Vɛɛ Diola Chɛhowa Laŋ La Cho yɛ La Sɔvɛ le Chiisu?

1-2. (a) Yɛɛ Chiisu ndoo tosa yɛ o nyumma ndɔ ma mɛɛlaŋ choo tuupa mbo sɔla piɔmndo? (b) Nyunala kuɛɛ naŋ cho yɛ yaasiaa o buŋgɛi hei niŋ?

O KƆƆLUMAA choo a paale yɔŋgaŋ ndeŋ Nisaŋ 14, wɔsi 33 o Boondii Chiisu Ve Niŋ, mi Chiisu bii bɔŋaŋ Nyɛdiaa Ichɔl Masanɔɔ a kiilaa nduaa lo o laalaŋndo choo wa. Ndoo sina maa Chuda wa ndu hunɔɔ pisi, okoŋ ma luei ndu mɔnɛi, nduyɛ mi yaamɔɔwaa nduaa ndaa dii ndu. Le hei, mɛɛ nda chii nyɛdiaa dio, mi Chiisu dimul kiilaa nduaa diomnda kɔl dɛɛniaalaŋ le nda choŋgɔŋndo. Kɛ tuupa mi nda kpou faŋaŋ, mi Chiisu piɛi piɛile sɔvɛ leŋ pila. Mi kiilanɔɔ Chɔŋ poonyiaa piɛileŋ ndeŋ, nduyɛ le cho o Chɔŋ bolle 17 niŋ.

² Vɛɛ piɛile Chiisu piɛileŋ le chɔm yɛ naa nyɛ wa yiyaŋ ndɔɔ a teleŋ koŋ ndo? Vɛɛ le chɔm yɛ nyɛ wa o sɔvɛ le ndu teleŋ o wa yooŋgu kɛndɔɔ dimioo o lɛŋndeŋ choo wo? Ŋ yaasiaŋndɔ le mulilaŋ sɔlaa le nyunalaŋ ndaŋ.

“I CHƆM NDA DIOLA NUMNDAŊ”

3. Yɛɛ Chiisu dimi yɛ a diola Chɛhowa laŋ okɔɔ, nduyɛ yɛɛ ndoo yiyaŋ yɛ? (Chɔŋ 17:​6, 26)

³ Mi Chiisu dimi o piɛile ndɔleŋ niŋ aa: “I chɔm nda diola numndaŋ.” Nduyɛ pɛŋ, bɛmbɔɔ lediiŋ kpulukuu o dimul buɛiyaa nduaa ni maa o chɔm nda diola Chɛhowa laŋ. (Nuawɔ Chɔŋ 17:​6, 26.) Yɛɛ ndoo yiyaŋ yɛ? Baa diola ndaa sina le laŋ ndoo chɔm nda ni? Chuuwa buɛiyaa Chiisu wa wa ni. Le hei, ndaa sina niŋ maa diola Mɛlɛkalaŋ la cho Chɛhowa ni. Diolaŋ ndaŋ la cho o yaula maHibuluilaŋ niŋ o waalaŋ niŋ. Lelaŋ, o cho a diola kpeekpeila Mɛlɛkalaŋ okɔɔ le Chiisu wa suɛi le. Kɛ o wa suɛi a nyɛ diolaŋ ndaŋ la simndo. Mi Chiisu chɔm wana Chɛhowa cho wo, sabu ndɔɔ le lɛŋndeŋ a le waŋnda chieeya, nyɛ o cho tosa o chilaŋ niŋndo, vɛlɛ a suliŋnda ndɔlaŋ. Nduyɛ wana o wana sina a Chɛhowa okɔɔ mbo hiau Chiisu le.

4-5. (a) Chɔmndɔ tamaseliiyo mɛɛ diola waŋndo la simnuŋ la sɔvɛ le naa yɛ. (b) O nɛi kuɛɛ choo buɛiyaa Chiisu wa sina yɛ diola Chɛhowa laŋ nyɛkɛndɛi?

