛm we dɛn dɔnawe wit Jerusɛlɛm ɛn di tɛmpul we bin de de. Jizɔs bin wɔn dɛn se wan de “sojaman dɛn” go kam ɛn “de rawnd Jerusɛlɛm.” (Lyuk 21:20) I bin tɛl dɛn se as dɛn si dɛn sojaman dɛn de, dɛn fɔ lɛf di siti wantɛm wantɛm. Di sojaman dɛn we bin sɔrawnd di siti na bin di Roman sojaman dɛn.​—Lyuk 21:21, 22.

2. Us advays apɔsul Pɔl bin gi di Ibru Kristian dɛn we bin de na Judia ɛn Jerusɛlɛm?

² Shɔt tɛm bifo di Roman sojaman dɛn sɔrawnd Jerusɛlɛm, apɔsul Pɔl bin rayt wan pawaful lɛta we wi de kɔl naw Ibruz. Insay da lɛta de, Pɔl bin gi di Kristian dɛn na Judia ɛn Jɛrusɛlɛm wan impɔtant advays we go ɛp dɛn fɔ rɛdi fɔ wetin gɛt fɔ apin. Us patikyula tin bin gɛt fɔ apin? Dɛn go dɔnawe wit Jerusɛlɛm. If dɛn Kristian dɛn de want fɔ sev, dɛn fɔ rɛdi fɔ lɛf dɛn os ɛn biznɛs dɛn. Pɔl bin rayt bɔt Jerusɛlɛm se: “Wi nɔ gɛt siti na ya we go kɔntinyu fɔ de.” I tɔk bak se: “Wi de wet wit ɔl wi at fɔ di wan we de kam.”—Ibru. 13:14.

3. Us siti “we de kam” Pɔl bin de tɔk bɔt? Wetin mek wi de wet fɔ am?

³ We di Kristian dɛn bin disayd fɔ lɛf Jerusɛlɛm ɛn Judia, i go bi se bɔku pipul dɛn bin de laf ɛn provok dɛn, bɔt dis tin we di Kristian dɛn bin disayd fɔ du bin sev dɛn layf. Tide, sɔntɛm pipul dɛn go se wi nɔ gɛt sɛns bikɔs wi nɔ abop pan mɔni ɔ mɔtalman dɛn fɔ sɔlv di prɔblɛm dɛn na di wɔl. Bɔt wetin mek wi disayd fɔ du dat? Na bikɔs wi no se i nɔ go te igen, dis wɔl go dɔn. Wi de wet fɔ “di siti we gɛt rial fawndeshɔn dɛn” we na “di wan we de kam,” dat na Gɔd in Kiŋdɔm.a (Ibru. 11:10; Mat. 6:33) Ɛniwan pan di sɔbɛdin dɛn insay dis atikul go tɔk bɔt: (1) aw Pɔl in advays bin ɛp di fɔstɛm Kristian dɛn fɔ kɔntinyu fɔ wet fɔ “di [siti] we de kam,” (2) aw Pɔl bin ɛp dɛn fɔ rɛdi fɔ di tin dɛn we bin gɛt fɔ apin, ɛn (3) aw in advays go ɛp wisɛf tide.

ABOP PAN DI WAN WE NƆ GO ƐVA LƐF YU

4. Wetin mek Jerusɛlɛm na ples we bin impɔtant to di Kristian dɛn?

⁴ Jerusɛlɛm na ples we bin impɔtant to di Kristian dɛn. Na de dɛn bin mek di fɔs kɔngrigeshɔn insay di ia 33 afta Krays ɛn na de di brɔda dɛn we bin de na di gɔvnin bɔdi bin de. Apat frɔm dat, bɔku pan di Kristian dɛn we bin de de bin dɔn gɛt os ɛn prɔpati dɛn na da siti de. Bɔt Jizɔs bin wɔn in disaypul dɛn se dɛn go nid fɔ kɔmɔt na Jerusɛlɛm ɛn ivin Judia.​—Mat. 24:16.

