ယိၤဟၣ်
၁၅ “ယမ့ၢ် စပံးမုၢ်နီၢ်ကီၢ် ဒီးယပၢ်မ့ၢ် ပှၤကွၢ်ထွဲစပံး အလီၢ်လီၤ. ၂ တၢ်အဒ့လၢယလိၤ လၢအတသၣ်ထီၣ်ဘၣ်န့ၣ် အဝဲကျီကွံာ်ဝဲခဲလၢာ် ဒီးကယဲၢ်တၢ်အဒ့ လၢအသၣ်ထီၣ်န့ၣ် အဝဲပဲာ်ဟိ ကဆှီထီၣ်ဝဲဒ်သိး ကသၣ်အါထီၣ်အဂီၢ်လီၤ. ၃ ခီဖျိလၢ ယကလုၢ်ကထါလၢ ယတဲတ့ၢ်သုအဃိ သုကဆှီလံ. ၄ ဆဲးအိၣ်ဒီးယၤ ဒီးယကဆဲးအိၣ်ဒီးသုလီၤ. တၢ်အဒ့တဒ့ မ့ၢ်တဆဲးအိၣ်လၢ စပံးမုၢ်အလိၤဘၣ်န့ၣ် သၣ်ထီၣ်ဒၣ်အတၢ် တသ့ဘၣ်. ဒ်န့ၣ်အသိး သုဝဲစ့ၢ်ကီး သုမ့ၢ်တဆဲး အိၣ်ဒီးယၤဘၣ်န့ၣ် သုသၣ်ထီၣ် တသ့ဘၣ်. ၅ ယမ့ၢ်စပံးမုၢ်ဒီး သုမ့ၢ်စပံး အဒ့တဖၣ်လီၤ. ယမ့ၢ်တပၣ်ဘၣ်န့ၣ် သုမၤတၢ် တသ့နီတမံၤဘၣ်. အဃိ ပှၤလၢ အဆဲးအိၣ်ဒီးယၤန့ၣ် ယဆဲးအိၣ်ဒီးအီၤ ဒီးအဝဲသၣ်ထီၣ် တၤသၣ်အါမးလီၤ. ၆ ပှၤတဂၤဂၤမ့ၢ် တဆဲးအိၣ်ဒီးယၤဘၣ်န့ၣ် အဝဲကဘၣ် တၢ်တၢၤကွံာ်အီၤ ဒ်တၢ်အဒ့အသိးဒီး ကဃ့ထီဝဲလီၤ. ဒီးပှၤကထၢဖှိၣ်က့ၤဝဲ တၢ်အဒ့တဖၣ်အံၤ ဒီးတၢ်ကကွံာ်လီၤအီၤလၢ မ့ၣ်အူအပူၤ ဒီးအဝဲသ့ၣ် ကအူအီၣ်ဝဲလီၤ. ၇ သုမ့ၢ်ဆဲးအိၣ်ဒီးယၤ ဒီးတၢ်လၢယတဲတဖၣ် မ့ၢ်ဆဲးအိၣ်လၢသုပူၤန့ၣ် သုမ့ၢ်ဃ့ တၢ်တမံၤဂ့ၤ တမံၤဂ့ၤလၢ သုအဲၣ်ဒိးန့ၣ် သုကန့ၢ်ဘၣ်အီၤလီၤ. ၈ သုမ့ၢ်ပာ်ဖျါထီၣ်လၢ သုမ့ၢ် ယပျဲၢ်ယဘီၣ်တဖၣ် ဒီးဆဲးသၣ်ထီၣ် တၤသၣ်အါမးန့ၣ် ယပၢ်ကဘၣ် တၢ်မၤလၤကပီၤအီၤလီၤ. ၉ ဒ်ပၢ်အဲၣ်ယၤအသိး ယအဲၣ်သုလီၤ. ဆဲးအိၣ်လၢ ယတၢ်အဲၣ်အပူၤတက့ၢ်. ၁၀ သုမ့ၢ်မၤထွဲ ယတၢ်မၤလိာ်တဖၣ်န့ၣ် သုကဆဲးအိၣ်လၢ ယတၢ်အဲၣ်အပူၤ ဒ်ယမၤထွဲ ပၢ်အတၢ်မၤလိာ်တဖၣ် ဒီးဆဲးအိၣ်လၢ အတၢ်အဲၣ်အပူၤအသိးလီၤ.
