“La Hɛli a Ba Nya . . . Mɛlɛka Nya Cho Piɛiyo”

1. Le miŋ sɔla kɔl kɛndɛ kpeekpeiyo, yɛɛ naŋ nɔ yɛ miŋ tosa, nduyɛ le yɛɛ? (Aisaya 48:​17, 18)

FINYA naa o choo choo niŋ kaala naa tau, nduyɛ o yeema naa miŋ tuei yoomoo yeela suŋ suŋ vɛlɛ a o chilaŋ niŋ. (Iki. 3:​12, 13) O toosiaa naa a suliŋndo le sɔŋ sɔviɔŋ pum tosaa, kɛ o ke naa dioo le miŋ wa masa naapila choo, ɔɔ miŋ kɛɛsiaa le nyɛ cho o kɛndɔɔ a o wɔɔŋndo wo tosaa le. (Iki. 8:9; Chɛl. 10:23) O sina maa le miŋ sɔla kɔl kɛndɛ kpeekpeiyo, mɛɛ miŋ piɛi ndu nduyɛ miŋ diikuŋ sawala ndɔlaŋ.— Nuawɔ Aisaya 48:​17, 18.

2. Yɛɛ Setana yeema yɛ naa miŋ laalaŋ, nduyɛ yɛɛ Chɛhowa tosa yɛ a keŋ okɔɔ?

² Setana yeema naa miŋ laalaŋ maa, mi waŋnda chieeya ve bɛɛ Chɛhowa piɛi le, a tiuba ma wa masaa ndapila choo nduyɛ ma wa a kɔl kɛndɛ. (Chɛn. 3:​4, 5) Le chɔmndo maa wana lachoowaa Setana cho ni, mi Chɛhowa chɛl le mi waŋnda chieeya wa masa ndapila choo le teleŋ biŋgi. I cho tɛtɛlɛ le chɔɔ maa masale wanachioo le nɔla batiuwaa sɔlaa le. O baa pilɔɔ choo, Baabuiyo chɔm naa puaa a waŋ laanduaa bɔɔbɔɔ, a wa a kɔl kɛndɛ wa le mɛɛ nda wa Chɛhowa piɛiyo yɛ. Nduyɛ wana ndoo hiou wa a kɔl kɛndɛ nda tɛɛŋndo wa Chiisu Kiliti ni. Le kandɔɔ, ŋ yaasiaŋndɔ sabula tosa mbo hɛli le Chɛhowa piɛiyo laŋ, okoŋ miŋ che le sabu naa bɛɛ nɔ miŋ piɛi Chɛhowa wo. O mɛɛlaa, ŋ cho yaasiaa le sabu naŋ kɛɛsiaa le Chɛhowa piɛiyo wo.

LE SABU YƐƐ CHIISU KƐƐSIAA YƐ LE CHƐHOWA PIƐIYO?

3. Yɛɛ Setana ndoo tuu yɛ le Chiisu kioo, kɛ kɛɛsiaa yɛɛ Chiisu tosa yɛ?

³ Teleŋ Chiisu wa o chieeŋndo choo wo, ndoo nɔ mbo kɛɛsiaa le Mɛlɛka o cho piɛiyo. Mɛɛ Chiisu sɔla yiŋɔɔ, teleŋ biŋgi okoŋ kɔɔli, mi Setana chɔm ndu masɛi o chieeŋndo choo kpou nduyɛ mbo dimul ndu maa o cho ndu masɛi keŋ ke te o piɛi ndu pɛ o yɔŋ bɛɛ aa le pilɛ kpe. Mi Chiisu muli aa: “Hiou ma kuɛ, Setana! I cho i poonyiaa aa: ‘Chɛhowa Mɛlɛka numndo ŋ nɔ ni ma piɛi. Nduyɛ ndu pilɛ kpe ŋ nɔ ni ma biilu.’” (Mat. 4:​8-10) Le yɛɛ Chiisu tosa yɛ chuaŋ chua koŋ? Ŋ yaasiaŋ ndɔ sabulaŋ lapum.

4-5. Le sabula kuɛɛ Chiisu kɛɛsiaa yɛ le Chɛhowa piɛiyo?

