Walta Kiilaa

2 O paale Pɛŋtikɔɔsileŋ choo,+ mi nda kpou chuuŋgiaŋ o fondaŋ pilɔɔ kpe. 2 O lepilɛ niŋ kpe, ma tuɛi bɔɔluuwo o choo choo niŋ mɛɛ hueiyii bɛnduei hɔŋ nuaa yɛ. Mi bɔɔluu koŋ tiu naa nda wa ichali chiɛiniŋ nda silɔ.+ 3 Okoŋ ma cha yiŋndeŋ maa idiɔɔmu. Mi le piɔuviaŋ, mi le chal nda choo a pilɛŋ pilɛŋnda. 4 Mi nda kpou sɔla nyina diandaa.+ Okoŋ, ma kandu sɔɔŋ maŋgalaŋ yɛ yiɔɔŋ dimioo mɛɛ nyina diandaa ke nda kpaayaa le muŋ dimioo yɛ.+

5 A boondii keŋ, Chuuwaa yɔŋguŋ o Mɛlɛka lo wa kpou wa Chulusalɛm.+ Ndaa fula o lɛŋnde niŋ kpou o chieeŋndo choo. 6 Mɛɛ nda tuei bɔɔluuwo hoo, ma huŋ chuuŋgiaŋ faŋga bɛndoo. Mi kɔndɔfillo bii nda, kanifuule wana o wana wa buɛiyaa Chiisu wa tueiyɔɔ suɛi o suɛi nduɛi maŋgalɛi niŋ. 7 Mi kɔndɔfillo bii nda tau, ma dimi aa: “La nuawɔ! Wanaa cho haa suɛi ya kpou, Kaliliaŋnda le nda cho le?+ 8 Yɛɛ tosa yɛ niko mi naa kpou wa nda tueiyɔɔ suɛi o sɔɔŋ naŋ maŋgalaŋ niŋ? 9 Wanaa cho naa tɛɛŋnda, apum Paatiaŋnda, Midiaŋnda,+ a Ɛlamaitiiya+ nda cho ni. Apum fula Mɛsopoteemiaa, Chudiaa, Kapadoosiaa, Pɔŋtɔɔ, a o tanda Eesiaa wo niŋ.+ 10 Apum fula Filichiaa, Pamfiliaa, Ichipi, a o tanda Libiaa wo niŋ Sailuini ikɛi. Mialaa chɛŋ Luom nda, apum Chuuwa a wanaa cho ŋChuu le wa nda cho ni.+ 11 Apum fula Kileti a Alueebiaa. Nduyɛ naa kpou ŋ cho nda tueiyɔɔ suɛi o sɔɔŋ naŋ maŋgalaŋ niŋ a sɔɔŋ kɔndɔfiliŋ Mɛlɛka woŋ okɔɔ.” 12 Nda kpou mi kaamaa bii nda ma wa dimulaŋndo aa: “I maavɛɛ cho yɛ hei?” 13 Kɛ mi apum wa nda mamɔɔ, ma dimi aa: “Mbɔ muɛiyaŋ ma bii nda ni.”

14 Mi Pitɛ chaŋ nya nda kiilaa 11,+ mbo suaa choo choo aa: “Waŋnda Chudiaa a nya waŋnda Chulusalɛm kpou, la yaŋ ya nilaŋ nyɛkɛndɛi mi la sina hei pɛŋgu. 15 O cho mamuɛi le ma bii waŋnda haa a mɛɛ nya cho dimioo yɛ le, kanifuule lɔɔ 9:00 idiiyo* cho hoo ni. 16 Nduyɛ pɛŋ, nyɛ Chowɛɛ, wana ndoo suaa le Mɛlɛka wo dimi wo cho hoo ni: 17 ‘Mɛlɛka dimi aa, “O palɛi mɛɛlɛi niŋ, I cho waŋnda suu o suu nyina nuu ke o tiŋ. Puaa nyaa a chuaa nyaa laanduaa cho yooŋgu nuu dimi, mi chuaa nyaa piaanduaa che yilaŋndoŋ. Falaa nyaa yuuwa cho lɔma teŋgeŋndaŋ sɔl.+ 18 Buɛiyaa niaa piaanduaa a buɛiyaa niaa laanduaa bɛɛ, I cho nda nyina nuu ke o tiŋ ma dimi yooŋgu nuu.+ 19 I cho sɔɔŋ kɔndɔfilloŋ tosa o choo choo niŋ, a kaamaalaŋ o lɛŋndeŋ choo. Muŋ cho ni, koowaŋ, yiŋndeŋ, a kumii piimiɛiye. 20 Paaleŋ le cho simnɔŋ nyumndaŋ, mi paŋgei simnuŋ koowaŋ tuupa mi paale bɛndule Chɛhowa* leŋ le fuuluu. 21 Nduyɛ, wana o wana veelu pɛ diola Chɛhowa* laŋ, o cho pioŋɔɔ sɔla.”’+

