၁ ယိၤဟၣ်

၄ ဒီပုၢ်ဝဲၢ်သးဘိသ့ၣ်ဧၢ, တၢ်သိၣ်လိတဖၣ်လၢ အဖျါလၢ အဟဲလၢယွၤအအိၣ်န့ၣ် တဘၣ်နာ်အီၤ ကိးမံၤဒဲးတဂ့ၤ. တၢ်သိၣ်လိတဖၣ်အံၤ မ့ၢ်အဘၣ်ဃးဒီး ယွၤအနီၢ်ကီၢ်ဧါန့ၣ် မၤကွၢ်အီၤတက့ၢ်. ဝံအဘျၣ်အိၣ်ထီၣ်လၢ ဟီၣ်ခိၣ်ချၢအါဂၤလံ.

၂ သုကသ့ၣ်ညါလၢ တၢ်သိၣ်လိတခါခါ ဟဲလၢကစၢ်ယွၤအအိၣ် ခီဖျိလၢတၢ်ဂ့ၢ်အံၤ လၢအမ့ၢ် တၢ်သိၣ်လိကိးခါဒဲး လၢအအၢၣ်လီၤတူၢ်လိာ်လၢ ယ့ၣ်ၡူးခရံာ်ဟဲ ဒ်ပှၤဟီၣ်ခိၣ်ဖိအသိးန့ၣ် မ့ၢ်ဝဲတၢ်သိၣ်လိ လၢအဘၣ်ဃးဒီး ကစၢ်ယွၤလီၤ. ၃ ဘၣ်ဆၣ် တၢ်သိၣ်လိ ကိးခါဒဲးလၢ အတအၢၣ်လီၤတူၢ်လိာ် ယ့ၣ်ၡူးဘၣ်န့ၣ် မ့ၢ်တၢ်လၢ အတဘၣ်ဃးဒီး ကစၢ်ယွၤဘၣ်. တကးဒံးဘၣ် တၢ်သိၣ်လိတဖၣ်အံၤ မ့ၢ်ဝဲ ပှၤတဂၤလၢ အထီဒါခရံာ် အတၢ်သိၣ်လိတဖၣ် လၢသုနၢ်ဟူတ့ၢ်လၢ အကဟဲဝဲ ဒီးခဲအံၤန့ၣ် အအိၣ်လၢ ဟီၣ်ခိၣ်ချၢလံ.

၄ ဖိဆံးသ့ၣ်ဧၢ, သုဝဲသ့ၣ်အံၤ သုဘၣ်ဃးဒီး ကစၢ်ယွၤလီၤ. ဒီးမ့ၢ်လၢပှၤတဂၤလၢ အဆီၣ်ထွဲသုန့ၣ် ဒိၣ်န့ၢ်ပှၤတဂၤလၢ အဆီၣ်ထွဲ ဟီၣ်ခိၣ်အဃိ သုမၤနၢၤအဝဲသ့ၣ်လီၤ. ၅ အဝဲသ့ၣ်ဘၣ်ဃးဒီး ဟီၣ်ခိၣ်အဃိ အဝဲသ့ၣ်တဲတၢ်လၢ အဘၣ်ဃးဒီး ဟီၣ်ခိၣ်န့ၣ်လီၤ. ဒီးဟီၣ်ခိၣ်န့ၣ် ဒိကနၣ်အဝဲသ့ၣ်လီၤ. ၆ ပဝဲဒၣ်အံၤ ပဘၣ်ဃး ဒီးကစၢ်ယွၤလီၤ. ပှၤလၢအသ့ၣ်ညါ ကစၢ်ယွၤန့ၣ် ဒိကနၣ်ပကလုၢ်လီၤ. ပှၤလၢအတဘၣ်ဃးဒီး ကစၢ်ယွၤဘၣ်န့ၣ် တဒိကနၣ် ပကလုၢ်ဘၣ်. လၢတၢ်န့ၣ်အဃိ ပသ့ၣ်ညါနီၤဖး တၢ်သိၣ်လိ လၢအမ့ၢ်အတီ ဒီးတၢ်သိၣ်လိ လၢအကမၣ်န့ၣ်လီၤ.