5. Aw Pɔl bin ɛp di Kristian dɛn fɔ rɛdi fɔ wetin bin gɛt fɔ apin?

⁵ Pɔl bin ɛp di Kristian dɛn fɔ pe atɛnshɔn to aw Jiova bin de si Jerusɛlɛm fɔ ɛp dɛn fɔ rɛdi fɔ wetin bin gɛt fɔ apin. I bin mɛmba dɛn se Jiova nɔ gladi igen fɔ di prist dɛn na di tɛmpul ɛn i nɔ de tek di sakrifays dɛn we dɛn de mek de. (Ibru. 8:13) Dɔn bak, bɔku pan di pipul dɛn we bin de na da siti de nɔ bin gri fɔ si Jizɔs as di Mɛsaya. Di tɛmpul na Jerusɛlɛm nɔto bin di men say igen fɔ wɔship Jiova di rayt we ɛn i nɔ bin de fa igen fɔ lɛ dɛn dɔnawe wit am.​—Lyuk 13:34, 35.

6. Wetin mek wi go se di Kristian dɛn bin rili nid di advays we Pɔl bin gi dɛn na Ibruz 13:5, 6 da tɛm de?

⁶ We Pɔl bin rayt to di Ibru Kristian dɛn, bɔku pipul dɛn we bin de na Jerusɛlɛm ɛn we bin de kam waka de bin de ɛnjɔy fɔ de de. Wan man we kɔmɔt na Rom we bin de rayt buk da tɛm de bin kɔl Jerusɛlɛm “di siti we pipul dɛn sabi pas ɔl di ɔda siti dɛn na da pat de na di wɔl.” Ju dɛn bin de kɔmɔt na difrɛn say dɛn ɛn kam na Jerusɛlɛm ɛni ia fɔ sɛlibret di fɛstival dɛn, ɛn dat bin de mek di siti gɛt mɔni. Wan dawt nɔ de se sɔm Kristian dɛn bak bin de bɛnifit bikɔs ɔf dis. Sɔntɛm na dat bin mek Pɔl tɛl dɛn se: “Lɛ di we aw una de liv una layf sho se una nɔ lɛk mɔni, ɛn una satisfay wit di tin dɛn we de naw.” Afta dat, i kot wan skripchɔ na di Baybul usay Jiova insɛf sɛf tɔk sɔntin we go mek in savant dɛn rili gɛt kɔnfidɛns. Jiova bin prɔmis se: “A nɔ go ɛva lɛf yu, ɛn a nɔ go ɛva lɛf fɔ ɛp yu.” (Rid Ibruz 13:​5, 6; Dyu. 31:6; Sam 118:6) Di Kristian dɛn we bin de na Jerusɛlɛm ɛn Judia da tɛm de bin nid fɔ mɛmba dis prɔmis. Wetin mek? Na bikɔs shɔt tɛm afta dɛn gɛt dis lɛta, dɛn bin nid fɔ lɛf dɛn os, biznɛs, ɛn bɔku pan dɛn prɔpati dɛn. Afta dat, dɛn go go de ɔda say ɛn layf nɔ go izi fɔ dɛn.

7. Wetin mek na naw wi fɔ abop pan Jiova mɔ?

⁷ Di lɛsin fɔ wi: Wetin gɛt fɔ apin jisnɔ? Dis wɔl go dɔn di tɛm fɔ da “big big trɔbul.” (Mat. 24:21) Jɔs lɛk di fɔstɛm Kristian dɛn, wisɛf fɔ rɛdi ɛn wi nɔ fɔ slip. (Lyuk 21:34-36) Insay di tɛm fɔ da big big trɔbul, sɔntɛm wi go nid fɔ lɛf biɛn sɔm ɔ ɔl wi prɔpati dɛn, ɛn biliv wit ɔl wi at se Jiova nɔ go ɛva lɛf in pipul dɛn. Ivin naw we da trɔbul nɔ bigin yet, wi gɛt chans fɔ sho udat ɔ wetin wi abop pan. Aks yusɛf, ‘Mi gol dɛn ɛn di tin dɛn we a de du de sho se a nɔ abop pan mɔni, bɔt a abop pan Gɔd we dɔn prɔmis fɔ kia fɔ mi?’ (1 Tim. 6:17) As wi ɔl no, pan ɔl we wi ebul lan lɛsin dɛn frɔm wetin bin apin insay di fɔstɛm Kristian dɛn tɛm, da “big big trɔbul” in kayn nɔ wande apin yet. So aw wi go no wetin fɔ du we da big big trɔbul bigin?

