Baa A Cho Pa o Bɛɛndiaŋ le Nyɛpalaa Bɛndoo?

1. Le yɛɛ i cho yɛ suɛi taasi le miŋ bɛɛndiaŋ le kpundɔɔ?

TE Ŋ bɛɛndiaŋ pɛ le nyɛ, mi keŋ piŋi yoomula naalaŋ. Le tamaseliiyo, te kpundɔɔ del pɛ, mi i wa tɛtɛlɛ le mi wanaa wa a bɛɛndiaŋ nda chinda, nduyɛ ma mala acheleŋnda. Mi kɔɔna pilɛ o Yulopi niŋ, o kindiŋ le waŋnda malaa wo dimi aa: “Te ŋ bɛɛndiaŋ pɛ nyɛkɛndɛi le nyɛpalaa, mi keŋ piŋi yoomulaŋ.”

2. Le yɛɛ naŋ nɔ yɛ miŋ bɛɛndiaŋ le nyɛpalaa bɛndoo? (Maatiu 24:​44)

² O lepilɛ niŋ kpe “nyɛpalaa bɛndoo” kanduŋ niŋ ni. (Maa. 24:​21) Kɛ, o ve niŋ maa kpundɛla yɔŋnuŋ ndaŋ te. Kanifuule ŋ sina maa o cho hunɔɔ. Naapum wɔsilaŋ 2,000 hiou niŋ ni, chɔŋ a teleŋ Chiisu dimul buɛiyaa nduaa le ma bɛɛndiaŋ le paaleŋ ndeŋ ndo. (Nuawɔ Maatiu 24:​44.) Te ŋ wa pɛ a bɛɛndiaŋ, keŋ cho tosa mi i wa tɛtɛlɛ le miŋ biunuŋ a teleŋ kala kala koŋ, nduyɛ miŋ mala acheleŋnda le ma tosa nyɛ pilɛ koŋ.—Luku 21:​36.

3. Vɛɛ kaa biuwaŋndo nɔɔ, nyiɛɛye, a kaalaa mala yɛ naa miŋ wa a bɛɛndiaŋ le nyɛpalaa bɛndoo?

³ Ŋ tofaŋndɔ suliŋndaŋ layaa la mala naa miŋ wa a bɛɛndiaŋ le nyɛpalaa bɛndoo wo. Yɛɛ naŋ tosa yɛ niŋ, te a dimul naa pɛ le waŋnda yooŋgu kɔɔsɔɔ dimullo, nduyɛ mi waŋnda wa naa simullo? (Sɔɔŋ. 16:​21) Ŋ nɔ niŋ miŋ nɔ kaa biuwaŋndo le Chɛhowa diikɔŋndo, vɛlɛ miŋ nɔ tiindaŋndo maa o cho naa manda. Yɛɛ naŋ cho yɛ tosa te nyɛm puaapiliaa naa ŋtiŋ, ɔɔ te nyɛm ndaŋ kpou hɛluŋ nda pɛ? (Haba. 3:​17, 18) Le mɛɛ naŋ nɔ nyiɛɛye le nda yɛ, keŋ cho naa nyindɔɔ miŋ mala nda. Yɛɛ naŋ cho yɛ tosa te lɛŋii chuuŋgiaŋ niŋ diompilɛ ve chiŋalaŋ naa pɛ, nduyɛ miŋ wa latulu a puaapiliaa a ndepiliaa le teleŋ tiŋ? (Isi. 38:​10-12) Ŋ nɔ niŋ miŋ nɔ kaala yiŋgoloŋndo le nda, le naa malaa miŋ biunuŋ a teleŋ kala kala koŋ.

