Vɛɛ Diola Chɛhowa Laŋ La Cho yɛ La Sɔvɛ le Naa?

1-2. Vɛɛ naŋ looku yɛ sina maa diola Chɛhowa laŋ la cho la sɔvɛ le Chiisu?

NYƐ o nyɛ cho o sɔvɛ Chiisu o hɔl mbo hiau diola Chɛhowa laŋ te. Nduyɛ, wana o wana tosa le mi waŋnda sina diola Chɛhowa laŋ mbo hiau Chiisu le. A mɛɛ naŋ pɛɛku o buŋgɛi hiou ve niŋ yɛ, Chiisu wa o yɔŋgaŋ a kɔllo wulee le piɔmndo sɔlaa le diola Finya ndɔlaŋ vɛlɛ a nyɛ la simndo. (Maki 14:36; Hibu. 10:​7-9) Te Wɔsila Waapilɛ La Chiisu cho wa o Masaleŋ choo laŋ la chuu pɛ, o cho chɛlɔɔ a kɔllo wulee le mbo yɔŋgu nyɛ o nyɛ o nɔ le mi diola Chɛhowa laŋ la sɔla diondɔɔ. (1 Kɔl. 15:​26-28) Mi kaala Chiisu ndoo nɔ le diola Mɛlɛkalaŋ ndo chɔm chaŋyɛi wa ndu tɛɛŋ nda Finya ndɔ ve. A tonya, mi Chiisu chɔm kpendekele wana suu Chɛhowa cho wo.

² Mi Chiisu huŋ o lɛŋndeŋ choo o diola Finya ndɔlaŋ niŋ. (Chɔŋ 5:43; 12:13) Mbo chɔm buɛiyaa nduaa diola Finya ndɔlaŋ. (Chɔŋ 17:​6, 26) Te ndoo wa pɛ waŋnda pɛɛkoo a kaamaalaŋ tosaa, mi ndoo chɔm nda kpendekele maa o diola Chɛhowa laŋ niŋ o wa sɔɔŋ muŋ tosaa ni. (Chɔŋ 10:25) Nduyɛ pɛŋ mi Chiisu nyuna Chɛhowa o piɛileŋ niŋ le mi hɔlte ndɔleŋ le wa buɛiyaa nduaa choo ‘le sabu diola ndɔlaŋ.’ (Chɔŋ 17:11) Lelaŋ, te Chiisu che pɛ diola Chɛhowa laŋ nyɛ sɔvɛ bɛndu, mɛɛ wana dimi pɛ maa o cho Chiisu tolɔɔ kɔɔli, o nɔ mbo sina diola Chɛhowa laŋ nduyɛ mbo soliŋ ndaŋ kpeku.

3. Yɛɛ naŋ cho yɛ yaasiaa o buŋgɛi hei niŋ?

³ Le mɛɛ naŋ cho Kilisiɔŋaa tonyaa yɛ, ŋ nɔ miŋ tol tamasi Chiisu wo kɔɔli le kaalaa chɔmndo a bɛɛleŋ le diola Chɛhowa laŋ. (1 Pit. 2:21) O buŋgɛi hei niŋ, ŋ cho chɔ le sabu diola Chɛhowa laŋ la cho wanaa cho ‘yooŋgu kɛndɔɔ dimioo a Masale Mɛlɛkaleŋ’ okɔɔ wa choo yɛ. (Mat. 24:14) Ŋ cho vɛlɛ yaasiaa mɛɛ diola Chɛhowa laŋ la cho la sɔvɛ le naa a pilɛŋ pilɛŋnda yɛ.

‘WANAA O HƐLI LE MI DIOLA NDƆLAŊ LA WA NDA CHOO WA’

4. (a) Wali yɛɛ Chiisu ndoo ke yɛ buɛiyaa nduaa tuupa mbo miiŋgu o choo choo niŋ? (b) Nyuna kuɛɛ naŋ cho yɛ yaasiaa a wali o ke hoo nda wo okɔɔ?

