Egaununo lyoronazimwe

‘Yipo nomu hovera tanko kupapara Uhompa’

1. (a) Morwasinke Jesus ga korangederere vapurakeni vendi asi va papare tanko pomuhowo Uhompa? (b) Epuro musinke natu lipura nyamwetu?

MONZOGERA moGalireya kupitakana nomvhura 1 900 da ka pita, Jesus kwa korangedere vapurakeni vendi asi: “Yipo nye nomu hovera tanko kupapara Untungi waKarunga neyi ga hepa ko kweni.” Nye morwasinke ya karerere nomulyo? Nani siruwo saKristusa sokukagwana nonkondo doUhompa kapisi kwa kere simpe mauye gomanzi? Yimo, nye Uhompa woUmesiyasa kwa kere ntambo omu Jehova na vhura kulikida uhunga wendi wokupangera nokusikisa mo sitambo sendi sosinene kevhu. Nkenye gumwe ogu a pandura mulyo goyininke oyo kupapara pomuhowo Uhompa meparu lyendi. Nsene asi yimo ya kere ngoso mouye womuhowo, ngapi tupu nye ngano pwanaina, apa Kristusa va mu tura posipundi ngaHompa! Epuro kuna kara nye asi, mparukiso zange kulikida asi ame kuna kupapara Uhompa waKarunga pomuhowo ndi?—Mateusa 6:33.

2. Yininke musinke ava kondjere kutaparara vantu wovanzi?

² Naina, mamiliyona govantu mouzuni mudima kuna kupapara pomuhowo Uhompa. Awo kuna kulikida ekwatesoko lyawo kepangero lyoUhompa mokudemenena maparu gawo mokurugana eharo lyaJehova, morwa awo kwa ligava kwendi. Melilimbo, sinzi sovantu kuna hara kupapara yininke youzuni. Vantu kutaparara yimaliva ntani noyiweka noyilihafesa yokuvhura kuranda noyimaliva. Ndi awo kulitura mo unene mokuzerura meho zoyirugana yawo. Mparukiso zawo kulikida kuligazara tupu vene noyiweka ntani noyilihafesa. Nsene va kara asi va pura mwaKarunga, kumutura mevango lyauvali.—Mateusa 6:31, 32.

3. (a) Emona musinke ga korangedere Jesus varongwa vendi asi va lipapare, namorwasinke? (b) Morwasinke pwa pilira hepero zokukara nosinka sokupitakanena kuhamena yininke yopanyama?

³ Nye Jesus kwa geve epukururo eli kovarongwa vendi: “Walye omu lipongaikire emona pevhu,” morwa kwato emona lyangesi eli ali kara narunye. Age kwa tente asi: “Nye omu lipongaikire emona meguru” pokukarera Jehova. Jesus kwa korangedere vasikuli vendi va kare nomeho ‘gokukanguka’ mokupakera sinka nokudemenena kurugana eharo lyaKarunga. Age kwa va tanterere asi: “None nokuvhura si kukerera Karunga nomamona.” Nye ngapi koyihepwa yopanyama—nondya nomudwaro ntani nouturo? Jesus kwa pukwilire asi: “Walye omu lipakere . . . sinka.” Age kwa va gazaresere koyidira—Karunga kuyipa nondya. Jesus kwa korangedere vasikuli vendi va lirongere ko konombya—Karunga kudidwareka. Nani vakareli vaJehova wovantu wonondunge kapi va kara nomulyo kupitakana eyi? Jesus kwa tente asi: “Yipo nye nomu hovera tanko kupapara Untungi waKarunga neyi ga hepa ko kweni, ano yininke eyi nayinye [ya hepwa] ngano ngava yi mu gwederera po.” (Mateusa 6:19-34) Yirugana yoge kulikida asi ove wa yi pura eyi ndi?

