Egaununo 14

Eyi natu gusilira po wopeke

KWELI gumwe ga ku rugana yuma yoyidona, ngwendi kukukoresa ndi kukuuyungira yininke yoyidona ndi?— Kuvhura nye nove o mu tekure monkedi zokulifana ngamoomu ana ku tekura age ndi?—

Vantu wovanzi, nsene gumwe ana va rugana yininke yepuko, awo kumutengwidira kuwoko. Nye Jesus kwa rongere asi twa hepa kugusira po ava ava tu rugana yepuko. (Mateusa 6:12) Ngapi nsene muntu ta tu handukisa yikando yoyinzi? Yikando yingapi twa hepa kumugusira po?—

Oyo yiyo ga here kudiva Peturusa. Ezuva limwe age kwa pulire Jesus asi: ‘Na hepa kugusira po dogoro nokorutano naruvali ndi?’ Nye yikando yitano nayivali kapi ya gwanena po. Jesus ta tanta asi: ‘Nampili a ku zonene yikando nomurongo ntambali nantambali, wa hepa kumugusira po.’

Oyo kuna kara yikando yoyinzi unene! Ose kapi ngatu vhura kudiworoka yininke yoyidona yoyinzi eyi ga tu rugana muntu, ndi ngapi? Kuliza neyi tuna konakona, Jesus kwa here tu lironge sirongwa esi: Twa ha kambadara kuvarura mapuko aga ava tu rugana wopeke. Nsene tava tu hundire egusiropo, twa hepa kuvagusira po.

Jesus kwa here kulikida varongwa vendi omu ya kara nomulyo unene yokugusira po. Makura, konyima zokulimburura epuro lyaPeturusa, age kwa tanterere varongwa vendi esimwititi. Nove ono hara kulizuvha ndi?—

Pwa kere hompa gomuwa ntani gonkenda. Age hena nga korotesa yimaliwa kovakareli vendi apa va hepere evatero. Ano ezuva limwe, hompa kwa here vakareli vendi ava va mu korotere yimaliwa mokumufuta. Tava mu retere ko mukareli gwendi gumwe ogu ga mu korotere yimaliwa yokusika ponoranda mamiliyona 60. Ayo kuna kara yimaliwa yoyinzi!

Nye mukareli ga lire yimaliwa yahompa nayinye ntani kapi ga vhulire kuyifuta. Yipo hompa ga geve mpangera asi va mu randese po. Ano hompa ga penge hena asi va randese mukadendi novana vendi ntani nanayinye eyi ga weka. Makura yimaliwa eyi ngano ya tundilire mo, va yi futire hompa. Ngapi omu ono kugazara ga lizuvhire mukareli?—

Age kwa twire nongoro pevhu ntani ta likwambere kwahompa asi: ‘Lididimika tupu, ngani ku futira nayinye eyi na ku korota.’ Ngano nyove wa kere hompa, yinke ngano wa mu rugene mukareli gwina?— Hompa kwa fililire mukareli gwendi nkenda. Makura hompa ta mu gusire po. Age kwa tanterere mukareli asi kapisi hepero a fute yimaliwa yina ga mu korotere. Ee, omu tupu ya mu hafesere mukareli gwina!

Nye yisinke ga rugene mukareli gwina kutunda opo? Ta zi ta ka gwana mukareli mukwawo, ogu ga mu korotere noranda dokusika tupu pefere. Age makura ta kwata mukareli mukwawo pomuliu, ta mu sini oku ta tanta asi: ‘Futira nge noranda dange efere limwe edi wa korota nge!’ Gazara tupu muntu ogu va gusilire po a rugane yininke yokufana ngoso.

Mukareli ogu ga korotere noranda efere limwe kwa kere muhepwe. Age kapi ga vhulire kufuta yimaliwa poopo. Age kwa twire nongoro pevhu ntani ta likwambere mukareli mukwawo asi: ‘Lididimika tupu, ngani ku futira eyi na ku korota.’ Ngano mugara gwina ga lididimikilire nokupa ko mukareli mukwawo siruwo ndi?— Ngano nyove, yinke ngano wa rugene?—

Mugara ogu kapi ga kere nonkenda, ngamoomu ga kere hompa. Age kwa here yimaliwa yendi poopo. Morwa mukareli mukwawo kapi ga vhulire kufuta, ta ka mu tulisa modorongo. Apa vakareli vapeke va mwene nayinye eyi ya horokere, kapi va yi haferere. Awo kwa fililire nkenda mukareli gwina va tulire modorongo. Makura tava zi va ka tantere hompa.