⁴ Tuupa mi Chiisu miiŋgu o choo choo niŋ, mbo dimul buɛiyaa nduaa aa: “La cho kpaayaa sɔla te nyina diandaa tol nya choo pɛ. Nduyɛ la cho seileŋ timbi a ya okɔɔ o Chulusalɛm niŋ, Chudiaa, a Sameeliaa, a ba o ba fee o chieeŋndo choo.” (Walta. 1:8) Lelaŋ, buɛiyaa nduaa ndaa nɔ ma dimi yooŋgu kɛndɔɔ ba o ba fee, o cho ko o Isɔluɛi niŋ te. O pɔmpɔmbɔ, mi waŋnda o chieeŋndo choo kpou sɔla dikeŋnaŋndo le simnɔŋndo buɛiyaa Chiisu wa. (Mat. 28:​19, 20) Kɛ mi Chiisu dimi aa: “La cho seileŋ timbi a ya okɔɔ.” Baa wanaa simnuŋ haa buɛiya sɛnɛi le Chiisu wa ndaa nɔ pa ma sina diola Chɛhowa laŋ, ɔɔ seileŋ kinɛi ndaa nɔ ni ma timbi a Chiisu okɔɔ? Kona cho o Walta Kiilaa bolle 15 niŋndo cho naa mala le nyunaa hoo mulioo.

5. Vɛɛ kiilaa a bɛnduaa o Chulusalɛm niŋ ndaa chɔm yɛ maa waŋnda kpou nɔ ma sina diola Chɛhowa laŋ? (Tofa vɛlɛ fotueiyo.)

⁵ A wɔsi 49 o faŋaŋ Chiisu wo kɔɔli, mi kiilaa a bɛnduaa o Chulusalɛm niŋ chuuŋgiaŋ naapilɛ le suukaŋndo, a nyɛ wanaa sɔla hivi chiɛi kɔɔli le wa nɔ ma tosa le ma simnuŋ Kilisiɔŋnda wo. O suukaŋ koŋ mɛɛlulaŋ, mi Chemisi, o fula kala pilɔɔ nda Chiisu wo dimi aa: “Pitɛ laŋga chɔm naa maa Mɛlɛka chɛl wanaa cho ŋChuu le wa, le mbo hɛli ŋwaŋ nda tɛɛŋ le mi diola ndɔlaŋ la wa nda choo.” A diola nɛɛ okɔɔ Chemisi wa yɛ suɛi? Mbo miŋgi sondo o nyɛ Emɔɔsi, wana ndoo suaa le Mɛlɛka wo dimi wo choo. Mbo dimi aa: “Le mi waŋnda a tuaa a wanaa cho ŋChuu le wa kpou nuuviaa ya Chɛhowa, wanaa diola nilaŋ la cho choo wa. Ya Chɛhowa dimi hei ni.” (Walta. 15:​14-18) Wanaa simnuŋ haa buɛiya sɛnɛi ya ndaa nɔ ko ma pɛɛku a diola Chɛhowa laŋ okɔɔ le, kɛ diola ndɔlaŋ laa nɔ vɛlɛ mi la wa nda choo. Hei sim ni maa ndaa nɔ ma mala waŋnda le ma sina diola Mɛlɛkalaŋ, nduyɛ mi waŋnda sina nda maa o diola Mɛlɛkalaŋ niŋ nda cho suɛi o nda lo ni.

6-7. (a) Le yɛɛ Chiisu ndoo hiŋ yɛ o lɛŋndeŋ choo? (b) Sabu sɔvɛ cheleŋ kuɛɛ ndoo lueinuŋ yɛ leniŋ?

⁶ Diola Chiisu laŋ la sim ni, “Chɛhowa cho wana piŋiaa ni.” Nduyɛ Chiisu Chɛhowa cho soliŋ kpeku ni le wanaa dɔu laalaŋndo o ndu niŋnda piŋioo. Mi Chiisu huŋ o lɛŋndeŋ choo le mbo yɔŋgu yoomu ndɔɔ le waŋnda chieeya. (Mat. 20:28) Mɛɛ o yɔŋgu sala baŋaa, mbo kumbi nɛiyo le mi waŋnda chieeya sɔla pioŋɔɔ nduyɛ ma huŋ sɔla yoomu fafɛɛŋndo.—Chɔŋ 3:16.