⁴ Sabu kpeekpei tosa mi Chiisu piɛi Chɛhowa wo wa kaala ndoo nɔ le ndu wo ni. Chiisu ndoo nɔ kaala yiŋgoloŋndo le Finya ndɔ, nduyɛ o wa o chaŋyɛi kpɛɛluŋnde niŋ a ndu. (Chɔŋ 14:31) Le handɔɔ lechoo, mi Chiisu piɛi Chɛhowa kanifuule mbo sina maa keŋ wa suɛi sɔvɛi le tosaa ni. (Chɔŋ 8:​28, 29; Sɔɔŋ. 4:11) Mbo sina maa ŋ nɔla miŋ tiindaŋ Chɛhowa kanifuule, ndu ke naa yoomoo ni, a nyɛm kɛndɛŋ cheleŋ tau. (Sam 33:4; 36:9; Chemi. 1:17) Mi Chɛhowa ndoo dimul Chiisu tonyaa teleŋ o teleŋ. Nduyɛ nyɛ o nyɛ Chiisu ndoo nɔ, Mɛlɛka o ba o fula ni. (Chɔŋ 1:14) Kɛ o baa pilɔɔ choo, Setana tosa ni mi piɔmndo wa. Wana lachoowaa o cho ni, o nɔ kaayei, vɛlɛ a hɔlte bɛŋndeŋ. (Chɔŋ 8:44) Le mɛɛ Chiisu ndoo sina sɔɔŋ muŋ yɛ, le pilɛ bɛɛ o del kɔl le Setana tolɔɔ kɔɔli, okoŋ mbo simul Chɛhowa le.—Filip. 2:​5-8.

⁵ Sabu cheleŋ tosa mi Chiisu piɛi Chɛhowa wo wa le fulamakɔɔlila diikɔŋ ndɔɔ wa hunɔɔ laŋ ni. (Hibu. 12:2) Ndoo sina maa te o lo pɛ o laalaŋ ndɔɔ choo, o wa diola Finya ndɔlaŋ dindi, nduyɛ mi ndoo faŋga piɔmndo a hakioo, o Setana tosa mbo wa naa choo wo.

LE YƐƐ NAŊ NƆ YƐ MIŊ PIƐI CHƐHOWA?

6-7. Le sabu yɛɛ wanaa bɔɔbɔɔ piɛi yɛ hau Chɛhowa le, kɛ le yɛɛ naŋ nɔ yɛ miŋ piɛi ndu?

⁶ Wanaa bɔɔbɔɔ cho hau Chɛhowa piɛi le kanifuule, a pɛɛku a suliŋnda ndɔla kɛndɛlaŋ okɔɔ le, nduyɛ a sina a sɔɔŋ kɛndɛŋ o tosal nda niŋ ndoŋ te. Hei cho tonya a wanaa kiilanɔɔ Pɔɔl dimul yooŋgu kɛndɔɔ Atɛŋ nda—Walta. 17:​19, 20, 30, 34.

⁷ Mi Pɔɔl tɛɛsial waŋnda Atɛŋ maa Mɛlɛka tonyaa “ke waŋchieeya kpou yoomoo a nyɛ o nyɛ fee ni.” Mbo chɔɔlu dimi aa: “Ndu ke naa yoomoo ni. Ndu tosa ni miŋ wa balɔɔ, nduyɛ miŋ wa achal.” Mɛlɛka toosiaa nyɛ o nyɛ fee ni, “o wanachiee tase o toosiaa wo niŋ o soli kaalaŋ kpou” ni. Lelaŋ, ndu kinɛi naŋ nɔ ni miŋ piɛi—Walta. 17:​25, 26, 28.

8. Yɛɛ Chɛhowa tosa yɛ niŋ fɛɛŋ te? Tɛɛsiaawɔ.

⁸ Le mɛɛ Chɛhowa cho Wana Toosiaa nduyɛ mbo wa Kpuluŋgumaa le Chieeŋndo yɛ, ndoo tiuba mbo baŋ waŋnda le ma piɛi ndu. Kɛ fɛŋ bɛɛ Chɛhowa tosa keŋ te. Nyɛ o tosa wo cho ni, mbo chɔm naa tamaseliila chɔm maa o cho kpeekpei nduyɛ maa o kaala naa tau laŋ. O yeema mi waŋnda tau simnuŋ chaaŋaa nduaa le fɛɛŋ a fɛɛŋ. (1 Tim. 2:​3, 4) Le hei Chɛhowa pɛɛku naa ni le miŋ pɛɛku acheleŋnda a tuula kɛndɛla o nɔ le waŋnda chieeya laŋ okɔɔ, nduyɛ a mɛɛ o peelu niŋ tuula laŋ yɛ. (Mat. 10:​11-13; 28:​19, 20) O ke naa kunda leKilisiɔŋndo le ndu piɛiyo, nduyɛ a bɛnduaa kundaa le naa malaa o ndu piɛiyo niŋ.—Walta. 20:28.

