BUŊGƐI PƐƐKƐI 41
Lo o Tiindaŋ Numndo Choo a Teleŋ “Nyɛ Palaa” Bɛndoo
“Nya buɛiyaa nduaa sakpuaa kinɛi, la kaala Mɛlɛka Yaawɛɛ. Mandaa Mɛlɛka Yaawɛɛ manda buɛiyaa cho sakpo a ndu wa ni.”—SAM 31:23.
CHONDII 129 Ŋ Cho Biuwɔŋ Haaa o Mɛɛlulaŋ
SƆƆŊ KULLOŊ O BUŊGƐI HEI NIŊa
1-2. (a) Yɛɛ masaa chieeŋnda dimi yɛ niŋ paale pilɛ? (b) Le nyunala kuɛɛ naŋ nɔ yɛ miŋ nuuviaa mulilaŋ?
Ŋ DIMI wɔ maa masaa chieeŋnda chii niko yonda maa, “kɔl nyuloo cho niŋ o tiuwaa ba o ba fee. Mbɔ wana yɔnuŋ niŋ isiooŋ fuu.” Nduyɛ ma wa saŋgalaŋndo maa kani bɛɛ kɔl nyulu nda sɔla wo sɔlaŋ ndɔ o chieeŋndo choo le. Masaa chieeŋnda cho hei tosa le miŋ yiyaŋ maa a nɔla ma chii bahawɛilaŋ kpou o chieeŋndo hoo niŋ. Kɛ nyɛ cho yɔŋnɔŋ o keŋ kɔɔli wo, a nɔ niŋ kpaaya o kpaaya le ndu kuuna le! Le sabu yɛɛ? A mɛɛ Baabuiyo dimi yɛ, “kpundɛ bɛndoo del niŋ nda choo o le pilɛ niŋ kpe . . . nduyɛ a nɔla niŋ ma fula o kpundɛ koŋ niŋ te.”—1 Tɛsa. 5:3.
2 Ŋ nɔ miŋ nuuviaa mulilaŋ le nyunala sɔvɛlaŋ ndaŋ: Yɛɛ yɔŋnuŋ yɛ niŋ a teleŋ “nyɛ palaa” bɛndoo? Yɛɛ Chɛhowa yeema yɛ niŋ naa miŋ tosa a teleŋ koŋ? Nduyɛ, vɛɛ naŋ bɛɛndiaŋ yɛ suŋ suŋ le miŋ lo o tiindaŋ naa choo a teleŋ nyɛpalaa bɛndoo?—Maa. 24:21.
YƐƐ YƆŊNUŊ YƐ NIŊ A TELEŊ “NYƐ PALAA” BƐNDOO?
3. A mɛɛ Sɔɔŋ Chɔɔmaŋndoŋ 17:5, 15-18 dimi yɛ, vɛɛ Mɛlɛka cho yɛ “Babilɔŋ Tɔɔ Bɛndoo” tɛɛmbuu?
3 Nuawɔ Sɔɔŋ Chɔɔmaŋndoŋ 17:5, 15-18. “Babilɔŋ Tɔɔ Bɛndoo” cho hunɔɔ tambei sɔla! A mɛɛ naŋ laŋga dimi yɛ, nyɛ o nyɛ cho wa yɔŋnɔŋndo a teleŋ koŋ, masaa chieeŋnda nɔ niŋ kpaaya o kpaaya lechoo le. Le yɛɛ? Kanifuule, “Mɛlɛka [cho nda dɔwɔɔ] o kɔl, le ma tosa nyɛ o yeema nda le ma tosa wo.” Yɛɛ cho yɛ nyɛ o yeema nda koŋ le ma tosa wo? Le ma tɛɛmbuu piɛiyii lachoowɛi cho o chieeŋndo choo ve kpou, hali a kaaŋndeb bɛɛ. “Leela tɔla” “visi siaŋaa” Mɛlɛka cho dɔwɔɔ o kɔl ni le tosaa nyɛ o yeema wo. Leela tɔlaŋ ndaŋ la sim lewundu le masɛi cho “visioo hoo” tooloo ve. Nduyɛ, “visioo hoo” cho kɔɔna nda veelu aa “United Nations” ndo ni. (Sɔɔŋ. 17:3, 11-13; 18:8) Teleŋ masaa chieeŋnda haa cho piɛile lachoowaleŋ chiŋalaŋndo nyɛpalaa bɛndoo cho kandɔŋ ni. Kpundɛ bɛndu piiliaŋ niŋ wana o wana fee o chieeŋndo choo wo wa niŋ koŋ ni.