⁷ Kɛ le yɛɛ waŋnda chieeya ndaa yeema yɛ sala baŋaa? Kanifuule, le nyɛ ndoo yɔŋnuŋ o kpeloo niŋ Idɛŋ ndo. A mɛɛ naŋ pɛɛku o buŋgɛi hiou ve niŋ yɛ, mi wanaa naa tasiaa Mɛlɛka toosiaa wa Adam nda Ifi tosal Chɛhowa nilakalulaŋ, nduyɛ mi dikeŋnaŋ ndaa nɔ le waa yoomu lefafɛɛŋ ndo hialuŋ nda. (Chɛn. 3:​6, 24) Kɛ, mi Chiisu huŋ o lɛŋndeŋ choo mbo tosa nyɛ mbo hiau pɛŋ chuauwaa Adam nda Ifi wa piŋioo. Kanifuule, mi Setana dimi choola wɔɔŋ wɔɔŋndaŋ a Chɛhowa okɔɔ. (Chɛn. 3:​4, 5) Lelaŋ, pioŋɔɔ chuauwaa Adam nda Ifi wa cho o chiɛɛliaŋ a suɛi ndii yɔŋnuŋ o kpeloo niŋ Idɛŋ nde, ndi cho yɛ diola Chɛhowa dindioo ni. Le mɛɛ Chɛhowa vem Chiisu hɔlte ndɔ mi diola ndɔlaŋ la wa ndu choo yɛ, ndu kpeekpei tosa a sabu ni le mi diola Chɛhowa laŋ la sɔla diondɔɔ.

8. Yɛɛ wanaa dɔu laalaŋndo o Chiisu niŋnda kpou nɔ yɛ ma sina?

⁸ Wana o wana ndoo dɔu pɛ laalaŋndo o Chiisu niŋ, Chuuwa a wanaa ve ŋChuu le wa kpou, ndaa nɔ ma sina maa Finyaa Chiisu, Chɛhowa Mɛlɛka, pioŋɔɔ ndaa cho fula o ba niŋ. (Chɔŋ 17:3) Le handɔɔ le choo, maa Chiisu, nda bɛɛ diola Chɛhowa laŋ la nɔ mi la wa nda choo. A nɔ vɛlɛ ma sina le sabu i cho suɛi sɔvɛ le mi diola Chɛhowa laŋ la wa la diandaa wo. Nduyɛ o ndi choo pioŋɔɔ ndaa tɔlnuŋ ni. (Walta. 2:​21, 22) Lelaŋ, wanaa cho Chiisu tolɔɔ kɔɔli o laalaŋndo choo wa kpou, nɔ ma pɛɛku a Chɛhowa okɔɔ vɛlɛ a Chiisu. Ŋ che niŋ le sabu Chiisu mɛɛlu piɛile ndɔleŋ o Chɔŋ 17 niŋ a diomndaŋ ndaŋ aa: “I chɔm nda diola numndaŋ, nduyɛ I cho hiouwɔɔ lachi a nda laŋ chɔmndo, le ma chɔm waŋnda kaalaa mɛɛ ŋ chɔm ya kaalaa yɛ. Okoŋ, mi wa diompilɛ a nda.”—Chɔŋ 17:26.

“NYA CHO SEIYAA NIAA NI”

9. Vɛɛ naŋ chɔm yɛ maa diola Chɛhowa laŋ la cho la sɔvɛ le naa?

⁹ A mɛɛ naŋ yaasiaa niŋ yɛ, le miŋ tol Chiisu kɔɔli, ŋ nɔ miŋ tosa mi diola Chɛhowa laŋ la wa la diandaa. (Mat. 6:​9, 10) Ŋ nɔ miŋ chua diola Chɛhowa laŋ la sɔvɛ mbo hiou nyɛ o nyɛ cheleŋ. Nduyɛ le batiuwaa sɔlaa o hei niŋ, mɛɛ miŋ tosa nyɛ. Kɛ, yɛɛ naŋ nɔ yɛ miŋ tosa le mi diola Chɛhowa laŋ la wa la diandaa, nduyɛ miŋ chɔm maa nyɛ o nyɛ Setana dimi a Chɛhowa okɔɔ choolaŋ o cho ni?