၁၁ “ယတဲဘၣ်သု တၢ်ဂ့ၢ်တဖၣ်အံၤ ဒ်သိးယတၢ်သးခု ကအိၣ်လၢသုပူၤ ဒီးဒ်သိး သုတၢ်သးခုကအိၣ် လၢလၢပှဲၤပှဲၤအဂီၢ်လီၤ. ၁၂ အဝဲအံၤမ့ၢ်ဝဲ ယတၢ်မၤလိာ်လီၤ. အဲၣ်လိာ်သုသး တဂၤဒီးတဂၤ ဒ်ယအဲၣ်သု အသိးတက့ၢ်. ၁၃ ပှၤလၢ အတၢ်အဲၣ်ဒိၣ်န့ၢ်ဒံး ပှၤတဂၤလၢ အဟ့ၣ်လီၤကွံာ် အသးသမူလၢ အတံၤသကိးတဖၣ်အဂီၢ်န့ၣ် တအိၣ်နီတဂၤဘၣ်. ၁၄ သုမ့ၢ်မၤတၢ်လၢ ယမၤလိာ်သုန့ၣ် သုမ့ၢ် ယတံၤသကိးတဖၣ်လီၤ. ၁၅ ယတကိးသုလၢ ကုၢ်တဖၣ်လၢၤဘၣ်, မ့ၢ်လၢကုၢ်န့ၣ် တသ့ၣ်ညါဝဲတၢ်လၢ အကစၢ်မၤဝဲန့ၣ်ဘၣ်. ဘၣ်ဆၣ် ယကိးသုလၢ တံၤသကိးတဖၣ် မ့ၢ်လၢ ယဒုးသ့ၣ်ညါသု တၢ်ခဲလၢာ်လၢ ယနၢ်ဟူဘၣ်လၢ ယပၢ်အအိၣ်အဃိန့ၣ်လီၤ. ၁၆ သုတဃုထၢယၤဘၣ်, မ့ၢ်ယဃုထၢသုလီၤ. ယဟ့ၣ်လီၤသုမူဒါလၢ သုကလဲၤဒီး ဆဲးသၣ်ထီၣ်တၤသၣ် ဒီးသုတၤသၣ်န့ၣ် ကဘၣ်အိၣ်ဂၢၢ်ဆိးကျၢၤဝဲ ဒ်သိးပၢ်ကဟ့ၣ်လီၤသု တၢ်လၢသုဃ့အီၤ တမံၤဂ့ၤတမံၤဂ့ၤ လၢယမံၤအပူၤန့ၣ်လီၤ.
