Ehistoli lyokuhova
20 Ketamekero lyomvhura* posiruwo esi ava zi vahompa koyita, Jowabu kwa pitisilire vakwayita va ze va ka zonagure sirongo soVaamoni. Age kwa kundurukidire sitata saRaba, ano Ndafita kwa kere moJerusarema. Jowabu kwa rwisire sitata saRaba ntani ta si zonagura po. 2 Makura Ndafita ta gusa nkata ezi za kere komutwe gwaMalikamu,* ta dimburura asi mukumo gwazo kwa sikire ponokilograma 34* dongorodo ntani nkata ozo kwa kere nomamanya gondiro makura tava zi dwareke Ndafita komutwe. Ndafita kwa ka simbire hena emona lyenzi lyomositata. 3 Age kwa gusire vantu ava va kere mositata, ta va ninki va tete mamanya, va rugane makuva ntani yiruganeso yimwe yoyivera youtwe. Ndafita kwa rugene yininke eyi koyitata nayinye yoVaamoni. Konyima, Ndafita novakwayita vendi tava tengura koJerusarema.
4 Konyima, Vaisraeli tava ru yita noVafilisiti moGesere. Posiruwo oso, Sibekayi gomoHusa ta dipaga Sipayi gomoruvharo roVarefa, makura tava va fundu.
5 Vaisraeli tava ru hena yita noVafilisiti, ano Elihanani munaJaire ta dipaga Rahimi mumbyaGolyata gomoGata, ogu ga kere negonga eli lya kere nositji sokuhura ponkambo ezi ava honzere.
6 Konyima, tava ru hena yita moGata omu ga kere mugara getundusika. Age kwa kere nononyara ntazimwe komawoko gendi nagenye nokonompadi dendi. Sivaro sado kwa kere 24 ntani nage kwa kere gomoruvharo roVarefa. 7 Age kwa swawire Vaisraeli, makura Jonatana munaSimeya ta mu dipaga. Simeya kwa kere mukurwaNdafita.
8 Vagara navenye ava kwa kere womoruvharo roVarefa ntani awo kwa tungire moGata. Awo kwa va dipagere Ndafita novakareli vendi.