4. Vɛɛ Baabuiyo chɔm yɛ maa ŋ nɔ miŋ hiou lachi a kaa biuwaŋndo nɔɔ, nyiɛɛye a kaalaa?

⁴ Diom Mɛlɛkaa dɛɛniaa naa le miŋ hiou lachi a kaa biuwaŋndo nɔɔ, nyiɛɛye, a kaalaa. Luku 21:​19 dimi aa: “Te la biunuŋ pɛ haaa o mɛɛlulaŋ, la cho yoomula nyalaŋ piŋi.” Koloosiaŋnda 3:​12 dimi aa: “La chuɛɛnuŋ nyiɛɛye.” Nduyɛ 1 Tɛsaloniaŋ 4:​9, 10 dimi aa: “La sɔla niŋ pɛɛkoo Mɛlɛka pila o ba le kaaliaŋndo vellaa velle. . . . Lelaŋ puaapiliaa, ŋ cho nya nyɔɔloo maa la hiou lachi a ndi tosaa mbo hiou maa paandu.” Bolii Baabuiye hei kpou, o Kilisiɔŋaa ndaa nɔ niŋ kaa biuwaŋndo, nyiɛɛye, a kaalaa wa lo nda poonyiaa ndi ni. Kɛ ndaa nɔ ma hiou lachi a suliŋndaŋ ndaŋ chɔmndo. Naa bɛɛ nɔ miŋ tosa nyɛ pilɛ koŋ kpe. Le naa malaa miŋ tosa hei, ŋ cho pɛɛku mɛɛ Kilisiɔŋaa tasiaa chɔm suliŋndaŋ ndaŋ la pilɛŋ pilɛŋ yɛ. Okoŋ miŋ che mɛɛ naŋ tual tamasi ndaa kɔɔli, nduyɛ miŋ chɔm maa ŋ cho a bɛɛndiaŋ le nyɛpalaa bɛndoo yɛ.

HIOU LACHI A KAA BIUWAŊNDO NƆƆ

5. Yɛɛ mala yɛ Kilisiɔŋaa tasiaa ma biunuŋ tɔɔndaŋnda komal nda laŋ?

⁵ Kilisiɔŋaa tasiaa ndaa nɔ ma biunuŋ. (Hibu. 10:​36) Mi che bɛɛ ndaa nɔ ma biunuŋ bahawɛila komal wana o wana laŋ, kɛ ndaa nɔ vɛlɛ ma biunuŋ tɔɔndaŋndaŋ. Kilisiɔŋaa kaŋ a bɔɔbɔɔ, o cho ko simlachiaa Chuuwa, a masaa maLuomaŋnda le wa nda nyɛpalaa tusioo choo le. Kɛ yuŋgula ndalaŋ bɛɛ wa nda nyɛpalaa tusioo choo. (Maa. 10:​21) Nduyɛ o kundaa niŋ bɛɛ, ndaa nɔ ma kindiŋ kpoke, le wanaa wa piɛile tonyaleŋ simullo, ma wa hunɔɔ a piɔuviaŋndo o kundaa niŋnda fafaŋndo. (Walta. 20:​29, 30) A koŋ kpou, mi Kilisiɔŋaa kaŋ biunuŋ. (Sɔɔŋ. 2:​3) Yɛɛ mala yɛ nda? Ma yiyaŋ nyɛkɛndɛi a wanaa Baabuiyo soo a nda okɔɔ, ma biunuŋ nyɛkindilaa wa, mɛɛ Choobu cho nuaa yɛ. (Chemi. 5:​10, 11) Ma piɛi o Chɛhowa lo le mbo luei nda yoomuaŋ. (Walta. 4:​29-31) Nduyɛ ma kɛsiŋ o kɔl maa, Chɛhowa cho nda fanda te a biunuŋ pɛ.—Walta. 5:​41.

6. Mi Mɛlita pɛɛku a wanaa biunuŋ nyɛkindilaa wa okɔɔ o Baabuiyo niŋ, vɛlɛ a o yaula naalaŋ niŋ, nduyɛ mbo yiyaŋ lechoo. Yɛɛ ŋ pɛɛku yɛ o keŋ niŋ?

