Egaununo lyomurongo

Uhompa ou ‘ngau kererera narunye’

1. Usili musinke ya likida yihorokwa youzuni mehistoli lyovantu?

YIHOROKWA yankenye ezuva mouzuni kulikida usili ou asi vantu kapi va gwana ruhafo mokunyoka upangeli waJehova nokuhetekera ko kulipangera vene. Kwato ngendeseso zoupangeli wovantu za reta po mauwa gokuhungama kovantu. Nampili ngomu vantu va gwederera ediwo lyawo lyoukonentu kupitakana pwanare, simpe kapi ya va vhulika kufunda mauvera ndi va kandane po nomfa, nampili komuntu gumwe googu. Mapangero govantu kapi ga gusa po yita nonyanya noukorokotji nezonauko ndi ruhepo. Mapangero gamwe gonyanya simpe kuhepeka vantu moyirongo yoyinzi. (Muudisi 8:9) Malirongokonentu nenyeneno ntani upofu kuretesa po enyateko lyevhu nomema ntani nompepo. Epirokugendesa nawa yikweparu kovampitisili kuninkisa wovanzi va gwanekere nomaudigu mokugwana yihepwa yeparu. Nomvhura mayovi edi va pangera vantu kwa likida nawa-nawa usili ou asi: “Nzira zovantu kapi za kara mepangero lyamwene; kutupu ogu a pangere kukaramwenyo kwamwene.”—Jeremiya 10:23.

2. Yisinke yelike yokuvhura kureta ekanduropo komaudigu govantu?

² Yisinke yokuvhura kureta ekanduropo? Uhompa waKarunga ou ga rongere Jesus vasikuli vendi asi va u kanderere: “Uhompa woge au wize. Mpango zoge ava zi [sikise] mo pevhu ngwendi meguru.” (Mateusa 6:9, 10) Uhompa waKarunga wemeguru kwa u singonona mwa-2 Peturusa 3:13 asi “eguru lyepe” eli ngali ka pangera ‘evhu lyepe,’ lina kutanta asi nkarapamwe zovantu wovahungami. Uhompa waKarunga wemeguru kwa kara nomulyo gomunene yipo nye Jesus ga u tulire siparatjangwa sedi lyezuvhiso lyendi. (Mateusa 4:17) Age kwa likidire evango eli natu u tura meparu lyetu, nokukorangeda asi: “Yipo nye nomu hovera tanko kupapara Untungi waKarunga neyi ga hepa ko kweni.”—Mateusa 6:33.

3. Morwasinke kulironga kuhamena Uhompa waKarunga kuna karere nomulyo unene ngesi?

³ Kulironga kuhamena Uhompa waKarunga kuna kara nomulyo unene ngesi, morwa ntaantani tupu Uhompa wina tau ka rundurura epangero lyevhu eli. Ndaniyera 2:44 (Bibeli zoRutjadi) kwa pumba asi: “Komazuva govahompa owo [mapangero aga gana kupangera ngesi] Karunga gemeguru nga ka tura po uhompa umwe [meguru] ou ngava dira kuzonagura konomvhura nadinye. Mpili epangero lyawo kapi ngava li gava kovantu nawopeke [vantu kapi ngava pangera hena evhu]; nye awo ngau ka ndembagura po nokulya mauhompa aga [gantaantani] nagenye, awo ngau ka sikama narunye.” Yipo nye asi Uhompa ngau ka hageka mazuva aga gouhura mokukazonagura po nkareso ezi zoyininke youdinikarunga. Upangeli wevhu koUhompa wemeguru kapi ngava ka u litatana hena. Natu vhura kukara norupandu asi epeperero eli ngau ka reta ngesi pepi-pepi lina kara!