Wa ha ninka usili woUhompa u fe

4. Yisinke yokuvhura kukara yitundwamo nsene muntu a demenena unene poyiweka yopanyama?

⁴ Ayo ya hungama mokugazadara kuhamena kukara noyihepwa yopanyama yina gwanene kwanyamoge ntani nepata lyoge. Nampili ngoso, nsene muntu a gazadara unene kuhamena yininke yopanyama, yitundwamo kuvhura kukara yoyidona. Nampili a tante asi ga pura moUhompa, nsene momutjima gwendi age kutura yininke peke pomuhowo, usili woUhompa kuvhura u fe. (Mateusa 13:18-22) Pasihonena, sikando simwe mupangeli gomumati gongawo kwa pulire Jesus asi: “Yisinke nye nani rugana ni gwane mwenyo gwanarunye?” Age kwa kere nomparukiso zokuvyuka ntani nga tekura vakwawo momuwa, nye age kwa kakaterere unene kemona lyendi lyopanyama. Age kapi ga vhulire kulisiga yipo a kare musikuli gwaKristusa. Yipo nye ga zumbanesere mpito ezi ngano za vhulire kumutwaredera kokukakara naKristusa moUhompa weguru. Posihorokwa sina Jesus kwa tente asi: “Ani udigu unene kwava va weka yoyinzi kuza moUntungi waKarunga.”—Marukusa 10:17-23.

5. (a) Yininke musinke Paurusa ga korangedere Timoteusa asi yi mu gwanene, namorwasinke? (b) Ngapi omu a ruganesa Satana “edowo lyokudowokera emona” ngosiraha sokuzonagwisa?

⁵ Konyima zonomvhura, mupositoli Paurusa kwa tjangerere Timoteusa ogu ga kere posiruwo sina moEfeso, sigongaikira sonongesefa. Paurusa kwa mu diworokesere asi: “Mouzuni kapi twa reta mo yuma, ose hena kapi ngatu pitura mo yuma. Ano ntene tuna kara nonondya nomudwaro, ngano yi tu gwanene makura.” Kurugana yipo o gwane ‘nondya nomudwaro’ gwanyamoge ntani nepata lyoge kwa vyuka. Nye Paurusa kwa rondwere asi: “Ava va hara kugawopa, kuza momaheteko nomoyiraha yomadowo gomanzi gougova gokuretesa ehudi lyenzi. Ago hena kukoreka vantu moupongo nemezonauko.” Satana kwa kotoka. Pomuhowo age kuvhura a koke muntu mononkedi dononunu. Yokukwama ko kuvhura o gwane masininiko gomanene, nampo mpito zokukuzerura moyirugana ndi yirugana yoyiwa eyi ayi futu nawa nye tayi gusa siruwo esi wa tulire pomuhowo koyininke yopampepo. Nsene kapi tuna kuvangarara, “edowo lyokudowokera emona” kuvhura kudipaga yininke yoUhompa eyi yina kara nomulyo unene. Paurusa kwa yi tanta ngesi asi: “Vamwe eyi va li dowokera, yiyo lina va gusa mo mepuro, makura vana lizweke nye momaruhodi gomanzi.”—1 Timoteusa 6:7-10.

6. (a) Yisinke natu rugana yipo tu pire kufa moyiraha yokuhara emona? (b) Ehuguvaro musinke natu vhura kukara nalyo nampili mukaro goyikweparu mouzuni gu fane ngesi naina?

⁶ Neharo lyenene kwamunazina gopaSikriste, Paurusa kwa korangedere Timoteusa asi: “Likara ure noyininke oyo nayinye” ntani “Lirombera elirombero lyewa lyepuro.” (1 Timoteusa 6:11, 12) Ayo kwa hepa elituromo lyenene nsene asi tatu ka henduka kutupitwilira mparukiso zeharo lyemona zouzuni ou wa tu kundurukida. Nye nsene tu litura mo tu lize nepuro lyetu, Jehova kapi nga tu zumba. Nampili nondando di zeruke nepiro lyoyirugana lina vhuka, age nga divilisa asi ose tuna kara neyi twa hepa nawa-nawa. Paurusa kwa tjenge asi: “Nyokeni edowo lyoyimaliva, yi mu gwanene yeeyi mwa kara nayo, yeeyi Karunga kwa tanta asi, ‘Ame kapi ngani ku zumba ndi ni ku sige.’ Yipo nye natu uyungira nehuguvaro asi: ‘Hompa yige Mukwafi gwange, yinke nani tjilira. Muntu a tompore nge yinke?’” (Vahebeli 13:5, 6) Ano Hompa Ndafita kwa tjenge asi: “Ntaantani nina kurupa, na kere ni mumati, nye simpe kapi na mona rumwe muhungami asi va mu zumbe, ndi asi vana vendi va hehere nondya.”—Episarome 37:25.

