Ehistoli lyokuhova
21 Makura Satana* ta rwisa Vaisraeli ntani ta ninkisa Ndafita a varure Vaisraeli. 2 Makura Ndafita ta tantere Jowabu novapitisili wovakwayita asi: “Zendeni mu ka varure Vaisraeli kutundilira koBere-seba dogoro koDana, makura mu ya tantere nge yipo ni dive sivaro sawo.” 3 Nye Jowabu ta tanta asi: “Ngano Jehova a vhukise vantu vendi yikando 100! Hompa gwange, vantu navenye ava nani kapisi vakareli woge ndi? Morwasinke nye ono harere kurugana yininke eyi? Ove kuna hara kuninkisa Vaisraeli va zone ndi?”
4 Nye hompa kapi ga purakenene kwaJowabu. Makura Jowabu ta gendi mosirongo nasinye soVaisraeli, ano konyima ta tengura koJerusarema. 5 Jowabu ta gava kwaNdafita sivaro sovantu ava va tjenge. Vagara navenye woVaisraeli ava va kere nomarufuro kwa kere 1 100 000, ano vagara womorudi rwaJuda ava va kere nomarufuro kwa kere 470 000. 6 Nye vantu womorudi rwaRevhi noru rwaMbenyameni kapi va va tjenge, yeeyi Jowabu kapi ga kwatesere ko eyi ga uyungire hompa.
7 Karunga gousili kwa mu guvisire unene yininke eyi, makura ta dipaga Vaisraeli. 8 Makura Ndafita ta tantere Karunga gousili asi: “Ame na tura nzo zonene pokurugana yininke eyi. Na kanderere, gusira nge po ame mukareli goge, yeeyi ame kwa rugana yininke yougova.” 9 Jehova makura ta tantere Gada, ogu nga tantere Ndafita mamoneko asi: 10 “Zende o ka tantere Ndafita asi: ‘Jehova kuna kutanta asi: “Ame tani ku ninki o horowore pokatji koyininke yitatu. Horowora po sininke simwe esi nani ku retera.”’” 11 Makura Gada ta zi kwaNdafita, ta ka mu tantera asi: “Jehova kuna kutanta asi: ‘Horowora 12 nsene ono hara mosirongo mu kare erumbu nomvhura ntatu, ndi ngadi mu dipage nonkore deni makwedi gatatu, ndi ngaru mu tengeke rufuro rwaJehova pokuninka mosirongo seni mu kare ehamba mazuva gatatu ntani muengeli gwaJehova nga zonagura sirongo nasinye soVaisraeli.’ Gazadara ko eyi nani ka limburura ogu ana tumu nge.” 13 Makura Ndafita ta tantere Gada asi: “Ayo kuna kudigopera nge. Na kanderere, ninka Jehova a tengeke nge nye kapisi vantu, yeeyi age ga kara nonkenda zonene.”
14 Makura Jehova ta tumu ehamba moIsraeli, ano Vaisraeli 70 000 tava fu. 15 Karunga gousili ta tumu hena muengeli a ka zonagure Jerusarema. Nye komeho a tameke kuyirugana, Jehova ta yi mono makura ta livere* morwa udigu ou ga retere. Makura ta tantere muengeli ogu ga retere ezonauko asi: “Hageka! Ganda kuwoko koge.” Muengeli gwaJehova kwa sikeme pepi norupare rwaOrunani goMujebusi.
16 Apa ga kankukire Ndafita, ta mono muengeli gwaJehova ana sikama pokatji keguru nevhu, age ana gonwene rufuro rwendi koJerusarema. Makura Ndafita nomasimbi ava va dwere nonsako, tava ligandere pevhu nokulinyongamena. 17 Makura Ndafita ta tantere Karunga gousili asi: “Ame nyame na geve mpangera asi va varure vantu. Ame nyame na zona ntani nyame na rugana epuko, nye vantu ava* yisinke va zona? Karunga gwange Jehova, tengeka nge kumwe nepata lyotate, nye wa ha tengeka vantu woge.”
18 Muengeli gwaJehova makura ta tantere Gada, a ka tantere Ndafita a ze, a ka tungire Jehova sizambero porupare rwaOrunani goMujebusi. 19 Makura Ndafita ta zi ngwendi moomu ga mu tanterere Jehova kupitira mwaGada. 20 Posiruwo oso, Orunani kwa hwege rukokotwa ano apa ga pirukire ta mono muengeli. Vana vendi wovagara vane ava ga kere nawo tava vanda. 21 Ndafita kwa wizire kwaOrunani, ano apa ga kankukire Orunani, ta mono Ndafita makura ta tundu po usimbu porupare ntani ta linyongamene komeho zaNdafita. 22 Ndafita ta tantere Orunani asi: “Randesa nge* evango eli apa rwa kara rupare, yipo ni tungire po Jehova sizambero. Li randesa nge kuliza nomukoso gwalyo, makura ehamba eli lina kuhepeka vantu ngali hage.” 23 Nye Orunani ta tantere Ndafita asi: “Li gusa tupu, li kare lyoge hompa gwange ntani ngano o rugane nkenye eyi ono kumona asi yiwa. Nongombe dononzambo deswakerero dedi nosireyi sokuhwagesa mbuto, o yi ruganese ngoyitare ntani norukokotwa o ru gave ngonzambo zombuto. Ame tani yi ku pe nayinye.”
24 Nye hompa Ndafita ta tantere Orunani asi: “Hawe, nina hepa kuliranda kuliza nomukoso gwalyo, morwa ame kapi tani vhuru kugusa yininke yoge ni yi gave kwaJehova ndi ni gave nzambo zeswakerero ezi nina dili kufutira.” 25 Makura Ndafita ta randa evango olyo kwaOrunani nongorodo zonokilograma ntambali.* 26 Ndafita ta tungire po Jehova sizambero, ta zambere po nonzambo deswakerero nononzambo dombili ntani ta kanderere kwaJehova. Makura ta mu limburura pokutuma mundiro gu tunde meguru, gu hwike nonzambo edi da kere posizambero sononzambo deswakerero. 27 Makura Jehova ta pangere muengeli a tengwidire rufuro rwendi mosiraro saro. 28 Apa ga mwene Ndafita asi Jehova ana limburura ekanderero lyendi porupare rwaOrunani goMujebusi, ta twikire kuzambera po nonzambo. 29 Nampili ngoso, posiruwo oso nkongoronzugo zaJehova ezi ga dikilire Mosesa momburundu nosizambero sononzambo deswakerero kwa kere kondundu moNgibiyoni. 30 Nye Ndafita kapi ga vhulire kuza ko a ka pure Karunga, yeeyi age kwa tjilire rufuro romuengeli gwaJehova.