10. A yɛɛ okɔɔ naŋ pɛɛku yɛ o Aisaya bolle 42 haaa 44 niŋ? (Aisaya 43:9; 44:​7-9) (Tofa vɛlɛ fotueiyo.)

¹⁰ Aisaya bolle 42 haaa 44 mala naa miŋ sina nyɛ naŋ nɔ miŋ tosa le mi diola Chɛhowa laŋ la wa la diandaa wo. O bolii Baabuiye hei niŋ, Chɛhowa cho wanaa piɛi ndu le wa dimullo maa mɛlɛkaa ndaa a cho mɛlɛkaa kpeekpei le. O cho vɛlɛ veeloo le mi waŋnda hiŋ ma timbi seileŋ le chɔmndo kɛsɛ te mɛlɛkaa kpeekpei mɛlɛkaa haa cho ni. Kɛ wana pilɛ bɛɛ hiŋ te!—Nuawɔ Aisaya 43:9; 44:​7-9.

11. A mɛɛ Aisaya 43:​10-12 dimi yɛ, yɛɛ Chɛhowa dimi yɛ a wanaa nduaa okɔɔ?

¹¹ Nuawɔ Aisaya 43:​10-12. Loŋ Chɛhowa dimi a wanaa nduaa okɔɔ ni aa: “Nya cho seiyaa niaa ni, . . . nduyɛ ya cho Mɛlɛka ni.” Chɛhowa cho nda dimullo aa: “Mɛlɛka o Mɛlɛka cheleŋ cho o ya kɔɔli le?” (Aisa. 44:8) Lelaŋ, dikeŋnaŋ bɛndoo pila naŋ sɔla ni le tosaa nyɛ Chɛhowa yeema wo. Sanaa a nyɛ naŋ dimi wo vɛlɛ a nyɛ naŋ tosa wo naŋ chɔm ni maa Chɛhowa ndupilɛ kpe cho Mɛlɛka tonyaa ni. Diola ndɔlaŋ la cho filioŋ mi la hiau nyɛ o nyɛ. O yɔŋ bɛɛ mi Setana wa naa sɔɔŋ kindilaŋ handɔɔ choo, ŋ chɔm o yoomu naa niŋ maa ŋ nɔ kaala kpeekpeiyo le Chɛhowa nduyɛ miŋ chɔm lo lechoo wo o ndu lo. Te ŋ tosa lende pɛ, mɛɛ ŋ chɔm kpendekele maa ŋ cho malaa le mi diola Chɛhowa laŋ la wa la diandaa.

12. Vɛɛ huului cho o Aisaya 40:​3, 5 niŋnde peeluŋ yɛ?

¹² Te ŋ toolu pɛ le tɔɔ wɔɔŋndo faŋaa o diola Chɛhowa laŋ choo, mɛɛ tamasi Chiisu wo naŋ cho koŋ tolɔɔ kɔɔli ni. Mi Aisaya dimi vɛlɛ maa waŋndo cho ‘nɛi Chɛhowa wo bɛɛndiaa.’ (Aisa. 40:3) Vɛɛ keŋ ndii peluŋ yɛ? Mi Chɔŋ Wana Yiŋaa bɛɛndiaa nɛiyo le Chiisu, o hiŋ o diola Chɛhowa laŋ niŋ nduyɛ mbo wa suɛi o diola laŋ niŋndo. (Mat. 3:3; Maki 1:​2-4; Luku 3:​3-6) Mi huului pilɛi hei kpe dimi vɛlɛ aa: “Naŋɔɔ bɛndu Chɛhowa wo cho chɔmnɔŋ kpendekele.” (Aisa. 40:5) Vɛɛ keŋ ndii nɔ yɛ mi i yɔŋnuŋ? Mɛɛ Chiisu hiŋ o lɛŋndeŋ choo maa wana Chɛhowa vem hɔlte ndɔ wo, mbo tosa nyɛ o nyɛ fee nyɛkɛndɛi naŋ chaa Chɛhowa pila hiŋ o lɛŋndeŋ choo ni.—Chɔŋ 12:45.

13. Vɛɛ naŋ tuallɛ tamasi Chiisu wo kɔɔli?

¹³ Maa Chiisu, naa bɛɛ Seiyaa Chɛhowaa naŋ cho ni. Diola Chɛhowa laŋ la cho naa choo, nduyɛ miŋ dimul wana o wana naŋ komal pɛ a walta ndɔlaŋ kɔndɔfiltaŋ okɔɔ. Le miŋ nɔla hei tosaa nyɛkɛndɛi, ŋ nɔ miŋ dimul waŋnda nyɛ Chiisu tosa le mi diola Chɛhowa laŋ la wa la diandaa wo. (Walta. 1:8) Wana o wana timbi wɔ seileŋ a Chɛhowa okɔɔ mbo hiau Chiisu le, nduyɛ ŋ nɔ miŋ tol tamasi ndɔɔ kɔɔli. (Sɔɔŋ. 1:5) Kɛ, vɛɛ naŋ chɔm yɛ maa diola Chɛhowa laŋ la cho la sɔvɛ le naa?

