Baa A Nɔla Pa Ma Chɔm Teŋgeŋndo Tonyaa Tɛɛŋ a Choolaŋ?

1. Vɛɛ ŋ yiyaŋ yɛ a tonyaa okɔɔ?

WANAA Chɛhowaa kaala tonya cho o Diom ndɔɔ niŋndo. Nduyɛ, o tonyaa hoo choo laalaŋ naa tɔlnuŋ ni. (Luomaŋ. 10:17) Ŋ nɔ laalaŋndo maa Chɛhowa kila kunda leKilisiɔŋndo ni, nduyɛ o cho ndu kpeku soliŋndo maa “suŋgbule saa tonyaa leŋ.” (1 Timo. 3:15) Nduyɛ, ŋ cho bɔɔ a kɔl kɛndɛ le diikɔŋndo “wanaa cho chilaŋ chuaa” naa tɛɛŋ nda. Mi waŋnda haa ke naa vɛlɛ nɛi chɔmaa mala naa le hɛnaŋ Mɛlɛkaa tosaa wo.—Hibu. 13:17.

2. A mɛɛ Chemisi 5:19 dimi yɛ, o yɔŋ bɛɛ miŋ pɛɛku tonyaa, yɛɛ tiu yɛ ba mbo yɔŋnuŋ naa?

² A koŋ kpou, o yɔŋ bɛɛ miŋ chɛl tonyaa a nɛi chɔmaa kɔɔna Mɛlɛkaa cho naa kioo wo, ŋ nɔla miŋ mal tonyaa te ŋ ve yekeŋ te. (Nuawɔ Chemisi 5:19.) Yeemɛi kpeekpei Setana ve cho ni, le miŋ mal tiindaŋndo dɔwɔɔ o nyɛ naŋ pɛɛku o Baabuiyo niŋndo, nduyɛ miŋ kɛɛ nɛi chɔmaa kɔɔna Chɛhowaa cho naa kioo wo diikɔŋndo.—Ɛfi. 4:14.

3. Le yɛɛ naŋ nɔ yɛ miŋ saa tonyaa kpiŋ? (Ɛfisiaŋnda 6:​13, 14)

³ Nuawɔ Ɛfisiaŋnda 6:​13, 14. O lo lɛ teleŋ bɔɔ le, mi Setana soliŋ choolaŋ kpeku le lɛŋii cho o chieeŋndo choo ve kpou huiyo le ma simul Chɛhowa. (Sɔɔŋ. 16:​13, 14) Ŋ sina vɛlɛ maa Setana cho wallo tosa kalaŋ le wanaa Mɛlɛkaa huiyo. (Sɔɔŋ. 12:9) Le saboo hoo kpeekpei i cho suɛi sɔvɛ ni le miŋ pɛɛku le teŋgeŋndo sinaa tonyaa a choolaŋ tɛɛŋ, nduyɛ miŋ diikuŋ tonyaa. (Luomaŋ. 6:17; 1 Pitɛ 1:22) Suɛi sɔvɛi pila hei cho ni te ŋ yeema pɛ pioŋɔɔ sɔlaa a teleŋ nyɛpalaa bɛndoo.

4. Yɛɛ naŋ cho yɛ pɛɛku o buŋgɛi hei niŋ?

⁴ O buŋgɛi hei niŋ, ŋ cho yaasiaa suliŋndaŋ la tiɔɔŋ la mala naa miŋ sina tonya cho o Baabuiyo niŋndo, vɛlɛ miŋ diikuŋ nɛi chɔmaa naŋ sɔla kɔɔna Mɛlɛkaa o ba wo. Okoŋ, miŋ yaasiaa sɔɔŋ ŋgaa ŋ mala naa miŋ hiou lachi a tonyaa saa kpiŋ ndo.