⁴ Le tamaseliiyo, ŋ dimi wɔ maa bɛndu kunda pilɛ cho o kunda numndo niŋ diolaŋ aa Deeve, nduyɛ wana chiɔuwaa o cho ni. A sina ndu niŋ le teleŋ vilɛi. Kɛ a teleŋ pilɛ, mi bahawɛi kɛndiaa choŋ choŋndo komal num, ma kua a num chɔchɔ o fondaŋ chiɔuwaa puaapilɛnɔɔ hoo tosa wallo wo, nduyɛ mbo soliŋ taasi ndɔ chiɔuwaa kpeku mbo piŋi yoomu numndo. Baa mi diola puaapilɛnɔɔ hoo la simnuŋ la sɔvɛ le num o nɛi teŋgeŋndo choo? A tonya, mi la simnuŋ la sɔvɛ le num mbo hiou maa paandu. Deeve cho lɛ ko bɛndu kunda ŋ sina wo le o cho le, kɛ wana chiɔuwaa piŋi yoomu numndo wo o cho vɛlɛ ni.

⁵ O nɛi pilɛ koŋ choo, buɛiyaa Chiisu wa ndaa sina niŋ diola Chɛhowa laŋ. Kɛ mi diolaŋ ndaŋ la chɔɔlu simnɔŋ la sɔvɛ le nda, le mɛɛ Chiisu mala nda le Chɛhowa sinaa nyɛkɛndɛi yɛ. Le yɛɛ naŋ dimi yɛ lende? Kanifuule, mi Chiisu tual tamasi Finya ndɔ wo kɔɔli o nyɛ ndoo tosa wo niŋ a nyɛ ndoo dimi wo. Mɛɛ Chiisu ndoo pɛɛku waŋnda yɛ, vɛlɛ a mɛɛ ndoo bii acheleŋnda yɛ tosa mi buɛiyaa nduaa sina Chɛhowa nyɛkɛndɛi.—Chɔŋ 14:9; 17:3.

“DIOLA NUMNDAŊ, LA Ŋ KE YA LAŊ”

6. O nɛi kuɛɛ niŋ Chɛhowa ke yɛ Chiisu diola ndɔlaŋ? (Chɔŋ 17:​11, 12)

⁶ Mɛɛ Chiisu wa piɛileŋ, mbo piɛi le buɛiyaa nduaa aa: “Hɔlte numndeŋ le wa nda choo le sabu diola numndaŋ, la ŋ ke ya laŋ.” (Nuawɔ Chɔŋ 17:​11, 12.) Baa hei sim ni maa waŋnda ndaa nɔ ma veelu Chiisu aa Chɛhowa? Sako. Nduyɛ kɛsiŋ o kɔl maa mɛɛ Chiisu wa piɛileŋ, mbo dimi a diola Chɛhowa laŋ okɔɔ maa “diola numndaŋ.” Lelaŋ, diola Chɛhowa laŋ la simnuŋ diola Chiisu laŋ te. Kɛ yɛɛ Chiisu ndoo yiyaŋ yɛ mɛɛ o dimi maa Mɛlɛka ke ndu diola ndɔlaŋ? I tasei, Chiisu wa wana Chɛhowa vem hɔlte ndɔ wo ni, nduyɛ sondo ndɔ suaa o wa ni. O diola Finya ndɔlaŋ niŋ o hiŋ ni, nduyɛ mbo tosa walta kɔndɔfiltaŋ o diola laŋ niŋ. (Chɔŋ 5:43; 10:25) Le handɔɔ lechoo, diola Chiisu laŋ la sim ni, “Chɛhowa cho wana piŋiaa ni.” A tonya, diola Mɛlɛkalaŋ la chiɛɛliaŋ a diola Chiisu laŋ.

7. Chɔmndɔ tamaseliiyo mɛɛ Chiisu ndoo suaa o diola Chɛhowa laŋ niŋ yɛ.

⁷ Le tamaseliiyo, te masaa vem pɛ waŋndo o lɛŋndeŋ niŋ, ndu wa sondo suaa le masanɔ ndɔɔ ni. Lelaŋ nyɛ wana koŋ dimi wo kpaaya pilɔɔ kpe o nɔ a nyɛ masaa dimi wo ni. O nɛi pilɛ koŋ choo, wana Chɛhowa ndoo vem hɔlte ndɔ wo Chiisu wa ni, nduyɛ mi ndoo soo o waŋnda lo o diola ndɔlaŋ niŋ.—Mat. 21:9; Luku 13:35.