22 “Waŋnda Isɔluɛi, la yaŋ nilaŋ o sɔɔŋ muŋ: Mɛlɛka chɔm nya kpendekele maa ndu vem Chiisu fula hoo Naasaluɛi yo ni. A mɛɛ nyapila sina yɛ, mi Mɛlɛka soliŋ ndu kpeku le kaamaalaŋ a sɔɔŋ kɔndɔfilloŋ tosaa nya tɛɛŋ.+ 23 Mɛlɛka ndoo sina niŋ maa a cho ndu hunɔɔ biyɔɔ, a mɛɛ ndii kɛɛsiaŋ yɛ.+ Chiisu hoo nya mal wanaa sina sawa le wa o ba ni, ma dii ndu o yɔmndo choo.+ 24 Kɛ mi Mɛlɛka miŋgi ndu yoomu,+ mbo soli ndu piɔmndo o ba, kanifuule ndoo nɔ mbo lo piɔmndo o ba bɛŋgu le.+ 25 Mi Deeve dimi a ndu okɔɔ aa: ‘I kɛsiŋ Chɛhowa* ya lachi* teleŋ o teleŋ, kanifuule o cho o ba ni kɛndɔɔ choo. Lelaŋ, nyɛ o nyɛ hiiluu ya le. 26 Le saboo hoo kɔllo cho ya wuye wuye ni, mi wa suɛi a nyaale bɛndoo. I* nɔ tiindaŋndo, 27 kanifuule a cho ya* malɔɔ o Sɛiyo* niŋ te, kɛlɛŋgaa ma chɛl mi wana chɔm lo lechoo wo o numndo wo sɛ.+ 28 A tosa mi sina nɛila yɔŋgu yoomoo laŋ. A cho tosa mi wa a nyaaloo tau num o hɔl.’+

29 “Puaapiliaa niaa, I chɔm ndɔ nya kpendekele a Deeve finya naa mamaa okɔɔ. Deeve vi niŋ ma kumbu ndu.+ Nduyɛ a paale hauleŋ ndeŋ bɛɛ, sɛi ndɔɔ cho nanuŋ. 30 Wana ndoo suaa le Mɛlɛka wo o wa ni. Mi Mɛlɛka mɛnaŋ o ndu lo maa chuaa nduaa mamaa o pilɛ cho hunɔɔ ichali o kpeŋgbei* ndɔ lemasaa choo.+ 31 Mi ndoo sina a mɛɛ Kiliti ndoo miiŋgu niŋ yoomu yɛ okɔɔ. Mbo dimi maa o lo niŋ o Sɛiyo* niŋ te, kɛlɛŋgaa mi dialuŋ ndɔŋ sɛ.+ 32 Mi Mɛlɛka miŋgi Chiisu yoomu, nduyɛ naa kpou cho lesei le hei.+ 33 Lelaŋ, mi Mɛlɛka heelu ndu tema mbo kɛsi ndu o ba ndɔ kɛndɔɔ choo.+ Nduyɛ, mbo sɔla nyina diandaa Finya ndɔ mɛi lediom le ndu kioo wo.+ Nyina diandaa koŋ o ke naa hoo ni, a mɛɛ nya cho chɔɔ nduyɛ mi la wa tueiyɔɔ yɛ. 34 Deeve hel o choo choo niŋ te, kɛ mbo dimi aa: ‘Chɛhowa* dimul Masanɔ nuu aa: “Chal o ba ni kɛndɔɔ choo 35 haaa mi siiŋguu yaamɔɔwaa numnda nyɛ num handaa ŋpelu.”’+ 36 Lelaŋ waŋnda Isɔluɛi, la sina pɛŋgu walaŋ maa Chiisu nya dii koŋ o yɔmndo choo wo,+ Mɛlɛka siiŋguu ndu Masanɔɔ+ a Kiliti.”

37 Mɛɛ nda tuei hei, mi i pilaŋ nda kɔltaŋ. Ma nyuna Pitɛ a kiilaa apiliaa aa: “Puaapiliaa, yɛɛnɛ naŋ nɔ yɛ miŋ tosa?” 38 Mi Pitɛ dimul nda aa: “La wookuŋ,+ mi wana o wana sɔla yiŋɔɔ+ o diola Chiisu Kiliti laŋ niŋ le mi Mɛlɛka mal nya haki le hakila nyalaŋ,+ mbo ke nya nyina diandaa. 39 Kanifuule, diomnde Mɛlɛka mɛi leŋ+ le cho le nya, chuauwaa nyaa, wana o wana cho levil, a wana o wana Chɛhowa* Mɛlɛka naa veelu niŋ naa ndu chua.”+ 40 Mbo hiau lachi a waŋnda yooŋgu kɛndɔɔ dimullo nyɛkɛndɛi. Mbo sila nda aa: “La fula wanaa dɛnɛ wɔɔŋnda haa tɛɛŋ yɔŋii nya sɔla tambei.”+ 41 Okoŋ, mi wanaa chɛl nyɛ o dimi wo a kɔl ndaa kpou wa sɔla yiŋɔɔ.+ O paale leŋ choo, waŋnda le 3,000 handuŋ lechoo ni.+ 42 Ma hiau lachi a pɛɛkula kiilaa diikɔŋndo, chuuŋgiaŋndo diompilɛ, nyɛdiaa dioo diompilɛ,+ a piɛileŋ diompilɛ.+

43 Mi siooŋnde kandu wana o wana fee biyɔɔ, nduyɛ mi kiilaa kandu sɔɔŋ kɔndɔfilloŋ a kaamaalaŋ tosaa.+ 44 Wanaa laalaŋnda kpou wa diompilɛ, nduyɛ a wa nyɛm ndaa nɔ woŋ chuuŋgiaa diompilɛ. 45 A wa nyɛm ndaŋ piisuuwo,+ ma wa kaniŋ* muŋ piɔuwo a mɛɛ bahawɛi wana o wana wa yɛ.+ 46 Lepaa o lepaa, a wa chuuŋgiaŋndo o chiɛi Mɛlɛkaa niŋ diompilɛ. Nduyɛ, a wa nyɛdiaa dioo latulu o chiɛila ndala yɛ yɛlaŋ niŋ. A wa nyɛdiaa keŋnaŋndo a nyaaloo, a kɔlta ndalaŋ kpou. 47 A wa Mɛlɛka saŋgalaa, nduyɛ nyɔɔ wa waŋnda kpou hɛnaŋndo a nda. Lepaa o lepaa, Chɛhowa* wa wanaa sɔla piŋioo wa handɔɔ o kunda ndaa choo.+