⁶ Naa bɛɛ tiuba miŋ biunuŋ, te ŋ wa pɛ pɛɛkoo teleŋ o teleŋ a tamaseliila wanaa biunuŋ nyɛkindilaa wa okɔɔ, o Diom Mɛlɛkaa niŋ, vɛlɛ a o yaula naalaŋ niŋ, nduyɛ miŋ yiyaŋ lechoo. Mɛɛ Mɛlita ndepilɛnɔ pilɛ o Alibeniaa niŋ tosa hei, mi keŋ mala ndu mbo biunuŋ nyɛkindilaa yuŋgu ndɔɔ handu ndu choo wo. Mbo dimi aa: “Mɛɛ ya pɛɛku a bundɛi Choobu ve okɔɔ o Baabuiyo niŋ, mi tamasi ndɔɔ pilaŋ ya kɔllo tau. Mbo saŋga tau. Nduyɛ mi che bɛɛ ndoo sina wana tosa mi tɔɔndaŋndaŋ la komal ndu wo le, kɛ mbo dimi aa: ‘I wu lende, I feŋaŋ o pimbi ni simiaa choo le!’ (Choobu 27:​5, NWT) Mi cha maa, nyɛpalaa komal Choobu wo hiou o komalla wo poloŋ. Choobu ndoo sina wana wa tosaa mi tɔɔndaŋndaŋ la komal ndu wo le. Kɛ ya I sina.”

7. O yɔŋ bɛɛ maa tɔɔndaŋ kala kala cho naa choo suŋ suŋ te, yɛɛ naŋ nɔ yɛ miŋ wa tosaa?

⁷ Ŋ tiuba miŋ chɔɔlu kaa biuwaŋndo nɔ, te ŋ wa pɛ piɛileŋ teleŋ o teleŋ o Chɛhowa lo, vɛlɛ miŋ wa ndu yiyaŋnda naalaŋ chɔmndo. (Filipi. 4:​6; 1 Tɛsa. 5:​17) Naapum tɔɔndaŋ kala kala cho num choo suŋ suŋ te. A koŋ kpou, baa ma nyuna pa Chɛhowa le mbo ke num nɛi chɔmaa te waŋndo tɛɛmbuu num pɛ kɔl, te a wa pɛ buulaŋndo, ɔɔ te a sina nyɛ o nyɛ ŋ nɔ ma tosa le? Te a wa ndu pɛ bahawɛila komal num suŋ suŋndaŋ chɔmndo, keŋ cho tosa mi i wa tɛtɛlɛ, le ndu simulta kala kala komal num niŋ o chilaŋ niŋndaŋ chɔmndo. Nduyɛ hei mala num ma nɔ tiindaŋndo maa, o sina teleŋ kpeekpei o tiuba mbo mala numndo, vɛlɛ a mɛɛ o tosa ndi yɛ.—Sam 27:​1, 3.

8. Vɛɛ tamasi Mila wo chɔm yɛ maa, te ŋ biunuŋ pɛ tɔɔndaŋnda komal naa hau laŋ, keŋ cho naa mala miŋ biunuŋ la cho naa komal o chilaŋ niŋndaŋ? (Chemisi 1:​2-4) (Tofa vɛlɛ fotueiyo.)