OBE DI WAN DƐN WE DE BIFO

8. Wetin Jizɔs bin tɛl in disaypul dɛn fɔ du?

⁸ Sɔm ia afta di Ibru Kristian dɛn gɛt Pɔl in lɛta, dɛn si di Roman sojaman dɛn sɔrawnd Jerusɛlɛm. Dat bin ɛp dɛn fɔ no se tɛm dɔn rich fɔ mek dɛn rɔnawe kɔmɔt na di siti ɛn i nɔ go te igen dɛn go dɔnawe wit Jerusɛlɛm. (Mat. 24:3; Lyuk 21:20, 24) Bɔt usay dɛn fɔ rɔnawe go? Jizɔs bin jɔs tɛl dɛn se: “Lɛ di wan dɛn we de na Judia bigin rɔn go na di mawntin dɛn.” (Lyuk 21:21) Bɔku mawntin dɛn bin de na di eria. So usay dɛn fɔ rɔnawe go?

9. Us mawntin dɛn di Kristian dɛn bin fɔ dɔn rɔnawe go? (Luk bak di map.)

⁹ Tink bɔt sɔm pan di mawntin dɛn we di Kristian dɛn fɔ dɔn rɔnawe go: di mawntin dɛn na Sameria, di mawntin dɛn na Galili, Mawnt Amɔn ɛn di mawntin dɛn na Libanɔn, ɛn di mawntin dɛn we bin de oba di Jɔdan. (Luk di map.) Pipul dɛn bin tink se i go sef fɔ go de na di siti dɛn usay sɔm pan dɛn mawntin dɛn de bin de. Fɔ ɛgzampul, di siti we nem Gamla bin de na di rɔf ɛj pantap wan ay mawntin ɛn i go rili at fɔ go de. Sɔm Ju dɛn bin de si da siti de as sef ples fɔ ayd. Bɔt di Roman sojaman dɛn bin atak ɛn dɔnawe wit da siti de ɛn bɔku pan di pipul dɛn we bin de de bin day.b

10-11. (a) Aw Jiova go dɔn gayd in pipul dɛn fɔ mek dɛn no usay fɔ go? (Ibruz 13:7, 17) (b) Aw di Kristian dɛn bin bɛnifit we dɛn obe di wan dɛn we bin de bifo? (Luk bak di pikchɔ.)

¹⁰ I tan lɛk se na di wan dɛn we bin de bifo na di kɔngrigeshɔn Jiova bin yuz fɔ gayd di Kristian dɛn fɔ no usay fɔ go. Wan man we nem Yusibiɔs we de rayt istri bin leta tɔk se: “Gɔd bin dayrɛkt di wan dɛn we bin de bifo na di kɔngrigeshɔn na Jerusɛlɛm fɔ tɛl di pipul dɛn fɔ kɔmɔt na di siti bifo di wɔ bigin ɛn go de na wan siti na Pɛria we dɛn de kɔl Pɛla.” Pɛla na bin di rayt ples fɔ di Kristian dɛn fɔ go. I nɔ bin de fa frɔm Jerusɛlɛm, so i nɔ bin tu at fɔ go de. Bɔku pan di pipul dɛn we bin de na Pɛla na bin Jɛntayl dɛn so dɛn nɔ bin de tray fɔ fɛt agens di Roman dɛn.​—Luk di map.

¹¹ Di Kristian dɛn we bin rɔnawe go na di mawntin dɛn bin fala di advays we Pɔl bin gi we i se “una obe di wan dɛn we de bifo una” na di kɔngrigeshɔn. (Rid Ibruz 13:​7, 17.) Gɔd in pipul dɛn bin sev bikɔs dɛn bin obe. Istri dɔn sho se Gɔd nɔ bin lɛf di wan dɛn we “bin de wet fɔ di siti we gɛt rial fawndeshɔn dɛn” we na Gɔd in Kiŋdɔm.​—Ibru. 11:10.