4. (a) Sabula kuɛɛ masaa chieeŋnda nɔ yɛ niŋ dɔɔ le piɛiyii lachoowɛi chiŋalaŋndo? (b) Yɛɛ wanaa wa paandu o piɛiyii lachoowɛi hei niŋnda tosa yɛ niŋ dɔɔ?
4 Ŋ sina sabula masaa chieeŋnda nɔ niŋ le Babilɔŋ Tɔɔ Bɛndoo chiŋalaŋndo wo le. Naapum ma dimi dɔɔ maa le mɛɛ piɛiye hei cho nda kuunaa hunɔɔ a kɔl nyuloo o chieeŋndo choo yɛ, ɔɔ le mɛɛ wanaa cho o ndi niŋnda cho a yiŋnaŋ pɔŋgeŋ o sɔɔŋ lemasaŋ niŋ yɛ. Ɔɔ naapum ma dimi dɔɔ vɛlɛ maa le mɛɛ wanaa cho o piɛiye hei niŋnda sɔla niŋ nyɛsɔlaa a nyɛm kiɔɔŋ tau yɛ. (Sɔɔŋ. 18:3, 7) Kɛ wana che pɛ aa o cho wanaa cho o piɛiyii lachoowɛi hei niŋnda kpou le sɔla niŋ tambei a teleŋ masaa chieeŋnda cho ndi chiŋalaŋndo le. Kɛ maa, kɔɔnala piɛiyii lachoowɛi kpou masaa chieeŋnda tɛɛmbuu niŋ ni. Te piɛiyii lachoowɛi hei kpou sɔla pɛ tambei, wanaa wa leniŋ nda cho sina kɛsɛ maa huiyo ko simlachiaa lepiɛiyaa ndaa hui nda ni. Naapum keŋ cho tosa ma fafaŋ piɛiye hei.
5. Diomnde yɛɛ Chɛhowa mɛi yɛ a nyɛpalaa bɛndoo okɔɔ, nduyɛ le yɛɛ?
5 Baabuiyo chɔm mɛɛ kpɛ o chua niŋ teleŋndo le mi Babilɔŋ Tɔɔ Bɛndoo chuu tɛɛmbuu yɛ le. Kɛ ŋ sina maa o cho suɛi chua niŋ teleŋ tau le i cho le. (Sɔɔŋ. 18:10, 21) Chɛhowa mɛi lediom maa o cho “faŋa palɛi nyɛ palɛi keŋ i tiŋ le choo” le mi “wanaa nduaa o hɛli wa” a piɛile tonyaleŋ sɔla pioŋɔɔ. (Maki 13:19, 20) Kɛ yɛɛ Chɛhowa yeema yɛ niŋ naa miŋ tosa chɔŋ a teleŋ nyɛpalaa bɛndoo cho kandɔŋ ndo haaa mi chɔu Amakɛdɔŋndo hiŋ?
HIOU LACHI A CHƐHOWA PIƐIYO O TONYAA CHOO
6. Te ŋ fula pɛ o piɛile lachoowaleŋ niŋ, yɛɛ cheleŋ naŋ nɔ yɛ miŋ tosa?
6 A mɛɛ naŋ yaasiaa o buŋgɛi naŋ hiou ve niŋ yɛ, Chɛhowa yeema mi wanaa cho ndu piɛiyo wa fula o Babilɔŋ Tɔɔ Bɛndoo niŋ. Kɛ o cho ko fulaa o piɛile lachoowaleŋ niŋ te yeemaŋ te. Ŋ nɔ vɛlɛ miŋ yiŋ yauleŋ le waa o piɛile tonyaleŋ niŋ nduyɛ, miŋ hiou lachi a Chɛhowa piɛiyo o tonyaa choo. Ŋ yaasiaŋndɔ nɛilaŋ la tiɔɔŋ la naŋ tosa heiyo.