4. Kuhamena koUhompa, yisinke ya horokere meguru mo-1914, ntani morwasinke yina karere eyi nomulyo kwetu?

⁴ Mo-1914, Jesus Kristusa kwa mu tumbire Hompa nokumupa nonkondo ‘a pangere mokatji kononkore dendi.’ (Episarome 110:1, 2) Momvhura zina hena, ‘mazuva gopouhura’ gonkareso ezi zoyininke youdinikarunga yipo ga tamekere. (2 Timoteusa 3:1-5, 13) Posiruwo sooso, yihorokwa eyi ga mwene Ndaniyera memoneko lyouporofete yipo ya horokere meguru. Jehova Karunga ogu “ga kererera po narunye,” kwa pere MunwaMuntu, Jesus Kristusa “epangero nefumano nononkondo dosiuhompa, asi vantu wonomuhoko nadinye nomarudi nomaraka nagenye va mu ruganene.” Memoneko Ndaniyera kwa tjenge asi: “Epangero lyendi ngali karerera, ano untungi wendi kapi ngau haga po.” (Ndaniyera 7:13, 14) Kupitira moUhompa wemeguru ou momawoko gaJesus Kristusa yimo nye Karunga nga ka ninka vahali wouhungami va ka hafere yininke yoyiwa eyi ga tembe apa ga tulire vakurona vetu wopomuhowo moParadisa.

5. Mafatururo musinke gokuhamena koUhompa gana kara nomulyo kwetu, namorwasinke?

⁵ Alyo kuna kara eharo lyoge o ka kare mulimburukwi goUhompa ndi? Nsene yimo, no hara kudiva ewapaiko nerugano lyepangero eli lyemeguru. Ove no hara kudiva eyi lina kurugana ngesi, neyi ngali ka rugana komeho ntani neyi lya hepa ko koge. Omu ono kukonakona Uhompa nawa, rupandu roge kwawo rwa kona kukura. Nsene o limburukwa kepangero lyawo, to kara ono liwapaikire nawa mokutantera ko wopeke kuhamena yininke yoyiwa eyi ngau ka ruganena Uhompa waKarunga vantu wokulimburukwa.—Episarome 48:12, 13.

Vapangeli woUhompa waKarunga

6. (a) Ngapi omu aga likida Matjangwa asi upangeli wanayinye walye au monekesa Uhompa woUmesiyasa? (b) Ngapi omu nayi tu kundama eyi atu lirongo kuhamena Uhompa?

⁶ Sininke simwe somuhowo esi ali likida ekonakono lyangoso sesi asi Uhompa woUmesiyasa ou kuna kara elikido lyoupangeli wanayinye waJehova mwene. Jehova yige ga pa Munwendi “epangero nefumano nononkondo dosiuhompa.” MunwaKarunga konyima zokumupa nonkondo a tameke kupangera ngaHompa, mazwi meguru kwa ga waperere mokutanta asi: “Uhompa wouzuni ntaantani una kara nye waHompa gwetu [Jehova Karunga] naKristusa gwendi. Age [Jehova] nga pangera narunye nanarunye.” (Ehororo 11:15) Yipo nye asi nkenye yimwe eyi atu dimburura kuhamena Uhompa ou neyi au sikisa mo kuvhura kutukokera pepi naJehova mwene. Eyi atu lirongo ya kona kutura mwetu eharo lyokulimburukwa koupangeli wendi wanayinye narunye.

7. Morwasinke yina karere nomulyo gokulikarera kwetu eyi asi Jehova kwa tura Jesus Kristusa Mupangeligona?

⁷ Tarurura ko hena kousili ou asi Jehova kwa tura Jesus Kristusa posipundi ngoMupangeligona. NgoNkurungu ezi ga ruganesere Karunga mokurugana evhu novantu, Jesus ga diva yihepwa yetu kupitakana omu twa yi diva ose. Ntani hena, kutunda kevareko lyehistoli lyovantu, age kwa likida ‘ehafero lyendi lyokorudi rovantu.’ (Yisewe 8:30, 31; Vakorosi 1:15-17) Eharo lyendi kovantu enene sili mokuninka asi age kwa wizire mwene pevhu nokuyagava eparu lyendi ngosizoweseso mwarwetu. (Johanesa 3:16) Mwangoso age kwa tu pere ntambo zokutumangurura kononzo nonomfa ntani nompito zomwenyo gwanarunye.—Mateusa 20:28.

8. (a) Melisigo nomapangero govantu, morwasinke epangero lyaKarunga ngali karerera? (b) Elikwatakano musinke ga kara nalyo “mukareli gokulimburukwa gonondunge” kumwe nepangero lyemeguru?