9. O nɛila kuɛɛ niŋ Chɛhowa chɔm yɛ waŋnda kpou kaalaa?

⁹ Miŋ che mɛɛ Chɛhowa chɔm kaala ndɔ bɛndoo yɛ, a mɛɛ o bii wanaa cho ndu piɛi le wa yɛ. Yiyaŋndɔ a hei okɔɔ, le wɔsilaŋ o waalaŋ niŋ wanaa bɔɔbɔɔ kɛɛsiaa niŋ hau a ba nda le nyɛ cho o kɛndɔɔ a o wɔɔŋndo wo, ma kɛɛ le Mɛlɛka diikɔŋndo. A koŋ kpou, mi Chɛhowa ke nda nyɛm nda hauba o yoomoo niŋndoŋ nduyɛ ma tuei ndu yeela. (Mat. 5:​44, 45; Walta. 14:​16, 17) Mbo tosa ma nɔ chaŋyaŋ a wanayaŋ kaala nda woŋ, ma velu chuauwa, nduyɛ mbo dɔu walta ndalaŋ sala. (Sam 127:3; Iki. 2:24) Hei chɔm kpendekele maa Finya naa o choo choo niŋ kaala waŋnda chieeya kpou. (Ɛso. 34:6) Ŋ loonuŋndɔ naapila a sabula tosa miŋ kɛɛsiaa le Chɛhowa piɛiyo laŋ, nduyɛ miŋ che mɛɛ o dɔu naa niŋ sala yɛ.

LE SABU YƐƐ NAŊ TOSA YƐ CHUAŊ CHUAA LE CHƐHOWA PIƐIYO?

10. (a) Ɔɔ sabu kpeekpei naŋ nɔ miŋ piɛi Chɛhowa wo? (Maatiu 22:37) (b) Vɛɛ ŋ sɔla yɛ niŋ tɔnɔɔ o biuwɔŋ Chɛhowa wo niŋ? (Sam 103:​13, 14)

¹⁰ Maa Chiisu, mi naa bɛɛ piɛi Chɛhowa le mɛɛ naŋ nɔ kaala yiŋgoloŋndo le ndu yɛ. (Nuawɔ Maatiu 22:37.) Te ŋ pɛɛku pɛ a suliŋnda kɛndɛla Chɛhowa laŋ okɔɔ, mi keŋ nyindu naa le ndu sɔɔŋguuwo ikɛi kpɛɛluŋ. Le tamaseliiyo, ŋ yaasiaŋ ndɔ mɛɛ Chɛhowa biunuŋ niŋ naa yɛ. Mɛɛ Isɔluɛiya kɛɛ ndu diikɔŋndo, mbo nyɔɔlu nda aa: “A yandii, la mulul sɔɔŋ wɔɔŋ nya cho tosaa woŋ kɔɔ.” (Chɛl. 18:11) Chɛhowa sina maa wanaa lahakiaa naŋ cho ni, nduyɛ maa a puuloo o tosaa naa ni. (Nuawɔ Sam 103:​13, 14.) Te a yiyaŋ pɛ a biuwɔŋ Chɛhowa wo vɛlɛ a suliŋnda ndɔla kɛndɛlaŋ okɔɔ, baa keŋ nyindu num le ndu piɛiyo lefafɛɛŋ te?

11. Sabula kuɛɛ naŋ nɔ yɛ le Finyaa naa o choo choo niŋ piɛiyo?

¹¹ Ŋ nɔ vɛlɛ yamɛi le Chɛhowa piɛiyo kanifuule, ŋ sina maa nyɛ sɔvɛ naŋ nɔ le tosaa wo cho koŋ ni. (Mat. 4:10) Le handɔɔ lechoo, ŋ sina fulamakɔɔli kɛndɛ naŋ cho sɔla le lo lechoo naa o Chɛhowa lo wo. Te ŋ chɔm pɛ lo lechoo wo o Chɛhowa lo, mi keŋ dindi diola ndɔlaŋ, miŋ chɔm maa wana lachoowaa nyina wɔɔŋndo cho ni, nduyɛ mi hei nɛŋi Chɛhowa kɔl. Te ŋ kɛɛsiaa pɛ hau le Chɛhowa piɛiyo, ŋ cho nɔ tiindaŋndo le ndu piɛiyo lefafɛɛŋ!—Chɔŋ 17:3.