Varongwa womuhowo tava gava sihonena

7. Mapukururo musinke gokuhamena kuzuvhisa ga geve Jesus kovarongwa vendi, ntani morwasinke ya karere eyi asi yina lizi?

⁷ Konyima zapa Jesus ga pere vapositoli vendi edeuro lyokugwanena, age kwa va tumine moIsraeli va ka zuvhise mbudi zongwa nokudivisa asi: “Untungi waKarunga pepi una kara.” Ee, mbudi musi zokutetura za kere! Hompa goUmesiyasa, Jesus Kristusa kwa kere mokatji kawo. Jesus kwa pamperekedere vapositoli va kare nehuguvaro mekungo lyaKarunga, morwa awo kwa ligeve vene koyirugana yaKarunga. Age kwa tente asi: “Nokupitura si yuma va gende nayo monzira, nompango si nondjato si nonondya noyimaliva si. One hena nagumwe si na simba yikoverero yivali. Nsene vana mu tambura membo, tomu kara moomo dogoro noku ngomu pita.” (Mateusa 10:5-10; Rukasa 9:1-6) Jehova kwa ka yi mwene nawa-nawa asi yihepwa yawo tava ka yi gwana kupitira moVaisraeli vakwawo ava va kere nompo zokutambura vagenda.

8. (a) Morwasinke Jesus ga gaverere mapukururo gomape gokuzuvhisa siruwogona tupu komeho zonomfa dendi? (b) Yisinke simpe eyi ya hepere kukara yomuhowo momaparu govasikuli vaJesus?

⁸ Konyima zeyi, siruwogona tupu komeho zonomfa dendi, Jesus kwa vangaresere vapositoli vendi kousili ou asi komeho ngava rugana momukaro nagopeke. Morwa erwaneso lyopaveta koyirugana yawo, etamburo momambo kapi nava ka li mona hena unene moIsraeli. Ntani hena, mosiruwogona awo tava ka twara mbudi zoUhompa koyirongo yoVapagani. Ngesi awo ya va tumbukilire kuza “nondjato zoyimaliva” ntani nezi “zomorugendo.” Nampili ngoso, awo kwa va tumbukilire va papare tanko Uhompa waJehova nouhungami wendi, nokuhuguvara asi Karunga na tungika elituromo lyawo va gwane nondja nomudwaro.—Rukasa 22:35-37.

9. Ngapi omu Paurusa ga tulire Uhompa pomuhowo meparu lyendi posiruwo sooso ga pakerere sinka yihepwa yendi yopanyama, ntani epukururo musinke ga geve ko kuhamena eyi?