8. Le yɛɛ Chɛhowa dimi yɛ maa diola ndɔlaŋ la wa Chiisu choo, tuupa mbo huŋ o lɛŋndeŋ choo? (Ɛsodɔɔ 23:​20, 21)

⁸ Baabuiyo veelu Chiisu aa Diomndo, kanifuule mi Chɛhowa ndoo soliŋ ndu kpeku le yooŋgulaŋ hivioo o maalikɛiya lo vɛlɛ a waŋnda chieeya, la Chɛhowa ndoo yeema nda le ma sina nduyɛ ma tosa laŋ. (Chɔŋ 1:​1-3) Naapum Chiisu wa maalikɛinɔ Chɛhowa ndoo vem le Isɔluɛiya mandaa teleŋ nda wa fulaa Ichipi wo ni. Mɛɛ Chɛhowa wa Isɔluɛiya dimullo le ma diikuŋ maalikɛinɔ koŋ, mbo dimi aa: “Kanifuule diola nilaŋ la cho ndu choo.”a (Nuawɔ Ɛsodɔɔ 23:​20, 21.) Diola Chɛhowa laŋ la cho Chiisu choo kanifuule, ndu Chɛhowa vem hɔlte ndɔ ni, ndu kpeekpei chɔm ni maa Chɛhowa tosa sɔɔŋ sakpo nduyɛ wana diandaa o cho ni.

“KƐKƐ, TOSA MI WAŊNDA SAŊGALA DIOLA NUMNDAŊ”

9. Tɛɛsiaawɔ mɛɛ diola Chɛhowa laŋ la wa la sɔvɛ le Chiisu yɛ.

⁹ A mɛɛ naŋ laŋga pɛɛku yɛ, tuupa mi Chiisu huŋ o lɛŋndeŋ choo, diola Chɛhowa laŋ la wa bɔɔ la sɔvɛ le ndu. Teleŋ o wa o lɛŋndeŋ choo wo, mbo chɔm kpendekele o nyɛ o nyɛ o tosa niŋ maa diola Chɛhowa laŋ la wa la sɔvɛ le ndu. Teleŋ wali pol Chiisu wo wa fuuluuwo o mɛɛlulaŋ ndo, mbo nyuna Chɛhowa choo choo kpendekele aa: “Kɛkɛ, tosa mi waŋnda saŋgala diola numndaŋ.” O lepilɛ niŋ kpe mi Finya ndɔ mulul ndu o diom bɛndoo niŋ maa letaŋ aa: “I tosa ma saŋgala laŋ, nduyɛ I cho vɛlɛ tosa ma saŋgala laŋ.”—Chɔŋ 12:28.

10-11. (a) Vɛɛ Chiisu ndoo saŋgala yɛ diola Chɛhowa laŋ? (Tofa vɛlɛ fotueiyo.) (b) Le yɛɛ diola Chɛhowa laŋ laa nɔ yɛ mi la dendu nduyɛ mi tɔɔ wɔɔŋndo ndoo faŋaŋ ndaŋ choo?

¹⁰ Mi Chiisu bɛɛ saŋgala diola Finya ndɔlaŋ. Vɛɛ o tosa yɛ ndi? Mbo dimul acheleŋnda a walta kɔndɔfilta Chɛhowa laŋ okɔɔ, vɛlɛ a sɔɔŋ kɔndɔfiliŋ o tosa woŋ. Kɛ, sɔɔŋ cheleŋ muŋ yeemaŋ tau le diola laŋ saŋgalaa. Chiisu ndoo nɔ mbo chɔm kpendekele maa nyɛ o nyɛ Chɛhowa tosa cho sakpo nduyɛ diola ndɔlaŋ la cho la diandaa. Mi Chiisu chɔm mɛɛ hei cho i sɔvɛ yɛ, mɛɛ o chɔm buɛiyaa nduaa mɛɛ nda nɔ ma piɛi yɛ. Mbo dimi aa: “Finya naa o choo choo niŋ, maa diola numndaŋ la wa la diandaa.”—Mat. 6:9.