Hompa nage kapi ga yi haferere eyi ya horokere. Ta handukire unene mukareli gokudira kugusira po mukwawo. Yipo nye ga mu zigidire ntani ta tanta asi: ‘Ove nani o mukareli gomudona, nani kapi kani ku gusilire po makongo aga wa korota nge ndi? Nani nove nokuvhura si kufira kenda mukareli mukweni?’

Mukareli gokudira kugusira po mukwawo ngano ga hepere kulirongera ko kwahompa gomuwa. Nye age kapi ga lirongerere ko. Makura hompa ta tura mukareli ogu modorongo, dogoro noku ngano ga mene kufuta makongo gendi. Nye modorongo kapi ga vhulire kugwana yimaliwa mokufuta hompa. Age ngano ga kere mo dogoro konomfa dendi.

Apa Jesus ga hulisire esimwititi eli, ta tantere vasikuli vendi asi: “NaTate gemeguru nage yimo nga mu ninka nkenye ogu a dili kudongwenena po mukwawo nzo zendi nomutjima nagunye.”—Mateusa 18:21-35.

Wa hepa kuyikwata egano asi ose natuvenye kwa korota yoyinzi kwaKarunga. Mousili, eparu lyetu kwa tunda kwaKarunga! Yipo nye pokuyihetakanesa neyi twa korota Karunga, eyi va tu korota vantu vapeke yinunu. Eyi va tu korota vapeke kwa lifana ngwendi noranda efere edi ga korotere mukareli gumwe kwamukwawo. Nye eyi twa korota kwaKarunga morwa yininke yoyidona eyi atu rugana kwa fana ngwendi noranda mamiliyona 60 edi ga korotere gwina mukareli kwahompa.

Karunga kwa kara nonkenda zonene. Nampili ngomu twa rugana yininke yepuko, age kutugusira po. Age kapi a tu futisa pokutugusa maparu getu. Twa hepa kudiworoka sirongwa esi asi: Karunga kutugusira po tupu nsene nose tatu gusire po vantu ava ava tu rugana yepuko. Esi kuna kara sirongwa somulyo unene, ndi ngapi?—

Ngapi nsene gumwe a ku rugana yininke yoyidona makura a ku pure asi gusira nge po, yinke ngo rugana? Ngo mu gusira po ndi?— Nye ngapi nsene yi horoka yikando yoyinzi? Simpe kuvhura ngo mu gusire po ndi?—

Nsene asi nyose ngatu hundira muntu a tu gusire po, ngatu mu harera a tu gusire po ndi?— Yipo nye asi twa hepa nose kumuruganena yokulifana. Kapisi tu tante tupu asi tuna mu gusire po, nye twa hepa sili kumugusira po kutundilira komutjima. Apa atu rugana ngoso, kuna kulikida asi ose sili tuna hara kukara vasikuli woMurongi goMunene.

Mokukwata egano mulyo gokugusira po, tu ze tu rese hena Yisewe 19:11; Mateusa 6:14, 15; ntani Rukasa 17:3, 4.

[Efano pepenuno 77]

Yisinke ga here kudiva Peturusa kuhamena kugusira po?

[Efano pepenuno 78]

Yisinke ya horokere apa mukareli ga hundilire hompa a mu gwederere ko siruwo mokufuta makongo?

[Mafano pepenuno 78]

Ngapi omu mukareli ga tekwire mukareli mukwawo ogu ga dilire kumufuta eyi ga mu korotere?

[Efano pepenuno 80]

Yisinke ga rugene hompa komukareli ogu ga dilire kugusira po mukwawo?

[Efano pepenuno 81]

Yinke ngo rugana nsene gumwe nga ku hundira o mu gusire po?