⁸ Te ŋ biunuŋ pɛ tɔɔndaŋnda komal naa hau laŋ, keŋ cho naa mala miŋ biunuŋ nyɛpalaa bɛndoo o chilaŋ niŋ. (Luomaŋ. 5:​3) Le yɛɛ naŋ dimi yɛ lende? Kanifuule puaapiliaa bɔɔbɔɔ saaluŋ maa, te a biunuŋ pɛ tɔɔndaŋ komal nda wo, mi keŋ mala nda ma biunuŋ, te tɔɔndaŋ kala kalaa komal nda pɛ. Nduyɛ mi hei tosa vɛlɛ, ma chɔɔlu tiindaŋndo nɔ maa Chɛhowa cho o bɛɛndiaŋ, vɛlɛ maa o nɔ yeemɛi le nda malaa. Mi laalaŋndo mala nda vɛlɛ, ma biunuŋ nyɛpalaa cheleŋ komal nda wo. (Nuawɔ Chemisi 1:​2-4.) Mi kɔɔfanɔ pilɛ o Alibeniaa niŋ diolaŋ Mila saaluŋ maa, mɛɛ o biunuŋ tɔɔndaŋnda komal ndu o paandoo niŋndaŋ, mi keŋ mala ndu le mbo hiou lachi a biuwɔŋndo. A mɛɛ o dimi yɛ, lepum mbo yiyaŋ maa, ndupilɛ kpe nɔ bahawɛilaŋ tau ni. Kɛ mbo loonuŋ a mɛɛ Chɛhowa mala ndu o wɔsiŋ bindiŋ hiou woŋ niŋ yɛ. Okoŋ mbo dimuluŋ aa: ‘Chɛhowa mala ya niŋ mi biunuŋ tɔɔndaŋnda bɔɔbɔɔ. Lelaŋ, I nɔ mi hiou lachi a ndu piɛiyo.’ Num bɛɛ nɔ ma loonuŋ a mɛɛ Chɛhowa mala num niŋ ma biunuŋ nyɛkindilaa yɛ okɔɔ. Nduyɛ nɔ tiindaŋndo maa, teleŋ o teleŋ ŋ biunuŋ pɛ tɔɔndaŋndo, mi Chɛhowa che, vɛlɛ mbo fanda num le keŋ. (Maa. 5:​10-12) Okoŋ te nyɛpalaa bɛndoo kanduŋ pɛ, a cho hiouwɔɔ lachi a biuwɔŋndo kanifuule, a biunuŋ niŋ sɔɔŋ palaŋ bɔɔbɔɔ.

CHƆM NYIƐƐYE

9. Vɛɛ kundaa Aŋtiɔɔ chɔm yɛ chaaŋaa ndaa laalaŋnda nyiɛɛye?

⁹ Ŋ tofaŋndɔ nyɛ yɔŋnuŋ Kilisiɔŋnda o Chudiaa niŋndo, mɛɛ yima bɛnduaŋ ma del. Mɛɛ kundaa Aŋtiɔɔ tuei maa yima bɛnduaŋ ma del puaapiliaa ndaa o Chudiaa niŋ choo, ma tuiinuŋ nda inyiɛɛ. Nduyɛ mi keŋ nyindu nda, le ma tosa nyɛ. Baabuiyo dimi aa, “Mi wanaa laalaŋnda kɛɛsiaa le ma dɔu nyɔɔŋ naapilɛ mɛɛ wana o wana nɔ yɛ, le puaapiliaa ndaa wa Chudiaa wa yɔŋndo.” (Walta. 11:​27-30) Mi che bɛɛ puaapiliaa yiaaŋ maa del choo wa wa landaŋ a nda, kɛ Kilisiɔŋnda haa ndaa nɔ yeemɛi le chaaŋaa ndaa malaa.—1 Chɔŋ 3:​17, 18.

