Ehistoli lyokuhova
19 Konyima Nahasi hompa goVaamoni ta dogoroka, makura munendi ta mu kwama mouhompa. 2 Ndafita ta tanta asi: “Ame ngani likida eharo lyanarunye kwaHanuni morwa oguhwe Nahasi va likidire nge eharo lyanarunye.” Makura Ndafita ta tumu vantu va ka mu hengagwide morwa oguhwe kwa dogorokere. Nye apa va ka sikire vakareli vaNdafita mosirongo soVaamoni va ka hengagwide Hanuni, 3 vapitisili woVaamoni tava tantere Hanuni asi: “Wa ha gazara asi Ndafita kuna kutumine vakareli vendi va ya ku hengagwide morwa oguho vana dogoroka. Ndafita kuna tumu vakareli vendi koge va ya tare sirongo, yipo ngava si guse.” 4 Makura Hanuni ta gusa vakareli vaNdafita ta va kurura ntani ta tetere yikoverero yawo mombunda, tava va ninki va ze. 5 Apa ga zuvhire Ndafita eyi ya horokerere vagara owo, ta tumu vantu va ka va gwane, yeeyi vagara owo kwa swaukire unene. Ndafita kwa va tanterere asi: “Kareni moJeliko dogoro ngadi kure nonzwedu deni ntani nye ngomu tengura.”
6 Konyima, Vaamoni tava dimburura asi Ndafita ana va nyenge, makura Hanuni noVaamoni tava tumu vantu noyisiliveli yonokilograma 34 000* va ka futire matemba novarondi wononkambe koMesopotamiya,* Aramu-maka naSoba. 7 Awo kwa futilire matemba 32 000 ntani awo kwa futire hena hompa gwaMaka novakwayita vendi. Awo kwa wizire moMedeba, tava dike kamba zawo makura Vaamoni tava tundu moyitata yawo va ya rwe yita.
8 Apa ga yi zuvhire Ndafita, ta tumu Jowabu novakwayita vendi navenye, kukwatera mo vakwayita vendi wononkondo unene va ka va rwise. 9 Makura Vaamoni tava zi va ka sikame pevero lyositata yipo va ka rwe yita, ano vahompa ava va wizire kwa kere velike mezana.
10 Jowabu apa ga mwene vakwayita kuna kumutundilira konyima nokomeho, ta horowora vakwayita wononkondo moIsraeli, ta va ninki va ze va ka rwe noVasiliya. 11 Ta ninki mukurwendi Abisayi a pitisire vakwayita wokuhupa ko, yipo va ze va ka rwe noVaamoni. 12 Makura Jowabu ta tanta asi: “Nsene Vasiliya nava kara nononkondo kupitakana nge, wa hepa kuwiza o ya vatere nge. Nye nsene Vaamoni nava kara nononkondo kukupitakana, nani ya kuvatera. 13 Twa hepa kukara nononkondo nouradi, yipo tu popere vantu vetu noyitata yaKarunga gwetu, ano Jehova nga rugana eyi nga mona asi yiwa.”
14 Makura Jowabu novakwayita vendi tava zi va ka rwise Vasiliya, ano Vasiliya tava duka. 15 Apa va mwene Vaamoni asi Vasiliya vana duka, nawo tava dukire mositata va sige Abisayi. Konyima Jowabu ta zi koJerusarema.
16 Apa va dimbwilire Vasiliya asi Vaisraeli vana va fundu, tava tumu vantu va ka zigide Vasiliya ava va kara pepi nomukuro.* Awo kwa va pitisilire Sopaka mukurona govakwayita vaHadadesere.
17 Apa ga yi zuvhire Ndafita, ta ninki Vaisraeli navenye va ponge, makura tava rutu mukuro gwaJorodana va ze va ka va rwise. Ndafita ta zi a ka rwise Vasiliya, makura nawo tava mu rwisa. 18 Nye Vasiliya tava duka va tjwayuke Vaisraeli; Ndafita kwa dipagere vantu 7 000 ava va rondere momatemba novakwayita woVasiliya 40 000 ntani age hena kwa dipagere Sopaka mukurona govakwayita. 19 Apa va yi dimbwilire vakareli vaHadadesere asi Vaisraeli vana va fundu, makura tava tulisa po usimbu mbili naNdafita ntani tava tameke kumuruganena; Vasiliya kapi va here hena kuvatera Vaamoni.