⁸ Uhompa waKarunga epangero lyokukora lyokukarerera. Sikara salyo sokukarerera kwa si huguvaresa usili ou asi Jehova mwene kapi a fu. (Habakuku 1:12) Melilimbo novahompa wovantu, Jesus Kristusa ogu ga pa Karunga uhompa nage si kapi a fu. (Varoma 6:9; 1 Timoteusa 6:15, 16) Ava ngava ka pangera naKristusa poyipundi yemeguru ngava kara 144 000, vakareli vaKarunga wokulimburukwa wokutunda ‘momazimo nagenye nomaraka nonomuhoko nomarudi nagenye.’ Ava nawo kuvapa eparu lyokupira kufa. (Ehororo 5:9, 10; 14:1-4; 1 Vakolinte 15:42-44, 53) Sinzi sawo nare meguru vana kara, ano yihupwa yiwo vana kara simpe pevhu yiwo ava tura po “mukareli gokulimburukwa gonondunge” gomosiruwo esi, ogu a twara komeho moulimburukwi yihepwa yoUhompa owo apa pevhu.—Mateusa 24:45-47.

9, 10. (a) Mazedo musinke gomadona ngau ya gusa po Uhompa? (b) Nsene kapi tuna hara kukara nonkore doUhompa waKarunga, moyininke musinke natu pira kulihameka?

⁹ Ntaantani tupu posiruwohorowora saJehova, age nga tuma vakwayita vendi vepanguro ngava zerese evhu. Awo ngava ka zonagwilira po narunye vantu owo va tokora pwavene asi va pire kudimburura upangeli wendi wanayinye ntani owo ava nyenge mawapaiko aga a tura po kupitira mwaJesus Kristusa. (2 Vatesaronika 1:6-9) Eli ngali kara ezuva lyaJehova, siruwo esi va ndindira kutunda kwanare sokulikida uhunga wendi asi yige Mupangeli gwanayinye. “Ezuva lyaHOMPA tali wiza—ezuva olyo lyedona lyehandu lyendi lyedigu. . . . Vananzo navenye ngava hanauka po.” (Jesaya 13:9) “Ngali kara ezuva lyehandu lyenene, ezuva lyoudigu noruhodi, ezuva lyesovagani nomaremo.”—Sefaniya 1:15.

¹⁰ Maukarelikarunga nagenye goyimpempa nomapangero nagenye govantu novakwayita vago, aga a gendesa mupangeli gomudona gokudira kumoneka gouzuni ou, ngava ga zonagwilira po narunye. Navenye ava ava lihameke kouzuni ou momparukiso zawo zokuligazara tupu vene nezi zokupira kuhungama zokunyata ngava va zonagura po. Satana nonompepo dendi donondona ngava va kandura ko kegwanekero novatungi vepevhu, nokuvamangerera nomumvho eyovi. Uhompa waKarunga ngau ka pitisira nye yihorokwa nayinye yepevhu. Ee, epeperero musi ngava ka kara nalyo navenye owo va hara uhungami!—Ehororo 18:21, 24; 19:11-16, 19-21; 20:1, 2.

Sitambo soUhompa—mokusisikisa mo

11. (a) Ngapi omu Uhompa woUmesiyasa ngau ka sikisa mo sitambo saJehova kevhu? (b) Yisinke ngali ka tanta epangero lyoUhompa kovantu owo ngava ka paruka pevhu posiruwo oso?

¹¹ Uhompa woUmesiyasa ngau sikisa mo sitambo saKarunga somuhoverera kevhu. (Genesis 1:28; 2:8, 9, 15) Dogoro papa ngesi, vantu kapi ya va tompoka mokukwatesa ko sitambo sina. Nampili ngoso, ‘uzuni ou ngau wiza’ ngau limburukwa kwaMunwaMuntu Jesus Kristusa. Navenye ava ngava ka paruka esikisomo lyompanguro zaJehova konkareso zoyininke eyi yanare ngava ka ruganena kumwe naHompa Kristusa, nokukahafera kukarugana nkenye eyi nga ka pitisira, yipo evhu nalinye li ka kare paradisa. (Vahebeli 2:5-9) Vantu navenye ngava hafera yininke eyi va rugana vene nokugwana uwa koyininke yoyinzi eyi ngali gava evhu.—Episarome 72:1, 7, 8, 16-19; Jesaya 65:21, 22.