10. O nɛila kuɛɛ choo naŋ chɔm yɛ nyiɛɛye, le chaaŋaa naa laalaŋaa kpundɔɔ komalla? (Tofa vɛlɛ fotueiyo.)

¹⁰ Naa bɛɛ tiuba miŋ chɔm hau chaaŋaa naa laalaŋnda nyiɛɛye te kpundɔɔ komal nda pɛ. Ŋ nɔ miŋ wa a bɛɛndiaŋ le nda malaa. Ŋ tosa hei te ŋ nyuna pɛ bɛnduaa le ma chɛl naa le miŋ kuɛ naa kpundɔɔ della le malaa yɔŋgoo, vɛlɛ miŋ yɔŋgu toolula naalaŋ le wali dimiaa yooŋgu kɛndɛ cho tosaŋndo chieeŋndo balɔɔ silɔ wo, ɔɔ miŋ piɛi le puaapiliaa a ndepiliaa kpundɔɔ komalla.b (Pulɔ. 17:​17) Le tamaseliiyo, a wɔsi 2020, miŋ kila Kundala Kɔɔna Sɔɔŋ le Wanaa Kpundɔɔ Komalla hiouwɔɔ 950 chieeŋndo balɔɔ silɔ, le puaapiliaa Naa Kolonaa ndoo piiliaŋ nda malaa. Ŋ nɔ miŋ chɔm balika melaa le puaapiliaa a ndepiliaa naa cho wallo kalaŋ, a kundalaŋ ndaŋ latulu wa. Mi nyiɛɛyii puaapiliaa a ndepiliaa haa nɔ le chaaŋaa ndaa ve nyindu nda ma ke nda nyɛm nda hauba woŋ, ma dɛɛniaa nda o Chɛhowa piɛiyo niŋ, ma bɛɛndiaa, vɛlɛ ma taŋgul chiɛila ndalaŋ, a fondaŋnda nda piɛi Chɛhowalaŋ.—Tuuwɔ 2 Kɔliŋtiaŋ 8:​1-4.

11. Vɛɛ nyiɛɛyii naŋ chɔmnaŋ vellaa velle ve chuu yɛ Finya naa o choo choo niŋ saŋgalaa?

¹¹ Te kpundɔɔ komal pɛ chaaŋaa naa laalaŋnda, nduyɛ miŋ tuiinuŋ nda inyiɛɛ, mi acheleŋnda che sala naŋ soliŋndo. Le tamaseliiyo, a wɔsi 2019, mi hueiyii bɛnduii nda veelu aa Dɔluaŋnde ve, tɛɛmbuu Toŋgo leMasaa o Bahamasi niŋ. Mɛɛ puaapiliaa wa Toŋgo leMasa koŋ miŋgioo taŋgullo, ma nyuna po pilɛ sina a taŋgullo okɔɔ kɛ o cho Sei Chɛhowa le wo, le mbo chɔm nda nyɛm yeemaŋ niŋ le wali koŋ tosaa wo. Mbo dimul nda aa: “I cho nya nyɛm walloŋ kpou you, . . . mi paawa wanaa walla le ma kuɛ le wali koŋ tosaa, nduyɛ mi ke nya nyɛm yeemaŋ ndoŋ. . . . I yeema mi mala kɔɔna nyaa. Mi i pilaŋ ya kɔllo tau, te I che pɛ mɛɛ nya buulaŋ le opilɛ a o cheleŋndo yɛ.” Wanaa bɔɔbɔɔ o chieeŋndo choo sina Chɛhowa le. Kɛ mi a bɔɔbɔɔ mɛɛndaŋ Seiyaa Chɛhowaa. I cho bɔɔ dikeŋnaŋ bɛndu le naa, le sinaa maa mi nyiɛɛyii naŋ chɔmnaŋ vellaa velle ve sɔɔŋguu waŋnda Mɛlɛka naa ikɛi kanifuule, o “cho wana inyiɛɛ bɛndu.”—Ɛfi. 2:​4.

12. Vɛɛ nyiɛɛyii naŋ chɔmnaŋ hau vellaa velle ve bɛɛndiaa yɛ naa le nyɛpalaa bɛndoo? (Sɔɔŋ Chɔɔmaŋndoŋ 13:​16, 17)

¹² Le yɛɛ naŋ nɔ yɛ niŋ miŋ chɔm chaaŋaa naa laalaŋnda nyiɛɛye te nyɛpalaa bɛndoo kanduŋ pɛ? Baabuiyo chɔm maa, bahawɛilaŋ la cho wanaa cho kɛɛ masale chieeŋndo hoo tooloo wa komal suŋ suŋ, vɛlɛ a teleŋ nyɛpalaa bɛndoo. (Nuawɔ Sɔɔŋ Chɔɔmaŋndoŋ 13:​16, 17.) A teleŋ koŋ, naapum puaapiliaa a ndepiliaa hau niŋ ba a nyɛm mala nda le pioŋɔɔ sɔlaa woŋ. Te Masa naa Chiisu Kiliti hiŋ pɛ le yamɛi kiolɔɔ, maa o komal naa nyiɛɛye chɔmaŋndo vellaa velle, okoŋ mbo veelu naa le miŋ “luɛi o masale o bɛɛndiaa” leŋ niŋ fɔ.—Maa. 25:​34-40.