Mɛɛ mɛɛ la wa, maa ŋ malnuŋ kɔlaŋ o bɔŋaŋnda naalaŋ te (Tofa pɛl 7)g
7. (a) Vɛɛ naŋ hiau yɛ lachi a sawala Chɛhowalaŋ diikɔŋndo? (b) Vɛɛ Hibuluiya 10:24, 25 kindila yɛ sabu i cho suɛi sɔvɛ le kɔlaŋ o bɔŋaŋnda naalaŋndo, nduyɛ le yɛɛ keŋ yeemaŋ yɛ suŋ suŋ?
7 O tasoo, ŋ nɔ miŋ hiou lachi a sawala Chɛhowalaŋ diikɔŋndo. Ŋ nɔ kposoŋ miŋ wou laba o kaala nɔɔlɛila waŋnda cho hau tosaa laŋ niŋ te. Le taamaseliiyo, ŋ nɔ miŋ wou laba o kaa ihini nɔɔlɛi kɛ kɛ niŋ te. Kaalaŋ ndaŋ la tiŋ la cho ni, poo a poo ɔɔ chuaa a chuaa hiniei tosaa, a kaala nɔɔlɛila cheleŋ chiɛɛliaŋ a kaa hoo wo. (Maa. 19:4, 5; Luomaŋ. 1:26, 27) O diiŋ ndɔɔ, ŋ nɔ miŋ hiou lachi a Chɛhowa piɛiyo a chaaŋaa naa laalaŋnda latulu. Ŋ nɔ miŋ wa hei tosaa ba o ba fee kɛɛsiaa tosaŋ pɛ le bɔŋaŋndaŋ biyɔɔ. O yɔŋ bɛɛ aa o Toŋgola naala leMasalaŋ niŋ, ɔɔ te o bɛnda pɛ, o chiɛi puaapilɛnɔɔ niŋ ɔɔ sɔɔ sɔɔ. Mɛɛ mɛɛ la wa, ŋ nɔ miŋ kelu kɔlaŋ o bɔŋaŋnda naalaŋ te. Nduyɛ pɛŋ, mɛɛ “paale Masanɔɔ nɔ le miiŋgoo nanuŋ ndeŋ” le sɔɔŋguu kpɛɛluŋ fau, lende ko naŋ nɔ ni miŋ hiou lachi a kɔlaŋ o bɔŋaŋndaŋ.—Nuawɔ Hibuluiya 10:24, 25.
8. Vɛɛ yooŋgu naŋ cho wa dimioo o chilaŋ niŋndo wa yɛ niŋ teŋgeŋ?
8 Kɛlɛŋgaa yooŋgu naŋ cho wa dimioo a teleŋ nyɛpalaa bɛndoo wo cho wa teŋgeŋ. Le suŋ suŋndɔ, ŋ cho yooŋgu kɛndɔɔ dimioo a Masale Mɛlɛkaleŋ okɔɔ nduyɛ, miŋ wa waŋnda siiŋgoo buɛiyaa Chiisuaa. Kɛ a teleŋ koŋ, yooŋgu naŋ cho wa dimioo wo lusul niŋ bɔɔ. Baabuiyo tuu ndu a looŋ kpuŋgbaŋ. (Sɔɔŋ. 16:21) Naapum yooŋgu naŋ cho wa dimioo wo wa niŋ ni maa chieeŋ Setanaa hiŋ siou tambei sɔla kpata kpata. O teleŋ koŋ niŋ, ŋ cho sina yooŋgu naŋ nɔ le dimioo wo nduyɛ a mɛɛ naŋ nɔ miŋ dimi ndu yɛ. Kɛ baa nɛila yɛ yɛla naŋ cho hau soliŋndo kpeku le yooŋgu kɛndɔɔ dimioo wo naŋ cho wa soliŋndo kpeku ni? Ɔɔ baa nɛila cheleŋ naŋ cho wa soliŋndo kpeku ni? O kpeekpei niŋ, ŋ sina wɔ le. Kɛ mɛɛ mɛɛ la wa, ŋ nɔ tiindaŋndo maa ŋ cho dioo sɔla le yooŋgu kɔl tuu Chɛhowaa dimioo a kɔl sikpaa!—Isi. 2:3-5.