SULIŊNDA YEEMAŊ LE TONYAA SINAA LAŊ

5. Vɛɛ siooŋnde nɔɔ le Chɛhowa mala yɛ naa miŋ sina nyɛ cho tonyaa wo?

⁵ Siooŋnde nɔɔ le Chɛhowa. Siooŋnde nɔɔ le Chɛhowa sim ni, kaalaa ndu a kɔllo kpou, nduyɛ ŋ tosa nyɛ o nyɛ tɛɛmbuu ndu kɔllo wo le. Ŋ nɔ miŋ dɔu sɛmbɔɔ le teŋgeŋndo sinaa suɛi bɛnda le tosaa ve tɛɛŋ a i bɛnda le tosa le ve, tonyaa a choolaŋ tɛɛŋ, le halikpeŋ miŋ nɛŋi Chɛhowa kɔllo. (Pulɔ. 2:​3-6; Hibu. 5:14) Fɛɛŋ bɛɛ ŋ nɔ miŋ chɛl mi siooŋii naŋ nɔ le wanachioo ve hiou kaala naŋ nɔ le Chɛhowa wo le. Kanifuule, teleŋnda bɔɔbɔɔ mi sɔɔŋ waŋnda chieeya hɛnaŋ ndoŋ tɛɛmbuu Chɛhowa kɔllo.

6. Vɛɛ siooŋii wanachioo tosa yɛ mi suaŋsuaŋnda ŋwaŋ tɔ kɛɛ le tonyaa sinaa a Chɛhowa okɔɔ?

⁶ Te ŋ nɔ pɛ siooŋnde le wanachioo mbo hiou siooŋii naŋ nɔ le Mɛlɛka ve pɛ, mi keŋ tosa miŋ kuɛ le tonyaa malɔɔ. Yiyaŋndɔ a suaŋsuaŋaa 12 kuɛ le lɛŋnde Chɛhowa mɛi lediom le Isɔluɛiya kioo leŋ mɛɛndaŋndo wa. O suaŋsuaŋaa 12 kaŋ tɛɛŋ, ŋwaŋ tɔ ndaa nɔ siooŋii Kenanaitiiya mbo hiau kaala ndaa nɔ le Chɛhowa wo. Ma dimul chaaŋaa ndaa Isɔluɛiya aa: “Ŋ nɔla miŋ kɔ chiŋalaŋ wanaa kaŋ te, kanifuule a hiou naa dialuŋ kalaŋ.” (Nɔm. 13:​27-31) O yiyaŋ iwana chieeyaa niŋ, i wa tonya maa Kenanaitiiya ndaa hiou dialuŋ kalaŋ nɔ a Isɔluɛiya. Kɛ wana o wana ndoo yiyaŋ pɛ maa Isɔluɛiya ndaa tiuba ma yem yaamɔɔwaa ndaa le, mɛɛ wana koŋ ve yiyaŋ kposoŋ a nyɛ Chɛhowa tiuba le tosaa wo le. Puaa suaŋsuaŋaa tɔ wa haa ndaa nɔ ma handu kɔllo o nyɛ Chɛhowa ndoo yeema Isɔluɛiya ma tosa wo choo. Ndaa nɔ vɛlɛ ma yiyaŋ a nyɛ Chɛhowa ndoo tosal nda niŋ o teleŋ biŋgi hiou wo niŋndo. Hei wa nda mala mi ndaa bii bila maa dialuŋ kalaŋ Kenanaitiiya nɔ woŋ cho nyɛ o nyɛ le, te a tuu muŋ pɛ a kpaaya bɛndu Chɛhowa nɔ wo. Kɛ Chɔɔsuaa nda Kelɛbi ve maa puaa suaŋsuaŋaa kɛɛ haa laalaŋndo dɔwɔɔ o Chɛhowa niŋnda le. Ndaa nɔ yeemɛi le Chɛhowa kɔllo nɛŋioo. Ma dimul waŋnda aa: “Te Chɛhowa hini pɛ kɔl a naa, o cho lakɔ a naa o lɛŋnde leŋ niŋ, nduyɛ mbo ke naa leŋ.”—Nɔm. 14:​6-9.