၇ ဒီပုၢ်ဝဲၢ်သးဘိသ့ၣ်ဧၢ, မ်ပဆဲးအဲၣ်လိာ်ပသး တဂၤဒီးတဂၤ, မ့ၢ်လၢတၢ်အဲၣ်န့ၣ် ဟဲလၢ ကစၢ်ယွၤအအိၣ်အဃိလီၤ. ပှၤကိးဂၤဒဲးလၢ အအဲၣ်တၢ်န့ၣ် ဟဲအိၣ်ဖျဲၣ်ထီၣ်လၢ ကစၢ်ယွၤအအိၣ် ဒီးသ့ၣ်ညါကစၢ်ယွၤလီၤ. ၈ ကစၢ်ယွၤန့ၣ် မ့ၢ်တၢ်အဲၣ်တၢ်ကွံလီၤ. အဃိ ပှၤလၢအတအဲၣ်တၢ်ဘၣ်န့ၣ် တသ့ၣ်ညါကစၢ်ယွၤဘၣ်. ၉ ကစၢ်ယွၤ အတၢ်အဲၣ်တၢ်ကွံန့ၣ် ဘၣ်တၢ်ပာ်ဖျါထီၣ်အီၤလၢ ပဖီခိၣ် ခီဖျိလၢ ကစၢ်ယွၤဆှၢလီၤ အဖိခွါနီၢ်နီၢ် ထဲတဂၤဧိၤလၢ ဟီၣ်ခိၣ်ချၢဒ်သိး ပကဒိးန့ၢ်ဘၣ်တၢ်မူ ခီဖျိလၢ အဝဲဒၣ်အဃိလီၤ. ၁၀ တၢ်အဲၣ်အံၤမ့ၢ်ဝဲ ကစၢ်ယွၤ ဆှၢလီၤအဖိခွါဒ် တၢ်လုၢ်တၢ်ပာ်လၢ ပတၢ်ဒဲးဘးအဂီၢ်လၢ အကဒုးအိၣ်ဃူအိၣ်ဖိး ပှၤဒီးကစၢ်ယွၤလီၤ. အမၤဝဲဒ်အံၤန့ၣ် မ့ၢ်လၢအအဲၣ်ပှၤ ဒီးတမ့ၢ်လၢ ပအဲၣ်အီၤအဃိဘၣ်.

၁၁ ဒီပုၢ်ဝဲၢ်သးဘိသ့ၣ်ဧၢ, ကစၢ်ယွၤ မ့ၢ်အဲၣ်ပှၤဒ်အံၤန့ၣ် ပဝဲသ့ၣ်တဖၣ် ပအိၣ်ဒီးမူဒါလၢ ပကအဲၣ်လိာ်ကွံလိာ်ပသး တဂၤဒီးတဂၤလီၤ. ၁၂ ပှၤတထံၣ်ဘၣ် ကစၢ်ယွၤ နီတဘျီ နီတဂၤဘၣ်. ပမ့ၢ်ဆဲးအဲၣ်လိာ်ကွံလိာ်ပသး တဂၤဒီးတဂၤန့ၣ် ကစၢ်ယွၤ ကဆဲးအိၣ်ဝဲဆိးဝဲလၢပပူၤ ဒီးအတၢ်အဲၣ်န့ၣ် ဘၣ်တၢ်မၤလၢထီၣ်ပှဲၤထီၣ်အီၤ လၢပပူၤလီၤ. ၁၃ ပသ့ၣ်ညါလၢ ပဆဲးအိၣ်ဆိးလၢအပူၤ ဒီးအဝဲဒၣ်န့ၣ် ဆဲးအိၣ်ဝဲဆိးဝဲလၢပပူၤ ခီဖျိလၢ အဝဲဟ့ၣ်လီၤပှၤ အသးစီဆှံအဃိလီၤ. ၁၄ တကးဒံးဘၣ် ပဝဲသ့ၣ်တဖၣ် ပထံၣ်ဒီး ပအုၣ်ပသးလၢ ပၢ်န့ၣ်ဆှၢလီၤအဖိခွါဒ် တၢ်အုၣ်က့ၤခီၣ်က့ၤကစၢ် လၢဟီၣ်ခိၣ်အဂီၢ်လီၤ. ၁၅ ပှၤတဂၤဂ့ၤတဂၤဂ့ၤ လၢအအၢၣ်လီၤတူၢ်လိာ်လၢ ယ့ၣ်ၡူးမ့ၢ် ကစၢ်ယွၤအဖိခွါန့ၣ် ကစၢ်ယွၤ ဆဲးအိၣ်ဝဲဆိးဝဲလၢအပူၤ ဒီးပှၤတဂၤအံၤ ကဆဲးအိၣ်ဝဲဆိးဝဲလၢ ကစၢ်ယွၤအပူၤလီၤ. ၁၆ ဒီးပသ့ၣ်ညါထီၣ် ဒီးပနာ်ကစၢ်ယွၤ အတၢ်အဲၣ်ပှၤလီၤ.