¹¹ Le yɛɛ diola Chɛhowa laŋ la nɔ yɛ mi la wa la diandaa nduyɛ mi tɔɔ wɔɔŋndo faŋaŋ ndaŋ choo? Kanifuule chɔŋ o kpeloo niŋ Idɛŋ, mi Setana Nyina Wɔɔŋndo tɛɛmbuu diola Chɛhowa laŋ tɔɔ nduyɛ mbo dimi choolaŋ a ndu okɔɔ. Mi Setana dimi maa wana lachoowaa Chɛhowa Mɛlɛka cho ni, nduyɛ o yeema nyɛ kɛndɛ le Adam nda Ifi le. (Chɛn. 3:​1-5) Mɛɛ dimioo Setana wa koŋ ni maa, Chɛhowa tosa sɔɔŋ o nɛi sakpoo choo le. Mi choola Setana hɛɛnduu laŋ Chɛhowa choo laŋ la tɛɛmbuu tɔɔ ndɔ kɛndɔɔ, ɔɔ diola ndɔlaŋ. O koŋ kɔɔli, o palɛi Choobu ve niŋ, mi Setana dimi maa le mɛɛ waŋnda chieeya cho nyɔɔŋ sɔlaa Chɛhowa o ba yɛ nda diikuŋ ndu ni. Mi wana lachoowaa hoo chɔɔlu dimi maa waŋnda chieeya cho malɔɔ Chɛhowa piɛiyo te sɔɔŋ palaŋ komal nda pɛ, kanifuule a nɔ kaala le ndu le. (Choobu 1:​9-11; 2:4) Teleŋndo ndoo yeemaŋ ni le sinaa wana lachoowaa, te Chɛhowa ni ɔɔ Setana.

“I YƆŊGU YOOMU NUU”

12. Le mɛɛ Chiisu ndoo kaala diola Chɛhowa laŋ yɛ, yɛɛ ndoo yɔŋguŋ yɛ le tosaa a kɔllo wulee?

¹² Le mɛɛ Chiisu ndoo kaala Chɛhowa yɛ, ndoo yeema mbo tosa nyɛ o nyɛ le diola Chɛhowa laŋ dindioo, nduyɛ mbo faŋa laŋ tɔɔ wɔɔŋndo choo. Mi Chiisu yɔŋguŋ pɛŋ le mbo sɔla piɔmndo le chɔmndo maa Chɛhowa cho wana diandaa nduyɛ o sakpoyɛi choo o tosa sɔɔŋ ni.b (Chɔŋ 10:​17, 18) Wanaa ŋiɔɔŋaa tasiaa Mɛlɛka toosiaa wa, Adam nda Ifi, ndaa nɔ haki le. Ma mulul Chɛhowa kɔɔ, okoŋ ma tual Setana kɔɔli. Kɛ mi Chiisu yɔŋguŋ a kɔllo wulee le hunɔɔ o lɛŋndeŋ choo, nduyɛ mbo chɔm kaala ndɔɔ le Chɛhowa. Mi Chiisu tosa hei o yoomu ndɔɔ niŋ le Chɛhowa diikɔŋndo sanaa a nyɛ ndoo tosa wo, vɛlɛ a o nyɛ ndoo dimi wo niŋ. (Hibu. 4:15; 5:​7-10) Mi Chiisu hiau lachi a lo lechoo ndɔɔ chɔmndo haaa a teleŋ o sɔla piɔmndo o yɔm imɔnɔɔ choo wo. (Hibu. 12:2) O nɛiyo hoo choo o chɔm kaala ndɔɔ le Chɛhowa a le diola ndɔlaŋ ni.

13. Le yɛɛ Chiisu wa yɛ wana kpeekpeiyo le chɔmndo maa wana lachoowaa Setana cho ni? (Tofa vɛlɛ fotueiyo.)

¹³ Sanaa a mɛɛ Chiisu ndoo bii yoomu ndɔɔ yɛ, mbo chɔm kpendekele maa Setana cho wana lachoowaa ni, kɛ o cho Chɛhowa le. (Chɔŋ 8:44) Chiisu ndoo hiou Chɛhowa sina nyɛkɛndɛi mbo hiau wana o wana wa o chieeŋndo choo. Te ndoo yɔŋ pɛ maa tonya choola Setana dimi a Chɛhowa okɔɔ laŋ la cho ni, Chiisu wa sina a ndi okɔɔ. Kɛ mi Chiisu lo o laalaŋ ndɔɔ choo le tɔɔ wɔɔŋndo faŋaa o diola Chɛhowa laŋ choo. Mi che bɛɛ mi sɔɔŋ palaŋ komal Chiisu mbo yiyaŋ maa Chɛhowa mal ndu, kɛ mbo yɔŋguŋ a kɔllo wulee le piɔmndo sɔlaa, nduyɛ mbo lo o laalaŋ ndɔɔ choo mbo hiau kiɔɔ Finya ndɔ diikɔŋndo.—Mat. 27:46.c

