Egaununo 12

Ekuho lyaJesus

KONYARA zomakwedi ntazimwe apa ga tamekere kuzuvhisa Johanesa, Jesus ta wiza kwendi koJorodana, age opo kuna kara nonomvhura 30. Nokonda musinke? Mokukadingura tupu ndi? Ndi Jesus kwa here kukatara omu sirugana saJohanesa sina kuza komeho? Hawe, age kwa pulire Johanesa a mu kuhwe.

Johanesa ta mu kava ta tanta asi: “Ame nyame ngano na fira kukuhwa nge ove, ngapi hena omu no wizira nge ame?” Johanesa ga divire asi mumbyendigona Jesus age MunwaKarunga gokulikarera. Eyi yiyo Johanesa ga vataukilire noruhafo mezimo lyozina apa Mariya ga ya va dingwire age nezimo. Ozina vaJohanesa Elisabeta va tanterere munwawo kuhamena yininke eyi. Ntani hena va mu tanterere ediviso lyomuengeli kuhamena ehampuruko lyaJesus ntani novaengeli ava va monekerere vasita masiku aga va hampurukire Jesus.

Yimo, oJesus naJohanesa va lidivire nawa. Ntani Johanesa ga divire asi ekuho lyendi kapi lya fira Jesus. Alyo lyava va litezwilire kononzo dawo, nye Jesus kapi ga kere nononzo. Nampili ngomu ga patanene Johanesa, Jesus ta limburura asi: “Siga tupu yi kare, yeeyi ntani yi tu wapera, tu sikise mo nayinye eyi ya hungama.”

Morwasinke ya waperere Jesus mokumukuhwa? Morwa ekuho lyaJesus kwa kere sidiviso sokulilikida mwene mokurugana mpango zaGuhwe, kapisi mokulitezurura kononzo. Jesus kwa kere muhongi goyikungu, nye siruwo sa sikire mo mokuvareka sirugana sendi esi ga mu tumininine Jehova Karunga apa pevhu. Omu ono kugazara, apa Johanesa ga kuhwire Jesus, ga ndindilire asi napa horoka yininke yokulikarera ndi?

Konyima, Johanesa ga divisire asi: “Ogu ga tuma nge, ni ya kuhwe nomema, yige ga tanterere nge asi, ‘Ogu ngo mona, Mpepo azo kuna kumutembera zi kare pwendi, yige googo a kuhwisa koMpepo zoKupongoka.’” Johanesa ga ndindilire mpepo zaKarunga mokutembera gumwe ogu na kuhwa. Yipo nye asi Johanesa kapi ya mu tetukisire unene apa ga zaukire Jesus momema makura ta mono “mpepo zaKarunga tazi mu hegumukire peguru lyendi ngwendi nkutji.”

Nye, kugusa ko eyi, yoyinzi ya horokere apa va mu kuhwire Jesus. ‘Eguru kwa mu zegurukilire.’ Yinke yina kutanta eyi? Eyi kutanta asi apa va mu kuhwire, va mu pere hena nondunge dendi danare ngadodina ga kere nado age simpe meguru. Yipo nye, Jesus ga diworokere nawa-nawa eparu lyendi ngomunwa gopampepo gwaJehova Karunga, kukwatera mo yininke nayinye eyi ga uyungire nage Karunga meguru komeho zokuyakara ngomuntu apa pevhu.

Mokugwederera ko, pekuho lyendi, meguru tamu tundu ezwi lina kutanta asi: “Ogu yige Munwange ogu na hara, ga za nge komutjima.” Ezwi lyalye lya kere? Ezwi lyaJesus mwene ndi? Hawe! Alyo kwa kere lyaKarunga. Yosili Jesus kuna kara MunwaKarunga, kapisi Karunga mwene ngwendi moomu ava yi uyunga vantu vamwe.

Nampili ngoso, Jesus kwa kere munwaKarunga gopanyama, ngwendi moomu ga kere muntu gokuhova Adamu. Murongwa Rukasa, konyima zokusingonona ekuho lyaJesus, kwa tjenge asi: “Jesus apa ga tamekere sirugana sendi, ado nomvhura dendi nomurongo ntatu. Age kwa kere munwaJosefa zaEli, . . . zaNdafita, . . . zaAbirahamu, . . . zaNowa, . . . zaAdamu, Adamu zaKarunga.”

Adamu kwa kere “zaKarunga,” kutanta asi munwendi gopanyama, ano Jesus nage ngosikwawo. Jesus yige muntu gomulyo po ogu ga parukire pevhu, eyi kuyimonenena apa atu konakona eparu lyaJesus. Nampili ngoso, pekuho lyendi, Jesus kwa hwililire melikwatakano lyepe naKarunga, mokuyakara hena MunwaKarunga gopampepo. Karunga kwa mu zigidire hena meguru pokumupa sirugana esi sa mu twaredesere a gave mwenyo gwendi gopasintu ngonzambo a fire vantu wononzo. Mateusa 3:13-17; Rukasa 3:21-38; 1:34-36, 44; 2:10-14; Johanesa 1:32-34; Vahebeli 10:5-9.

▪ Morwasinke oJesus naJohanesa va lidivililire nawa?

▪ Mokumona asi Jesus kapi ga tulire nkenye nzo, morwasinke va mu kuhwilire?

▪ Mokuliza neyi ga divire Johanesa kuhamena Jesus, morwasinke ga dilire kutetuka apa mpepo zaKarunga za hegumukilire Jesus?