NƐILA CHELEŊ NAŊ CHƆM MAA DIOLA CHƐHOWA LAŊ LA CHO LA SƆVƐ LE NAA WO

14. A mɛɛ Sam 105:3 dimi yɛ, vɛɛ naŋ yiyaŋ yɛ a diola Chɛhowa laŋ okɔɔ?

¹⁴ Ŋ nɔ miŋ pɛɛluŋ le mɛɛ diola Chɛhowa laŋ la cho naa choo yɛ. (Nuawɔ Sam 105:3.) Mi Chɛhowa naŋ kɔl tau te ŋ wa pɛ pɛɛlɔŋndo le diola ndɔla cho naa choo laŋ. (Chɛl. 9:​23, 24; 1 Kɔl. 1:31; 2 Kɔl. 10:17) Ŋ che ndi maa dikeŋnaŋndo i cho ni le diola ndɔlaŋ bɛɛleŋ kioo, nduyɛ miŋ toolu le tɔɔ wɔɔŋndo faŋaa o laŋ choo. Lelaŋ, fɛɛŋ bɛɛ ŋ nɔ miŋ yɔŋ lasiɔmbu le wanaa naŋ tosa wallo wa, chaaŋaa naa sukuuwa, wanaa naŋ chiɛɛliaŋnda, vɛlɛ a acheleŋnda dimullo maa Seiyaa Chɛhowaa le naŋ cho le. Nyina wɔɔŋndo yeema naa miŋ pɛŋgi acheleŋnda dimullo a Chɛhowa okɔɔ. (Chɛl. 11:21; Sɔɔŋ. 12:17) Nduyɛ pɛŋ, Setana a wanaa cho ndu tooloo le choolaŋ pɛŋgɛlaa wa yeema mi waŋnda puɛɛnuŋ a diola Chɛhowa laŋ okɔɔ. (Chɛl. 23:​26, 27) Kɛ le mɛɛ naŋ kaalaa diola Chɛhowa laŋ yɛ, miŋ dɔɔnuŋ nyaale le “paaleŋ kpɛŋ.”—Sam 5:11; 89:16.

15. Yɛɛ o sim yɛ le diola Chɛhowa laŋ veeloo?

¹⁵ Ŋ nɔ miŋ hiou lachi a diola Chɛhowa laŋ veeloo. (Chow. 2:32; Luom. 10:​13, 14) Diola Chɛhowa laŋ veeloo sim ni, ŋ nɔ miŋ tosa tau mbo hiou sinaa laŋ vɛlɛ a laŋ soliŋndo kpeku. Ŋ nɔ miŋ sina maa waŋndo kpeekpei Mɛlɛka o cho ni, miŋ tiindaŋ o ndu niŋ, nduyɛ miŋ muliŋ o ndu lo le malaa a nɛi chɔmaa. (Sam 20:7; 99:6; 116:4; 145:18) Ŋ nɔ miŋ dimul acheleŋnda a diola ndɔlaŋ okɔɔ vɛlɛ a suliŋnda ndɔla kɛndɛlaŋ, nduyɛ miŋ mala nda le ma wookuŋ okoŋ ma tosa nyɛ le halikpeŋ mi Chɛhowa hini kɔl a nda.—Aisa. 12:4; Walta. 2:​21, 38.