12-13. Yɛɛ naŋ pɛɛku yɛ o tamasi Chani nda Pam ndo niŋ?

¹² Te ŋ pɛɛku pɛ le kaalaa nɔɔ le Chɛhowa o chuaambɔyɛi niŋ, mi keŋ mala naa miŋ hiou lachi a kaala yiŋgoloŋndo nɔɔ le ndu mɛɛ naŋ hindu fau. Mi hei yɔŋnuŋ ndepiliaa naa pɔmbɔɔ a bɛndoo diolaŋ Chani nda Pam.a Mɛɛ nda kandu Baabuiyo pɛɛkoo, Chani wa wɔsilaŋ 11, Pam wa wɔsilaŋ 10. Mi che bɛɛ wanaa velu nda wa ndaa nɔ iyeema le Baabuiyo pɛɛkoo le, kɛ ma chɛl le mi Chani nda Pam pɛɛku Baabuiyo a Seiyaa Chɛhowaa. Nyɛ nda yeema kinɛiyo wa ni, ndaa nɔ ma kuɛ o kaŋnde ndaleŋ a yuŋgu ndaa latulu o lɔɔ mɛɛlulaŋ. Mi Chani dimi aa: “Nyɛ Seiyaa Chɛhowaa kpeku ya o Baabuiyo niŋndo mala ya ni, I tul chaaŋaa niaa kɔɔli le kooma wana ve o numpila niŋ te waŋ chuaa, a balaŋ lueiyo o kaa ihini nɔɔlɛiyo niŋ te.”

¹³ Mɛɛ wɔsioŋ tiŋ hiou, mi chuaambuaa ŋiɔɔŋnda haa kpou simnuŋ wanaa dimiaa yooŋgu kɛndiaa. Okoŋ kɔɔli, ma kandu kɔɔfaleŋ nduyɛ a wa vɛlɛ wanaa ndaa yuwɛiya mandaa. Mi Chani yiyaŋ a sɔɔŋ Chɛhowa tosal nda niŋndoŋ kpou okɔɔ. Mbo dimi aa: “Mi pɛɛku mɛɛ Chɛhowa manda chaaŋaa nduaa yɛ a mɛɛ 2 Timoti 2:19 dimi yɛ, ‘Chɛhowa sina wanaa cho le ndu wa.’” A tonya, Chɛhowa buulaŋ a wanaa kaala ndu ma wa ndu piɛiyo wa.

14. Vɛɛ naŋ suŋgu yɛ le Chɛhowa sanaa a nyɛ naŋ dimi wo vɛlɛ a nyɛ naŋ tosa wo? (Tofa vɛlɛ fotueilaŋ.)

¹⁴ Ŋ yeema miŋ mala acheleŋnda ma che tonya cho a Chɛhowa okɔɔ wo. Le tamaseliiyo, yiyaŋndɔ a chaaŋ num kpɛɛluŋ cho wana ikɛndɛ, mbo wa wana malaa haki wo. Paale pilɛ, ma tuɛi waŋndo dimioo choolaŋ a ndu okɔɔ maa o cho wana kɔl vesɛi mbo wa wana lakafa. Yɛɛ ŋ cho yɛ tosa? A nɔ ma suŋgu le ndu. O nɛi pilɛ koŋ choo, te Setana a wanaa cho ndu o ba bɛŋgu wa kindiŋ pɛ le choolaŋ pɛŋgɛlaa a Chɛhowa okɔɔ le ma tɛɛmbuu ndu tɔɔ, ŋ nɔ miŋ suŋgu le Chɛhowa sanaa a acheleŋnda dimullo tonya cho a ndu okɔɔ wo. (Sam 34:1; Aisa. 43:10) Ŋ chɔm maa ŋ kɛɛsiaa le Chɛhowa piɛiyo a kɔl naa kpou sanaa a nyɛ naŋ dimi wo vɛlɛ a nyɛ naŋ tosa wo.