၁၇ “တၢ်သ့ၣ်တဖၣ်အံၤ ယမၤလိာ်သုဒ်သိး သုကအဲၣ်လိာ်သုသး တဂၤဒီးတဂၤအဂီၢ်လီၤ. ၁၈ ဟီၣ်ခိၣ်မ့ၢ်သးဟ့သုန့ၣ် သ့ၣ်နီၣ်ထီၣ်လၢ အသးဟ့ဆိယၤလၢ သုမဲာ်ညါန့ၣ်တက့ၢ်. ၁၉ သုမ့ၢ်ဘၣ်ဃးဒီး ဟီၣ်ခိၣ်န့ၣ် ဟီၣ်ခိၣ်ကအဲၣ်ဝဲတၢ်လၢ အဘၣ်ဃးဒီးအီၤလီၤ. ဘၣ်ဆၣ် သုဝဲသ့ၣ်အံၤ သုတဘၣ်ဃးဒီး ဟီၣ်ခိၣ်ဘၣ် ဒီးမ့ၢ်လၢ ယဃုထၢထီၣ်ကွံာ်သုလၢ ဟီၣ်ခိၣ်အဃိ ဟီၣ်ခိၣ်ကသးဟ့သုလီၤ. ၂၀ တိၢ်နီၣ်ဃာ် တၢ်ကတိၤလၢ ယကတဲသုအံၤတက့ၢ်. ကုၢ်န့ၣ်တဒိၣ်န့ၢ်ဘၣ် အကစၢ်ဘၣ်. အဃိ အဝဲသ့ၣ် မ့ၢ်မၤအၢမၤနးယၤန့ၣ် အဝဲသ့ၣ် ကမၤအၢမၤနးသု စ့ၢ်ကီးလီၤ. ဒီးအဝဲသ့ၣ် မ့ၢ်ဒိကနၣ် ယကလုၢ်န့ၣ် အဝဲသ့ၣ် ကဒိကနၣ် သုကလုၢ်စ့ၢ်ကီးလီၤ. ၂၁ ဘၣ်ဆၣ် လၢယမံၤအဃိန့ၣ် အဝဲသ့ၣ် ကမၤသုလၢ တၢ်သ့ၣ်တဖၣ်အံၤခဲလၢာ် မ့ၢ်လၢအဝဲသ့ၣ် တသ့ၣ်ညါ ပှၤလၢ အဆှၢလီၤယၤတဂၤဘၣ် အဃိလီၤ. ၂၂ ယမ့ၢ်တဟဲလီၤဒီး တဲဘၣ်အဝဲသ့ၣ်ဘၣ်န့ၣ် အဝဲသ့ၣ် အတၢ်ဒဲးဘးတအိၣ်ဘၣ်. ဘၣ်ဆၣ် ခဲအံၤအဝဲသ့ၣ် တဲပူၤဖျဲးအသးလၢ အတၢ်ဒဲးဘး တသ့လၢၤဘၣ်. ၂၃ ပှၤလၢ အသးဟ့ယၤန့ၣ် သးဟ့ယပၢ် စ့ၢ်ကီးလီၤ. ၂၄ တၢ်မၤလၢ ပှၤတမၤနီတဂၤဒံးဘၣ်န့ၣ် ယမ့ၢ်တမၤဘၣ်လၢ အဝဲသ့ၣ် အကျါဘၣ်ဒီး အဝဲသ့ၣ် အတၢ်ဒဲးဘး တအိၣ်ဘၣ်. ဘၣ်ဆၣ် ခဲအံၤအဝဲသ့ၣ် ထံၣ်ယၤဒီး သးဟ့ယၤဒီးယပၢ်လီၤ. ၂၅ ဘၣ်ဆၣ် တၢ်ကဲထီၣ်အသး ဒ်အံၤန့ၣ် ဒ်သိးတၢ်ကွဲးအသးလၢ အဝဲသ့ၣ် အတၢ်သိၣ်တၢ်သီအပူၤ လၢအမ့ၢ် ‘တၢ်ဂ့ၢ်တအိၣ် နီတမံၤဘၣ် သနာ်က့ အဝဲသ့ၣ်သးဟ့ယၤ’ န့ၣ် ကလၢထီၣ်ပှဲၤထီၣ် အဂီၢ်လီၤ. ၂၆ ယကဆှၢလီၤန့ၢ်သု ပှၤမၤစၢၤတၢ်လၢ အဟဲလၢပၢ်အအိၣ် လၢအမ့ၢ်ဝဲသးစီဆှံလၢ အပာ်ဖျါထီၣ် တၢ်မ့ၢ်တၢ်တီလီၤ. အဝဲအိၣ်ဟဲလၢပၢ်အအိၣ် ဒီးဖဲအဟဲတုၤဝဲအခါန့ၣ် ကအုၣ်အသးလၢ ယဂ့ၢ်ယကျိၤလီၤ. ၂၇ ဒီးသုဝဲစ့ၢ်ကီး မ့ၢ်လၢသုအိၣ်ဒီးယၤ စးထီၣ်လၢအခီၣ်ထံး လံၤလံၤအဃိ သုကဘၣ် အုၣ်သုသးလီၤ.