16. Vɛɛ naŋ chɔm yɛ maa wana lachoowaa Setana cho ni?

¹⁶ Ŋ nɔ miŋ chɛl a kɔllo kpou le saŋgaa le diola Chɛhowa laŋ. (Chemi. 5:​10, 11) Te ŋ wa pɛ o simullo bɛŋgu miŋ chɔm lo lechoo wo o Chɛhowa lo, mɛɛ ŋ chɔm maa wana lachoowaa Setana cho ni. O palɛi Choobu ve niŋ, mi Setana dimi a wanaa cho Chɛhowa piɛiyo wa okɔɔ aa: “Mi waŋndo yɔŋgu nyɛ o nyɛ o nɔ, le yoomu ndɔɔ baŋaa.” (Choobu 2:4) Mbo dimi vɛlɛ maa teleŋ sɔɔŋ wa ŋ kɛndɛ a waŋnda chieeya wo koni nda piɛi Chɛhowa ni. Mi wana laalaŋndo Choobu chɔm maa hei cho tonya le. Naa bɛɛ nɔ dikeŋnaŋndo le chɔmndo maa, mɛɛ mɛɛ Setana tosal naa sɔɔŋ, fɛɛŋ bɛɛ ŋ mulul Chɛhowa kɔɔ le. Ŋ nɔ miŋ nɔ tiindaŋndo kɛsɛ maa Chɛhowa cho hiouwɔɔ lachi a naa hɔlteŋ handɔɔ choo le sabu diola ndɔlaŋ.—Chɔŋ 17:11.

17. A mɛɛ 1 Pitɛ 2:12 dimi yɛ, o nɛi cheleŋ kuɛɛ choo naŋ saŋgala yɛ diola Chɛhowa laŋ?

¹⁷ Ŋ nɔ miŋ chɔm bɛɛleŋ le diola Chɛhowa laŋ. (Polo. 30:9; Chɛl. 7:​8-11) Le mɛɛ diola Chɛhowa laŋ la cho naa choo yɛ, mi sɔɔŋ naŋ tosa woŋ saŋgala diola ndɔlaŋ ɔɔ mi la tɛɛmbuu diola ndɔlaŋ tɔɔ. (Nuawɔ 1 Pitɛ 2:12.) Lelaŋ, ŋ nɔ miŋ tosa nyɛ o nyɛ naŋ tiuba le Chɛhowa saŋgalaa sanaa a nyɛ naŋ dimi wo, vɛlɛ a nyɛ naŋ tosa wo.

18. Nɛi cheleŋ kuɛɛ naŋ chɔm yɛ maa diola Chɛhowa laŋ la cho la sɔvɛ le naa? (Tofa vɛlɛ tɛɛsiaa.)

¹⁸ Ŋ nɔ miŋ buulaŋ tau le diola Chɛhowa laŋ mbo hiou tɔɔ naa kɛndɔɔ. (Sam 138:2) Le yɛɛ hei cho yɛ suɛi sɔvɛ? Kanifuule, te ŋ wa pɛ sɔɔŋ nɛŋi Chɛhowa kɔllo woŋ tosaa, teleŋnda bɔɔbɔɔ mi waŋnda dimi sɔɔŋ wɔɔŋndoŋ a naa okɔɔ.a Mi Chiisu yɔŋguŋ a kɔllo wulee mbo sɔla piɔm imɔnɔɔ maa wana dɛnɛ wɔɔŋ, le halikpeŋ mbo saŋgala diola Chɛhowa laŋ. Siɔmbula bii ndu ɔɔ mbo buulaŋ tau le nyɛ acheleŋnda yiyaŋ a ndu okɔɔ wo le. (Hibu. 12:​2-4) Mbo handu kɔl ndɔɔ kpou le hɛnaŋ Mɛlɛkaa tosaa.—Mat. 26:39.

19. Vɛɛ ŋ yiyaŋ yɛ a diola Chɛhowa laŋ okɔɔ, nduyɛ le yɛɛ?

¹⁹ Ŋ nɔ miŋ pɛɛluŋ le mɛɛ naŋ cho Chɛhowa piɛiyo yɛ, nduyɛ miŋ che ndi maa dikeŋnaŋndo i cho ni le waa Seiyaa nduaa. Le hei, ŋ cho a bɛɛndiaŋ a kɔllo kpou le biuwɔŋndo simul kɛ kɛ komal naa pɛ. Diola Chɛhowa laŋ la cho la sɔvɛ le naa, mbo hiau pɛŋ tɔɔ naa kɛndɔɔ. Lelaŋ, ŋ nɔ miŋ kɛɛsiaŋ o kɔl le hiouwɔɔ lachi a diola Chɛhowa laŋ saŋgalaa mɛɛ mɛɛ Setana tusi naa sɔɔŋ palaŋ choo. O hei niŋ, ŋ cho chɔm maa diola Chɛhowa laŋ la hiou wa la sɔvɛ le naa mɛɛ la wa la sɔvɛ le Chiisu Kiliti yɛ.