12-13. Aw Jiova dɔn gayd in pipul dɛn di tɛm dɛn we tin rili tranga?

¹² Di lɛsin fɔ wi: Jiova de yuz di wan dɛn we de bifo fɔ gi in pipul dɛn patikyula dayrɛkshɔn dɛn. Di Baybul ful-ɔp wit ɛgzampul dɛn bɔt aw Jiova bin yuz fetful man dɛn fɔ gayd in pipul dɛn insay tɛm dɛn we tin bin rili tranga. (Dyu. 31:23; Sam 77:20) Ɛn tide, wisɛf dɔn si bɔku pruf dɛn we de sho se Jiova de kɔntinyu fɔ yuz di wan dɛn we i dɔn pik fɔ de bifo.

¹³ Fɔ ɛgzampul, we di COVID-19 pandɛmik bigin, “di wan dɛn we de bifo” bin gi wi di dayrɛkshɔn we wi nid. Di ɛlda dɛn bin gɛt dayrɛkshɔn bɔt wetin fɔ du fɔ ɛp di brɔda ɛn sista dɛn fɔ kɔntinyu fɔ wɔship Jiova. Shɔt tɛm afta di pandɛmik bigin, wi bin gɛt kɔnvɛnshɔn insay pas 500 langwej dɛn. Wi brɔda ɛn sista dɛn bin ebul fɔ wach di program na di intanɛt, tɛlivishɔn, ɛn lisin to am na redio. Wi nɔ ɛva gɛt da kayn kɔnvɛnshɔn de yet. Wi nɔ bin stɔp fɔ gɛt di tin dɛn we wi nid fɔ kɔntinyu fɔ wɔship Jiova. Bikɔs ɔf dat, wi bin kɔntinyu fɔ gɛt wanwɔd. Wi gɛt kɔnfidɛns se ilɛk uskayn prɔblɛm dɛn mit wi tumara bambay, Jiova go kɔntinyu fɔ ɛp di wan dɛn we de bifo fɔ disayd fɔ du di rayt tin. Apat frɔm fɔ abop pan Jiova ɛn fɔ obe in lɔ dɛn, us ɔda kwaliti dɛn go ɛp wi fɔ rɛdi fɔ da big big trɔbul ɛn du tin wit sɛns da tɛm de we tin go rili tranga?

SHO SE YU LƐK YU BRƆDA ƐN SISTA DƐN ƐN DU GUD TO DƐN

14. Akɔdin to Ibruz 13:1-3, us kwaliti dɛn Kristian dɛn bin nid fɔ gɛt insay di tɛm bifo dɛn dɔnawe wit Jerusɛlɛm?

¹⁴ We da big big trɔbul bigin, wi go nid fɔ sho se wi lɛk wisɛf pas ɛni ɔda tɛm. Bikɔs ɔf dat, wi go nid fɔ fala di ɛgzampul we di Kristian dɛn na Jerusɛlɛm ɛn Judia bin sɛt. Dɛn bin dɔn de sho se dɛn lɛk dɛn kɔmpin dɛn. (Ibru. 10:32-34) Bɔt insay di tɛm bifo dɛn dɔnawe wit Jerusɛlɛm, dɛn bin nid fɔ sho se dɛn “lɛk [dɛn] brɔda” ɛn sista dɛn ɛn “kia” fɔ dɛn pas aw dɛn bin dɔn de du.c (Rid Ibruz 13:​1-3.) Na di sem tin wisɛf go nid fɔ du as di tɛm fɔ lɛ dis wɔl dɔn de kam nia.