9. Yɛɛ masaa chieeŋnda tosa yɛ niŋ dɔɔ te a tuei pɛ yooŋgu naŋ cho wa dimioo wo, kɛ tiindaŋ yɛɛ naŋ nɔ yɛ?
9 Naapum suɛi cho masaa chieeŋnda pala a yooŋgu naŋ cho wa dimioo wo okoŋ, ma kuunaa naa niko wali dimiaa yooŋgu kɛndɔɔ tosaa. Mɛɛ naŋ tiindaŋ hau Chɛhowa le naa malaa o wali naa pollo niŋ yɛ, lende koni naŋ cho ndu vɛlɛ tiindaŋ a teleŋ koŋ le naa malaa ni. Le kɛndɛi, ŋ nɔ tiindaŋndo maa Mɛlɛka naa cho naa kpaayaa ke le hɛnaŋ ndɔɔ tosaa.—Makal 3:8.
BƐƐNDIAŊ LE TELEŊ NDA CHO HUNƆƆ WANAA MƐLƐKAA CHIŊALAŊNDO
10. A mɛɛ Luku 21:25-28 dimi yɛ, vɛɛ wanaa bɔɔbɔɔ wa yɛ niŋ a teleŋ nyɛpalaa bɛndoo?
10 Nuawɔ Luku 21:25-28. A teleŋ nyɛpalaa bɛndoo, kɔltaŋ la cho waŋnda yɔŋnɔŋ pulaŋ pulaŋ te a che pɛ nyɛm ndaa tiindaŋ maa ŋ cho wa lefafɛɛŋndo tambei sɔlaa. Waŋnda cho wa o “saŋgaa” niŋ nduyɛ ma wa buulaŋndo te yoomu ndaa fula niŋ pɛ leniŋ. Kanifuule, nyɛpalaa wa niŋ ndo komal lɔ waŋchieeya paale pilɛ bɛɛ le. (Sɛfa. 1:14, 15) A teleŋ koŋ, sɔɔŋ cho wa ŋ kala kpoke o yoomu wanachioo niŋ, hali wanaa Chɛhowaa bɛɛ. Le mɛɛ naŋ cho le chieeŋndo hoo le yɛ, naapum sɔɔŋ palaŋ cho naa komal. Naapum ŋ sɔla niŋ nyɛm kpeekpei naŋ hauba woŋ te.
11. (a) Le yɛɛ masaa chieeŋnda cho yɛ Seiyaa Chɛhowaa hɔlteŋ muli kɔɔli? (b) Le yɛɛ siooŋii nɔ mii wa naa le nyɛpalaa bɛndoo le?
11 Seiyaa Chɛhowaa cho wa hiouwɔɔ lachi a Mɛlɛka ndaa piɛiyo a boondii keŋ. Naapum teleŋ cho fuuluu mi wanaa masaa waa tɛɛmbuu piɛiyii ndɛi wa tuulu kɔl le hei. Yiyaŋndɔ a sɔɔŋ nda wa niŋ dimioo woŋ, ɔɔ yooŋgula nda wa niŋ yɔŋndo a naa okɔɔ o intanɛtiiyo choo laŋ. Masaa chieeŋnda a Setana, wana cho nda bolleŋndo cho naa yɛleŋ tul le mɛɛ piɛile naaleŋ le lo le tambei sɔlaa yɛ. A cho yiyaŋ maa a komal lɔ kpeleŋ ndaa le tɛɛmbuu wo piɛiye kpou o chieeŋndo choo le. A boondii keŋ, naa kpeekpei nda cho niŋ hɔlteŋ muli kɔɔli ni. A teleŋ koŋ kinɛi nda simnuŋ niŋ Kɔki o Lɛŋnde Makɔkileŋ Niŋc ni. Nda kpou cho chuuŋgiaŋ diompilɛ a nyɛm ndaŋ chɔuwoŋ nduyɛ ma chiŋalaŋ wanaa Chɛhowaa. (Isi. 38:2, 14-16) Kɛ ŋ nɔ miŋ kandu pɔɔ buulaŋndo le nyɛ yɔŋnuŋ niŋ a teleŋ nyɛpalaa bɛndoo wo le kanifuule, ŋ sina mɛɛ sɔɔŋ wa niŋ kpou yɛ le. Kɛ siooŋii nɔ mii wa naa kposoŋ le nyɛpalaa bɛndoo le. Chɛhowa cho naa ke sila kiindiaa niŋ yoomula naalaŋ ndo. (Sam 34:19) Ŋ cho “wa niko lehɔl o nɛi kani fondole” ŋ sina maa “boondii Mɛlɛka cho [naa] piŋi ve i cho niŋ kpɛɛluŋ.”d
12. Vɛɛ “buɛi cho sakpo, nduyɛ, mbo wa buɛi kɔl kalu wo” bii yɛ naa niŋ bɛɛndiaa le sɔɔŋ nɔ le yɔŋnɔŋndo o chilaŋ niŋndoŋ?