⁹ Mupositoli Paurusa kwa kere sihonena sosiwa sagumwe ogu ga sikisire mo mapukururo gaJesus. Paurusa kwa tulire sirugana sokuzuvhisa somuhowo meparu lyendi. (Yirugana 20:24, 25) Apa nga zi a ka zuvhise, age nga pakere mwene mbili yihepwa yendi yopanyama mokurugana notenta. Age kapi nga ndindire asi wopeke va mu rere. (Yirugana 18:1-4; 1 Vatesaronika 2:9) Nye age kwa yi pandwire unene nsene wopeke tava likida eharo lyawo mokumutambura momambo gawo nokumupa mauhwi. (Yirugana 16:15, 34; Vafilipi 4:15-17) Paurusa kapi ga korangedere Vakriste asi va sige yitumbukirwa yawo yemepata yipo va ka zuvhise, nye va gwane ehetakaneso moyitumbukirwa yawo yokulisiga-siga. Age kwa va pukwilire asi va rugane nokuhara vanepata lyawo nokuligawinwina nava wopeke. (Vaefeso 4:28; 2 Vatesaronika 3:7-12) Age kwa va korangedere va ture ehuguvaro lyawo mwaKarunga, kapisi momamona gopanyama, nokuruganesa maparu gawo monkedi zokulikida asi awo nawa-nawa vana diva asi yisinke yomulyo po unene. Kuliza nerongo lyaJesus, eyi kwa tembe kupapara pomuhowo Uhompa waKarunga nouhungami wendi.—Vafilipi 1:9-11.

Tura Uhompa muhowo meparu lyoge

10. Yisinke ayi tanta kupapara tanko Uhompa?

¹⁰ Dogoro pokusika papi apa atu ligawinwine mbudi zongwa zoUhompa ose nyamwetu nava wopeke? Oyo poyikando yimwe kukwama koukaro ntani nokonkedi zorupandu rwetu. Diworoka asi Jesus kapi ga tente asi: ‘Papareni Uhompa nsene kwato yopeke eyi muna kurugana.’ Mokudiva mulyo goUhompa, age kwa likidire eharo lyaGuhwe mokutanta asi: “Hoveni kupapara Untungi waKarunga.” (Rukasa 12:31) Nampili ngomu wovanzi vetu twa hepa kurugana yipo tu pakere mbili yihepwa yetu ntani neyi yepata, nsene ose twa kara nepuro, maparu getu taga ka kunduruka koyirugana yoUhompa eyi ga tu pa Karunga. Posiruwo sooso, ose tatu ka kunga yitumbukirwa yetu yepata.—1 Timoteusa 5:8.

11. (a) Ngapi omu Jesus ga yi likidire asi kapisi navenye ngava vhura kurugana yokulifana mokuhanesa mbudi zoUhompa? (b) Nokonda musinke adi kundama eyi a vhuru kusikisa mo muntu?

¹¹ Vamwe kuvhura kugava siruwo sokupitakana wopeke moyirugana yokuzuvhisa mbudi zongwa zoUhompa. Nye mosifanekeso sendi sokuhamena evhu lyokulisiga-siga, Jesus kwa yi likidire asi navenye ava va kara ngwendi evhu lyewa ngava yima yiyimwa. Dogoro pokusika papi? Mukaro gwankenye gumwe kwa lisiga. Ukurona noukanguki ntani noyitumbukirwa yepata kuna kara nokonda. Nye nsene pana kara rupandu rorunene, kuvhura kusikisa mo yoyinzi.—Mateusa 13:23.

12. Sitambo musinke sopampepo sosiwa vana kukorangeda unene po vadinkantu asi va si tarurure?

¹² Ayo ya wapa mokutura po yitambo eyi ngayi tu vatera mokunenepeka elihamekomo lyetu moyirugana yoUhompa. Vadinkantu va kona kugazadara ko nawa kuhamena sihonena sosiwa soMukriste gomudinkantu gelituromo Timoteusa. (Vafilipi 2:19-22) Yisinke hena yokuvhura kuvawapera nsene kapisi kuza moyirugana yokuzuvhisa siruwo nasinye nsene vana mana sure zawo? Vakurona nawo ngava gwana mo uwa mokutura po yitambo yopampepo yoyiwa.

13. (a) Yilye gokutokora asi ose nyamwetu yokusika kupi natu vhura kurugana moyirugana yoUhompa? (b) Nsene tu papara nawa-nawa pomuhowo Uhompa, yisinke natu likida?