15. Tɔnɔ yɛɛ kiilanɔɔ Pɔɔl sɔla yɛ mɛɛ o chɛl le siŋgaŋnda bɛŋndaŋ tosaa o yoomu ndɔɔ niŋ? (Filipiaŋnda 3:​7, 8)

¹⁵ Miŋ chɛl le siŋgaŋndaŋ tosaa o yoomoo naa niŋ le halikpeŋ mi Chɛhowa hini kɔl a naa, nduyɛ miŋ chɔɔlu tosa tau o ndu piɛiyo niŋ. Le tamaseliiyo, mi Kiilanɔɔ Pɔɔl kɛɛ foofo bɛndoo o piɛile Chuuwa niŋ le halikpeŋ mbo tol Kiliti kɔɔli nduyɛ mbo piɛi Chɛhowa. (Kale. 1:14) Fulamakɔɔlioo wa ni, mbo sɔla sɔɔŋ yɔŋnaŋ kɛndɔŋ o Chɛhowa piɛiyo niŋ, nduyɛ mbo sɔla dikeŋnaŋndo le waa a Chiisu latulu o choo choo niŋ. O paaleŋ niŋ bɛɛ o kil iso le kɛɛsiaa o tosa le Chɛhowa piɛiyo wo le, nduyɛ naa bɛɛ ŋ kil niŋ iso le.—Nuawɔ Filipiaŋnda 3:​7, 8.

16. Yɛɛ naŋ pɛɛku yɛ o suɛi yɔŋnaŋii Chuliaa ve niŋ? (Tofa vɛlɛ fotueilaŋ.)

¹⁶ Te ŋ siiŋguu pɛ Chɛhowa piɛiyo nyɛ tase o yoomu naa niŋ, o cho naa salaa dɔwɔɔ suŋ suŋ, vɛlɛ a o chilaŋ niŋ. Ŋ tofaŋ ndɔ tamasi ndepilɛnɔ pilɛ diolaŋ aa Chuliaa. Tuupa mbo kandu Baabuiyo pɛɛkoo, Chuliaa wa wana soliaa ŋchondoo o kaŋnde ndɔleŋ teleŋ o wa feleŋgɔnɔ wo. Mɛɛ wana ndoo chaa choŋndo solioo nyɛkɛndɛiyo che maa Chuliaa nɔ kioo le chondoŋ solioo, mbo pɛɛku ndu le mi ndu bɛɛ simnuŋ wana soliaa ŋchondu kɛndɛ. Nyɔɔ viou bɛɛ le, mi Chuliaa fula tɔɔ tau, nduyɛ mbo kandu chondoŋ solioo o fondaŋnda bɛŋndaŋ. Mɛɛ Chuliaa kuɛ o suuku bɛndu nda pɛɛku chondoŋ ndo, mi po pilɛ nda wa o toŋgo pilɔɔ niŋndo kandu ndu dimullo a Mɛlɛka okɔɔ. Mbo chɔm ndu maa diola Mɛlɛkalaŋ la cho Chɛhowa ni. Mɛɛ teleŋ tiŋ hiou, mi Chuliaa kandu Baabuiyo pɛɛkoo lediiŋ o lɔɔ bɛŋgu. O pɔmpɔmbɔ, mbo kɛɛsiaa le teleŋ ndɔɔ a yoomuma nduaŋ kpou soliŋndo kpeku le Chɛhowa piɛiyo, kɛ o cho le waa wana soliaa ŋchondu bɛndu o chieeŋndo niŋ te. I ve bɛɛŋ bɛɛŋ le kɛɛsiaa koŋ tosaa le. Mbo dimi aa: “Mi wanaa bɔɔbɔɔ dimul la maa I soliŋ ke nuu kpeku o nɛi sɔvɛ choo le. Kɛ yaa yeema mi piɛi Chɛhowa a kɔl nuu kpou.” Vɛɛ o yiyaŋ yɛ a kɛɛsiaa o tosa koŋ chɔŋ niŋ wɔsilaŋ hiouwɔɔ 30 wo? Mbo hiau lachi a dimioo aa: “I cho a kɔl kɛndɛ le kɛɛsiaa ya tosa le Chɛhowa piɛiyo wo, nduyɛ I nɔ tiindaŋndo maa o cho yeemaŋ nuŋ kpou peelu o chilaŋ niŋ.”—Sam 145:16.

HIOU LACHI A CHƐHOWA PIƐIYO

17. Vɛɛ sinaa maa ŋ cho niŋ o mɛɛlula chieeŋndo hoo ikɛi kpɛɛluŋ piiliaŋ yɛ wanaa tosa niŋ kɛɛsiaa le Chɛhowa piɛiyo wa a wanaa tosa wɔ kɛɛsiaa hoo le wa?