12 “Buɛi cho sakpo, nduyɛ, mbo wa buɛi kɔl kalu wo” bii niŋ naa bɛɛndiaa le miŋ lo o tiindaŋ naa choo a teleŋ nyɛpalaa bɛndoo. (Maa. 24:45) O tosa niŋ hei o nɛila bɔɔbɔɔ niŋ. Ŋ yaasiaŋndɔ taamaseliiyo opilɛ o nɛilaŋ ndaŋ tɛɛŋ: Bɔŋaŋnda bɛnda naŋ bii chɔŋ a wɔsi 2016-2018. O bɔŋaŋndaŋ ndaŋ, miŋ pɛɛku maa mɛɛ paale Chɛhowaleŋ le cho niŋ kpɛɛluŋ yɛ, ŋ nɔ miŋ hiou lachi a suliŋnda o yeema naa miŋ nɔ laŋ kindioo poŋ. Ŋ miŋgiŋ ndɔ sondoo o suliŋndaŋ ndaŋ choo chobe.
HIOU LACHI A LO LECHOO WO, BIUWƆŊNDO, A KƆL SIKPA NUMNDO KINDIOO
Bɛɛndiaŋ suŋ suŋ le pioŋɔɔ sɔlaa o “nyɛ palaa” bɛndoo niŋ (Tofa pɛlta 13-16)h
13. Vɛɛ naŋ kindi yɛ lo lechoo naa poŋ o Chɛhowa lo, nduyɛ, le yɛɛ naŋ nɔ yɛ miŋ tosa keŋ suŋ suŋ?
13 Lo Lechoo Wo: Bɔŋaŋ bɛndoo le wɔsi 2016 ndoo nɔ suɛi lebolle aa: “Hiou Lachi a Lo Lechoo Wo Chɔmndo o Chɛhowa Lo!” Miŋ pɛɛku o bɔŋaŋndo hoo maa te o yɔŋ pɛ miŋ nɔ chaŋyɛi kpɛɛluŋnde a Chɛhowa, ŋ cho lo lechoo wo chɔm o ndu lo. Ma loonuŋ naa vɛlɛ maa ŋ nɔla miŋ sɔɔŋguu Chɛhowa ikɛi kpɛɛluŋ te ŋ wa pɛ piɛileŋ o ndu lo a kɔl naa kpou nduyɛ miŋ wa Diom ndɔɔ pɛɛkoo lɔɔlɔɔ. Sɔɔŋ muŋ tosaa luei naa yoomuaŋ le simulta kala kala komal naalaŋ biuwɔŋndo. Mɛɛ mɛɛlula chieeŋ Setanaa la sɔɔŋguu fau, i nɔ mii wa naa o kɔl maa simulta kala kalalaŋ la cho naa komal tau le lo lechoo naa chɔmndo o Mɛlɛka lo vɛlɛ a Masale ndɔleŋ. Waŋnda cho wa dɔɔ hiouwɔɔ lachi a naa mamɔɔ maa paandu. (2 Pitɛ 3:3, 4) Sabula nda mam naa laŋ opilɛ cho ni, le mɛɛ naŋ cho yuŋyeŋ a sɔɔŋ cho o chieeŋ Setana woŋ niŋ yɛ. Suŋ suŋ naŋ nɔ ni miŋ kindi lo lechoo naa poŋ le halikpeŋ miŋ chɔm lo lechoo naa a teleŋ nyɛpalaa bɛndoo.
14. (a) Siŋgaŋ yɛɛ cho yɛ yɔŋnɔŋ puaapiliaa cho chilaŋ chuaa wa tɛɛŋ? (b) Le yɛɛ naŋ nɔ yɛ miŋ chɔm lo lechoo wo a teleŋ koŋ?