¹³ Montambo zokuninka asi tu kuyauke owo tuna kugazarera asi kuvhura va rugane yoyinzi, epuro lyetu lya kona kuturuganesa tu ture po mawapukururo gopanyamwetu yipo tu karere Karunga paapa twa hulira kukwama momukaro gwanyamwetu. (Varoma 14:10-12; Vagarata 6:4, 5) Ngomosihorokwa saJoba, Satana kurwanesa asi eyi twa hara po ose unene ungawo nehafo noukalinawa wanyamwetu ntani asi etumangedo lyetu mokukarera Karunga kwa kara lyokuligazara tupu pwanyamwetu. Nye nsene asi ose kuna kupapara nawa-nawa Uhompa pomuhowo, ose kuna kulihameka mo mokulikida Muzonaguli asi age munayimpempa. Ose kuna kugava elikido asi eyi twa tura yi kare yomuhowo meparu lyetu kuna kara kukarera Karunga. Mononkango detu nomoyirugana yetu, tatu likida eharo lyetu lyenene kwaJehova nekwatesoko lyetu moulimburukwi upangeli wendi wanayinye ntani neharo lyetu lyokuhara vakwetetu.—Joba 1:9-11; 2:4, 5; Yisewe 27:11.

14. (a) Morwasinke elikwamo lyoyirugana yomomapya lya karera nouwa? (b) Dogoro pomukaro gokusika kupi dina kulihameka mo Nombangi dononzi moyirugana yomomapya?

¹⁴ Elikwamo kuvhura kutuvatera tu sikise mo yokupitakana eyi natu sikisa mo momukaro nagopeke. Jehova mwene kwa “paka po siruwo” sokusikisa mo sitambo sendi. (Exodus 9:5; Marukusa 1:15) Nsene yina vhulika, ayo yiwa mokulihameka moyirugana yomomapya posiruwo wa paka po rumwe ndi rongadi mwankenye sivike. Mafere gomayovi goNombangi daJehova mouzuni mudima kwa litura mo ngovapioniri wokuvatera nokurugana peyereko novili mbali mezuva mokuzuvhisa mbudi zongwa. Mafere gomayovi gavamwe kwa litura mo ngovapioniri wokukarerera nokuruganesa novili dokuhetakanesa pwambali noharufa mezuva mokuzuvhisa mbudi zoUhompa. Vapioniri wokulikarera novatumwa kurugana hena siruwo sosire moyirugana yoUhompa. Ose kuvhura hena kupapara nompito da hana ewapaiko tu ligawinwine ehuguvaro lyoUhompa nankenye gumwe ogu na purakena. (Johanesa 4:7-15) Eharo lyetu lya kona kukara asi tu lihameke mo unene moyirugana eyi paapa una kuvhura kutupulisira ukaro wetu, morwa Jesus kwa pumbire asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.”—Mateusa 24:14; Vaefeso 5:15-17.

15. Morwasinke ono kulizuvhira asi epukururo lyomo-1 Vakolinte 15:58 kuhamena yirugana yetu ya wapera mosiruwo setu?

¹⁵ Mouumwe, momaruha nagenye gevhu, monomuhoko nadinye, Nombangi daJehova kuna kulihameka mompito zoyirugana eyi. Awo kusikisa mo pwanyamwawo epukururo eli ga retesa po Karunga moBibeli asi: “Omu likorerere, mwa ha linyunganga. Omu kare nkenye apa nomupampi moyirugana yaHompa, yeeyi mwa diva asi yirugana yeni eyi omu ruganene Hompa kapisi yomawoko-woko.”—1 Vakolinte 15:58.

Erugururo nzogera

• Apa Jesus ga tente asi twikireni ‘kupapara pomuhowo Uhompa,’ yisinke ga likidire asi yi kare pevango lyauvali?

• Etaro musinke natu kara nalyo kuhamena kupakera mbili yihepwa yopanyama yanyamwetu neyi yepata lyetu? Evatero musinke na tu pa Karunga?

• Momaruha musinke goyirugana yoUhompa natu vhura kulihameka?

[Efano pepenuno 107]

Mwankenye sirongo, naina Nombangi daJehova kuna kuzuvhisa mbudi zongwa komeho zokuwiza uhura