12. Ngapi omu ngava ka gwana valimburukwi woUhompa esikiliromo lyopanondunge noparutu?

¹² Adamu naEva apa va va sitire, kwa kere wokusikilira mo, ntani aso kwa kere sitambo saKarunga asi evhu va li zwide vana vawo, awo navenye va hafere usikiliromo wopanondunge noparutu. Mepangero lyoUhompa, sitambo esi ngasi ka sikilira mo nawa-nawa. Eyi kwa hepa egusopo lyoyininke nayinye eyi adi retesa po nonzo, yeeyi Kristusa kapi nga kara tupu Hompa nye nga kara hena Mupristeli goMunene. Nelididimiko, age nga vatera wokulimburukwa kwendi va gwane uwa kupitira monzambo zeparu lyendi lyopasintu zokudongonona po nonzo.

13. Mauwa musinke gopanyama ngaga ka kara mepangero lyoUhompa?

¹³ Mepangero lyoUhompa, vatungi vepevhu ngava ka hafera mauwa gomanene gopanyama. “Vatwiku ngava vhura kumona ko noyipurupuru ngayi zuvha ko. Yirema yomondambo ngayi lidinkura tayi dana, ano yipurupuru ngayi dimba unene.” (Jesaya 35:5, 6) Rutu oru rwa yipa morwa ukurupe ndi uvera ngaru wapa hena kupitakana romunona, ano nonkondo dokukanguka ngadi pingira mo upirankondo wourema. “Rutu rwendi taru tengwire udinkantu ru kare hena nononkondo.” (Joba 33:25) Ezuva tali wiza apa navenye ngava pira konda zokutanta asi ‘tani vere.’ Morwasinke? Morwa vantu ava ava tjira Karunga ngava va zakura mo moudigu wononzo ntani neguwo eli adi reta. (Jesaya 33:24; Rukasa 13:11-13) Yimo, Karunga “nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”—Ehororo 21:4.

14. Yisinke ya kwaterera mo mokugwana esikiliromo lyountu?

¹⁴ Nampili ngoso, kusikilira mo kwa kwaterera mo yoyinzi hena kupitakana kukara tupu nomarutu nonondunge dokukanguka. Ayo kwa kwaterera mo kulikida nawa yikara yaJehova, morwa ose kwa tu sita ‘tu kare ngwendi Karunga, tu mu fane.’ (Genesis 1:26) Mokusikisa mo eyi, ngapa ka hepwa erongo lyenene. Mouzuni woupe “ngamu kara uhungami.” Ngamoomu ga yi pumbire Jesaya, “navenye ngava lirongera mo asi uhungami yinke.” (2 Peturusa 3:13; Jesaya 26:9) Sikara esi kutwaredera kombili—pokatji kovantu womarudi nagenye nomovakaume wopopepi nemepata ntani rambangako naKarunga mwene. (Episarome 85:10-13; Jesaya 32:17) Owo ava lirongo uhungami ngava va ronga nakauke-nakauke eharo lyaKarunga kwawo. Ngomu lina kukura eharo lyawo kwaJehova monomutjima dawo, awo ngava kwama nompango nononzira dendi mwankenye ruha romparukiso zawo. Awo ngayi va vhulika mokutanta ngomu ga tente Jesus asi, ‘Ame kurugana nkenye apa eyi ga hara Tate.’ (Johanesa 8:29) Ee, ngapi tupu omu ngali ka kara eparu lyokuhafera apa ngayi ka kara eyi usili kovantu navenye!

Yisikisamo eyi yina kumoneka nare

15. Mokuruganesa mapuro aga gana kara moparagarafu ezi, likida yisikisamo yoUhompa ntani eyi ngano tuna hepa kurugana ngesi.

¹⁵ Yisikisamo yokutetura yoUhompa waKarunga neyi yovalimburukwi kwawo kuna kumoneka. Mapuro nomatjangwa aga gana kukwama ko taga ka ku diworokesa yisikisamo yimwe eyi, ntani nayimwe hena eyi valimburukwi navenye woUhompa nava vhura neyi va hepa kurugana ngesi.

Yilye ogu wa divyukire Uhompa pomuhoverera ntani noyitundwamo musinke? (Ehororo 12:7-10, 12)

Epongaiko lyoyihupwa yombunga musinke lina kuhoroka kutunda keturopo lyosipundi saKristusa? (Ehororo 14:1-3)

Yirugana musinke ga pumbire Jesus eyi nga ka rugana konyima zetameko lyoudigu wounene, ngomu va yi tjanga mwaMateusa 25:31-33?