14 A teleŋ nyɛpalaa bɛndoo cho wa wo, siŋgaŋndo cho yɔŋnɔŋ puaapiliaa cho chilaŋ chuaa wa tɛɛŋ. Kilisiɔŋaa pɔyaŋaa cho wɔ wa o lɛŋndeŋ choo wa kpou cho lakɔ choo choo a boondii pum le mi nda bɛɛ sɔɔŋguu le chɔ Amakɛdɔŋndo. (Maa. 24:31; Sɔɔŋ. 2:26, 27) Hoo sim ni maa, Dialii Kuumbaŋ Choo Ve cho lɛ wa latulu a naa o lɛŋndeŋ choo le. Kɛ, wanaa faŋga bɛnduaa cho lo o lɛŋndeŋ choo naŋ nda cho wa a kɔɔnaa. Puaapiliaa suliŋ o saa cheleŋnda tɛɛŋ nda cho wa chilaŋ chuaa ni. Ŋ chɔm lo lechoo naa o Chɛhowa lo a teleŋ koŋ te ŋ toolu pɛ puaapiliaa kaŋ nduyɛ miŋ tol nɛi chɔmaa Mɛlɛka nda cho naa wa kioo wo kɔɔli. Keŋ yeemaŋ niŋ naa o ba ni le kindaa sɔlaa!
15. Yɛɛ naŋ nɔ yɛ miŋ tosa le biuwɔŋndo nɔɔ, nduyɛ le yɛɛ naŋ nɔ yɛ miŋ tosa ndi suŋ suŋ?
15 Biuwɔŋndo: Bɔŋaŋ bɛndoo le wɔsi 2017 ndoo nɔ suɛi lebolle aa: “Wu Ŋdial Te!” Mi bɔŋaŋndo hoo luei naa yoomuaŋ le miŋ hiou lachi a tɔɔndaŋnda komal naa laŋ biuwɔŋndo. Miŋ pɛɛku maa o cho o tiindaŋ naŋ nɔ maa sɔɔŋ cho siŋgaŋ ŋ kɛndɛ o yoomu naa niŋndo choo le biuwɔŋ naa sɛɛŋuŋ te. Kɛ maa Chɛhowa naŋ nɔ ni miŋ tiindaŋ le biuwɔŋndo nɔɔ. (Luomaŋ. 12:12) Maa ŋ kɛsiŋ diomnde Chiisu mɛi leŋ ndeŋ o kɔl: “Wana o wana hiou lachi a biuwɔŋndo pɛ haaa mbo lo o koŋ mbo fuuluu o mɛɛlulaŋ pɛ, Mɛlɛka piŋi ndu.” (Maa. 24:13) Diomnde Chiisu mɛi leŋ ndeŋ le sim ni maa mɛɛ mɛɛ simultaŋ la komal naa, ŋ nɔ miŋ lo o tiindaŋ naa choo. Te ŋ biunuŋ pɛ simulta cho naa komal lo suŋ suŋ ndaŋ, tiindaŋ naa cho kalu poŋ tuupa mi nyɛpalaa bɛndoo hiŋ.
16. Yɛɛ mala yɛ naa le kɔl sikpaa nɔɔ, nduyɛ, yɛɛ naŋ nɔ yɛ miŋ tosa suŋ suŋ le kɔl sikpa naa kindioo?
16 Kɔl sikpaa: Bɔŋaŋ bɛndoo le wɔsi 2018 ndoo nɔ suɛi lebolle aa: “Nɔ Kɔl Sikpaa!” Miŋ pɛɛku o bɔŋaŋndo hoo maa o cho kpaaya naa le tosa miŋ nɔ kɔl sikpaa le. Kɛ maa mɛɛ naŋ tiindaŋ Chɛhowa le biuwɔŋndo nɔɔ yɛ koni naŋ nɔ ni miŋ tiindaŋ ndu le kɔl sikpa kpeekpeiyo nɔɔ. Yɛɛ mala yɛ naa le Chɛhowa tiindaŋndo? Diomndaŋ veeloo o Baabuiyo niŋ lepaa o lepaa a yiyaŋndo a mɛɛ o piŋi niŋ wanaa nduaa o paandoo niŋ yɛ. (Sam 68:20; 2 Pitɛ 2:9) Teleŋ masaa chieeŋnda cho naa chiŋalaŋ a boondii nyɛpalaa bɛndoo wo kpeekpei naŋ yeema niŋ kɔl sikpaa ni. Nduyɛ, ŋ nɔ miŋ tiindaŋ Chɛhowa a teleŋ koŋ mbo hiou maa paandu. (Sam 112:7, 8; Hibu. 13:6) Te ŋ dɔu pɛ tiindaŋ naa o Chɛhowa niŋ suŋ suŋ, mɛɛ ŋ cho kɔl sikpa naŋ yeema niŋndo sɔla le miŋ sim yi, te Kɔki huŋ chiŋalaŋ naa pɛ.e
WA LEHƆL O NƐI LE BOONDII MƐLƐKA CHO NUM PIŊI VE
Chiisu a puaa nduaa chɔuwa o choo choo niŋ cho suŋ suŋ hunɔɔ yaamɔɔwaa Mɛlɛkaa tɛɛmbuu a teleŋ chɔu Amakɛdɔŋndo! (Tofa pɛl 17)