KINDI KAALA NUMNDO LE PUAAPILIAA A NDEPILIAA POŊ

13. A mɛɛ Luomaŋnda 15:​7 dimi yɛ, vɛɛ Kilisiɔŋaa tasiaa kindi yɛ kaala ndaa nɔ le opilɛ a o cheleŋndo wo?

¹³ Kaalaa wa pondaleŋ le Kilisiɔŋaa tasiaa ni. Kɛ baa i wa pa tɛtɛlɛ nda o ba le kaalaa chɔmndo? Ŋ tofaŋndɔ wanaa yɛ yiaa wa o kundaa Luom niŋnda. Mi che bɛɛ Chuuwa ndaa pɛɛku niŋ le sawala Mɛlɛka ndoo ke Muuse laŋ diikɔŋndo, kɛ o cho ko nda le wa o kunda koŋ niŋ te. Wanaa ve ŋChuu le wa bɛɛ wa nda tɛɛŋ. Nduyɛ waŋnda haa kɔɔlima ndaŋ ma ve nyɛ pilɛ a Chuuwa le. Naapum Kilisiɔŋaa kaŋ apum chiaa nda wa ni. Kɛ apum yɛ, a ve ŋchɛ le. Nduyɛ pɛŋ, wana che pɛ maa, apum ndaa nɔ chiaa. Mi che bɛɛ Kilisiɔŋnda haa ndaa nɔ kɔɔlima pilɛ le, kɛ yɛɛ mala yɛ nda ma hiau lachi a kaalaa chɔmaŋndo? Mi kiilanɔɔ Pɔɔl dɛɛniaa nda aa: “La biyaŋ vellaa velle mɛɛ Kiliti bɛɛ bii nya yɛ.” (Nuawɔ Luomaŋnda 15:​7.) Yɛɛ Pɔɔl ndoo yiyaŋ yɛ? Diomndo hoo, “biyaŋ” sim le waŋndo yiyaa, ɔɔ ma tosal ndu kɛndɛi naapum o numndo chiɛiniŋ, ɔɔ o nɛila cheleŋ choo. Le tamaseliiyo, mi Pɔɔl dimul Filimɔŋ mɛɛ o nɔ mbo bii Onisimɔɔ yɛ aa: “Bii ndu nyɛkɛndɛi.” (Filɛ. 17) Nduyɛ mi Pilisila nda Akuila bii Apɔlɔɔ nyɛkɛndɛi. Nyɛɛmbɔ koni Apɔlɔɔ ndoo sina a Kilisiɔŋndeŋ okɔɔ ni. Lelaŋ mi pɔnɔɔ a lanɔɔ hoo “kua a ndu o [ndalo bɛɛ,]” le ndu sɔɔŋ tɛɛsiallo. Kanifuule, ndaa sina tau a Kilisiɔŋndeŋ okɔɔ. (Walta. 18:​26) Kilisiɔŋnda haa chɛl mi kɔɔlima yɛ yɛma nda fula waŋ ma hiŋ a piɔuwaŋndo nda tɛɛŋ te, kɛ ma biyaŋ vellaa velle nyɛkɛndɛi.