Yirugana musinke yeliwapaikiro vana kusikisa mo naina? Wolye vana kulihameka mo mwayo? (Episarome 110:3; Mateusa 24:14; Ehororo 14:6, 7)

Morwasinke ya sumpilira varwanesi wovanapolitika nava womaukerelikarunga mokuhagekesa yirugana yokuzuvhisa? (Sakaliya 4:6; Yirugana 5:38, 39)

Marunduruko musinke ga horoka meparu lyava ava limburukwa kepangero lyoUhompa? (Jesaya 2:4; 1 Vakolinte 6:9-11)

Uhompa wonomvhura eyovi

16. (a) Siruwo sokusika kupi nga pangera Kristusa? (b) Yininke musinke yoyiwa ngava ka rugana posiruwo oso ntani nokonyima zaso?

¹⁶ Konyima zemango lyaSatana nonompepo dendi donondona, Jesus Kristusa novapingi wokulipakerera 144 000 ngava pangera ngovahompa novapristeli nomvhura eyovi. (Ehororo 20:6) Mosiruwo sina, vantu ngava va reta mesikiliromo negusopo lyononzo nonomfa daAdamu narunye. Kouhura wEpangero lyoNomvhura Eyovi, age ana sikisa mo yirugana yendi ngoHompa-Pristeli goUmesiyasa, Jesus ‘nga gava uhompa’ koGuhwe, “Karunga makura ta kara nye gelike mupangeli goyininke nayinye.” (1 Vakolinte 15:24-28) Posiruwo oso, Satana tava mu mangurura karuwogona a heteke vantu ava va zowora kekwatesoko lyawo upangeli wanayinye waJehova. Konyima zehagero lyeheteko lyokuhulilira lina, Jehova nga zonagura po Satana novarwanesi ava va mu kwatesa ko. (Ehororo 20:7-10) Owo va kwatesa ko upangeli waJehova—uhunga wendi wokupangera—opo ngano vana likida ulimburukwi wawo wokupama. Awo ngava va reta nye melikwatakano lyokuvyuka naJehova, age nga va tambure ngovana vendi nokuvakorekera mwenyo gwanarunye.—Varoma 8:21.

17. (a) Yisinke ngayi ka horokera Uhompa konyima zonomumvho eyovi? (b) Monkedi musinke omu yina kara usili asi Uhompa ngau “kererera narunye”?

¹⁷ Yipo nye asi, sirugana saJesus mwene nesi sava-144 000 ngasi ka lipirura kuhamena kevhu. Yisinke ngayi ka kara yirugana yawo yokomeho? Bibeli kapi za yi tanta. Nye nsene tu kwatesa ko moulimburukwi upangeli waJehova, ose ngatu ka paruka kouhura wEpangero lyoNomumvho Eyovi nokukadiva asi yinke sitambo saJehova kwawo ntani nokouzuni naunye. Nampili ngoso, epangero lyaKristusa lyonomumvho eyovi “ngali karerera” ano Uhompa wendi “kapi ngau haga po.” (Ndaniyera 7:14) Monkedi musinke? Pomuhowo, epitisiro lyepangero kapi ngava li gava momawoko gava wopeke ava va kara noyitambo nayopeke, morwa Jehova yige nga kara Mupangeli. Ntani hena, Uhompa ngau “kererera narunye” morwa yisikisamo yawo ngayi karerera narunye. (Ndaniyera 2:44) Ano Hompa-Pristeli goUmesiyasa kumwe novapangeli vakwawo wovahompa-pristeli ngava ka va fumadeka narunye morwa yirugana yawo yokulimburukwa kwaJehova.

Erugururo nzogera

• Morwasinke una karere Uhompa waKarunga asi welike wokuvhura kukandura po maudigu govantu? Siruwoke ga tameka kupangera Hompa goUhompa waKarunga?

• Yisinke ayi ku hafesa po unene ove kuhamena Uhompa waKarunga neyi ngau sikisa mo?

• Yisikisamo musinke yoUhompa eyi tuna vhuru kumona nare, ntani ruha musinke tuna kara naro ose mweyi?

[Efano pepenuno 92, 93]

MoUhompa waKarunga, vantu navenye ngava ka lironga uhungami