17. Le yɛɛ siooŋii nɔ mii bii naa le hunɔɔ chɔu Amakɛdɔŋndo cho wo le? (Tofa fotueiyo o kɔɔ.)
17 A mɛɛ naŋ pɛɛku o buŋgɛi naŋ hiou ve niŋ yɛ, naa bɔɔbɔɔ de niŋ yoomu naa tau o palɛi mɛɛlɛi hei niŋ. Kɛ ŋ nɔ vɛlɛ tiindaŋndo maa nyɛpalaa bɛndoo bɛɛ cho naa hunɔɔ hiouwɔɔ choo fogbi. Chɔu Amakɛdɔŋndo cho hunɔɔ chieeŋ dɛnɛ wɔɔŋndo hoo tɛɛmbuu kpata kpata ni. Kɛ siooŋii cho naa le chɔuwo hoo le. Le yɛɛ? Kanifuule, chɔu Chɛhowaa o cho ni nduyɛ, o cho naa le cho ndu chɔulaba le. (Pulɔ. 1:33; Isi. 38:18-20; Sɛka. 14:3) Chɛhowa cho Chiisu viomɔɔ le hunɔɔ chɔuwo hoo chɔulabaa. O cho lasisi ŋwaŋ 144,000 a maalikɛiyaa cho waalaŋ o waalaŋ niŋnda lachi le hunɔɔ chɔuwo hoo chɔulabaa. Nda kpou cho hunɔɔ Setana, nyinaa nduaa wɔɔŋnda, a waŋchieeyaa sim nda kɔɔli wa chɔulaba.—Daan. 12:1; Sɔɔŋ. 6:2; 17:14.
18. (a) Tiindaŋ yɛɛ Chɛhowa ke yɛ naa? (b) Tiindaŋ yɛɛ Sɔɔŋ Chɔɔmaŋndoŋ 7:9, 13-17 chɔɔlu yɛ num ke a chila naalaŋ okɔɔ?
18 Chɛhowa mɛi lediom maa: “Wolɔɔ o wolɔɔ chɔu cho mi waŋndo chiŋalaŋ num a ndu mbo nɔla num yomɔɔ le.” (Aisaya 54:17) “Waŋnda faŋga bɛndu bɛndoo” a cho Chɛhowa piɛiyo o laalaŋndo choo wa cho “fula o nyɛ palaa bɛndoo niŋ” yoomu! Okoŋ, ma hiou lachi a ndu piɛiyo. (Nuawɔ Sɔɔŋ Chɔɔmaŋndoŋ 7:9, 13-17.) Baabuiyo ke naa tiindaŋndo maa ŋ cho pioŋɔɔ sɔla o chilaŋ niŋ! Nduyɛ, ŋ nɔ miŋ laalaŋ kɛsɛ maa hei cho yɔŋnɔŋ kanifuule, “mandaa Mɛlɛka Yaawɛɛ manda buɛiyaa cho sakpo a ndu wa ni.” (Sam 31:23) Wanaa kaala Chɛhowa nduyɛ ma wa ndu piɛiyo wa cho hunɔɔ kɔllo naŋɔɔ tau te o huŋ wa pɛ tɔɔ wɔɔŋ cho hau o diola ndɔlaŋ choo wo faŋaa.—Isi. 38:23.