7. Yɛɛ naŋ nɔ yɛ miŋ tosa le miŋ chɔɔlu siooŋnde nɔ le Chɛhowa? (Tofa vɛlɛ fotueiyo.)

⁷ Le miŋ chɔɔlu siooŋnde nɔ le Chɛhowa, ŋ nɔ miŋ yiyaŋ a nyɛ nɛŋi ndu kɔllo wo teleŋ o teleŋ naŋ wa pɛ kɛɛsiaa tosaa. (Sam 16:8) Te a wa pɛ sɔɔŋ cho o Baabuiyo niŋndoŋ diomndaŋ veeloo, nyunaŋndɔ aa, ‘Te ndoo yɔŋ pɛ aa ya suɛi keŋ yɔŋnuŋ ni, kɛɛsiaa yɛɛ ya wa yɛ tosa?’ Le tamaseliiyo, yiyaŋndɔ maa a cho nilaŋ yaŋɔɔ mi suaŋsuaŋaa tɔ wa, wa dimioo maa Isɔluɛiya nɔla Kenanaitiiya chɔulaba kposoŋ te. Baa a wa pa nyɛ nda dimi wo laalaŋ okoŋ mi num oo kandu siooŋnde nɔɔ le wanachioo? Ɔɔ kaala ŋ nɔ le Chɛhowa a yeemɛi ŋ nɔ le ndu kɔllo nɛŋioo ve wa tosa ma tiu siooŋii wanachioo ba? Mi Isɔluɛiyaa bɔɔbɔɔ kɛɛ le laalaŋndo dɔwɔɔ o nyɛ Chɔɔsuaa nda Kelɛbi dimi wo niŋ. Fulamakɔɔlioo wa ni, mi dikeŋnaŋ ndaa nɔ le luɛiyɔɔ o Lɛŋnde Mɛyaaleŋ niŋndo hialuŋ nda.—Nɔm. 14:​10, 22, 23.

8. Suliŋ kuɛɛ naŋ nɔ yɛ miŋ nɔ, nduyɛ le yɛɛ?

⁸ Tusiŋndo. Mi Chɛhowa chɔm wanaa tusiaŋnda tonyaa. (Maa. 11:25) Tusiŋndo mala naa ni miŋ chɛl le tonya Baabuiyo pɛɛkoo. (Walta. 8:​30, 31) Kɛ o wa bɛɛ lende, ŋ nɔ miŋ wa yekeŋ yɔŋii naŋ kandu kaa heelaŋndo nɔɔ. Te ŋ nɔ pɛ kaa heelaŋndo, naapum miŋ kandu yiyaŋndo maa, mɛɛ naŋ tosa sɔɔŋ yɛ hiou bɛnda mbo hiau sawala mandaala Baabuiyo, a nɛila chɔmaala kɔɔna Chɛhowaa cho naa kioo laŋ.

9. Vɛɛ naŋ hiau yɛ lachi a kaa tusiaŋndo nɔɔ?

⁹ Le miŋ hiou lachi a waa wanaa tusiaŋnda, ŋ nɔ miŋ loonuŋ mɛɛ kpɛ naŋ cho wanaa taaniŋ Chɛhowa o hɔl lɛ. (Sam 8:​3, 4) Ŋ nyuna vɛlɛ Chɛhowa o piɛileŋ niŋ le mbo mala naa miŋ wa wanaa tusiaŋnda, nduyɛ miŋ dɔu nyɛ naŋ cho pɛɛkoo o Diom ndɔɔ niŋndo o wali niŋ. Mi Chɛhowa soliŋ kɔɔna ndɔɔ a Diom ndɔɔ kpeku le naa yiyaŋnda ndɔlaŋ chɔmndo. Nduyɛ mbo mala naa le sinaa maa, mɛɛ o cha sɔɔŋ yɛ hiou wa o sɔvɛ a mɛɛ naŋ cha muŋ yɛ. Te a wa pɛ diomndaŋ veeloo o Baabuiyo niŋ, kindiŋ ma che le sabu Chɛhowa kaala tusiŋndo, kɛ mbo tul kaa heelaŋndo a yoŋgaa leyɛ wo. I cho bɔɔ suɛi sɔvɛ le miŋ hiou lachi a kaa tusiaŋndo nɔɔ te ŋ sɔla pɛ foofoo ɔɔ miŋ sɔla dikeŋnaŋ waŋnda handu naa hɔlteŋ kɔɔli wo.

VƐƐ NAŊ HIAU YƐ LACHI A TONYAA DIIKƆŊNDO?