“I CHII WALI Ŋ KE YA WO TOSA”

14. Vɛɛ Chɛhowa ndoo fanda yɛ Chiisu le laalaŋ ndɔɔ?

¹⁴ O nyumma ndɔ ma mɛɛlaŋ choo, mi Chiisu piɛi aa: “I chii wali ŋ ke ya wo tosa.” Ndoo laalaŋ o Chɛhowa niŋ maa o cho ndu fanda le laalaŋ ndɔɔ. (Chɔŋ 17:​4, 5) Chiisu ndoo nɔ dioo le tiindaŋndo dɔwɔɔ o Finya ndɔ niŋ. Lelaŋ, Chɛhowa chɛl ndu mbo lo o sɛiyo niŋ te. (Walta. 2:​23, 24) Mbo miŋgi Chiisu yoomu, nduyɛ mbo ke ndu foofo bɛndoo o choo choo niŋ. (Filip. 2:​8, 9) O mɛɛlulaŋ kpɔŋ, mi Chiisu simnuŋ Masaa o Masale Mɛlɛkaleŋ choo. Yɛɛ Masaleŋ ndeŋ le cho yɛ hunɔɔ tosa? Mi Chiisu yɔŋgu mulioo mɛɛ o pɛɛku buɛiyaa nduaa le ma piɛi aa: “Maa Masale numndeŋ le huŋ. Maa hɛnaŋ numndo tosaŋ o choo choo niŋ a o lɛŋndeŋ choo.”—Mat. 6:10.

15. Yɛɛ cheleŋ Chiisu cho yɛ tosa?

¹⁵ O teleŋ biŋgi bɛŋgu, Chiisu cho sɔŋga a yaamɔɔwaa Mɛlɛkaa, nduyɛ mbo tɛɛmbuu wanaa dɛnɛwɔɔŋnda a teleŋ chɔu Amakɛdɔŋ ndo. (Sɔɔŋ. 16:​14, 16; 19:​11-16) Okoŋ kɔɔli, o cho Setana wou o “sooŋ yiŋgilɛi” nɔ lamɛɛlu le wo niŋ, naa o cho wa o biyɔɔ niŋ o nɔla nyɛ o nyɛ tosa le wa. (Sɔɔŋ. 20:​1-3) Chiisu cho wa o Masaleŋ Choo le Wɔsilaŋ Waapilɛ nduyɛ mbo hiŋ a kɔl nyuloo o lɛŋndeŋ choo, okoŋ mbo mala waŋnda chieeya ma simnuŋ wanaa walaŋ nda. O cho wanaa vi wa miŋgi yoomu, mbo siiŋguu lɛŋndeŋ kpele hɛnɛkiɔɔ, nduyɛ mi sabu Chɛhowa wo peeluŋ.—Sɔɔŋ. 21:​1-4.

16. Yɛɛ cho yɛ yɔŋnɔŋ te Wɔsila Waapilɛ Laŋ la chuu pɛ?

¹⁶ Yɛɛ naŋ nɔ yɛ miŋ wa kɔl te Wɔsila Waapilɛ Laŋ la chuu pɛ? Waŋnda chieeya ve lɛ niŋ nyuna le malɔɔ hakioo le hakila ndalaŋ o sala baŋaa Chiisu Kiliti wo niŋ te kanifuule, a cho lɛ nɔ haki le. Ŋ heu lɛ niŋ ba le waŋndo mbo wa naa tɛɛŋ naa Mɛlɛka waa ɔɔ wana bɛndu wanaa soliaa lasala le. “Nduyɛ yaamɔɔnɔ o mɛɛlu niŋ tɛɛmbuu kpɔŋ ndo cho piɔmndo ni.” Wanaa vi wa cho miiŋgu yoomu nduyɛ wana o wana cho wa o lɛŋndeŋ choo cho simnɔŋ walaŋ.—1 Kɔl. 15:​25, 26.