14. Vɛɛ Ana nda pɔnɔ ndɔ chɔm yɛ puaapiliaa a ndepiliaa ndaa kaalaa?

¹⁴ Naa bɛɛ nɔla miŋ chɔm puaapiliaa a ndepiliaa naa kaalaa, te ŋ wa pɛ o chaŋyɛi niŋ a nda, vɛlɛ miŋ wa teleŋndo chuaa latulu a nda. Keŋ cho nda nyindɔɔ mi nda bɛɛ chɔm naa kaalaa. (2 Kɔliŋ. 6:​11-13) Ŋ tofaŋndɔ suɛi yɔŋnaŋii Ana nda pɔnɔ ndɔ ve. Mɛɛ nda yɔŋ nda Misiɔnalueileŋ Afilika Ba Paaleŋ le Dello, teleŋ biŋgi okoŋ kɔɔli, mi Naa Kolonaa del. Mi che bɛɛ ndaa kuɛ loŋ sɛnɛi, kɛ ndaa tiuba ma che puaapiliaa a ndepiliaa hɔlla a hɔlla le. Vɛɛ pɔnɔɔ a lanɔɔ hoo ndaa tiu yɛ ba ma chɔm puaapiliaa a ndepiliaa ndaa kaalaa? Mi ndaa soliŋ nyɛm mapuuloŋ kpeku le puaapiliaa a ndepiliaa ndaa veeloo, okoŋ ma wa chaŋnaŋndo, nduyɛ ma dimul nda maa a yeema niŋ bɔɔ nda sinaa nyɛkɛndɛi. Mi keŋ pilaŋ puaapiliaa a ndepiliaa kaŋ kɔltaŋ tau. Le hei, ma kandu nda veelu laŋ teleŋ o teleŋ, vɛlɛ a nda yooŋgulaŋ poonyiallo. Le yɛɛ pɔnɔɔ a lanɔɔ hoo kindiŋ yɛ kpoke, le wanaa wa o kunda nda sɛnɛiyo niŋnda sinaa? Mi Ana dimi aa: “Fɛɛŋ bɛɛ I puɛɛnuŋ a kaala puaapiliaa a ndepiliaa chɔm ya a yuŋgu nuu o teleŋnda kɛndɛlaŋ, a o la wɔɔŋndaŋ niŋndo le. Tamaselii ndaa mala ya, le mi chɔm acheleŋnda kaalaa.”

15. Yɛɛ naŋ pɛɛku yɛ o tamasi Vanɛsa wo niŋ, te o hiŋ pɛ a puaapiliaa a ndepiliaa naa kpou kaalaa okɔɔ? (Tofa vɛlɛ fotueiyo.)

¹⁵ Naa a bɔɔbɔɔ, ŋ nɔ puaapiliaa a ndepiliaa fula o kɔɔlima yɛ yiaaŋ niŋnda o kundala naalaŋ niŋ. Nduyɛ nda kpou nɔ kaalaŋ yɛ yɛ. Ŋ tiuba miŋ kindi kaala naŋ nɔ le puaapiliaa a ndepiliaa naa wo, te ŋ handu pɛ kɔllo o suliŋnda ndala kɛndɛlaŋ choo. Mi ndepilɛnɔ pilɛ o Niu Zilaŋ niŋ diolaŋ Vanɛsa, ndoo che ndi ikala le waa o chaŋyɛi kpɛɛluŋnde niŋ a wanaa wa o kunda ndɔɔ niŋnda. Kɛ yɔŋii ndoo fafaŋ wanaa kaala ndalaŋ laa tɛɛmbuu ndu kɔllo wa, mbo kɛɛsiaa le teleŋndo chuaa tau a nda latulu. Mi hei tosaa mala ndu mbo cha sɔɔŋ Chɛhowa kaala a wanaa kaŋ okɔɔ woŋ. Mbo dimi aa: “Chɔŋ a teleŋ pɔnɔ nuu simnuŋ buɛi ibuŋgaa wo, miŋ chua teleŋndo tau a puaapiliaa a ndepiliaa nɔ kaalaŋ yɛ yɛ wa. Nduyɛ mi i wa tɛtɛlɛ ya o ba, le waa o chaŋyɛi niŋ a nda. I kaala bɔɔ puaapiliaa a ndepiliaa fulaa o kɔɔlima yɛ yiaaŋ niŋ. Nduyɛ Chɛhowa bɛɛ kaala hei kanifuule, ndupila sɔɔŋguŋ puaapiliaa a ndepiliaa haa o ibuŋ niŋ.” Te ŋ pɛɛku pɛ le acheleŋnda chɔɔ mɛɛ Chɛhowa che nda yɛ, mi keŋ chɔm maa ŋ kaala nda.—2 Kɔliŋ. 8:​24.

