Ehistoli lyauvali
21 Makura Jehosafata ta fu ngwendi ozinakuru, tava ka mu horeka oku va horeka ozinakuru, moSitata saNdafita, ano munendi Jehoramu ta mu kwama mouhompa. 2 Vamumbya vendi kwa kere Asaliya, Jehiyeli, Sakaliya, Asaliya, Mikayera naSefatiya. Navenye ava kwa kere vana vaJehosafata hompa gwaIsraeli. 3 Ano guhyawo kwa va pere mauhwi gosiliveli nongorodo nayimwe yomulyo kumwe noyitata yomoJuda eyi va kundurukida makuma, nye guhyawo kwa pere Jehoramu uhompa, yeeyi Jehoramu kwa kere mbeli.
4 Jehoramu apa ga kweme oguhwe mouhompa, age kwa dipagere vamumbya vendi norufuro ntani novapangeli vamwe womoIsraeli, yipo a nkondopeke uhompa wendi. 5 Jehoramu kwa kere nonomvhura 32 apa ga kere hompa ntani kwa pangerere moJerusarema nomvhura ntantatu. 6 Age kwa kweme sihonena sovahompa woVaisraeli ngwendi vemepata lyaAhaba, yeeyi age kwa kwere munaAhaba ntani kwa twikilire kurugana yininke yoyidona kosipara saJehova. 7 Nye Jehova kapi ga here kuzonagura po epata lyaNdafita morwa egwanekero* eli ga tulire po naNdafita, yeeyi age kwa mu tumbwidilire asi nga mu pa ramba nkenye apa kumwe novana vendi.
8 Posiruwo esi ga pangerere, Vaedomu kwa rwanesere vantu womorudi rwaJuda, makura tava horowora hompa gwawo. 9 Makura Jehoramu novapitisili vendi wovakwayita tava zi kumwe nomatemba gendi, ano masiku ta ka rwisa Vaedomu novapitisili vawo womatemba ava va mu kundurukidire, makura ta va fundu. 10 Nye Vaedomu kwa twikira kurwisa vantu womorudi rwaJuda dogoro naina. Vantu womositata saLibuna nawo kwa mu rwisire posiruwo oso, yeeyi age kwa sigire Jehova Karunga gozinakuru. 11 Age kwa dikire hena mavango gokukarera yikarunga yoyimpempa gokonondundu moJuda ntani kwa ninkisire vantu womoJerusarema va karere yikarunga yapeke,* makura vantu womorudi rwaJuda tava hageke kukarera Karunga.
12 Konyima, ta gwana mbudi ezi ga mu tjangerere muporofete Eliya asi: “Jehova Karunga gonyokokuru Ndafita kuna kutanta asi: ‘Ove kapi wa kwama sihonena soguho Jehosafata ndi saAsa hompa gorudi rwaJuda. 13 Nye ove kwa kwama sihonena sovahompa woVaisraeli ntani kwa ninkisa vantu womoJerusarema nava womoyitata yapeke yomoJuda va karere yikarunga yapeke* ngwendi moomu va yi rugene vemepata lyaAhaba. Ove kwa dipaga hena vana woguho, vamumbya vanyamoge ava va ku pitakanene. 14 Yipo nye, Jehova nga tengeka vantu woge novana woge wovagara novakadi woge ntani nga zonagura nayinye eyi wa weka. 15 Ove ngaga kugwana mauvera gokulisiga-siga kukwatera mo uvera wokomaura. Awo ngau kuhepeka nkenye ezuva dogoro maura goge ngaga tjapuruke mo.’”
16 Makura Jehova ta ninkisa Vafilisiti noVaarabiya ava va kere pepi noVaetiyopiya va rwanese Jehoramu. 17 Makura awo tava wiza mosirongo sorudi rwaJuda, tava si homokere, tava gusa emona eli lya kere mombara* zahompa novana vendi wovagara ntani novakadi vendi. Awo kwa mu sigilire po tupu munendi gomunona gomumati gedina Jehoyahasi.* 18 Ano konyima zeyi, Jehova ta mu ninki a kare nouvera wokomaura wokudira kuveruka. 19 Konyima zonomvhura mbali, uvera owo kwa ninkisire maura gendi ga tjapuruke mo makura ta fu, morwa uvera owo kwa mu hepekere unene. Ano ponomfa dendi vantu kapi va hwamekere mundiro gomunene ngwendi gogu va hwamekerere ozinakuru. 20 Jehoramu kwa kere nonomvhura 32 apa ga kere hompa ntani age kwa pangerere moJerusarema nomvhura ntantatu. Apa ga fire, kwato ogu ga guvire makura tava mu horeke moSitata saNdafita, nye kapisi mevango omu ngava horeke vahompa.