17-18. (a) Yɛɛ cho yɛ yɔŋnɔŋ te Wɔsila Waapilɛ Laŋ la chuu pɛ? (b) Yɛɛ Chiisu cho yɛ tosa te teleŋ o cho wa o masaleŋ choo wo fuuluu pɛ o mɛɛlulaŋ? (1 Kɔliŋtiaŋ 15:​24, 28) (Tofa vɛlɛ fotueiyo.)

¹⁷ Yɛɛ cheleŋ cho yɛ yɔŋnɔŋ te Wɔsila Waapilɛ La Chiisu cho wa o Masaleŋ choo laŋ la chuu pɛ? A teleŋ koŋ, nyɛ teŋgeŋ cheleŋ nɔ mbo yɔŋnuŋ. Wana o wana cho lɛ nɔ kiisaŋ o kɔl maa Chɛhowa cho wana diandaa ɔɔ Mɛlɛka tosa sɔɔŋ o sakpoyɛi choo wo le o cho le. Le sabu yɛɛ? O kpeeloo niŋ Idɛŋ, mi Setana dimi maa wana lachoowaa Chɛhowa cho ni, nduyɛ maa o tosa masaleŋ waŋnda chieeya choo o nɛi kaalaa niŋ te. Chɔŋ niŋ a teleŋ koŋ, wanaa piɛi Chɛhowa wa cho hiouwɔɔ lachi a chɔmndo maa mɛɛ o tosa sɔɔŋ yɛ hiou bɛnda. Lelaŋ te Wɔsila Waapilɛ Laŋ la fuuluu pɛ o mɛɛlulaŋ, Chɛhowa cho faŋa tɔɔ wɔɔŋndo o diola ndɔlaŋ choo. O cho chɔm kpendekele maa Finya kaalaa cho o choo choo niŋndo o cho ni.

¹⁸ Te Wɔsila Waapilɛ La Chiisu cho wa o masaleŋ choo laŋ la chuu pɛ, nyɛ o nyɛ Setana dimi a Chɛhowa okɔɔ, wana o wana cho sina maa choolaŋ o dimi ni. Yɛɛ Chiisu cho yɛ tosa te teleŋ o cho wa o masaleŋ choo wo fuuluu pɛ o mɛɛlulaŋ? Baa o cho pa tamasi Setana wo tolɔɔ kɔɔli le Chɛhowa nilakalulaŋ tosallo, okoŋ mbo simul Chɛhowa? Sako! (Nuawɔ 1 Kɔliŋtiaŋ 15:​24, 28.) Chiisu cho Masaleŋ miŋgi Finya ndɔ o ba, okoŋ mbo hiou lachi a waa o masale Chɛhowa leŋ bɛŋgu. A tonya, Chiisu tosa niŋ maa Setana le, kɛ o cho yɔŋgɔŋ a kɔllo wulee le mbo mal nyɛ o nyɛ le mɛɛ o kaala Chɛhowa yɛ.

19. Yɛɛ diola Chɛhowa laŋ la sim yɛ le Chiisu?

¹⁹ A tonya, mi Chɛhowa chɛl le mi diola ndɔlaŋ la wa Chiisu choo! Mi Chiisu chɔm o nɛi walaŋndo choo wana suu Finya ndɔ cho wo. Lelaŋ, yɛɛ diola Chɛhowa laŋ la sim yɛ le Chiisu? Diola Chɛhowa laŋ la wa la sɔvɛ le Chiisu mbo hiau nyɛ o nyɛ cheleŋ. Mbo yɔŋguŋ a kɔllo wulee le mbo vi le diola laŋ, o cho vɛlɛ wa o bɛɛndiaŋ le nyɛ o nyɛ miŋgioo Chɛhowa o ba, te Wɔsila Waapilɛ La o Cho Wa o Masaleŋ Choo Laŋ la fuuluu pɛ o mɛɛlulaŋ. Vɛɛ naŋ tuallɛ tamasi Chiisu wo kɔɔli? Ŋ cho muli nyunaa hoo sɔla o buŋgɛi cho lachi ve niŋ.