¹⁷ Ŋ cho niŋ kpɛɛluŋ o mɛɛlula chieeŋndo hoo. Mi kiilanɔɔ Pɔɔl dimi aa: “Kanifuule, ‘o teleŋ biŋgi bɛŋgu, wana nɔ le hunɔɔ wo cho fuuluu, o dounuŋ niŋ tamala le.’” (Hibu. 10:37) Yɛɛ hei sim yɛ? Hei cho naa malaa le sinaa maa teleŋ lo le mi waŋnda tosa kɛɛsiaa le Chɛhowa piɛiyo wo cho lɛ o bɔɔ le. (1 Kɔl. 7:29) Te o yɔŋ pɛ maa ŋ tosa niŋ kɛɛsiaa le Mɛlɛka piɛiyo, ŋ sina maa ŋ cho simultaŋ sɔla, kɛ le “teleŋ biŋgi koni la cho wa ni.”

18. Yɛɛ Chɛhowa nda Chiisu yeema yɛ naa miŋ tosa?

¹⁸ Mi Chiisu dɛɛniaa buɛiyaa nduaa o cho ko le ndu tolɔɔ kɔɔli le, kɛ le ma hiou lachi a ndu tolɔɔ kɔɔli. (Mat. 16:24) Lelaŋ te o yɔŋ pɛ maa ŋ cho niŋ Chɛhowa piɛiyo le wɔsiŋ bɔɔbɔɔ, ŋ nɔ miŋ hiou lachi a ndu piɛiyo. Ŋ nɔ miŋ tosa wallo kalaŋ le miŋ hiou lachi a Chɛhowa piɛiyo. Mi che bɛɛ i ve bɛɛŋ bɛɛŋ te, kɛ ŋ nɔla miŋ wa a kɔl kɛndɛ nduyɛ miŋ tuei salala bɔɔbɔɔ yeela o Chɛhowa piɛiyo niŋ.—Sam 35:27.

19. Yɛɛ suɛi yɔŋnaŋii Cheŋ nde pɛɛku yɛɛ naa?

¹⁹ Waŋnda apum yiyaŋ maa sala soliaŋndo cho bɔɔ o Chɛhowa piɛiyo niŋ. Te feleŋgɔnɔɔ ŋ cho ni, baa ma yiyaŋ pa maa Chɛhowa piɛiyo cho num kuunaa yoomoo tueiyɔɔ yeela? Mi puaapilɛnɔ feleŋgɔnɔ pilɛ diolaŋ aa Cheŋ dimi aa: “Mi yiyaŋ maa le mɛɛ ya cho Sei Chɛhowaa yɛ, I tui niŋ yoomoo yeela le. Mi yiyaŋ maa feleŋguaa bɔɔbɔɔ cho yoomoo tueiyɔɔ yeela mɛɛ kɔlaŋ o pisultaŋ, chaŋyaŋ tosaa a waŋ laanduaa, a vidueila lasɔŋgɔ laŋ tofaa cho nuaa yɛ, kɛ mi ya wa teleŋ nuu kpou soliŋndo kpeku o bɔŋaŋndaŋ a o wali pollo niŋ.” Vɛɛ yiyaŋndo hoo nɔɔ paaliaŋ yɛ Cheŋ? Mbo dimi aa: “Mi kandu sɔɔŋ wɔɔŋ feleŋguaa tuaa wa tosaa woŋ tosaa. Nduyɛ le teleŋ tiŋ, mi tuɛi yoomoo yeelaa. Kɛ hei chuu ya nyaale kpeekpei o yoomoo niŋ te. Mi kandu yiyaŋndo a tɔnɔla naŋ sɔlaŋ laŋ te ŋ diikuŋ pɛ nyɛ Baabuiyo dimi wo. Le hei, mi kɛɛsiaa le Chɛhowa piɛiyo a kɔl nuu kpou. Chɔŋ niŋ a teleŋ koŋ, mi cha maa Chɛhowa cho piɛile nileŋ kpou mulioo.”

20. Yɛɛ naŋ nɔ yɛ miŋ kɛɛsiaŋ o kɔl le tosaa?

²⁰ Mi wana ŋchondu pilɛ dimi aa: “Kɔl kɛndɔɔ cho le wana ŋ hɛli ma sɔɔŋguŋ ndu ikɛi, le mbo wa o luŋ chiɛi numndo wo.” (Sam 65:4) Maa ŋ kɛɛsiaŋ o kɔl le Chɛhowa piɛiyo maa Chɔɔsuaa. Mbo dimi aa: “Kɛ ya a wana o wana cho o yuŋgu nuu niŋ, Chɛhowa naŋ cho piɛi ni.”—Chs. 24:15.