10. Nɛɛ yaa Chɛhowa ndoo soliŋ yɛ kpeku le wanaa nduaa pɛɛkoo a nda nɛi chɔmaa kioo?

¹⁰ Hiou lachi a nɛi chɔmaa Chɛhowaa tolɔɔ kɔɔli. O Isɔluɛi niŋ sindɛ, mi Chɛhowa soliŋ Muuse nda Chɔɔsuaa kpeku le wanaa nduaa nɛi chɔmaa kioo. (Chɔɔ. 1:​16, 17) Mi nyɛ o nyɛ ndoo wa o kɛndɛ a Isɔluɛiya te ndaa diikuŋ pɛ wanaa Chɛhowa wa kpekoo soliŋndo wa. Mɛɛ wɔsilaŋ la hiou o kɛmɛlaŋ niŋ, mi Chɛhowa soliŋ kiilaa 12 kpeku le kunda leKilisiɔŋ sɛnɛi ndoo kilaŋ ndo nɛi chɔmaa kioo. (Walta. 8:​14, 15) Mɛɛ teleŋ tiŋ hiou, mi bɛnduaa kundaa cheleŋ wa Chulusalɛm nda sɔɔŋguu kiilaa choo le chilaŋ chuaa. Le mɛɛ ndaa tol nɛi chɔmaa nda wa sɔlaa puaa laalaŋnda haa o ba wo, “mi kundala wanaa laalaŋnda la hiau lachi a kaloo poŋ o laalaŋndo niŋ, nduyɛ lepaa o lepaa waŋnda wa hiouwɔɔ lachi a kuiyo.” (Walta. 16:​4, 5) Hau bɛɛ, mi Chɛhowa dɔu naa sala te ŋ tol pɛ nɛila chɔmaala kɔɔna ndɔɔ cho naa kioo laŋ kɔɔli. Kɛ vɛɛ Chɛhowa yiyaŋ yɛ te ŋ kɛɛ pɛ nɛila chɔmaala wanaa o yulu iso wa tolɔɔ kɔɔli? Le muli nyunaa hoo sɔlaa, ŋ yaasiaŋndɔ nyɛ yɔŋnuŋ Isɔluɛiya wo teleŋ nda wa kɔlaŋ o Lɛŋnde Mɛyaaleŋ niŋndo.

11. Yɛɛ ndoo yɔŋnuŋ yɛ o Isɔluɛi niŋ sindɛ a wanaa simul Muuse, wana Mɛlɛka yulu iso le chilaŋ chuaa wo? (Tofa vɛlɛ fotueiyo.)

¹¹ Teleŋ Isɔluɛiya wa o nɛi tɛɛŋ le kɔlaŋ o Lɛŋnde Mɛyaaleŋ niŋndo, mi puaa ndaa nɔ tɔɔ wa apum simul Muuse a nɛi chɔmaa o wa nda kioo wo, fulaa Chɛhowa o ba. Ma dimi aa: “Wanaa tuaa kpou bɛɛ [o cho ko Muuse kinɛi le] Mɛlɛka hɛli nda ni, nduyɛ Chɛhowa cho nda tɛɛŋ.” (Nɔm. 16:​1-3) I cho tonya maa Chɛhowa o hɔl, “wanaa tuaa kpou bɛɛ,” Chɛhowa hɛli nda ni. Kɛ Muuse kpeekpei Chɛhowa ndoo hɛli ni le mbo chua chilaŋ wanaa nduaa choo. (Nɔm. 16:28) O dimi niŋ, simul nda wa koŋ Muuse wo, Chɛhowa kpeekpei nda wa koŋ simullo ni. A hendu kɔllo o nyɛ Chɛhowa ndoo yeema wo choo le, kɛ ma handu kɔllo o yeemɛi ndaa nɔ o foofoo, a tɔɔ sɔlaa wo choo. Mi Chɛhowa tosa mi wanaa sim lachi le ndu simullo wa, a wanaa cheleŋ o waalaŋ niŋ toolu nda wa kpou sɔla piɔmndo. (Nɔm. 16:​30-35, 41, 49) Hau bɛɛ, Chɛhowa niŋ kɔl a wanaa kɛɛ bɛɛleŋ chɔmndo le nɛi chɔmaa kɔɔna ndɔɔ cho naa kioo wo le.