15. Wetin mek di Ibru Kristian dɛn bin nid fɔ sho se dɛn lɛk dɛn brɔda ɛn sista dɛn ɛn du gud to dɛn afta dɛn rɔnawe?

¹⁵ Di Roman sojaman dɛn sɔrawnd Jerusɛlɛm, ɛn dɛn lɛf di siti jɔs lɛk dat. Dis mek di Kristian dɛn gɛt chans fɔ rɔnawe, bɔt dɛn nɔ bin ebul fɔ go wit bɔku tin dɛn. (Mat. 24:17, 18) Dɛn bin nid fɔ ɛp dɛnsɛf as dɛn de travul fɔ go na di mawntin, ɛn we dɛn rich na Pɛla, dɛn bin nid fɔ ɛp dɛnsɛf fɔ gɛt wok ɛn say fɔ de. Wan dawt nɔ de se bɔku tɛm di Kristian dɛn bin nid ɛp “kwik kwik wan,” ɛn dat bin gi dɛn chans fɔ sho se dɛn rili lɛk dɛn brɔda ɛn sista dɛn ɛn dɛn kia fɔ dɛn bay we dɛn bin de sɔpɔt dɛnsɛf ɛn sheb wetin dɛn gɛt.​—Taytɔs 3:14.

16. Aw wi go sho se wi lɛk wi kɔmpin Kristian dɛn we nid ɛp? (Luk bak di pikchɔ.)

¹⁶ Di lɛsin fɔ wi: Lɔv de mek wi ɛp wi kɔmpin Kristian dɛn we dɛn nid wi ɛp. Bɔku pan Gɔd in pipul dɛn dɔn sho se dɛn rɛdi fɔ ɛp fɔ kia fɔ di tin dɛn we dɛn brɔda ɛn sista dɛn nid fɔ liv ɛn fɔ gɛt tayt padi biznɛs wit Jiova we dɛn bi rɛfyuji dɛn bikɔs ɔf wɔ ɛn nachɔral dizasta dɛn. Wan sista we kɔmɔt na Yukren we lɛf in os bikɔs ɔf di wɔ tɔk se: “Wi dɔn si aw Jiova dɔn yuz wi brɔda ɛn sista dɛn fɔ gayd ɛn ɛp wi. Dɛn wɛlkɔm wi ɛn rili ɛp wi we wi bin de na Yukren, Ɔngari, ɛn naw we wi de na Jamani.” Di wan dɛn we de du gud to dɛn brɔda ɛn sista dɛn ɛn kia fɔ di tin dɛn we dɛn nid de alaw Jiova fɔ yuz dɛn.​—Prɔv. 19:17; 2 Kɔr. 1:3, 4.

17. Wetin mek i impɔtant fɔ mek wi lan fɔ lɛk wi brɔda ɛn sista dɛn naw ɛn du gud to dɛn?

¹⁷ Wan dawt nɔ de se wi go nid fɔ ɛp wi brɔda ɛn sista dɛn tumara bambay pas aw wi de du naw. (Aba. 3:16-18) Jiova de tren wi naw fɔ lan fɔ lɛk wi brɔda ɛn sista dɛn ɛn du gud to dɛn. Dis na impɔtant kwaliti dɛn we wi go nid da tɛm de.

WETIN GƐT FƆ APIN TUMARA BAMBAY

18. Aw wi go falamakata di Ibru Kristian dɛn we bin de trade?

¹⁸ Istri dɔn sho se di Kristian dɛn we bin rɔnawe go na di mawntin dɛn bin ebul fɔ avɔyd di bad bad tin dɛn we bin apin na Jerusɛlɛm. Dɛn bin lɛf di siti, bɔt Jiova nɔ bin ɛva lɛf dɛn. Wetin go apin insay wi yon tɛm? Wi nɔ no ɔltin bɔt wetin gɛt fɔ apin tumara bambay. Bɔt Jizɔs bin dɔn wɔn wi se wi fɔ rɛdi fɔ du sɔntin. (Lyuk 12:40) Wi gɛt bak di advays we Pɔl bin rayt to di Ibru Kristian dɛn ɛn da advays de fayn fɔ wi jɔs lɛk aw i bin fayn fɔ di Kristian dɛn we bin de trade. Ɛn Jiova insɛf sɛf dɔn prɔmis wi se i nɔ go ɛva lɛf wi ɔ lɛf fɔ ɛp wi. (Ibru. 13:5, 6) So lɛ wi kɔntinyu fɔ wet fɔ di siti we go kɔntinyu fɔ de we na Gɔd in Kiŋdɔm, if wi du dat, wi go ɛnjɔy di blɛsin dɛn we i go briŋ we go de sote go.​—Mat. 25:34.