ကစၢ်ယွၤန့ၣ် မ့ၢ်တၢ်အဲၣ်တၢ်ကွံလီၤ. ဒီးပှၤလၢ ဆဲးအိၣ်ဝဲဆိးဝဲလၢ တၢ်အဲၣ်တၢ်ကွံအပူၤန့ၣ် ဆဲးအိၣ်ဝဲဆိးဝဲလၢ ကစၢ်ယွၤအပူၤ ဒီးကစၢ်ယွၤ ဆဲးအိၣ်ဝဲဆိးဝဲလၢအပူၤလီၤ. ၁၇ လၢတၢ်န့ၣ်အဃိ တၢ်အဲၣ်တၢ်ကွံ ဘၣ်တၢ်မၤ လၢထီၣ်ပှဲၤထီၣ်အီၤလၢပပူၤ ဒ်သိးပတဲတၢ်လၢ တၢ်သးဒူအပူၤ ကဘူၣ်ဝဲဖဲ တၢ်စံၣ်ညီၣ်အမုၢ်နံၤ, မ့ၢ်လၢ ဒ်ခရံာ်အိၣ်ဝဲအသိး ပအိၣ်ဒ်န့ၣ်လၢ ဟီၣ်ခိၣ်ချၢအံၤအဃိလီၤ. ၁၈ လၢတၢ်အဲၣ်တၢ်ကွံအပူၤန့ၣ် တၢ်ပျံၤတၢ်ဖုးတအိၣ်ဘၣ်. တၢ်ပျံၤတၢ်ဖုး တြီမၤတံာ်တာ်ပှၤ အဃိ တၢ်အဲၣ်တၢ်ကွံလၢ အလၢအပှဲၤန့ၣ် နီဟးထီၣ်ကွံာ် တၢ်ပျံၤတၢ်ဖုးလီၤ. ပှၤလၢအပျံၤတၢ်န့ၣ် တမ့ၢ်ပှၤလၢအဘၣ်တၢ်မၤ လၢထီၣ်ပှဲၤထီၣ်အီၤလၢ တၢ်အဲၣ်တၢ်ကွံအပူၤဘၣ်. ၁၉ ပအဲၣ်တၢ်န့ၣ် မ့ၢ်လၢ အဝဲအဲၣ်ဆိပှၤအဃိလီၤ.

၂၀ ပှၤတဂၤဂၤ မ့ၢ်တဲလၢ “ယအဲၣ်ကစၢ်ယွၤ” ဘၣ်ဆၣ် အဝဲမ့ၢ်သးဟ့ အဒီပုၢ်ဝဲၢ်န့ၣ် အမ့ၢ်ပှၤလၢ အလံၣ်တၢ်လီတၢ်လီၤ. ပှၤလၢအတအဲၣ် အဒီပုၢ်ဝဲၢ်လၢ အထံၣ်ဝဲန့ၣ် အအဲၣ်ကစၢ်ယွၤလၢ အထံၣ်ဝဲတသ့ဘၣ်တဂၤန့ၣ် ကသ့ဒ်လဲၣ်. ၂၁ ဒီးအဝဲဟ့ၣ်လီၤပှၤ တၢ်မၤလိာ်တခါ လၢအမ့ၢ် ပှၤလၢအအဲၣ် ကစၢ်ယွၤန့ၣ် ကဘၣ်အဲၣ်စ့ၢ်ကီး အဒီပုၢ်ဝဲၢ်လီၤ.