12. Le yɛɛ naŋ nɔ yɛ miŋ hiou lachi a tiindaŋndo dɔwɔɔ o kɔɔna Chɛhowaa niŋ?

¹² Ŋ nɔ miŋ hiou lachi a tiindaŋndo dɔwɔɔ o kɔɔna Chɛhowaa niŋ. Te wanaa cho chilaŋ chuaa wa saaluŋ pɛ maa ŋ nɔ miŋ kpɛlɛkiaa sinapɛŋgu naa a sɔɔŋ pum okɔɔ o Baabuiyo niŋ, ɔɔ ma che maa ŋ nɔ miŋ siŋga sɔɔŋ a mɛɛ naŋ piɛi Chɛhowa yɛ, ma wa fɛɛsɛŋ le keleŋaa siŋgaŋnda yeemaŋ ndaŋ tosaa. (Pulɔ. 4:18) Ma tosa hei kanifuule, yeemɛi ndɛi cho le Chɛhowa kɔllo nɛŋioo ni. Ma kindiŋ vɛlɛ kpoke le tosaa le mi kɛɛsiaala ndalaŋ la tɔlnuŋ o Diom Mɛlɛkaa choo, nduyɛ Diom Mɛlɛkaa hoo wanaa Chɛhowaa kpou cho hau tolɔɔ kɔɔli ni.

13. Yɛɛ cho yɛ ‘diomnda tonyalaŋ,’ nduyɛ yɛɛ naŋ nɔ yɛ miŋ tosa a laŋ?

¹³ ‘Hiou lachi a diomnda tonyalaŋ biyɔɔ kpiŋ.’ (2 Timo. 1:13) ‘Diomnda tonyalaŋ’ ndaŋ la sim le pɛɛkula tɔlnuŋ o tonyala Baabuiyo choo laŋ. (Chɔŋ 17:17) Pɛɛkula laŋ la cho yɛ puunduleŋ le sɔɔŋ naŋ laalaŋ ndoŋ ni. Kɔɔna Chɛhowaa pɛɛku naa le miŋ mɛɛndaŋ nyɛkɛndɛi te laalaŋnda naalaŋ la tɔlnuŋ pɛ o diomnda tonyalaŋ ndaŋ choo. Te ŋ hiou pɛ lachi a keŋ tosaa, Chɛhowa cho naa dɔwɔɔ sala.

14. Vɛɛ Kilisiɔŋnda apum ndaa mal lɛ ‘diomnda tonyalaŋ’ saa kpiŋ?

¹⁴ Yɛɛ yɔŋnuŋ yɛ te ŋ kɛɛ pɛ ‘diomnda tonyalaŋ’? Ŋ tofaŋndɔ tamaseliiyo hoo. O wɔsiŋ kɛmɛ tasoŋ niŋ, Kilisiɔŋnda apum wa sɔɔŋ ve tonya le woŋ pɛŋgɛlaa o kundaa niŋ maa paale Chɛhowa leŋ lee fuuluu niŋ. Naapum yau soo a sɔɔŋ muŋ okɔɔ wo nda sɔla ni, nduyɛ ma yiyaŋ maa Pɔɔl poonyiaa ndu ni. Yɔŋii nda chua teleŋndo le sɔɔŋ muŋ mɛɛndaŋndo nyɛkɛndɛi, mi Kilisiɔŋnda apum o Tɛsalonaika niŋ laalaŋ choola nda wa laŋ dimioo laŋ. Nduyɛ pɛŋ, ma hiau lachi a laŋ pɛŋgɛlaa. A ve nda hui le, te ndaa loonuŋ pɛ a sɔɔŋ Pɔɔl ndoo pɛɛku nda woŋ, teleŋ o wa wɔ a nda latulu wo. (2 Tɛsa. 2:​1-5) Mi Pɔɔl ndoo sila puaapiliaa nduaa maa a nɔ ma laalaŋ nyɛ o nyɛ nda tuei pɛ le. Le nda malaa ma fafaŋ keŋ o chilaŋ niŋ, mi Pɔɔl mɛɛlu dimi o yau diiŋ ndɔ o poonyial Tɛsaloniaŋnda wo niŋ aa: “Ya Pɔɔl cho niŋ yilɔɔ hoo poonyiaa ni. I yil nya lapi. Nuaa ya poonyiaa o yaula nilaŋ niŋ kpou ni, le mi la sina maa ya poonyiaa ni.”—2 Tɛsa. 3:17.