16. Le yɛɛ naŋ nɔ yɛ niŋ miŋ chɔm puaapiliaa a ndepiliaa naa kaalaa, a teleŋ nyɛpalaa bɛndoo? (Tofa vɛlɛ fotueiyo.)

¹⁶ Ŋ nɔ niŋ miŋ chɔm puaapiliaa a ndepiliaa naa kaalaa, a teleŋ nyɛpalaa bɛndoo. Te nyɛpalaa bɛndu koŋ kanduŋ pɛ, vɛɛ Chɛhowa manda yɛ niŋ naa? Ŋ tofaŋndɔ nyɛ Chɛhowa ndoo dimul wanaa nduaa le ma tosa wo, mɛɛ nda del Babilɔŋ choo. Mbo dimul nda aa: “La luɛi chiɛilaŋ niŋ wanaa niaa, mi la kiindiaŋ diolaŋ kɔɔli. La vioŋnuŋ chiɛilaŋ niŋ mi la wa loŋ le teleŋ biŋgi, haaa mbo lo o koŋ mi tumbe Mɛlɛka dɔɔnuŋ ndo o pɔlul.” (Aisaya 26:​20) Wana che pɛ maa, naa bɛɛ nɔ niŋ miŋ tol nɛi chɔmaa hoo kɔɔli, te nyɛpalaa bɛndoo kanduŋ pɛ. Naapum chiɛilaŋ o bolle Baabuileŋ ndeŋ niŋ sim le kundala naalaŋ. A teleŋ nyɛpalaa bɛndoo, Chɛhowa mɛi lediom maa o cho naa manda, te ŋ wa pɛ o diompilɔɔ niŋ a chaaŋaa naa laalaŋnda. Lelaŋ, naa kpou nɔ miŋ tosa wallo kalaŋ, le puaapiliaa a ndepiliaa naa kaalaa chɔmndo. Kanifuule, keŋ cho naa mala miŋ sɔla pioŋɔɔ.

BƐƐNDIAŊ SUŊ SUŊ

17. Te ŋ bɛɛndiaŋ pɛ suŋ suŋ, yɛɛ naŋ tiu yɛ niŋ ba miŋ tosa te nyɛpalaa bɛndoo hiŋ pɛ?

¹⁷ “Paale Mɛlɛka Yaawɛɛ o kɔɔsa niŋ a waŋnda leŋ,” le huŋ niŋ a nyɛpalaa le waŋnda chieeya kpou. (Sɛfa. 1:​14, 15) Wanaa Chɛhowaa bɛɛ, nyɛkindilaa cho nda komal. Kɛ te o yɔŋ pɛ miŋ bɛɛndiaŋ suŋ suŋ, keŋ cho naa mala miŋ kɛsi kɔllo, vɛlɛ miŋ mala acheleŋnda. I cho naa vɛlɛ mala miŋ biunuŋ simulta cho naa komaltaŋ. Te chaaŋaa naa laalaŋnda wa pɛ saŋgaa, ŋ cho tosa nyɛ o nyɛ naŋ tiuba le nda nyiɛɛye chɔmndo, vɛlɛ miŋ ke nda mala nda yeema wo. Te ŋ pɛɛku pɛ suŋ suŋ le puaapiliaa a ndepiliaa naa kaalaa, keŋ cho naa mala miŋ chɔm nda vɛlɛ kaalaa o chilaŋ niŋ. Okoŋ Chɛhowa cho naa fanda a yoomu fafɛɛŋndo, o chieeŋ naŋ yiyaŋ niŋ kposoŋ a kpundɔɔ, vɛlɛ a tɔɔndaŋndaŋ te wo niŋ.—Aisaya 65:​17.