19. Chila kɛndɛla kuɛɛ naŋ cho yɛ suŋ sɔla?
19 O chieeŋ sɛnɛiyo niŋ, Setana nɔ lɛ niŋ kpaaya o kpaaya ŋwaŋnda chiee choo le. Yiyaŋndɔ a nyɛ Timoti Diiŋ Ndɔɔ 3:2-5 dimi niŋ a waŋchieeyaa wa niŋ o teleŋ koŋ niŋnda okɔɔ wo. (Tofa kɔfoo hoo “Mɛɛ Kaa Waŋnda Chieeya Cho Hunɔɔ Wa Yɛ.”) Mi Ŋgɔɔ George Gangasf o wa waŋndo opilɛ o Dialii Kuumbaŋ Choo Ve choo wo tɛɛsiaa mɛɛ waŋnda wa niŋ a teleŋ koŋ yɛ. Mbo dimi aa: “Chieeŋndo yeela niŋ bɔɔ kanifuule, puaapiliaa a ndepiliaa wana o wana cho wa ni! La cho hunɔɔ suŋ hiouwɔɔ o chieeŋ sɛnɛiyo hoo niŋ. Te Chɛhowa cho pɛ yoomu, mɛɛ nya bɛɛ cho wa yoomu. Ŋ cho wa achal lefafɛɛŋ.” Nuawɔ se chila kɛndɛla cho naa lachi laŋ!
CHONDII 122 Sim Yi, Nɔ Dialuŋ Kalaŋ!
a Ŋ sina maa “nyɛ palaa” bɛndoo cho suŋ suŋ hunɔɔ ŋwaŋnda chiee kpou choo. Vɛɛ sɔɔŋ wa yɛ niŋ le wanaa Chɛhowaa a teleŋ koŋ? Yɛɛ Chɛhowa yeema yɛ niŋ naa miŋ tosa a teleŋ koŋ? Suliŋnda kuɛɛ naŋ nɔ yɛ miŋ nɔ suŋ suŋ le miŋ lo o tiindaŋ naa choo a teleŋ koŋ? Ŋ cho mulioo sɔla le nyunalaŋ ndaŋ o buŋgɛi hei niŋ.
b TƐƐSIAA LE DIOMNDO: Kaaŋnde hei cho wanaa dimi maa a cho Chiisu tolɔɔ kɔɔli, kɛ a cho nyɛ sawala Chɛhowalaŋ la dimi wo tosa le wa ni.
c TƐƐSIAA LE DIOMNDO: Diomndo hoo Kɔki o Lɛŋnde Makɔkileŋ Niŋ (a kiolɔɔ ndɔ biŋgioo Kɔki) sim le, lɛŋii cho chuuŋgiaŋ diompilɛ le piɛile tonyaleŋ simullo a teleŋ nyɛpalaa bɛndoo wo.
d Le chɔɔloo sinaa sɔɔŋ nɔ le yɔŋnɔŋndo tuupa mi Amakɛdɔŋ hiŋndo, tofa buŋgɛi 21 o yauwo hoo niŋ, God’s Kingdom Rules! Le chɔɔloo sinaa mɛɛ Kɔki o Lɛŋnde Makɔkileŋ Niŋ chiŋalaŋ niŋ wanaa Chɛhowaa nduyɛ a mɛɛ Chɛhowa piŋi niŋ wanaa nduaa a teleŋ chɔu Amakɛdɔŋndo yɛ, tofa buŋgɛi 17 a 18 o yauwo hoo niŋ, Pure Worship of Jehovah—Restored At Last! O puuluei niŋ la cho ni.
e Bɔŋaŋ bɛndoo le wɔsi 2019 nɔ suɛi lebolle aa: ‘Kaalaa Cho Nyɛ Mɛɛlu Le’! Bɔŋaŋndo hoo mala naa le sinaa kɛsɛ maa te ŋ wa pɛ o ba Chɛhowaa bɛŋgu, nyɛ o nyɛ nɔla mbo yɔŋnuŋ naa le.—1 Kɔliŋ. 13:8.
f Tofa buŋgɛi hei “His Deeds Follow Him,” o Bandu Mɛŋgɛlaa niŋ Yindimiiyo 1, 1994.
g TƐƐSIAA LE FOTUEIYO: Seiyaa Chɛhowaa cho bɔŋaŋndo biyɔɔ o bundɔɔ niŋ a teleŋ nyɛpalaa bɛndoo.
h TƐƐSIAA LE FOTUEIYO: Wanaa faŋga bɛnduaa cho Chɛhowa piɛiyo o laalaŋndo choo wa cho wa a kɔl kɛndɛ le fula nda cho o nyɛpalaa bɛndoo niŋ yoomu wo!