15. Vɛɛ naŋ mandaŋ yɛ a sɔɔŋ lachoowaŋ waŋnda dimi lepum le naa huiyo woŋ? Chɔmndo tamaseliiyo. (Tofa vɛlɛ fotueilaŋ.)

¹⁵ Yɛɛ naŋ pɛɛku yɛ o diomnda Pɔɔl poonyial Tɛsaloniaŋnda laŋ niŋ? Te ŋ tuei pɛ suɛi pum i chɛlaŋ kposoŋ a nyɛ naŋ pɛɛku o Baabuiyo niŋndo le, ɔɔ miŋ tuei suɛi yɔŋnaŋii bii naa tiŋ kɔndɔfillo ve, ŋ nɔ miŋ soliŋ taasi naa kpeku le ndi yaasiaa nyɛkɛndɛi. O tanda Soviet Union ndo niŋ paandu, mi yaamɔɔwaa naa ke puaapiliaa yau nda dimi maa o fondaŋnda leboltaŋ o fula ni wo. Yauwo hoo wa puaapiliaa dɛɛniaa le mi ndaa kila kɔɔna teŋgeŋndo a ba nda. Te wanaa che pɛ yau koŋ, ma kuɛ le laalaŋndo sɔɔŋ wa leniŋ ndoŋ. A koŋ kpou, mi puaapiliaa bɔɔbɔɔ lo o laalaŋ ndaa choo. A tul nyɛ yau koŋ dimi wo kɔɔli le, kanifuule ma sina kpendekele maa nyɛ yau koŋ dimi wo chɛlaŋ a nyɛ nda pɛɛku niŋ paandu wo le. Hau bɛɛ, mi wanaa simul tonyaa wa soliŋ lepum intanɛtiiyo kpeku le naa kiisaŋndo lueiyo o kɔl, a le wanaa Chɛhowaa piɔuwaŋndo lueiyo tɛɛŋ. Te i waa lende yɔŋnuŋ pɛ, ‘ŋ nɔ miŋ chɛl kposoŋ mi kɔlta naalaŋ la laasiaŋ te.’ Kɛ ŋ nɔ miŋ manda yiyaŋnda naalaŋ sanaa a yaasiaa tosaa le sinaa te nyɛ naŋ tuei ɔɔ nyɛ naŋ veelu diomndaŋ ndo cho pɛ o chɛlaŋ a tonyala naŋ pɛɛku niŋ paandu laŋ.—2 Tɛsa. 2:2; 1 Chɔŋ 4:1.

16. A mɛɛ Luomaŋnda 16:​17, 18 dimi yɛ, yɛɛ naŋ nɔ yɛ miŋ tosa te waŋndo o kundaa niŋ kandu pɛ sɔɔŋ cho tonya le woŋ pɛŋgɛlaa?

¹⁶ Hiou lachi a waa o diompilɔɔ niŋ a wanaa cho lo lechoo wo chɔmndo o Chɛhowa lo wa. Mɛlɛka yeema naa miŋ piɛi ndu o diompilɔɔ niŋ a puaapiliaa a ndepiliaa naa latulu. Nduyɛ, ŋ nɔla miŋ hiou lachi a waa o diompilɔɔ niŋ te ŋ bii pɛ tonyaa kpiŋ. Wana o wana dimi choolaŋ le piɔuviaŋndo lueiyo o kundaa niŋ, Mɛlɛka ke naa silaa maa naŋ “holnuŋ” wana koŋ te. Yɔŋii naa bɛɛ kandu sɔɔŋ cho tonya le woŋ laalaŋndo, okoŋ miŋ mal Chɛhowa piɛiyo.—Nuawɔ Luomaŋnda 16:​17, 18.

17. Tɔnɔ yɛɛ naŋ sɔla yɛ te ŋ sina pɛ tonyaa, nduyɛ miŋ saa ndu kpiŋ?

¹⁷ Te ŋ sina pɛ tonyaa nduyɛ miŋ bii ndu kpiŋ, keŋ cho naa mala miŋ lo Chɛhowa ikɛi kpɛɛluŋ, nduyɛ miŋ kɛsi laalaŋ naa o kala poŋ. (Ɛfi. 4:​15, 16) Pɛɛkula lachoowala Setana laŋ a choola o cho pɛŋgɛlaa a wanaa Mɛlɛkaa okɔɔ laŋ la hui naa le, nduyɛ hei cho tosa miŋ lo o manda Chɛhowaa bɛŋgu a teleŋ nyɛpalaa bɛndoo. La hiou lachi a tonyaa saa kpiŋ, okoŋ “Mɛlɛka kɔl nyuloo cho wa a nya latulu.”—Filipi. 4:​8, 9.